Jehová kiMapakgsinakan
Jehová kiMapakgsinakan
«Kimalana tiku kiMapakgsina Jehová wa klitamakgtaya.» (SAL. 73:28, NM)
1. ¿Tuku max xkilhchanima tuku Pablo lichuwinalh 1 Corintios 7:31?
«WA NTU [...] ntasiyuy [o lama] xala yunu nkatuxawat, kaj titaxtuma.» (1 Cor. 7:31.) Umakgolh tachuwin, apóstol Pablo max tamalakxtumi tuku lama la uku, la akxni wi tuku matitaxtikan kteatro, niku titaxtukgo tiku tlan likatsikgo chu tiku nitlan likatsikgo, niku sputa pulaktu chu tsukupara apulaktu.
2, 3. 1) ¿Tuku tlan natamalakxtumiyaw xlakata naʼakgatekgsaw pi limasiyaputunkan pi Dios ni lakgchan namapakgsinan? 2) ¿Tukuya takgalhskinin naʼakxilhaw?
2 La uku la akgtum drama titaxtuma, pulaktum tuku lu xlakaskinka niku putum akinin na kilimasiyatkan komo Jehová lakgchan namapakgsinan xlikalanka kakilhtamaku. Uma tuku lama tlan natamalakxtumiyaw la akxni kʼakgtum país wilakgolh pulaktiy tiku latatlawa guerra. Pulaktu wa mapakgsina tiku kuentajtlawa tlan natawila kachikin, chu apulaktu wa tiku lixkajni likatsikgo, akgskgawinankgo, tlawakgo tuku nitlan chu asta makgninankgo. Umakgolh tiku lixkajni likatsikgo tlawakgo pi mapakgsinanin namakgkatsikgo pi wi tuku nitlan nakatlawanikan chu na kaliʼakxilhkan latamanin komo tatayakgo mapakgsinanin.
3 ¿Tuku xlakata wanaw pi xlikalanka kakilhtamaku nachuna lama? Pulana, xlakata wi chatum xaxlikana mapakgsina, wa «kiMalanakan, Mapakgsina Jehová» (Sal. 71:5, NM). Latamanin na pekuankgo, o tajikuan pi wi tuku nitlan nakatlawani tiku tapakgsinikgo Satanás tiku lixkajni likatsi (1 Juan 5:19). Tiku stalanikgo Satanás lakatayakgo xtamapakgsin Dios chu na kaliʼakxilhkan latamanin komo tatayakgo Dios pi wa lakgchan namapakgsinan xlikalanka kakilhtamaku. ¿Tuku xlakata chuna lalh? ¿Tuku xlakata Jehová masta talakaskin chuna nala? ¿Tuku tlan natlawayaw chatunu chatunu akinin?
Wantuku natitaxtu kdrama
4. ¿Tuku pulaktiy nema lu xlakaskinka lama xlikalanka kakilhtamaku?
4 Kʼuma drama nema titaxtuma xlikalanka kakilhtamaku, naʼakxilhaw pi Jehová lakgchan namapakgsinan chu xlakata latamanin ni namakgxtakgkgo Dios. Anta kBiblia makglhuwa limapakuwikan Jehová «Malana, Mapakgsina». Xlakata salmista lu xlipawan Dios wa: «Kimalana tiku kiMapakgsina Jehová wa klitamakgtaya» (Sal. 73:28, NM). Tachuwin lakgchan namapakgsinan kilhchanima tiku tlakg kgalhi limapakgsin. Wa xlakata, wantiku tlakg kgalhi litliwakga limapakuwikan tiku lakgchan namapakgsinan. Lhuwa tuku xlakata tlan nawanaw pi wa Jehová lakgchan namapakgsinan (Dan. 7:22).
5. ¿Tuku xlakata natatayayaw pi Jehová lakgchan namapakgsinan?
5 Xlakata Jehová tlawanit putum tuku anan xlikalanka kakilhtamaku wa lakgchan namapakgsinan kKatiyatni chu xliputum tuku anan (kalikgalhtawakga Apocalipsis 4:11). Nachuna Jehová wa kiJuezkan, Tiku Masta Limapakgsin chu kiMapakgsinakan (Isa. 33:22). Xlakata lakliniyaw kilatamatkan chu wa tapakgsiniyaw, kililakgachixkuwilitkan Jehová chu natatayayaw xlakata wa kimalanakan xliputum kakilhtamaku. Wantuku nakinkamatlawiyan, wa putum kilhtamaku nalakapastakaw umakgolh tachuwin: «[«Jehová», NM] Dios kgalhi lanka ixlaktawilh nak akgapun, [...] kamapakgsima wakg lata tu anan talhman y tutsuj» (Sal. 103:19; Hech. 4:24).
