ORACIÓN

5 ¿Tukuya hora chu niku natlawayaw?

ATSINU ni putum takanajla nema tlakg kalakgapaskan wankgo niku chu tukuya hora natlawakan oración. Pero ¿chuna wan Biblia?

Xlikana pi kinkawaniyan akxni tlan natlawayaw oración. Chuna, Jesús tlawalh oración akxni aku xʼama wayan (Lucas 22:17). Kstalaninanin na xtlawakgo oración akxni xtamakxtumikgo xlakata nakakninanikgo Dios. Pero uma talismanin ni wa matsukikgolh. Chuntiya xtlawakan ksinagogas xla judíos chu ktemplo xla Jerusalén nema Dios xlakaskin pi «nchiki xputlawakan oración» xwa (Marcos 11:17).

Dios lakgati pi xlakskujnin natamakxtumikgo chu watiya talakapastakni nakgalhikgo akxni natlawanikgo oración chuna la wan Biblia. Asta, oración tlan namatlawiyan tuku nila xtlawa (Hebreos 13:18, 19). Wa xlakata, putum tamakxtumit nema kgalhikgo xtatayananin Jehová tlawakgo oración. Komo kgaxmatputuna xʼoracionkan, tlan napina kxPukgalhtawakgakan xTatayananin Jehová niku tamakxtumikgo nema tlakg lakatsu wi niku wila.

Pero, Biblia ni wan tukuya hora chu niku natatlawa oración. Anta wan pi xlakskujnin Dios xtlawakgo oración katuwa hora chu kaniwa. Jesús wa: «Akxni wix natlawaya miʼoración, katanu ntani lhtataya, kamalakchuwa, chuna nchu nkatlawa miʼoración nkaxakgatlilakapi minTlat nti nkaj tsekg wi; chu minTlat nti nkaj tsekg ukxilhnan, na namaxkiyan xtalakgalhaman» (Mateo 6:6).

¿Ni lipaxuwaya xlakata katsiya pi tlan natachuwinanaw tiku tlakg xaLanka xlikalanka kakilhtamaku chu nakinkakgaxmatniyan akxni natachuwinamputunaw tanu tanu niku wilaw nawan? Wa likatsiyaw tuku xlakata Jesús xputsa niku xakstu xtawi xlakata xtlawalh oración. Akgtum kilhtamaku, akxni wi tuku lu xlakaskinka xʼama tlawa, tantaskaka tlawalh oración (Lucas 6:12, 13).

Pero na xwilakgo lakchixkuwin chu lakpuskatin tiku ni xmakgatsankgananikgo Dios nema tlawanikgolh oración akxni wi tuku lu xlakaskinka xʼamakgolh tlawakgo o akxni wi tuku tuwa xtitaxtimakgolh. Maski takgaxmatli o ni takgaxmatli, xkatawilakgo amakgapitsin o xakstukan xwilakgo, tuku tlakg xlakaskinka wa pi tlawakgolh oración. Jehová kinkawaniyan: «Ni anan xtajaxni nkatlawatit miʼoracionkan» (1 Tesalonicenses 5:17). Xlakata tlan natlawaniyaw oración Dios limasiya pi kinkapaxkiyan. Dios kgaxmatputum xʼoracionkan xlakskujnin maski makglhuwa natlawanikgo.

Maski chuna, la uku lhuwa tiku ni kanajlakgo akstu kakgalhskinkan komo kinkamakgtayayan natlawayaw oración. Max wix nachuna kgalhskinkana.

[Epígrafe xla página 8]

Tlan natlawaniyaw oración Dios tukuya hora nalakaskinaw chu paks tlan niku natlawaputunaw