ORACIÓN

6 ¿Kinkamakgtayayan?

LHUWA lakpuwankgo pi ni kinkamakgtayayan oración. Pero Biblia nichuna wan (Lucas 22:40; Santiago 5:13). Oraciones ni kajwatiya kinkamakgtayayan kkintakanajlakan na kinkamakgtayayan xlakata tlan makgkatsiyaw chu tlan natawila kintalakapastaknikan. ¿La chuna kinkamakgtayayan?

Kawiliw akgtum liʼakxilhtit: akxni kamanan wi tuku kamaskiwikan, ¿tuku kawanikgo xnatlatnikan pi xlitlawatkan? Natlatni ni kajwatiya kamasiyanikgo pi lu tlan nalimakgkatsikgo xlakata tuku kamaskiwika: na kamasiyanikgo pi namastakgo tapaxtikatsin. Xlakata akxni paxtikatsiniyaw, tlakg staka tuku makgkatsiyaw. Nachuna kitaxtu akxni tachuwinanaw  Dios. Kaʼakxilhwi la kinkamakgtayayan tanu tanu oraciones.

Akxni mastayaw paxtikatsinit kʼoraciones. Akxni paxtikatsiniyaw Dios xlakata putum tuku tlan titaxtuyaw, kaj wa lakapastakaw tasikulunalin nema makglhtinanaw. Wa xlakata, tlakg mastayaw paxtikatsinit, tlakg napaxuwayaw nalakpuwanaw pi tlan nakitaxtu tuku natlawaputunaw (Filipenses 4:6).

Liʼakxilhtit: Oración nema tlawanilh Jesús xTlat akxni paxtikatsinilh xlakata kgaxmatnillh (Juan 11:41).

Oraciones niku skinaw nakinkatapatikanan. Akxni skiniyaw Dios pi kakinkatapatin tlawa pi tlan namakgkatsiyaw. Nachuna, matliwakglha kintalakapastaknikan, liwana katsiyaw pi lu nitlan tuku tlawaw chu tlakg nitlan nalimakgkatsiyaw.

Liʼakxilhtit: Oración nema tlawalh David akxni nitlan xlimakgkatsi talakgalhin nema xtlawanit (Salmo 51).

Oraciones niku skinaw liskgalala chu kakinkapulalin. Tlawa pi ni tlankajwa nawanaw, lakaskinaw nakinkamakgtayakanan chu kinkamakgtayayan xlakata nalipawanaw kinTlatikan xalak kʼakgapun, chu ni kiʼakstukan nakinkalipawankanan (Proverbios 3:5, 6).

Liʼakxilhtit: Oración niku Salomón skinilh Dios xpulalilh chu xmaxkilh liskgalala xlakata tlan xmapakgsinalh kʼIsrael (1 Reyes 3:5-12).

Oraciones nema tlawakan akxni anan talakgaputsit. Akxni wi tuku lu lilakgaputsamaw, kajwatiya nakinkamakgtayayan akxni nawaniyaw Dios tuku makgkatsiyaw. Nachuna, kinkamakgtayayan nalipawanaw Jehová (Salmo 62:8).

Liʼakxilhtit: Oración nema tlawalh mapakgsina Asá akxni xʼama talachipa xatliwakga xtalamakgasitsin (2 Crónicas 14:11).

Oraciones xpalakata tiku lakaskinkgo tamakgtay. Chuna limasiyayaw pi ni kiʼakstukan kinkapaxkikanan chu nalimasiyayaw pi lakgalhamananaw chu kaʼakgatekgsniyaw amakgapitsin.

Liʼakxilhtit: Oración nema tlawalh Jesús xpalakata kstalaninanin (Juan 17:9-17).

Oración niku waniyaw lakwan tachuwin. Takaknin nema maxkiyaw tlakg staka chu tlakg paxkiyaw akxni waniyaw lakwan tachuwin xlakata la xtayat chu putum tuku tlawanit. Uma oraciones na tlakg kinkamalakatsuwiyan kiDioskan chu kinTlatkan xalak akgapun.

Liʼakxilhtit: Oración niku David tlan lichuwinalh Jehová xlakata xpaxtikatsini tuku tlawanit (Salmo 8).

Pero oración nikajwatiya kinkamakgtayayan la lichuwinanitawa: oración kinkamakgtayayan xlakata nakgalhiyaw «xtatanksni [o tlan nakinkamamakgkatsiniyan] Dios, wa ntu lakatsalaniy xlipaks kintapuwankan» (Filipenses 4:7). Xlikana, Dios tlan nakinkamamakgkatsiniyan kʼuma kakilhtamaku niku ni kgalhi xtapalh. ¡Asta kinkamakgtayayan xlakata ni lu natatatlayaw! (Proverbios 14:30.) Pero ¿la tlan namakgkatsiyaw? ¿Kajwatiya xlakata tuku tlawayaw, o wi tuku tlakg talakaskin?

[Epígrafe xla página 9]

Oración kinkamakgtayayan tlan natawilayaw, tlan namakgkatsiyaw pero tlakg kinkamakgtayayan kkintakanajlakan