6. ¿Tuku wamputun ni makgatsankganankan?
6 Komo tatayaputunaw Jehová, ni namakgatsankgananiyaw. Pero ¿tuku wamputun ni namakgatsankgananiyaw Jehová? Chuna la tlawalh Job, ni makgatsankgananikan Dios talakaskin akgstitum nalatamakan chu natlawakan putum tuku xalakatitum (Job 1:1).
Tsuku drama
7, 8. ¿La limasiyaputulh Satanás pi Jehová ni lakgchan namapakgsinan?
7 Titaxtunita akgchaxan milh kata, akxni chatum espíritu lakatayalh xtamapakgsin Jehová. Wantuku tlawalh chu tuku wa, limasiyaputulh pi Dios ni lakgchan namapakgsinan. Chu chuna tlawalh xlakata lakgkatsaninan: kaj xlakata xlakaskin namaxkikan kakni. Wa xlakata tlawalh pi xapulana kinatlatnikan xmakgxtakgkgolh Mapakgsina xlikalanka kakilhtamaku. Na xmaxkajwaniputun xtukuwani Dios akxni limasiyaputulh pi xaʼakgsanina (kalikgalhtawakga Génesis 3:1-5). Ama lakatayana xtalamakgasitsin Dios litaxtulh. Alistalh limapakuwika Satanás, chu Akgskgawini, wa luwa chu dragón, umakgolh tukuwani tlawa pi nalitalakgapasa pi lakatayana, lichuwinan tuku nixaxlikana xlakata achatum, akgskgawinan chu wanan (Apo. 12:9).
8 Satanás na litaxtulh atanu mapakgsina wantiku xtalamakgasitsin Jehová. Xlakata lakatayalh xtamapakgsin Dios, ¿tuku tlawalh Jehová? ¿Tunkun xkamalakgsputulh Satanás, Adán chu Eva? Dios tlan tunkun xtikamalakgsputulh tiku ni kgaxmatnikgolh. Komo chuna xtitlawalh, xlimasiyalh pi wa Dios tiku lhuwa kgalhi litliwakga. Nachuna, xlimasiyalh pi ni akgsaninan xlakata xkawaninit tuku xʼakgspulakgolh komo ni xkgalhakgaxmatnikgolh. Pero ¿tuku xlakata ni chuna tlawalh?
9. ¿Tuku xlimasiyaputun Satanás?
9 Xlakata Satanás kaʼakgskgawilh Adán chu Eva, xlakan makgxtakgkgolh xMalakatsukinakan. Chuna limasiyaputulh pi Dios ni lakgchan nakgalhakgaxmatkgo latamanin. Nachuna, akxni tlawalh pi Adán chu Eva ni xkgaxmatnikgolh Jehová, limasiyaputulh pi putum latamanin tiku lakapastaknankgo namakgxtakgkgo Dios. Chuna la tasiyalh xlakata tuku titaxtulh Job, Akgskgawini xlimasiyaputun pi tlan xtlawalh pi putum latamanin xmakgxtakgkgolh Dios pero Job nikxni makgxtakgli Jehová (Job 2:1-5).
10. Xlakata Jehová ni tunkun lakkaxtlawalh taʼakglhuwit, ¿tuku natakatsi?
10 Xlakata Jehová ni tunkun lakkaxtlawalh tiku lakgchan namapakgsinan, maxkilh kilhtamaku Satanás xlakata xlimasiyalh komo xlikana tuku xlimawakama Jehová. Chu akinin na tlan nalimasiyaniyaw pi ni makgxtakgaw Dios. ¿Tuku tasiyama uma akglhuwa ciento kata nema titaxtunit? Satanás lakkaxwilinit tiku lixkajni xtayatkan. Pero Dios namalakgsputu Satanás chu kstalaninanin, chuna nalimasiya pi wa lakgchan namapakgsinan. Jehová liwana katsi pi wa natlajanan. Lu liwana katsi, xlakata tunkun chuna wa akxni Adán ni kgalhakgaxmatnilh (Gén. 3:15).
11. ¿La limasiyakgonit lhuwa latamanin pi Dios lakgchan namapakgsinan?
