Kalimasiyaw pi lu tatayayaw xaxlikana takanajla
Kalimasiyaw pi lu tatayayaw xaxlikana takanajla
«Lhuwa tachananat, pero lakskujnin ni lu chalhuwa.» (MAT. 9:37, NM)
1. ¿Tukuya liʼakxilhtit kinkamakgatekgsniyan akxni wi tuku lu lakapara xlitatlawat?
KOMO wix lipimpat khospital chatum puskat nema nakgalhi kskgata. ¡Lakapara nalipina! Atanu liʼakxilhtit, komo wi niku lu xlakaskinka pimpat, liman taxi chu nialh lhuwa kilhtamaku kgalhiya, ¿tuku nawaniya tiku matlawanima taxi? «Tlakg lakapara kamatlawani; lu XLAKASKINKA sokg nakchan.» Chuna, akxni wi tuku lu xlakaskinka kilitlawatkan chu nialh lhuwa kilhtamaku kgalhiyaw, lu lakaparayaw. Chu adrenalina tlawa pi tlakg lhuwa naskujaw. Chuna tamakgkatsi akxni wi tuku lu xlakaskinka talakaskin katatlawalh.
2. ¿Tukuya taskujut tlakg lakapara xlitlawatkan la uku kstalaninanin Cristo?
2 La uku, wi tuku lu xlakaskinka xlitlawatkan xaxlikana kstalaninanin Cristo, nalichuwinankgo xalakwan xalaksasti tamakatsinin xlakata Tamapakgsin chu nakamasiyanikgo latamanin xlikalanka katiyatni (Mat. 24:14; 28:19, 20). Chuna la lichuwinalh Marcos, Jesús wa pi uma taskujut “pulana” xʼama tatlawa chu alistalh xʼama min lisputni (Mar. 13:10). Chu chuna nala. Nachuna Jesús wa pi, «lhuwa tachananat, pero lakskujnin ni lu chalhuwa» uma limasiya pi lakapara xlitatlawat uma taskujut, chuna la akxni wi tuku tamakgalama nila lhuwa kilhtamaku makgxtakgkan: namakikan akxni nina lakatsala xkilhtamaku (Mat. 9:37, NM).
3. ¿La limasiyakgo lhuwa kstalaninanin Cristo pi katsikgo pi lu xlakaskinka natalichuwinan Dios?
3 Xlakata lu xlakaskinka nalichuwinanaw Dios, talakaskin tlakg nalimaxtuyaw kilhtamaku chu nalimaklakaskinaw putum kilitliwakgakan. Lhuwa natalan chuna tlawamakgolh. Wilakgolh tiku lakkaxwilikgonit xlatamatkan xlakata ni lhuwa tuku nakgalhikgo chu tlakg nalichuwinankgo Dios, makgapitsi precursores wankgo, misioneros o skujkgo kBetel. Lhuwa skujnikgo Dios. Xlikana lhuwa tuku limakgxtakgkgo xlakata natlawakgo uma taskujut chu tanu tanu taʼakglhuwit kgalhikgo, pero Jehová lhuwa kasikulunatlawa. Chu lu lipaxuwayaw xlakata chuna skujmakgolh (kalikgalhtawakga Lucas 18:28-30). Amakgapitsi natalan nila precursores wankgo, pero lu limaxtukgo kilhtamaku xlakata nakamasiyanikgo tuku nakalakgmaxtu, xkamankan chu latamanin (Deu. 6:6, 7).
4. ¿Tuku xlakata makgapitsi kstalaninanin Cristo tuwa makgkatsikgo chuntiyaku lhuwa nalichuwinankgo Dios?
