Kgawasa, ni kamatlawikgon amakgapitsin tuku nitlan
Kgawasa, ni kamatlawikgon amakgapitsin tuku nitlan
«Mintachuwinkan putum kilhtamaku [...] xtachuna kawa la akxni limakgamikanit matsat, xlakata nakatsiyatit la nakakgalhtiyatit chatunu chatunu.» (COL. 4:6, NM)
1, 2. ¿Tuku xlakata lhuwa lakgkgawasan ni lakgatikgo tanu nakaʼakxilhkan?
MAX kgaxpatnitata xlakata makgapitsin matlawiputunkgo tuku nitlan amakgapitsin chu max chuna titaxtunita. Max wi tiku matlawiputun tuku nitlan. ¿La limakgkatsiya akxni chuna wanikgoyan? Max makgkatsiya la Christopher tiku kgalhi 14 kata, xla wan: «Klakaskin nialhti xkiʼakxilhli, o nachuna xaklikatsilh la kincompañeros xlakata ni tanu xkiʼakxilhkgolh».
2 ¿Lakpuwana pi wa lakgkgawasan chu laktsuman lu matlawiputunkgoyan tuku nitlan? Komo chuna, ¿tuku xlakata? ¿Max lakaskina tlan natalalinkgoyan? Nila nawanaw pi uma nitlan. Asta tiku linkgoya kata na ni lakaskinkgo nakalakgmakgankan. Pero milikatsit pi komo natlawaya tuku tlan, ni putum katilipaxuwakgolh. Asta Jesús nachuna akgspulalh, pero wa tlawalh wantuku xlilat. Maski makgapitsi stalanikgolh xKgawasa Dios, amakgapitsi lakgmakgankgolh chu xliʼakxilhkgo pi «nitu litaxtu» (Isa. 53:3).
¿Namatlawikgoyan tuku nitlan amakgapitsin?
3. ¿Tuku nitlan nakitaxtu komo nalipina milatamat la amakgapitsin?
3 Max namin kilhtamaku na natlawaputuna tuku tlawakgo mincompañeros xlakata ni nalichuwinankgoyan. Ni chuna katlawa. Kstalaninanin Cristo ni nalitaxtuyaw la laktsu kamanan tiku tlan anu anu kalinkan xtachuna la «nakinkaliyanan nkaniwa xaʼun» (Efe. 4:14). Chuna, laktsu kamanan lakapara tlawakgo tuku lakaskin achatum. Pero wix nialh aktsu kgawasa. Wa xlakata liwana katsiya pi xlimapakgsin Jehová makgtayayan xlakata tlan nakitaxtuniyan, niti kamalaktlawiputun. ¡Kalilatapa tuku katsiya! (Deu. 10:12, 13.) Komo ni chuna natlawaya kitaxu la xmasta talakaskin atanu tiku napulalin milatamat. Komo chuna natlawaya nalitaxtuya la akgtum muñeco tiku matlawikan tuku amakgapitsin lakaskinkgo (kalikgalhtawakga 2 Pedro 2:19).
4, 5. 1) ¿Tuku matlawikgolh Aarón israelitas, chu tuku kinkamasiyaniyan? 2) ¿La max namatlawiputunkgoyan tuku nitlan mincompañeros?
4 Akgtum kilhtamaku, Aarón, xtala Moisés tlawalh tuku xlakaskinkgo amakgapitsin. Akxni israelitas skinikgolh katlawalh akgtum ídolo, chuna tlawalh. Pero ni kalakpuwanti pi xapekua xwanit. Kalakapastakti pi ni pekualh akxni kitalalh xtala chu kitachuwinalh lanka mapakgsina Faraón xalak Egipto chu wanilh tuku xlakaskin Dios. Pero akxni israelitas xmatlawiputunkgo tuku nitlan, wata kapekuanilh. Tlakg tuwa makgkatsilh nixawa akxni kilalh kxlakatin mapakgsina xalak Egipto. ¡Lu tuwa akxni amakgapitsi namatlawiputunkgoyan tuku nitlan! (Éxo. 7:1, 2; 32:1-4.)
