Kgawasa, ¿tuku natlawaya kmilatamat?
Kgawasa, ¿tuku natlawaya kmilatamat?
«Ni kaj akglakgwa kkgaxinama.» (1 COR. 9:26, Nueva Versión Internacional [NVI])
1, 2. ¿Tuku namakgtayayan xlakata tlan nakitaxtuniyan kmilatamat?
KOMO lapulaya kʼakgtum sipi niku ni lakgapasnana chu xtsukulh tsiswan. ¿Tuku namaklakaskina nema namakgtayayan tlan nachipina niku pimputuna? ¿Xmakgtayan maktum mapa chu akgtum lampara? Mapa namakgtayan xlakata naʼakxilha niku wila chu tukuya tiji natitaya chu lampara namakgtayayan naʼakxilha tiji chu ni natsankgaya. Pero komo ni katsiya niku pimputuna ni katimakgtayan maski nalipina mapa chu lampara. Xlakata ni naʼakgtsankgatapuliya, talakaskin nakatsiya niku chipimputuna.
2 Pero la uku nastakkgoyata chu nachuna na titaxtuya la tuku aku lichuwinaw. Pero na kgalhiya tuku lu namakgtayayan. ¿Tuku uma? Biblia, nema namakgtayayan nalaksaka tuku tlakg tlan natlawaya kmilatamat (Pro. 3:5, 6). Nachuna kgalhiya akgtum lu tlan lampara: wa mintalakapastakni. Komo liwana limasmaninita mintalakapastakni natlawa tuku katsininita kBiblia, namakgtayayan natlawaya tuku tlan (Rom. 2:15). Komo lakaskina pi lu tlan nakitaxtuniyan kmilatamat, talakaskin liwana nakatsiya tuku tlawaputuna.
3. Chuna la wa Pablo 1 Corintios 9:26, ¿la kinkamakgtayayan nalakaxwiliyaw tuku natlawayaw?
3 Apóstol Pablo lichuwinalh tuku xmakgtaya liwana nakatsi tuku natlawa chu xliskuja xlakata namakgantaxti: «Akit ni kkgosnan la tiku ni katsi tuku natlawa, ni kaj akglakgwa kkgaxinama» (1 Cor. 9:26, NVI). Komo wix na liwana katsiya tuku tlawaputuna, naliskuja xlakata tuku tlawaputuna. Nialh makgas mililaksakat tuku lu xlakaskinka kmilatamat, la naskujnaniya Dios, tuku naliskuja, tamakgaxtokgat chu familia. Namin kilhtamaku max namakgkatsiya pi pulaklhuwa tuku tlan xtlawa. Pero komo pulana nalakkaxwiliya tuku natlawaya kmilatamat chu napulalinan tuku wan xtastakyaw Biblia, ni katitiyaputu nitlan tiji (2 Tim. 4:4, 5).
4, 5. 1) ¿Tuku nakitaxtu komo ni nalakkaxwiliya tuku natlawaya? 2) Akxni wi tuku nalaksaka, ¿tuku xlakata nakgalhskinkana komo namakgapaxuwa Jehová?
4 Komo wix ni nalakaxwiliya tuku natlawaya kmilatamat, max wa mincompañeros chu makgalhtawakgenanin nalakaxwilikgo tuku natlawaya, chuna la nalakpuwankgo pi tlan nakitaxtuniyan. Xlikana, wix tlan nalakkaxwiliya tuku natlawaya, pero uma ni wamputun ni nakgaxpatniya tuku nawanikgoyan amakgapitsin. Akxni nakakgaxpatniya, kakgalhskinka: «¿Nakimakgtaya tuku kiwanikgo xlakata naklakapastaka kiMalakatsukina o natlawa pi nialh naklakapastaka?» (kalikgalhtawakga Eclesiastés 12:1).
