ORACIÓN

7 ¿Kgaxmata Dios kiʼoracionkan?

XLIKANA, wa uma takgalhskinin nema tlakg katlawanikan latamanin. Akxilhnitawa pi Dios kgaxmata makgapitsi oraciones, pero ni putum. Wa xlakata, ¿kgaxmata kiʼoracionkan? Wantuku natlawayaw wa namakgtayanan komo nakgaxmata o ni nakgaxmata kiʼoracionkan.

Jesús wa pi tiku xpulalinkgo takanajla kxkilhtamaku nitlan la xtlawakgo xʼoracionkan: xlimasiyaputunkgo pi lu liwana xkakninanikgo Dios. Asta, wa «mpi paksa kgalhikgoy xtatlajankan». Uma tiku xpulalinkgo takanajla ni xlakaskinkgo pi Dios xkgaxmatli xʼoracionkan, wata xlakaskinkgo pi xkaʼakxilhkgolh amakgapitsi chu kajwatiya uma kgalhikgolh (Mateo 6:5). Nachuna tlawakgo uku. Lhuwa latamanin ni lakapastakkgo Dios akxni tlawakgo oración, wata lakapastakkgo tlan nakakitaxtuni. Xlakata ni wa stalanikgo xtastakyaw Biblia nema lichuwinaw kʼamakgapitsi artículos, Dios ni kakgalhti.

 ¿Chu akinin? Xlakata Jehová nakinkakgalhtiyan kiʼoracionkan, ni akxilha kincolorkan, kinkachikinkan chu komo kgalhiyaw o ni kgalhiyaw tumin. Biblia wan: «Dios, ni tlaway ntastokgopitsin», o ni laksakpaxkinan. Pero kinkawaniyan, «wampi kaxani kawa xala, wa nti mpikuaniy Dios, chu na wa ntu xlilat ntu ntlaway, tlan tlaway» (Hechos 10:34, 35). Chuna, tiku «mpikuaniy Dios» lu xlakaskinka akxilha chu wa xlakata ni tlawaputun tuku ni lakgati. Chu tiku «ntu xlilat ntu ntlaway» liskuja xlakata natlawa xtalakaskin Dios, chu ni wa tuku lakaskin o tuku lakaskinkgo amakgapitsin. Wa xlakata, komo lakaskinaw pi Jehová nakgaxmata kiʼoracionkan, talakaskin nastalaniyaw tuku wan xTachuwin. *

Xlikana, lhuwa tiku lakpuwankgo pi Dios nakalikgalhti tuku nila tamakanajla xʼoracionkan. Pero makgasa, na ni putum chuna xkgalhtinan. Biblia lichuwinan, pi akxni xtlawakan akgtum milagro makgas xtitaxtu xlakata xtlawaparaka atanu. Nachuna, Biblia masiya pi xʼama sputa milagros akxni xnikgolh apóstoles (1 Corintios 13:8-10). Maski chuna, ni wamputun pi Dios ni kgalhtinan oraciones. Kaʼakxilhwi makgapitsi la Jehová kgalhtinan oraciones uku.

Masta liskgalala. Dios, tiku masta xaxlikana liskgalala, xatapaxuwan kamaxki tiku putsakgo xtamakgtay chu liskujkgo xlakata nakgalhakgaxmatkgo (Santiago 1:5).

Masta espíritu santo. Ni anan tuku xtachuna la espíritu santo, uma xlitliwakga Dios, litliwakga nema liskuja. Kinkamakgtayayan xlakata natayaniyaw taʼakglhuwit, tlawa pi tlan namakgkatsiyaw akxni wi tuku lilipuwamaw, o lilakgaputsamaw chu tlawa pi nakgalhiyaw lakwan tayat (Gálatas 5:22, 23). Asta Jesús wa pi Dios nakinkamaxkiyan espíritu santo chuna la namaklakaskinaw (Lucas 11:13).

Kamaxki takatsin tiku putsakgo xaxlikana. Chuna la wan Hechos 17:26, 27, xlikalanka kakilhtamaku lhuwa latamanin tiku xlikana katsiputunkgo putsakgo Dios. Lakgapasputunkgo xtukuwani, tuku lakpuwanit natlawa xlakata Katiyatni chu xlakata latamanin chu katsiputunkgo la natalakatsuwinikgo Dios (Santiago 4:8). Xtatayananin Jehová katekgskgo latamanin tiku katsiputunkgo chu xatapaxuwan kamasiyanikgo tuku wan Biblia chu kakgalhtikgo xtakgalhskininkan.

¿Wa xlakata makglhtinanti uma revista? ¿Putsapat Dios? Komo chuna, max wa uma likgalhtika miʼoración.

[Notas nema wilakgo kpágina]