5 Chuna la akxilhwi, uma taʼakglhuwit ni kajwatiya kgalhikgo tiku lakgkgawasanku o tiku ni tliwakga wi xtakanajlakan chu tlawaputunkgo tuku xalak kakilhtamaku. Na tuwa makgkatsikgo tiku lu tlawaputunkgo tuku tlan chuna la wix tlawapat. Max mincompañeros nalilitsinkgoyan o wi tuku nawanikgoyan xlakata natlawaya tuku nitlan. Akxni chuna natitaxtuya, tuwa namakgkatsiya. Pero komo ni tlawaputuna tuku nitlan, pulana liwana milikanajlat tuku masiyanikanita.
«Kakaliʼukxilhkantit»
6, 7. 1) ¿Tuku xlakata xlakaskinka liwana nakanajlaya tuku katsiya chu la tlan chuna natlawaya? 2) ¿Tukuya takgalhskinin tlan natlawanikana xlakata namatliwakglha mintakanajla?
6 ¿Liwana katsiya pi wantuku wix kanajlaya o limapakgsin nema kgalhakgaxpata wa xatlan? Wa pulana tuku milikatsit xlakata ni namatlawikgoyan tuku nitlan (kalikgalhtawakga 2 Corintios 13:5). ¿Tuku xlakata? Xlakata akxni liwana katsiya pi tuku kanajlaya xaxlikana, maski maxanana tlan nakawaniya amakgapitsi pi tuku kanajlaya wa xatlan (2 Tim. 1:7, 8). Pero, komo ni lu kanajlaya, lu tuwa namakgkatsiya maski lakpuwana pi katsiya la nakgalhtinana. Wa xlakata, tlakg tlan liwana xkatsi komo xlikana tuku masiyanikanita xalak Biblia. Pulana kaʼakxilhti tuku tlakg xlakaskinka. La uma, kanajlaya pi Dios lama chu kgaxpatnita tuku xlakata amakgapitsin na kanajlanikgo Dios. Pero kakgalhskinka: «¿Tuku klikanajla pi Dios lama?». Xlikana, akxni miʼakstu natlawanikana umakgolh takgalhskinin ni wamputun pi lhuwa tuku nalakpuwana pi xaxlikana o ni, wata nalimatliwakglha mintakanajla. Nachuna tlan miʼakstu nakgalhskinkana: «¿Tuku klikatsi pi Dios matsokgninalh Biblia?» (2 Tim. 3:16). «¿Tuku klikatsi pi “xaʼawatiya kilhtamaku” lamaw?» (2 Tim. 3:1-5, NM). «¿Tuku klikatsi pi komo nakmakgantaxti xlimapakgsin Dios tlan nakinkitaxtuni?» (Isa. 48:17, 18.)
7 Max ni tlawaputuna umakgolh takgalhskinin xlakata lakpuwana pi nila kakgalhtiya. Pero komo ni natlawanikana uma takgalhskinin nakitaxtu la tiku ni akxilhputun komo kgalhijku gasolina xputlaw kaj xlakata ni katsiputun pi nialh kgalhi gasolina. Komo ni xkgalhilh gasolina, milikatsit tuku natlawaya. Nachuna, naputsananiya mintakanajla xlakata nakatsiya niku talakaskin namatliwakglha (Hech. 17:11).
8. ¿La tlakg liwana nakatsiya pi tlakg tlan nakgalhakgaxpata Dios chu ni natlawaya talakgxtumit nema ni xlitatlawat?
8 Kalichuwinaw uma. Biblia kinkawaniyan tuku nikilitlawatkan: «Katsalanitit talakgxtumit nema ni xlitatlawat». Kakgalhskinka: «¿Tuku xlakata lu tlan uma tastakyaw?». Kalakpuwanti tuku xlakata tlawakgo talakgxtumit nema ni xlitatlawat mincompañeros chu na kalakpuwanti tuku xlakata Biblia wan pi wantiku chuna tlawa «wa xtiyatliwa lakgalhiy» (1 Cor. 6:18, NM). Alistalh katamalakxtumi, chu katlawanika uma takgalhskinin: «¿Tuku tlakg tlan? ¿Xlikana tlan nakitaxtu komo naktlawa tuku nitlan?». Kalakpuwanti tuku nitlan nakitaxtu komo xtlawa. Max mincompañeros nawanikgoyan pi lu tlan xlakata tlawa tuku nitlan, pero ¿la namakgkatsiya akxni akxtum xkatatawila minatlatni chu natalan ktamakxtumit? Chu, ¿la xmakgkatsi komo xtlawaniputu oración Dios? ¿Lu xlikana nitu limakgkatsiya komo nialh tlan natalalipina Dios kaj xlakata kamakgapaxuwaputuna mincompañeros?
