Kakilhtliniw Jehová
Kakilhtliniw Jehová
«Naklitlini [...] kiDios limakgwan klamaj.» (SAL. 146:2)
1. ¿Tuku malakpuwanilh David natsokgwili makgapitsi salmos?
AKXNI David kgawasaku xwanit, ¡lu lhuwa kilhtamaku xkakuentajtlawa xborregos xtlat, lakatsu kBelén! Akxni xkakuentajtlawa borregos, xkaʼakxilha staku nema wilakgolh kʼakgapun, «nachuna kitsistankanin [o animales] xala nak kakiwin», «laktsu spitu [o animales] nima [...] kgosa nak kaliʼunin» chu putum tuku lu lakglilakgatit tlawanit Jehová. Lu kaks xlimalakawani, wa xlakata tsokgnanilh makgapitsi takilhtlin Jehová tiku xtlawanit umakgolh tuku xalilakgatit. La uku lhuwa xtakilhtlin David tatsokgnit klibro xla Salmos (kalikgalhtawakga Salmo 8:3, 4, 7-9). *
2. 1) ¿La makgtayanan tatlakgni? Kalichuwinanti akgtum liʼakxilhtit. 2) Chuna la lichuwinan Salmo 34:7, 8 chu Salmo 139:2-8, ¿la xtalalin David Jehová?
2 Max, akxni David xkakuentajtlawa borregos tlakg liwana katsinilh tlakgnan. Lu liwana katsinilh tlakga arpa wa xlakata wanika kaʼalh tlakgnani mapakgsina Saúl (Pro. 22:29). Xlakata lu stlan xtakgaxmata akxni xtlakgnan, xtlawa pi mapakgsina skayaj xlimakgkatsilh, la uku nachuna limakgkatsiyaw akxni kgaxmataw lu xastlan tatlakgni. Akxni xkgaxmata la xtlakgnan David, «Saúl skayaj xlimakgkatsi chu tlan xkitaxtuni» (1 Sam. 16:23). Umakgolh lu xastlan takilhtlin nema David tsokgnanilh chu xlikilhtlini Dios, maski titaxtunita lhuwa kilhtamaku chuntiyaku talakapastaka. La uku, maski titaxtunita akgtutu mil kata akxni lakachilh David, lhuwa millones latamanin nema tanu tanu la wilakgolh chu tanu tanu niku xalanin limaklakaskinkgo umakgolh salmos xlakata tlan nalimakgkatsikgo chu nakamakgtaya (2 Cró. 7:6; kalikgalhtawakga Salmo 34:7, 8 chu 139:2-8; Amós 6:5).
Lu xlakaskinka liʼakxilhkan tatlakgni kxaxlikana takanajla
3, 4. ¿Tuku lakkaxwililh David xlakata xkilhtlinika chu xtlakgnanika Dios?
3 David putum kilhtamaku limaklakaskilh tuku lu liwana xkatsini xlakata xtlawa tuku tlan: xlimalanki Jehová. Nachuna, akxni mapakgsina xwanit kʼIsrael, lakkaxwililh xtlakgnanka akxni xkakninanikan Dios ktabernáculo. Kalaksakli 4,000 levitas tiku xkalimaklakaskinkanku xlakata “xkilhtlinikgolh Jehová”, max 10% xliputum levitas. Pero kaj 288 «nema xkamasiyanikanit la natlinikgo Jehová, [chu] xputumkan lu tlan xkatsikgo la natlawakgo» (1 Cró. 23:3, 5; 25:7).
4 Lhuwa takilhtlin nema xkilhtlikgo levitas xtsokgnit David. Israelitas tiku na anta xtawilakgo akxni xkilhtlikgo chu xtlakgnankgo levitas max lu tlan xlimakgkatsikgo. Titaxtulh kilhtamaku linka caja xla talakkaxlan kJerusalén, «David [...] kawanilh xpuxkukan levitas pi akxtum xkawilikgolh xnatalan tiku xkilhtlikgo chu tiku xtlakgnankgo, litlakgni nema kgalhi cuerdas chu arpas chu címbalos, xlakata pixlanka xtakgaxmatli» chu «xlakata lu stlan xtakgaxmatli» (1 Cró. 15:16).