11 Lhuwa latamanin limasiyakgonit pi kanajlanikgo chu ni makgxtakgkgo Jehová, xlakata katsikgo pi wa lakgchan namapakgsinan chu namasantujlikgo xtukuwani. La Abel, Enoc, Noé, Abrahán, Sara, Moisés, Rut, David, Jesús, xapulana kstalaninanin Cristo chu millones lakchixkuwin chu lakpuskatin tiku ni makgatsankgananikgo Dios la uku. Umakgolh tiku tatayakgo Dios pi wa lakgchan namapakgsinan, tuku tlawakgolh limasiyakgolh pi Satanás xaʼakgsanina. Chu xlakata ni makgxtakgkgolh Dios na litasiyalh pi ni xlikana putum tuku Satanás nitlan limawakanit Dios akxni wa pi tlan xtlawalh pi latamanin nialh kskujnikgolh Dios (Pro. 27:11).
Liwana katsiyaw pi natlajanan
12. ¿Tuku xlakata liwana katsiyaw pi nialh makgas Dios namasputu tuku nitlan?
12 Nialh makgas Jehová nalimasiya pi wa lakgchan namapakgsinan. ¿Tuku xlakata liwana katsiyaw pi chuna nala? Pulana xlakata Dios nila putum kilhtamaku namasta talakaskin kaʼanalh tuku nitlan. Nachuna, putum tuku lama litasiya pi lamaw kxaʼawatiya kilhtamaku. Chu nachuna, minit kilhtamaku makgasa Dios kamalakgsputunit tiku nitlan xlikatsikgo. Akxni limilh Munkaklat, akxni kamalakgsputulh Sodoma chu Gomorra chu akxni malakgsputulh faraón xalak Egipto chu xsoldados. Na kamalakgsputulh xsoldados Sísara chu xla mapakgsina xalak Asiria Senaquerib (Gén. 7:1, 23; 19:24, 25; Éxo. 14:30, 31; Jue. 4:15, 16; 2 Rey. 19:35, 36). Wa xlakata liwana katsiyaw pi Jehová ni katimastalh talakaskin pi putum kilhtamaku lixkajni nalichuwinankan xtukuwani chu na ni katimastalh talakaskin pi wi tuku nakatlawanikan xTatayananin. Chu nialh makgas chuna natlawa xlakata liwana tasiya pi kinkatawilan Cristo chu na nialh makgas namasputukan uma xalixkajni kakilhtamaku (Mat. 24:3).
13. ¿Tuku kilitlawatkan xlakata ni nakinkamasputukanan akxni nakamalakgsputukan xtalamakgasitsin Jehová?
13 Komo ni lakaskinaw nakinkamasputukanan akxni Jehová nakamasputu xtalamakgasitsin, lu xlakaskinka nalimasiyayaw pi Dios lakgchan namapakgsinan. Pero ¿tuku tlan natlawayaw? Ni para tsinu natalakatsuwiniyaw tiku lixkajni xtayat nema Satanás lakkaxwilinit (Isa. 52:11; Juan 17:16; Hech. 5:29). Komo chuna natlawayaw nalimasiyayaw pi Jehová lakgchan namapakgsinan chu ni nakinkamalakgsputuyan akxni nasantujtlawa xtukuwani chu namasiya pi wa lakgchan namapakgsinan xlikalanka kakilhtamaku.
14. ¿Tuku kinkamasiyaniyan lhuwa textos xalak Biblia?
14 Xlimaktuminika Biblia lhuwa tuku lu xlakaskinka lichuwinan xlakata latamanin chu na wan pi Jehová lakgchan namapakgsinan. Xapulana akgtutu capítulos lichuwinan xlakata la malakatsukinalh Dios chu xapulana talakgalhin, chu xaʼawatiya akgtutu capítulos lichuwinankgo la nalakkaxwiliparakan latamanin. Amakgapitsi capítulos lhuwa tuku lichuwinankgo xlakata tuku lakkaxwilinit kiMalanakan chu Mapakgsina xlakata namakgantaxti tuku lakapastaknit natlawa xpalakatakan latamanin, Katiyatni chu xlikalanka kakilhtamaku. Chu chuna la kʼGénesis lichuwinan tuku tlawalh Satanás chu tatlawalh talakgalhin, kxaʼawatiya libro Apocalipsis lichuwinan la Jehová namasputu tuku nitlan chu namalakgsputu Akgskgawini chu natlawa pi natamakgantaxti xtalakaskin kKatiyatni chuna la kgantaxtuma kʼakgapun. Biblia kinkawaniyan tuku xlakata anan talakgalhin chu linin chu la nakamalakgsputukan xlakata atanu tuku namin, xasasti kakilhtamaku niku xatapaxuwan chu xliputum kilhtamaku nalatamakgo tiku ni makgxtakgkgo Dios.