9, 10. ¿La namakgtayayan akxni katsiya pi xlikana tuku kanajlaya, xlakata ni namatlawikgoyan tuku nitlan?
9 Komo wix kgawasaku, la uku “mintalakapastakni” tlakg liwana stakma nixawa makgasa (kalikgalhtawakga Romanos 12:1, 2). Wa uma kilhtamaku akxni liwana mililakapastakat tuku wamputun xtatayana Jehová nawana. Uma namakgtayayan tliwakga natawila tuku kanajlaya. Akxni mincompañeros namatlawiputunkgoyan tuku nitlan, tunkun nakatsiya la nakgalhtinana chu ni katipekuanti. Namakgkatsiya la chatum tala tsumat nema tiwa: «Akxni ni ktlawa tuku lakaskinkgo kincompañeros, klimasiyanikgo pi akit xtatayana Jehová. Chu nikaj kililakgapaskan kintakanajla. Kintakanajla kimakgtaya la naklakpuwan, tuku naktlawa, tukuya tayat nakkgalhi. Wa tlawa la naklin kilatamat».
10 Lu tuwa namakgkatsiya ni namakgtlawaputuna tuku nitlan chu nakgalhakgaxmata Dios (Luc. 13:24). Max natsukuya lakpuwana komo xlikana tlan nakitaxtu nakgalhakgaxmata Dios. Pero kalakapastakti: komo nalimasiyaya pi nitlan limakgkatsiya o limaxanana mintakanajla, mincompañeros naʼakxilhkgo chu tlakg nawanikgoyan natlawaya tuku nitlan. Pero komo naʼakxilhkgo pi xlikana kanajlaya tuku wana, max tunkun nialhtu katiwanikgon (katamalakxtumi Luc. 4:12, 13).
«Lakpuwan xlakata nakgalhtinan»
11. ¿Tuku xlakata makgtayanan pulana nalakpuwana tuku natlawaya akxni namatlawiputunkgoyan tuku nitlan?
11 Atanu tuku namakgtayayan ni namatlawikgoyan tuku nitlan wa liwana nakatsiya tuku natlawaya (kalikgalhtawakga Proverbios 15:28). Uma wamputun pi pulana nalakpuwanaw tuku max nitlan nakinkamatlawiputunkanan. Komo pulana nalakkaxwiliyaw tuku natlawayaw nakinkamakgtayayan ni nakgalhiyaw lanka taʼakglhuwit. La uma, kalakpuwanti pi wi niku tlawampat chu akxilha pi niku natitaxtuya wilakgolh mincompañeros chu xkulimakgolh. ¿Nawanikgoyan kaxkuli? ¿Tuku tlan natlawaya xlakata nitu nawanikgoyan? Proverbios 22:3 wan: «Xaskgalala wantiku tatsekga akxni akxilha pi naʼakgspula tuku nitlan». Komo atanu tiji natiyaya ni katikatatanokglhti. Uma ni wamputun pi wix xapekua, wata wix skgalala.
12. ¿La tlan nakgalhtinana komo wi tiku naliwaniyan komo nina wi tiku atatalakgxtupiya?