5, 6. 1) ¿Tuku xlakata lu xlakaskinka xʼakxilhkan tatlakgni akxni David mapakgsina xwanit? 2) ¿Tuku likatsiyaw pi tatlakgni lu xlakaskinka xʼakxilhkgo israelitas akxni xkakninanikgo Dios?
5 ¿Tuku xlakata lu xlakaskinka xʼakxilhkan tatlakgni akxni David mapakgsina xwanit? ¿Kaj xlakata mapakgsina xlakgati xtlakgnan? Ni. Wi atanu tuku xlakata lu xlakaskinka xliʼakxilhkan, chuna la lichuwinanka alistalh akxni mapakgsina Ezequías lakkaxwilipa nakakninaniparakan Dios ktemplo. Anta 2 Crónicas 29:25, wan pi uma xatlan mapakgsina «tlawalh pi levitas xtayakgolh kxchik Jehová, xlinkgolh címbalos, litlakgni nema kgalhi cuerdas chu arpas, chuna la mapakgsinalh David chu Gad [...] tiku xtaskuja David chu palakachuwina Natán, xlakata wa Jehová tiku xkamapakgsinit xpalakachuwinanin chuna xtatlawalh».
6 Chuna xla: Jehová limaklakaskilh xpalakachuwinanin xlakata nakawani xlakskujnin nakilhtlinikgo. Wa xlakata levitas tiku xkilhtlikgo ni xkamatlawikan atanu taskujut xlakata xkgalhikgolh kilhtamaku natlawakgo takilhtlin chu tlan xmakgatawakgakgolh (1 Cró. 9:33).
7, 8. ¿Tuku tlakg xlakaskinka akxilha Jehová akxni kilhtliniyaw?
7 Pero max wix nawana: «Akit nipara tsinu tlan kkilhtli». Max akinin nawanaw: «Levitas lu tlan xkilhtlikgo, pero akit nikxni xkintilaksakka xlakata na xakkatakilhtlikgolh tiku liwana xkatsinikgo chu xkilhtlikgo niku xwi tabernáculo». Pero na kalakapastakwi pi ni putum levitas liwana xkatsinikgo kilhtlikgo. Anta 1 Crónicas 25:8 wan pi na xwilakgolh tiku aku xkatsinimakgolh. Na liwana katsiyaw pi xwilakgolh amakgapitsi israelitas tiku lu xkatsinikgo tlakgnankgo chu xkilhtlikgo, pero Jehová kajwatiya kalaksakli levitas xlakata nakilhtlikgo chu natlakgnankgo. Chu xlakan lu xatapaxuwan xkilhtlikgo maski xkatsinikgo o ni lu xkatsinikgo kilhtlikgo chu tlakgnankgo.
8 Maski David xkatsini tlakgnan chu lu xlakgati, uma ni wamputun pi Jehová tlakg xlakaskinka akxilha la xlilhuwa katsiniyaw tlakgnanaw chu kilhtliyaw. Anta kSalmo 33:3, kTraducción del Nuevo Mundo mapakgsina David wa: «Lu kaliskujtit xlakata tlan natlawayatit akxni natlakgnanatit, chu xatapaxuwan katakgaxmatli». Uma texto liwana kinkawaniyan: Akxni kilhtliniyaw Jehová, tuku tlakg xlakaskinka wa naliskujaw xlakata lu tlan nakilhtliyaw.
Tatlakgni akxni nialh wa xmapakgsinama David
9. ¿Tuku xtiʼakxilhwi chu xtikgaxmatwi komo na anta xtitawilaw akxni makamastanika Jehová templo nema tlawalh Salomón?
9 Akxni mapakgsina xwanit Salomón, lu xlakaskinka xʼakxilhkan tatlakgni kxaxlikana takanajla. Kawiliw akgtum liʼakxilhtit, akxni tlawakgoka templo chu makamastanika Jehová, xwilakgolh lhuwa tlakgnanin, xwilakgolh 120 tiku xlitlakgnankgo trompetas (kalikgalhtawakga 2 Crónicas 5:12). Biblia wan pi tiku xlitlakgnankgo trompetas putum sacerdotes xwankgonit chu akxni kilhtlikgolh “takgaxmatli la komo kaj chatum xtlima akxni malankikgolh chu paxtikatsinikgolh Jehová”. Akxni xkilhtlimakgolh xwankgo: «Xlakata Dios tlan likatsi, xlakata xliputum kilhtamaku kinkapaxkiyan chu ni kinkamakgxtakgan». Akxni kgatsputli uma lu stlan tatlakgni, «chiki litatsamalh puklhni», nema litasiyalh pi Jehová makgamakglhtinalh. ¡Max lu lipaxuwakgolh tiku anta xwilakgolh akxni kgaxmatkgolh pi xlitlakgnamaka lhuwa trompetas chu lhuwa miles xkilhtlimakgolh! (2 Cró. 5:13.)