5 Akxni wi tuku nalaksaka natlawaya, lu tlan nawan pi miakstu nakgalhskinkana komo tuku natlawaya namakgapaxuwa Jehová. ¿Tuku xlakata? Pulana, xlakata Jehová maxkinitan putum tuku kgalhiya (Sant. 1:17). Chu chatunu akinin napaxtikatsiniyaw (Apo. 4:11). Xlakaskinka chuna natlawayaw, chuna nalimasiyaniyaw pi paxtikatsiniyaw Jehová, akxni wi tuku natlawaputunaw pulana nalakpuwanaw komo tlan akxilha tuku natlawayaw. Wa xlakata, kaʼakxilhwi tuku tlan natlawayaw nema lu xlakaskinka chu la tlan namakgantaxtiyaw.
¿Tuku tlan xlakkaxwili natlawaya?
6. ¿Tuku lu xlakaskinka nalakkaxwiliya natlawaya, chu tuku xlakata?
6 Chuna la akxilhwi kʼartículo nema titaxtulh, pulaktum tuku tlan natlawaya wa miʼakstu naʼakxilha komo xaxlikana tuku masiya Biblia (Rom. 12:2; 2 Cor. 13:5). Mincompañeros max kanajlanikgo evolución o atanu ni xaxlikana tamasiy kaj xlakata chuna kamasiyanikanit. Pero wix nichuna militlawat. Kalakpuwanti pi minTlat xalak akgapun lakaskin pi putum miliskgalala chu mintalakapastakni naliskujniya (kalikgalhtawakga Mateo 22:36, 37). Lakaskin pi nakanajlaniya, pero lakaskin liwana nakatsiya tuku xlakata chuna kanajlaya (Heb. 11:1).
7, 8. 1) ¿Tuku tlan nalakkaxwiliya nema lakapara makgantaxtikan namatliwakglha mintakanajla? 2) ¿La namakgtayayan komo namakgantaxtiya tuku lakkaxwilinita?
7 Komo matliwakglhputuna mintakanajla, tlan xlakkaxwili tuku tlan lakapala namakgantaxtiya. Pulaktum wa natlawaya oración chali chali. Tuku namakgtayayan xlakata kmiʼoraciones nawana tuku makgkatsiya chu tuku lakaskina wa nalakkaxwiliya kmintalakapastakni o natsokgwiliya tuku akgspulan nema waniputuna. Chu ni kaj watiya nawaniya mintaʼakglhuwit; nakalitachuwinanti Dios tuku makgapaxuwan (Fili. 4:6). Tuku na tlan natlawaya wa nalikgalhtawakgaya Biblia chali chali. ¿Katsiya pi komo nalikgalhtawakgaya maktati páginas chali chali kaj akgtum kata nalikgalhtawakgakgoya? * Chuna la wan Biblia Traducción del Nuevo Mundo kSalmo 1:1, 2: «Paxuwa ama chixku [...] [wantiku] xatapuxawan chali chali ni lu xapixlanka likgalhtawakga kxlimapakgsin Jehová».
8 Kaʼakxilhwi xlipulaktutu tuku tlan lakapala namakgantaxtiya: nalakkaxwiliya tuku nakgalhtinana kʼakgatunu tamakxtumit. Pulana max kaj akgtum texto nalikgalhtawakgaputuna o tuku wan párrafo. Pero, alistalh nawana tuku naʼakgatekgsa, o makgachakgxiya. Kalakapastakti pi akxni mastaya takgalhtin ktamakxtumit, wa Jehová maskiwipat (Heb. 13:15). Akxni makgantaxtinitata nawan makgapitsi tuku xlakkaxwilinita natlawaya, tlakg lu tlan namakgkatsiya, tlakg napaxtikatsiniya Jehová chu namakgtayayan xlakata tlan namakgantaxtiya nema tlakg makgas kilhtamaku limakgantaxtikan.
9. Komo wix nina lichuwinana Dios, ¿tuku tlan nalakkaxwiliya natlawaya nema tlakg makgas kilhtamaku nalimakgantaxtiya?
9 ¿Tuku tlan xlakkaxwili natlawaya nema tlakg makgas kilhtamaku nalimakgantaxtiya? Komo nina lichuwinana Dios, lu tlan xlakpuwanti chuna natlawaya. Chu akxni namakgantaxtiya uma, naliskuja xlakata ni natitaxtu akgtum papaʼ ni nalichuwinana Dios. Na tlan xwa tlakg xkatsini nalichuwinana Dios chu tlakg liwana nalimaklakaskina Biblia, uma namakgtayayan tlakg nalipaxuwaya akxni natlawaya uma taskujut. Na tlan tlakg nalimaxtuya kilhtamaku xlakata nalichuwinana Dios akgatunu chiki chu wi tiku namakgalhtawakgaya. Chu akxni wanikanitata pi tlan nalichuwinana Dios, tuku tlakg tlan natlawaya wa naliskuja xlakata natamakamastaniya Jehová chu natlawaya tuku talakaskin xlakata natamunuya.