12 Pero ¿komo nila tuku natlawaya? Kalakpuwanti pi chatum compañero nawaniyan: «¿Wix, nikxni wi tiku a tatalakgxtupiya?». ¿La nakgalhtiya? Colosenses 4:6 kBiblia Traducción del Nuevo Mundo wan pi kintachuwinkan: «Putum kilhtamaku [...] xtachuna kawa la akxni limakgamikanit matsat, xlakata nakatsiyatit la nakakgalhtiyatit chatunu chatunu». Chuna la wan uma versículo, tanu la nakgalhtinana o tuku natlawaya makgatunu akxni namatlawiputunkana tuku nitlan. Max ni natalakaskin nawaniya lhuwa textos xalak Biblia niku wan tuku xlakata ni tlawaya, max kaj natalakaskin ni lhuwa tuku nawaniya, max tlan nawana: «Nina» o «Wix ni kalitaʼakglhuwi».
13. ¿Tuku pulana naʼakxilhaw xlakata liwana nakakgalhtiyaw kincompañeroskan?
13 Kaʼakxilhti la xkgalhtinan Jesús. Akxni xkatsi pi kaj xkgalhputsamakgolh, kaj ni lhuwa tuku xwan o nipara xkgalhtinan, la akxni Herodes wi tuku kgalhskilh (Luc. 23:8, 9). Tlakg tlan nitu nawana akxni nakgalhskinkana tuku ni liwamputu (Pro. 26:4; Ecl. 3:1, 7). Pero ¿tuku natlawaya komo naʼakxilha pi mincompañero xlikana katsiputun tuku kgalhskiman? Max asta akxni ni liwana nawaniyan, max kaj xlakata ni katsi la akxilha wix talakgxtumit o atanu nitlan tayat (1 Ped. 4:4). Akxni chuna akxilha, kalimaklakaskinti Biblia xlakata nalimasiyaniya niku takilhtinit tuku wix kanajlaya. Ni kapekuanti wata, “skgalalh katawila [...] lakatitum nalikgalhtiya” xlakata tuku kanajlaya (1 Ped. 3:15).
14. ¿La natlawaya xlakata wa nakgalhtinan tiku tlawaniman takgalhskinin pero kuenta natlawaya ni namakgasitsiya?
14 Namin kilhtamaku tlan natlawaniya atanu takgalhskinin xlakata wa nakgalhtinan. Pero kuenta natlawaya xlakata ni nalimakgasitsiya. Kawiliw akgtum liʼakxilhtit, komo chatum compañero fuerza nawaniyan kaxkuli, tlan xwani: «Ni, paxtikatsinilh» chu na tlan xwani: «¿Wix, xkuliya? Akit xaklakpuwan pi wix tlakg skgalala». ¿Akxilha pi wata wa nakgalhtinan? Nialh natalakaskin nawaniya tuku xlakata wix ni xkuliya, wata wa natsuku lakpuwan tuku xlakata xkuli. *
15. ¿La nakatsiya akxni tlakg tlan nakamakgxtakga mincompañeros chu tuku xlakata?
15 Komo liwana kawaninita tuku xlakata ni tlawaya chu chuntiya matlawiputunkgoyan tuku nitlan. ¿Tuku natlawaya? Tlakg tlan alakatanu kapit. Komo tlakg lhuwa kilhtamaku natamakgxtakga, max namatlawikgoyan tuku nitlan. Wa xlakata kakamakgxtakgti. Pero ni kalakpuwanti pi tlajakgon. Kalakpuwanti pi wix laksakti chuna natlawaya. Chu ni tlawa tuku mincompañeros lakaskinkgo, chu wa makgapaxuwa Jehová (Pro. 27:11).
«Akxni liwana lakkaxwilikan tuku natatlawa lu tlan kitaxtu»
16. ¿La max namatlawiputunkgoyan tuku nitlan makgapitsi lakgkgawasan tiku wankgo pi skujnikgo Jehová?
16 Namin kilhtamaku max namatlawiputunkgoyan tuku nitlan lakgkgawasan tiku wankgo pi skujnikgo Jehová. Kalakpuwanti pi chatum waniyan pi katapi kʼakgtum convivio. ¿Tuku xtlawa komo akxni xchipi xʼakxilhti pi ni anan chatum tala tiku tlakg lankata xlakata nakuentajtlawanan? ¿O tuku xtlawa komo chatum kgawasa lin kuchu, chu wix chu amakgapitsi nina makgatsikgo kata xlakata nawakgo kuchu? Wix miʼaktsu nalaksaka tuku natlawaya chuna la nawaniyan mintalakapastakni nema limasiyaninita tuku wan Biblia. Chatum tsumat wan: «Kintala chu akit ktaxtuw kcine xlakata kpelícula lu lixkajni tachuwin xtakgaxmatma, pero makgapitsi lakgkgawasan tamakgxtakgkgolh. Kinatlatnikan kinkawanikgon pi tlan tuku ktlawaw, pero tiku xakkataʼanaw sitsikgolh xlakata kamamaxaniw».