10, 11. ¿Tuku likatsiyaw pi xapulana kstalaninanin Cristo xlimaklakaskinkgo tatlakgni akxni xkakninanikgo Dios?
10 Kstalaninanin Cristo xalak pulana siglo na xlimaklakaskinkgo takilhtlin chu tatlakgni akxni xkakninanikgo Dios. Pero xlakan ni xtamakxtumikgo ktemplos o tabernáculos, xtamakxtumikgo kmakgapitsi chiki. Chu makglhuwa ni lu xatapaxuwan xwilakgolh, xlakata xkaputsastalanimaka o atanu tuku nitlan xtitaxtumakgolh. Maski chuna, xkilhtlinikgo Dios xlakata nalikakninanikgo.
11 Pablo kawanilh kstalaninanin Cristo xalak Colosas pi xlalimatliwakglhkgolh chatunu chatunu «ntatlin xla xtachuwin Dios, chu ntatlin xla paxkatsinit» (Col. 3:16). Chu akxni Pablo chu Silas katamaknuka kpulachin, lhuwa kilhtamaku “xtlawakgo xʼoracionkan, chu xtlinimakgo Dios”, maski ni xkgalhikgo maktum libro xla takilhtlin (Hech. 16:25). Chuna la tlawakgolh, chatunu chatunu tlan natlawayaw uma takgalhskinin: «Komo xkintamaknuka kpulachin, ¿niku akglit takilhtlin tlan xakkilhtlinilh Jehová maski ni xakkgalhilh maktum libro?
12. ¿La limasiyayaw pi lu xlakaskinka akxilhaw akxni kilhtliniyaw Dios?
12 Xlakata tatlakgni lu xlakaskinka kxaxlikana takanajla, kilitlawatkan uma takgalhskinin: «¿Lanka talakgalhaman kaʼakxilha nakkilhtlini Dios? ¿Sokg kchan ktamakxtumit chu klaklanka tamakxtumit xlakata akxtum nakkatakilhtli kinatalan akxni tsuku tamakxtumit? ¿Lu xatapaxuwan kkilhtli? ¿La akxilhkgo tiku xalak kifamilia takilhtlin nema takilhtli ktamakxtumit Niku Masiyakan xlakata la Lichuwinankan Dios chu Tamakxtumit xlakata xTaskujut Dios, Taʼakgchuwin xalak Biblia chu akxni likgalhtawakgakan revista Makatsinina? ¿Kkamasiniyani kinkamanan pi akxni kilhtliyaw ni kaj xlakata nalijaxaw tsinu o natlawayaw tuku ni lu xlakaskinka?» Putum kilhtamaku kalakapastakwi pi akxni kilhtliyaw na likakninaniyaw Dios. Jehová lakgati nakilhtliniyaw maski “liwana katsiyaw kilhtliyaw” o maski “aku katsinimaw”. Kimputumkan tlan nakilhtliniyaw Dios chu akxtum nakatakilhtliyaw kinatalankan xlakata tlan namalankiyaw (katamalakxtumi 2 Corintios 8:12).
Chuna la titaxtutilha kilhtamaku talakgpalitilhama tuku tamaklakaskin
13, 14. ¿Tuku xlakata lu xlakaskinka xatapaxuwan nakilhtliyaw ktamakxtumit? Kalichuwinanti akgtum liʼakxilhtit.
13 Liwakaya akgtum ciento kata uma revista xaʼinglés lichuwinalh pulaktum tuku xlakata lu xlakaskinka nakilhtliniyaw Jehová: «Akxni likilhtliyaw xaxlikana tlawa pi nalaktanu kxʼakgxekga chu kxnakujkan xlakskujnin Dios». Xlakata lhuwa takilhtlin takilhtinit kBiblia, akxni liwana katsiniyaw, tuku xaxlikana liwana tamakgxtakga kkintalakapastaknikan. ¡Wa xlakata lu xlakaskinka nakatsiniyaw makgapitsi takilhtlin! Nachuna, akxni natalan xalak makgapitsi congregaciones xatapaxuwan kilhtlikgo ktamakxtumit, latamanin tiku kajku xlimakgtumku ankgo kPukgalhtawakga xla xTatayananin Jehová lu lakgatikgo tuku kgaxmatkgo.