15. ¿Tuku kilitlawatkan xlakata namakglhtinanaw tasikulunalin akxni nasputa drama niku xlimasiyamaka tiku lakgchan namapakgsinan?
15 Nialh makgas kaj lakapara natalakgpali tuku lama kkakilhtamaku. Nasputa drama niku xlimasiyamaka tiku lakgchan namapakgsinan nema makgasa lakatsukunit. Satanás namaxtukan chu alistalh xliputum kilhtamaku namasputukan. ¡Nakgantaxtu xtalakaskin Dios! Komo lipaxuwaputunaw akxni Dios nakatlaja xtalamakgasitsin chu tasikulunalin nema talichuwinan kBiblia, xlakaskinka natatayayaw pi Jehová lakgchan namapakgsinan. Nila pulaktiy niku natawilayaw. Tlan nawanaw pi «Dios kintatayaj» komo akinin na tatayayaw (Sal. 118:6, 7).
¡Tlan ni namakgatsankgananiyaw Dios!
16. ¿Tuku likatsiyaw pi tlan nikxni namakgxtakgaw Dios?
16 Akinin tlan natatayayaw pi Jehová lakgchan namapakgsinan chu ni namakgxtakgaw, apóstol Pablo wa: «Putum tuku nitlan kamatlawiputunkanatit kajwatiya kalakgchinan nema kalakgchin latamanin. Pero Dios ni makgxtakgnan, chu ni katimastalh talakaskin tlakg nakamatlawiputunkanatit tuku nila natayaniyatit, wata akxni nachin tuku nitlan na nakamakgtayayan xlakata tlan natayaniyatit» (1 Cor. 10:13, NM). ¿Niku minacha akxni namatlawiputunkana tuku nitlan nema lichuwinan Pablo chu la kinkamakgtayayan Dios?
17-19. 1) ¿Tuku nitlan tlawakgolh israelitas kdesierto? 2) ¿Tuku xlakata tlan ni namakgatsankgananiyaw Jehová?
17 Chuna la titaxtukgolh israelitas kdesierto, “tuku nitlan namatlawiputunkana” nema lichuwinan Pablo, tsuku akxni wi tuku tlawaputun pi ni nakgalhakgaxmataw xlimapakgsin Dios (kalikgalhtawakga 1 Corintios 10:6-10). Israelitas tlan ni xtitlawakgolh «wantu nitlan» pero lu lhuwa xwaputunkgo codornices. Chuna tlawakgolh akxni Jehová kaj lakapara kamaxkilh codornices xlakata naliwayankgo akgtum papaʼ. Maski makgasa nia xwakgo liway, pero liwana xwayamakgolh xlakata xkgalhikgo maná. Pero, lhuwa tsukgolh chipakgo codornices chu nikaj wa chipakgolh nema xkaʼakchanilh (Núm. 11:19, 20, 31-35).
18 Xtitaxtunita kilhtamaku, akxni Moisés xmakgamakglhtinama Limapakgsin ksipi wanikan Sinaí, israelitas kakninanikgolh tantum aktsu toro chu lu lhuwa tlawakgolh tuku lu tlan xlimakgkatsilh xmaknikan. Tuku tlawalh tlakg lakapara natlawakgo tuku nitlan wa pi ni anta xkatawi tiku xkapulalima (Éxo. 32:1, 6). Alistalh akxni xʼamakgolh tanukgo kTiyat nema xKawanikanit Nakamaxkikan, lhuwa miles lakchixkuwin mastakgolh talakaskin pi lakpuskatin xalak Moab nakamatlawikgo talakgxtumit, chu wa xlakata kamakgnika xlakata xtlawakgonit uma talakgalhin (Núm. 25:1, 9). Nachuna milh kilhtamaku israelitas nitlan xlichuwinankgo xlakata tuku xtlawa Jehová. Makgtum, nikajwatiya nitlan lichuwinankgolh Moisés, na nitlan lichuwinankgolh Jehová (Núm. 21:5). Asta wankgolh pi nitlan xlakata kamakgnika Coré, Datán, Abiram chu tiku xtatayakgo xlakata xlakpuwankgo pi nitlan tuku katlawanika. Wa xlakata kamakgnika 14,700 latamanin xlakata Dios kamalakgaxokgelh (Núm. 16:41, 49).