4 Chuna la akxilhwi, latamanin tlakg lakapara wi tuku tlawakgo akxni akxilhkgo pi nialh lhuwa kilhtamaku kgalhikgo. La uku lamaw kxaʼawatiya kilhtamaku, chu Biblia lhuwa tuku lichuwinan nema likatsiyaw pi lamaw xaʼawatiya kilhtamaku chu putum tuku lama litasiya pi chuna kgantaxtuma (Mat. 24:3, 33; 2 Tim. 3:1-5). Pero niti katsi tukuya kilhtamaku namin lisputni, chuna wa Jesús akxni lichuwinalh «xaliʼukxilhtit [...] akxni nasputa nkatuxawat», o kakilhtamaku. Jesús wa: «Akxni yama nkilhtamaku nchuna nalay, chu xatu hora nawan, tini katsiy, asta ni mpala wa angeles xala kʼakgapun, chu na ni mpala wa xaKam, wampi xman wa nkinTlat» (Mat. 24:36). Xlakata ni katsiyaw tukuya hora namin lisputni, chu tiku lhuwata kata kgalhimakgolh kamilh lisputni, tuwa makgkatsikgo chuntiyaku lu lhuwa nalichuwinankgo Dios (Pro. 13:12). ¿Chuna makgkatsiya? ¿Tuku tlan nakinkamakgtayayan xlakata tlakg lakapara natlawayaw taskujut nema Jehová chu Jesucristo kinkalakgayawakgon?
Katlawaw la tlawalh Jesús
5. ¿La limasiyalh Jesús pi lu xlakaskinka xakxilha lu nalichuwinan Dios?
5 Ni anan achatum tlakg tlan liʼakxilhtit kajwatiya xla Jesucristo xlakata la xlilhuwa chu lu xlakaskinka naʼakxilhaw nalichuwinanaw Dios. Pulaktum tuku xlakata chuna tlawalh, wa pi lhuwa tuku xlitlawat xwanit chu kaj xkgalhi akgtutu kata aʼitat. Pero maski ni lhuwa kilhtamaku xkgalhi, lhuwa lichuwinalh xaxlikana takanajla, ni anan achatum tiku nachuna tlawalh. Masiyalh xtukuwani Dios, chu tuku lakapastaknit natlawa xTlat, lichuwinalh xalakwan xalaksasti tamakatsin xlakata Tamapakgsin, kawanilh tiku xpulalinkgo takanajla pi ni xlikana tuku xmasiyakgo chu asta limakgnika xlakata xtataya pi Jehová lakgchan namapakgsinan. Nachuna Jesús lhuwa liskujli xlakata xliputum kilhtamaku nalichuwinan Dios, kamakgtayalh chu kamapaksalh latamanin xanikuta niku xʼan (Mat. 9:35). Xlikana, niti a tlawa chuna la tlawalh Jesús chu ni lhuwa kilhtamaku chuna litlawalh. Tlawalh putum tuku chatum chixku tlan xtlawalh (Juan 18:37).
6. ¿Tuku tlakg xlakaskinka xakxilha Jesús kxlatamat?
6 ¿Tuku xlikatsi Jesús pi lu lakapara xlitlawat xwanit taskujut nema xlakgayawakanit? Wantuku makgtayalh nakatsi lakapara natlawa taskujut chuna la Dios lakkaxwilinit, wa tuku xlichuwinanit Daniel, niku xwan pi xtaskujut Mesías xʼama sputa «kxitat semana», xkilhchanima kaj akgtutu kata aʼitat (Dan. 9:27). Pero akxni xtitaxtunit tsinu kilhtamaku, akxni tlan xmakgamakglhtinankanit kJerusalén kkata 33, Jesús wa: «Akchanitta nkilhtamaku akxni Xkam nchixku, natama[...]lankiy» (Juan 12:23). Xkatsi pi atsinu xtsankga namakgnikan. Pero ni wa uma tuku matlawilh pi lhuwa naskujni Dios. Lhuwa lichuwinalh Dios xlakata tlakg xlakaskinka xakxilha natlawa xtalakaskin xTlat chu xliputum kilhtamaku nakapaxki latamanin. Xlakata lu xkapaxki latamanin, laksakli makgapitsi kstalaninanin chu kamasiyanilh la nalichuwinankgo Dios xlikalanka país. Chu kamasiyanilh taskujut nema xmatsukinit chuntiya xtatlawalh chu tlakg xtlawakgolh nixawa nema Jesús tlawalh (kalikgalhtawakga Juan 14:12).