14 Kalichuwinaw tuku lalh akgtum katsisni kkata 1869. Akxni xmimaja kxchik Charles Russell kgaxmatli pi kʼakgtum chiki xkilhtlimaka. Ama kilhtamaku nialh xputsaputun tuku xaxlikana xlakata Dios chu xlakapastaknit pi kajwatiya xnegocios xʼama liskuja. Xlakpuwan pi maski nialhla xʼama kamakgtaya latamanin nalakgapaskgo Dios, tumin nema xtlajalh tlan xkalimaxkilh tuku xmaklakaskinkgo. Akxni tanulh kʼuma chiki akxilhli pi xtlawamaka akgtum tamakxtumit xla takanajla. Maski kapokgxniwa chu nialh tlan xwanit, tawilalh chu kgaxmatli. Titaxtulh makgapitsi kata, xla lichuwinalh xlakata tuku kgaxmatli ama katsisni, xla wa: «Kajwatiya kimakgtayalh xlakata natatliwakglhpara kintakanajla nema kxlajwananita, pi wa Dios malakpuwaninalh natsokgkan Biblia». Chuna la akxilhwi wantuku tlawalh pi naʼan ktamakxtumit wa takilhtlin.
15. ¿Tuku tlakg liwana taʼakgatekgsli xlakata Biblia chu wa xlakata talakaskilh natlawakan xasasti libro xla takilhtlin?
15 Chuna la titaxtutilhama kilhtamaku tlakg liwana akgatekgsmaw o makgachakgximaw tuku wan Biblia. Chuna la wan Proverbios 4:18: «Xtijikan tiku xaʼakgstitum tsinu tsinu tsuku tlakg kaxkgakga asta akxni kakuwani wan». Xlakata tlakg liwana akgatekgsmaw tuku wan Biblia talakaskin nalakgpalitilhayaw la «likilhtliyaw tuku xaxlikana». Titaxtunitta puxamakitsis kata, xtatayananin Jehová limaklakaskinitaw klhuwa países libro xla takilhtlin nema wanikan Canten alabanzas a Jehová. * Pero akxni taxtulh uma libro asta la uku lhuwa tuku tlakg liwana taʼakgatekgsma, wa xlakata makgapitsi tachuwin nema kgalhi uma libro la uku nialh limaklakaskinaw. La umakgolh, nialh lichuwinanaw «xasasti tuku talakkaxwilinit» wata wanaw «xasasti kakilhtamaku». Chu xtukuwani Jehová «natasantujtlawa» chu nialh wanaw «natamalanki». Xlakata lhuwa tuku tlakg liwana akgatekgsmaw, talakaskilh natlawakan xasasti libro xla takilhtlin.
16. ¿La nakinkamakgtayayan xasasti libro xla takilhtlin xlakata namakgantaxtiyaw tuku wan Efesios 5:19?
16 Wa uma tuku xlakata Lakgkgolotsin tiku Pulalinkgo xTatayananin Jehová mastakgolh talakaskin natlawakan xasasti libro xla takilhtlin nema wanikan Cantemos a Jehová. * La uku uma libro kgalhi 135 takilhtlin, uma nakinkamakgtayayan tlakg lakapara nakatsiniyaw maski kaj makgapitsi takilhtlin. Uma tastakyaw xtachuna tuku wa Pablo kʼEfesios 5:19 (kalikgalhtawakga).
Kalimasiyaw pi paxtikatsininanaw
17. ¿Tuku nakinkamakgtayayan ni napekuanaw akxni kilhtliyaw kcongregación?
17 ¿Pi tlan ni nakilhtliyaw kaj xlakata lakpuwanaw pi naʼakgtsankgayaw? ¡Ni! ¿Ni xlikana pi akxni chuwinanaw «paks akgchakgxtayayaw»? (Sant. 3:2.) Pero uma ni tlawa pi nialh nalichuwinanaw Dios akgatunu chiki. Wa xlakata, na chuntiya kalimalankiw Jehová kintakilhtlinkan maski ni lu tlan kilhtliyaw. Jehová tiku «maxkilh xkilhni chixku», lipaxuwa akxni limaklakaskinaw xlakata nakilhtliniyaw (Éxo. 4:11).