19 Maski tlan xtitayanikgolh tuku nitlan tlawakgolh. Israelitas tlawakgolh tuku nitlan xlakata nialh xkanajlanikgo Jehová chu nialh xlakapastakkgo, la xkakuentajtlawanit chu na nialh xlakapastakkgo xaʼakgstitum xlimapakgsin. Nachuna, tuku nitlan tlawakgolh wa tuku putum latamanin kaliʼakxilhkan, chu nachuna titaxtumaw akinin. Wa xlakata komo naliskujaw ni natlawayaw tuku nitlan chu skiniyaw kakinkamakgtayan Jehová, tlan nikxni namakgxtakgaw. Akinin liwana kilikanajlatkan pi «Dios ni makgxtakgnan» chu nikxni masta talakaskin “tlakg nakinkamatlawiputunkanan tuku nila natayaniyaw”. Dios nikxni nakinkamakgxtakgan, ni katimastalh talakaskin natitaxtuyaw tuku nila natayaniyaw chu nialh namakgantaxtiyaw xtalakaskin (Sal. 94:14).
20, 21. ¿La nakinkamakgtayayan Jehová xlakata tlan natayaniyaw akxni nakinkamatlawiputunkanan tuku nitlan?
20 ¿La “nakinkamakgtayayan xlakata tlan natayaniyaw”? Jehová nakinkamaxkiyan litliwakga xlakata ni natlawayaw tuku nitlan. Kalilakpuwaw akxni kinkaputsastalanikanan. Tiku ni kinkaʼakxilhputunkgoyan max nakinkatlawanikgoyan tuku nitlan xlakata namakgxtakgaw kintakanajlakan. Akxni chuna napatinanaw max namakgxtakgputunaw kintakanajlakan xlakata nialhtu nakinkatlawanikanan o ni nakinkamakgnikanan. Pero chuna la lichuwinalh Pablo 1 Corintios 10:13, liwana katsiyaw pi akxni kinkamatlawiputunkanan tuku nitlan ni putum kilhtamaku chuna nawan. Jehová nikxni katimastalh talakaskin natitaxtuyaw taʼakglhuwit nema natlawa pi namakgxtakgaw. Jehová tlan nakinkamatliwakglhan xlakata ni namakgatsankgananiyaw.
21 Jehová kinkalimakgtayayan xʼespíritu. Nachuna espíritu kinkamalakapastakayan tastakyaw xalak Biblia nema nakinkamakgtayayan ni natlawayaw tuku nitlan (Juan 14:26). Chu chuna ni katimakgxtakgwi xatlan tiji. Akinin katsiyaw pi tamasiyaputun pi Dios ni lakgchan namapakgsinan chu pi putum latamanin namakgatsankgananikgo Dios. Xlakata katsikgo uma chu xlakata Dios kamakgtayanit, lhuwa kstalaninanin Cristo ni namakgxtakgkgo Dios maski kamakgnikan. Pero ¿tuku kamakgtayalh? Ni wa linin “kamakgtayalh” natayanikgo ni natlawakgo tuku nitlan. Jehová kamakgtayalh xlakata ni xtlawakgolh talakgalhin. Jehová na tlan nakinkamakgtayayan putum akinin. Kinkalimakgtayayan xʼángeles tiku «ntamalakgachakgonit namakgtayakgoy nti nalakgchankgoy akgaputaxtut» (Heb. 1:14). Chuna la naʼakxilhaw kʼartículo nema aku mima, kgalhiyaw akgtum lanka tasikulunalin, nalimasiyayaw pi Jehová lakgchan namapakgsinan xliputum kilhtamaku. Tlan chuna natlawayaw komo ni namakgatsankananiyaw Dios chu xliputum kilhtamaku nalimasiyayaw pi Jehová kiMapakgsinakan.
¿La xkgalhtinaw?
• ¿Tuku xlakata natatayayaw pi wa Jehová Malana chu Mapakgsina?
• ¿Tuku kilhchanima ni namakgatsankgananiyaw Dios?
• ¿Tuku likatsiyaw pi Jehová nialh makgas nalimasiya pi lakgchan namapakgsinan?
• ¿La limasiya 1 Corintios 10:13 pi kimputumkan tlan ni namakgatsankgananiyaw Dios?
[Takgalhskinin]
[Epígrafe xla página 24]
Satanás tlawalh pi Adán chu Eva namakgxtakgkgo Jehová
[Epígrafe xla página 26]
Kilimasiyatkan pi Jehová lakgchan namapakgsinan