7, 8. ¿Tuku xlakata Jesús kamaxtulh ktemplo tiku xtlawamakgolh negocios chu tuku lilakapastakkgolh xʼapóstoles?
7 Nina lhuwa kilhtamaku xtitaxtunit akxni Jesús tsukulh lichuwinan Dios, chu xtlawamaka Paskua kkata 30, liwana masiyalh pi nipara tsinu xlakaskin namaxkajwanikan la nakakninanikan xtlat. Akxni katachalh xtamakgalhtawakgen kJerusalén, akxilhli «kxpulakni templo wa nti kstamakgo ntoro, chu nkalhniluj, chu ntijtimput, chu na anta xwilakgo xlakgpalinanin tumin». ¿Tuku tlawalh Jesús chu tuku lakpuwankgolh kstalaninanin? (Kalikgalhtawakga Juan 2:13-17.)
8 Tuku Jesús wa chu tlawalh ama kilhtamaku kamalakapastakalh kstalaninanin tuku xlichuwinanit David: «Xliwakg kinaku klakgkatsan min[chik]» (Sal. 69:9). ¿Tuku xlakata lakapastakkgolh uma texto? Xlakata tuku Jesús tlawalh xʼama limini lhuwa taʼakglhuwit. Tiku xpulalinkgo uma nitlan negocios nema xlitlajakgo tumin, wa sacerdotes chu escribas xalak templo. Akxni kalakxtlawanilh xnegocioskan chu lichuwinalh tuku nitlan xtlawamakgolh, xkatakgalhima taʼakglhuwit tiku xmapakgsinankgo. Xʼapóstoles akgatekgskgolh pi wantuku Jesús tlawalh limasiyalh pi nipara tsinu xlakaskin nitlan nalimaklakaskinkan xchik Dios, uma wamputun pi nipara tsinu xlakaskin namaxkajwanikan xaxlikana takanajla. Kaʼakxilhwi tuku kilhchanima uma tuku tlawalh Jesús chu la makgtayanan xlakata nialh lhuwa kilhtamaku anan.
Nipara tsinu mastakan talakaskin chu sputma kilhtamaku
9. ¿Tuku kilhchanima «lakgkatsankan»?
9 Maktum diccionario wan pi lakgkatsanankan wamputun «wi tuku lu limakgtayaputunkan achatum o atanu». Na wamputun la akxni tuku lu lakgatikan tlawakan, lu ni makgxtakgnanputunkan, chu xatapaxuwan tlawakan. Chu uma tuku wan diccionario, limasiyalh Jesús akxni chuna tlawalh xtaskujut. Nachuna Biblia Traducción en lenguaje actual wan: «Xlakata lhuwa kpaxki mintemplo, kilhkuyuma». Wa xlakata xʼapóstoles lilakapastakkgolh tuku wan Salmo akxni akxilhkgolh xMakgalhtawakganakan ktemplo. Pero ¿tuku tlawalh pi xnaku Jesús xtachuna la lhkuyat wa chu makgtayalh xlakata chuna xtlawalh?
10. ¿La limaklakaskinkan kBiblia tachuwin «lakgkatsanankan»?