18. ¿Tuku nakinkamakgtayayan nakatsiniyaw xaletra takilhtlin?
18 Klhuwa tanu tanu tachuwin na wilakgolha discos Cantemos a Jehová (coro y orquesta), niku pulaklhuwa litlakgni limaklakaskinkan chu lhuwa tiku kilhtlikgo. Umakgolh takilhtlin lu tlan takgaxmata. Komo makglhuwa nakgaxmataw umakgolh takilhtlin ktachuwin nema akinin akgatekgsaw ni lhuwa kilhtamaku natitaxtu nakatsiniyaw makgapitsi xasasti takilhtlin. Lhuwa letras katsokgka xlakata akxni nakilhtliyaw nakatsiyaw tuku stala. Wa xlakata, kakgaxmatwi umakgolh grabaciones, chu kastalaniw la kilhtlimakgolh. Komo kkinchikkan liwana nakatsiniyaw xaletra chu la takilhtli, tlakg liwana nakilhtliyaw kPukgalhtawakga xla xTatayananin Jehová.
19. ¿La tatlawa xlakata nalakkaxwilikan tatlakgni nema kilhtliniyaw Dios?
19 Klanka tamakxtumit xaʼakgtum kilhtamaku, xaʼakgtiy kilhtamaku chu xaʼakgtutu kilhtamaku matitaxtikan lu lakswan tatlakgni. Maski minkilhtamaku ni kuenta katlawaniyaw, lu lhuwa liskujkan. Pulana laksakwilikan tatlakgni chu alistalh lakkaxwilikan tuku natlakga orquesta Watchtower, uma orquesta tlakgnankgo 64 natalan. Chatunu chatunu lhuwa hora limaxtu xlakata namakgatawakga, nakgalhtawakga chu alistalh tagrabarli kPatterson (Nueva York). Putum tiku makgtlakgnankgo, akgtum lanka tasikulunalin akxilhkgo makgtayanankgo natatlawa tatlakgni nema maklakaskinaw klaklanka tamakxtumit. Akinin lu kapaxtikatsiniyaw. ¿La nalimasiyayaw klaklanka tamakxtumit pi kapaxtikatsiniyaw xtaskujutkan kinatalankan? Akxni wankan pi katawilaw tunkun natawilayaw xlakata nakgaxmataw tatlakgni nema xatapaxuwan tlawakgonit kinatalankan.
20. ¿Tuku lakapastaknitaw natlawayaw?
20 Dios kgaxmata akxni makxtum kilhtliniyaw xlakata nakakninaniyaw. Jehová lu xlakaskinka akxilha. Wa xlakata xatapaxuwan kakilhtliw xlakata namakgapaxuwayaw. ¡Xatapaxuwan kakilhtliniw Jehová, maski katsiniyaw o ni lu katsiniyaw kilhtliyaw!
[Notas nema wilakgo kpágina]
^ párr. 1 Akxni xtitaxtunita akgtum mil kata akxni xninita David, lhuwa ángeles kakimakatsinikgolh makgapitsin tiku xkuentajtlawamakgolh xborregos anta lakatsu kBelén pi xlakachinit Mesías (Luc. 2:4, 8, 13, 14).
^ párr. 15 Xatakgatsin libro xla takilhtlin xkgalhi 225 takilhtlin, xtatlawama kliwaka akgtum ciento tanu tanu tachuwin.
^ párr. 16 Uma libro nina anan xatotonaco.
¿Tuku lakpuwana?
• ¿Tukuya liʼakxilhtit xalak Biblia masiyakgo pi lu xlakaskinka nakilhtliyaw akxni kakninaniyaw Dios?
• ¿La makgantaxtiyaw tuku wan Mateo 22:37 akxni xatapaxuwan kilhtliniyaw Jehová ktamakxtumit?
• ¿La limasiyayaw pi paxtikatsininanaw tatlakgni nema likilhtliniyaw Jehová?
[Takgalhskinin]
[Epígrafe xla página 25]
¿Kawaniyaw kinkamanankan ni nataxtukgo akxni kilhtlinimaw Jehová?
[Epígrafe xla página 26]
¿Katsinimaw kkinchikkan xasasti takilhtlin?