10, 11. ¿Tuku tlan nalakkaxwilikgo natlawakgo tuku tlakg makgas kilhtamaku nalimakgantaxtikgo lakgkgawasan nema tamunukgonita?
10 Pero komo tamununitata, tlan nalakkaxwiliya natlawaya tuku tlakg makgas kilhtamaku nalimakgantaxtiya xlakata naskujnaniya Jehová. La uma, tlan napina makgtayanana kʼakgtum congregación nema lhuwa niku kalakgchan nalichuwinankgo Dios. O komo wix tliwakgaku chu ni tatatlaya tlan precursor auxiliar o regular naliskuja. Wilakgolh lhuwa miles natalan tiku lichuwinankgo Dios putum kilhtamaku. Xatapaxuwan nawanikgoyan pi uma taskujut lu lipaxuwakan chu wa uma tlan nalimasiyaniyaw kiMalakatsukinakan pi lakapastakaw la uku xlakata kajku lakgkgawasan akinin. Putum uma tuku lichuwinaw tlan namakgantaxtiya la uku, xlakata wilaku xchik minatlatni. Chu mincongregación nalitamakgtaya tuku wix natlawaya.
11 Pero na tlan nalakkaxwiliya natlawaya tuku tlakg makgas kilhtamaku nalimakgantaxtiya nema namakgtayayan napina alakatanu. Kawiliw akgtum liʼakxilhtit, max nalakkaxwiliya namakgtayanana niku talakaskin tamakgtay, max kminkachikin o alakatanu país. Max na tlan namakgtlawaya Pukgalhtawakga xla xTatayananin Jehová o sucursales kʼalakatanu país. O max skujputuna kBetel o misionero wamputuna. Chuna la akxilhwi, komo nalakkaxwiliya natlawaya tuku lichuwinaw, talakaskin pi pulana natamunuya. Komo nina tamunuya, liwana kalakpuwanti tuku kilhchani tamunukan.
Kalakkaxwili natamunuya
12. ¿Tuku xlakata tamunuputunkgo makgapitsi chu tuku xlakata ni tlan chuna natlawakgo?
12 ¿Tuku xlakata lakpuwana pi kilitamunutkan? Makgapitsi lakgkgawasan chu laktsuman tamunuputunkgo xlakata ni natlawakgo talakgalhin, pero amakgapitsin kaj xlakata xʼamigos tamunokgonit o xlakata kamakgapaxuwaputunkgo xnatlatnikan. Pero tamunut ni kaj akgtum contrato nema tlawa pi putum kilhtamaku matlawiyan tuku tlan chu ni natlawaya tuku wix tlawaputuna. Na ni katamunu kaj xlakata amakgapitsin nawanikgoyan. Wata, katamunu akxni liwana akgatekgsata tuku kilhchani xtatayana Jehová wankan chu xatapaxuwan namakgantaxtiputuna tuku taskin (Ecl. 5:4, 5).
13. ¿Tuku xlakata militamunut?
13 Pulaktum tuku xlakata nalitamunuyaw wa xlakata Jesús kawanilh kstalaninanin: «Na kamasiyunikgotit [...] chu nakalimunukgotit». Chu Jesús wililh xliʼakxilhtit akxni tamunulh (kalikgalhtawakga Mateo 28:19, 20 chu Marcos 1:9). Na lu xlakaskinka natamunuyaw xlakata tamunut kinkamakgtayayan nalakgtaxtuyaw. Akxni apóstol Pedro xlichuwinanita pi Noé tlawalh akgtum arca niku lilakgtaxtukgolh putum xfamilia akxni milh Munkaklat, na wa: «Wantuku xtachuna uma, la uku na kalakgmaxtuman wixin, wa tamunut [...], xlakata xtalakastakwanat Jesucristo» (1 Ped. 3:20, 21, NM). Pero ni naʼakxilha tamunut la kaj tuku makgtayanan o tuku nalakgmaxtuyan, wata katamunu xlakata paxkiya Jehová chu skujniputuna xliputum minaku, milatamat, mintalakapastakni chu xliputum militliwakga (Mar. 12:29, 30).