10 Tachuwin xahebreo nema matitaxtikan xatotonaco «lakgkatsanankan» nema lichuwinalh David ksalmo takilhtinit kmakgapitsi textos nema kilhchanima «lakgkatsaninan» o «lakgsitsinankan». Lakgachunin Traducción del Nuevo Mundo chuna lichuwinan «tiku lakaskin kajwatiya [...] nakakninanikan» (kalikgalhtawakga Éxodo 20:5; 34:14 chu Josué 24:19). Akgtum diccionario xlakata Biblia wan tuku wamputun uma tachuwin: «Limaklakaskinkan akxni lichuwinankan tamakgaxtokgat [...]. Akxni chixku lakgsitsi chu lakaskin pi xpuskat kajwatiya napaxki. Nachuna Dios lakaskin pi ni atanu tiku natatayakgo tiku tapakgsinikgo». Wa xlakata lakgkatsanankan nema lichuwinan Biblia ni wa kilhchanima tuku makgkatsikgo tiku tatayakgo akgtum equipo. Tuku xlichuwinama David wa tuku makgkatsiyaw nema ni masta talakaskin atanu nalakgachixkuwilikan, wi tiku nitlan nalichuwinankan o lakkaxtlawaputunkan tuku nitlan tlawanika achatum.
11. ¿Tuku xlakata Jesús lu lhuwa lichuwinalh Dios?
11 Akxni xtamakgalhtawakgen Jesús akxilhkgolh tuku tlawalh ktemplo, lakapastakkgolh salmo nema tsokgli David. Pero na kililakapastakatkan pi Jesús chuna tlawalh ni kaj xlakata xkatsi pi nialh lhuwa kilhtamaku xtsankgani xlakata nalimakgantaxti xtaskujut, wata lu xkgalhmakgtayaputun xaxlikana takanajla chu ni xlakaskin nitlan xlichuwinanka xTlat. Wa xlakata akxni xakxilha pi xtukuwani Dios nitlan xlichuwinamaka o xlakgmakgamaka, tunkun xlakkaxtlawaputun. Wa uma xtlawa xlichuwinalh tuku nitlan xtlawamakgolh tiku xpulalinkgo takanajla chu xkamakgtaya tiku nitu xkaliʼakxilhkan chu lhuwa tuku nitlan xkatlawanikan (Mat. 9:36; 23:2, 4, 27, 28, 33).
Lu katatayaw xaxlikana takanajla
12, 13. ¿Tuku tlawakgo sacerdotes xlakata 1) xtukuwani Jehová? 2) xTamapakgsin Dios?
12 Tuku tlawakgo tiku wankgo pi skujnanikgo Dios nitlan, xtachuna kxapulana siglo, max asta tlakg nitlan. Kaj kalakpuwaw la akxilhkgo xtukuwani Dios. Akxni Jesús kamasiyanilh kstalaninanin la natlawakgo oración, tuku pulana kamasiyanilh naskinkgo wa uma: «Katamasantujlilh mintukuwini» (Mat. 6:9). Pero ¿tuku tlawamakgolh la uku tiku pulalinkgo takanajla, chu sacerdotes tiku pulalinkgo nixaxlikana kstalaninanin Cristo? Ni kamasiyanikgo namapakuwikgo Jehová akxni natlawanikgo oración chu xasanto naʼakxilhkgo, wata masiyakgo tuku ni xaxlikana nema tlawa pi nitlan natalichuwinan kiMalakatsukinakan, masiyakgo Trinidad, pi kgalhiyaw akgtum espíritu nema ni niy chu pi anan pupatin. Uma tlawa pi latamanin nalakpuwankgo pi Dios niti la lakgapasa, nila akgatekgsniyaw, ni lakgalhamanan chu nitlan likatsi. Nachuna xlakata nitlan la limakgolh xlatamatkan chu kaj limasiyakgo pi tlan likatsikgo, sacerdotes tlawakgo pi nitlan natalichuwinan xtukuwani Dios (kalikgalhtawakga Romanos 2:21-24). Nachuna lu ni masiyakgo xtukuwani asta ni wilikgo kBiblia, chu uma tlawa pi latamanin tlakg tuwa namakgkatsikgo natalakatsuwinikgo Jehová chu tlan natalalinkgo (Sant. 4:7).