17. Komo napina kʼakgtum convivio, ¿tuku namakgtayayan xlakata namakgantaxtiya xtastakyaw Biblia?
17 Chuna la limasiya tuku aku lichuwinaw, komo natlawaya tuku waniyan mintalakapastakni nema limasiyaninita tuku wan Biblia, max amakgapitsin ni katilakgatikgolh. Maski chuna, wata katlawa tuku wix lakpuwana pi tlan. Pero talakaskin nakatsiya tuku natlawaya. Akxni napina kʼakgtum convivio, kalakkaxwili tuku natlawaya komo nichuna nakitaxtu la xlakpuwanita. Makgapitsi natalan katalakkaxlakgo xnatlatnikan pi komo wi tuku nitlan nakitaxtu kaʼanka katiyakan (Sal. 26:4, 5). La wan Biblia, «akxni liwana lakkaxwilikan tuku natatlawa lu tlan kitaxtu» (Pro. 21:5, Versión Popular).
Kapaxuwa xlakata kgawasaku wix
18, 19. 1) ¿Tuku likatsiya pi Jehová lakaskin napaxuwaya? 2) ¿La akxilha Jehová tiku ni mastakgo talakaskin nakamatlawikan tuku nitlan?
18 Jehová tlawan xlakata xlipaxuwa latamat chu lakaskin pi xatapaxuwan nalatapaya (kalikgalhtawakga Eclesiastés 11:9). Kalakapastakti pi tuku tlawakgo mincompañeros wa «nalimakgapaxuwakan ntalakgalhin ntu [...] nkaj makgtum natitaxtuj» (Heb. 11:25). Xlikana Dios maxkiputunan tuku tlakg tlan: tapaxuwan nema ni kgalhi xlisputni. Wa xlakata, akxni natlawaputuna tuku katsiya pi ni lakgati Dios, kalakapastakti pi tuku skiniyan namakgtayayan la uku o alistalh.
19 ¿Namakgtayayan komo natlawaya tuku lakaskinkgo mincompañeros? Kaj tsinu, xlakata akxni natitaxtu kilhtamaku lhuwa nialhpara katilakapastakkgolh mintukuwani. Pero, komo ni tlawaya tuku namatlawiputunkgoyan mincompañeros, Jehová naʼakxilha chu putum kilhtamaku nalilakgapasan pi nikxni makgxtakga. Jehová «[namalakki] akgapun chu xlikana [namaxkiyan] tasikulunalin asta akxni nialh namaklakaskina» (Mal. 3:10). Uku, maxkimana lhuwa xʼespíritu xlakata ni napekuana. Liwana kakatsi: komo Jehová makgtayaman ni katimatlawikgon tuku nitlan mincompañeros.
[Notas nema wilakgo kpágina]
^ párr. 14 Kaʼakxilhti «Estrategia contra la presión de grupo» xla libro Lo que los jóvenes preguntan. Respuestas prácticas (volumen 2), páginas 132 chu 133.
¿Lakapastaka?
• ¿Xlikana tuwa ni natlawaya tuku nitlan?
• ¿Tuku xlakata liwana nakatsiya tuku kanajlaya xlakata ni namatlawikana tuku nitlan?
• ¿Tuku nalakaxwiliya xlakata ni namatlawikana tuku nitlan?
• ¿La katsiya pi Jehová lanka xtapalh akxilha ni namakgatsankgananiya?
[Takgalhskinin]
[Epígrafe xla página 16]
¿Tuku xlakata Aarón tlawalh aktsu toro nema litatlawanit oro?
[Epígrafe xla página 18]
Kalakkaxwili la nakgalhtinana