14. ¿Tuku xlakata lhuwa ni tamunuputunkgo pero tuku liwana milikatsit?
14 Wilakgolh tiku ni tamunuputunkgo xlakata pekuankgo pi alistalh nakatamakxtukan kcongregación. ¿Nachuna lakpuwana? Komo chuna lakpuwana ni wamputun pi lu nitlan. Max chuna limasiyaya pi akgatekgsa tuku kilhchani xtatayana Jehová nawana. Pero ¿wi atanu tuku xlakata ni tamunuputuna? Max ni liwana kanajlaya pi namakgantaxtiya xlimapakgsin Dios wa tuku tlakg tlan natlawaya kmilatamat. Komo chuna akgspulaman, namakgtayayan nalilakapastaka tuku kaʼakgspula tiku ni makgantaxtikgo tastakyaw xalak Biblia. O max kanajlaya pi xlimapakgsin Dios tlan, pero lakpuwana pi nila xlenkgalhin namakgantaxtiya. Max tlan komo chuna lakpuwana, xlakata chuna limasiyaya pi ni lankajwa wix. Biblia kinkawaniyan pi kinakujkan kgalhi talakgalhin chu kinkaʼakgskawiyan (Jer. 17:9). Pero, wix tlan natlawaya tuku skiniyan Dios. ¿La tlan chuna natlawaya? “Namatanksaya milatamat kaj xlakata nakgaxmata xtachiwin.” (Kalikgalhtawakga Salmo 119:9.) Wa xlakata, komo wi tuku tlawama pi ni natamunuya, kaputsa tamakgtay. *
15, 16. ¿Tuku nalikatsiya pi tlantiya natamunuya?
15 Pero ¿tuku nalikatsiya pi tlantiya natamunuya? Tlan akstu natlawanikana umakgolh takgalhskinin: ¿Tlan nakkamasiyani amakgapitsin tuku tlakg xlakaskinka masiya Biblia? ¿Kkan lichuwinan Dios maski kinatlatni ni ankgo? ¿Kkan kputum tamakxtumit? ¿Tlan nakwan akxni ni ktlawalh tuku nitlan xkimatlawiputunkgo kincompañeros? ¿Chuntiya xakskujnilh Dios maski kinatlatni chu kiʼamigos nialh kskujnikgolh? ¿Kwaninit Jehová pi lu kpaxki? ¿Kwaninit Jehová pi nakmakamastani putum kilatamat?
16 Tamunut lakgpali kilatamatkan chu ni kaj akglakgwa natamunuyaw. ¿Tliwakga wi mintakanajla xlakata nalakpuwana natamunuya? Akxni mastaya lu tlan taʼakgchuwin kplataforma o natalan akxilhkgo pi tlan comentarios mastaya ktamakxtumit ni wamputun pi tliwakga wi mintakanajla. Tliwakga natawila mintakanajla kilhchanima pi akxni wi tuku natlawaya nalimaklakaskina tastakyaw xalak Biblia (kalikgalhtawakga Hebreos 5:14). Komo tliwakgata wi mintakanajla chu tlantiya natamunuya, kgalhiya akgtum lanka talakgalhaman nema ni anan xtachuna: xliputum minaku naskujniya Jehová, chu chuna la nalipina milatamat nalimasiyaniya chali chali pi tamakamastaninita.
17. ¿Tuku namakgtayayan nalakkaxtlawaya taʼakglhuwit nema nakgalhiya akxni tamununitata nawan?
17 Max akxni tamununitata nawan xatapaxuwan naskujnaniya Dios. Pero alistalh nakgalhiya taʼakglhuwit nema nalitaʼakxilha komo tliwakga wi mintakanajla (2 Tim. 3:12). Pero ni kapuwanti pi miʼakstu nalakkaxtlawaya. Kakaskini kamakgtayakgon minatlatni. Na kakaskini kamakgtayakgon natalan tiku tliwakga wi xtakanajlakan. Miʼamigos kakatlawa tiku namakgtayakgoyan ni namakgatsankgananiya Jehová. Xlenkgalhin kalakapastakti pi Jehová paxkiyan chu namakgtayayan xlakata tlan nalakkaxtlawaya taʼakglhuwit nema nakgalhiya (1 Ped. 5:6, 7).
¿La tlan namakgantaxtiya tuku lakpuwanita natlawaya?
18, 19. ¿Tuku xlakata mililaksakat tuku tlakg xlakaskinka militlawat?
18 ¿Min kilhtamaku akxni akxilha pi maski lhuwa liskuja, ni akchaniyan kilhtamaku xlakata natlawaya tuku lakaskina o tuku militlawat? Komo chuna akgspulaman kalakkaxwili tuku tlakg xlakaskinka militlawat. Katamalakxtumiw uma. Kalakpuwanti pi tiyaya patum cubeta chu mujuniya laklanka chiwix. Chu alistalh na mujuniya kuku o muntsaya asta nalitatsama. La uku tajuma kcubeta laklanka chiwix chu kuku. Pero komo napuxtakgaya cubeta chu namatsamaparaya, chu pulana namujuya kuku chu alistalh chiwix, ¿tuku lalh? Nialh tajukgolh chiwix xlakata pulana muju kuku.
19 Nachuna kinkaʼakgspulayan xlakata la limaklakaskinaw kinkilhtamakujkan. Komo pulana lakgastanana, nialh katikgalhi kilhtamaku xlakata natlawaya tuku tlakg xlakaskinka, naskujnaniya Jehová. Pero ¿tuku nakitaxtu komo natlawaya uma tastakyaw xalak Biblia, “nakatsiniya nalaksaka wantu xatlan”? (Fili. 1:10.) Komo chuna natlawaya nakgalhiya kilhtamaku xlakata naskujniya Dios chu na tlan nalakgastanana.
20. ¿Tuku militlawat komo namin kilhtamaku ni lu katsiya tuku natlawaya akxni wi tuku tlawaputuna?
20 Akxni wi tuku makgantaxtiputuna, la akxni tamunuputuna, namin kilhtamaku ni lu nakatsiya tuku natlawaya. Akxni chuna namakgkatsiya, «Kintikukan Dios, xla namakgtayayan» xlakata tlan nalipina mintakuka (Sal. 55:22). La uku tlan natlawaya tuku tlakg xlakaskinka chu tlan taskujut nema anan, wa uma: talichuwinama chu tamasiyama xlakata Dios xlikalanka Katiyatni (Hech. 1:8). ¿Tuku natlawaya? ¿Kaj naʼakxilha la tatlawama uma taskujut o namakgtayanana? Tuku tlakg tlan natlawaya kmilatamat wa nalimaklakaskina tuku tlan tlawaya xlakata naskujnaniya Dios. Nikxni katilipuwanti xlakata naskujniya «miMalakatsukina akxni kgawasaku wix» (Ecl. 12:1).
[Notas nema wilakgo kpágina]
^ párr. 7 Kaʼakxilhti La Atalaya 1 xla agosto kata 2009, páginas 15 asta 18.
^ párr. 14 Na namakgtayayan tuku wan libro Lo que los jóvenes preguntan. Respuestas prácticas (volumen 2), capítulo 34.
¿La xkgalhtinanti?
• ¿Tuku xlakata nalakkaxwiliya tuku natlawaputuna?
• ¿Tuku lu tlan nalakkaxwiliya chu namakgantaxtiya?
• ¿Tuku xlitlawat tiku tamunuputun?
• ¿Tuku xlakata miliʼakxilhat tuku tlakg xlakaskinka militlawat xlakata tlan namakgantaxtiya tuku tlawaputuna?
[Takgalhskinin]
[Epígrafe xla página 20]
¿Likgalhtawakgaputuna Biblia chali chali?
[Epígrafe xla página 22]
¿Tuku tlan natlawaya xlakata tlan natamunuya?
[Epígrafe xla página 23]
¿Tuku masiyaniyan uma liʼakxilhtit?