13 Jesús na kamasiyanilh kstalaninanin natlawakgo oración xpalakata xTamapakgsin Dios: «Kamilh milimapakgsin. Wa nkatatlawalh ntu mintalakaskin, xtachuna lantla nkʼakgapun, nachuna kawa nkatiyatna» (Mat. 6:10). Chu maski sacerdotes makglhuwa wankgo uma oración, kawanikgo kstalaninanin kamakgtanukgolh kpolítica o atanu tuku lakkaxwilikgonit latamanin. Ni kajwatiya uma na ni kaʼakxilhputunkgo tiku lichuwinankgo xTamapakgsin Dios. Wa xlakata tiku tapakgsikgo knixaxlikana takanajla ni lu lichuwinankgo xTamapakgsin Dios, xlakata ni kanajlakgo.
14. ¿Tuku limasiyakgo pi ni xlakaskinka liʼakxilhkgo sacerdotes xTachuwin Dios?
14 Akxni Jesús xtlawani oración xTlat, liwana wa: «Mintachuwin, talulokgtat» o xaxlikana (Juan 17:17). Akxni nina xtaspitpara kʼakgapun lichuwinalh pi xʼama masta «skujni xatalipaw chu xaskgalala» xlakata xkamaxkikgolh tuku xlitatliwakglhli xtakanajlakan (Mat. 24:45, NM). Tiku pulalinkgo ni xaxlikana takanajla wankgo pi kaliyawakanit nalichuwinankgo xTachuwin Dios. Pero ¿liwana makgantaxtikgonit taskujut nema mastanit Malana? Lhuwa wankgo pi tuku Biblia lichuwinan kaj cuentos chu ni xaxlikana. Ni kamasiyanikgo tuku nalimatliwakglhkgo xtakanajlakan chu tlan nalimakgkatsikgo, wata kamasiyanikgo xtamasiy lakchixkuwin nema “ni lakwan talakapastakni” o kaj kamasiyanikgo tuku kgaxmatputunkgo. Nachuna ni xlakaskinka akxilhkgo tastakyaw xalak Biblia chu limaklakaskinkgo chuna la lakpuwankgo pi tlan (2 Tim. 4:3, 4).
15. ¿La makgkatsiya akxni akxilha lhuwa tuku nitlan tlawakgo sacerdotes kxtukuwani Dios?
15 Akxni katsikgo pi kxtukuwani Dios tiku matsokgninalh Biblia, limaklakaskinkgo akxni tlawakgo tuku nitlan tiku pulalinkgo takanajla, tiku xlikana skujnaniputunkgo Dios nitlan limakgkatsikgo o max nialh kanajlaniputunkgo Dios chu xTachuwin chu kaʼakgchipa Satanás chu xkakilhtamaku. ¿La makgkatsiya wix akxni akxilha pi chali chali chuna tlawamakgolh? ¿La makgkatsiya akxni akxilha pi nitlan lichuwinankan kinTlatikan tiku lu paxkiyaw chu na nitlan lichuwinankan xtukuwani? ¿Ni xlikana pi wi tuku tlawaputuna xlakata nialh chuna natlawakgo? Akxni kaʼakxilhaw pi lhuwa tiku tlan likatsikgo kaʼakgskgawimaka chu nitlan kalikatsinikgo tiku pulalinkgo xtakanajlakan, ¿ni xlikana pi kamakgtayaputuna? Akxni Jesús kaʼakxilhli pi lhuwa latamanin «kaj lhtuj xtamakgaxtakgkonit xtakgawanikgonit xtachuna nkalhnilu ntu ni kgalhikgoy xmapuchuwanna» ni kaj kalakgalhamalh, wata «titsukulh masiyunikgo lhuwa nkatuwaj» (Mat. 9:36; Mar. 6:34). ¡Lu limasiyalh pi xtataya xaxlikana takanajla! Nachuna kilitlawatkan la Jesús.
16, 17. 1) ¿Tuku kinkamakgtayayan xlakata lu naskujniyaw Dios? 2) ¿Tuku naʼakxilhaw kʼartículo nema aku mima?
16 Akxni nachuna akxilhaw taskujut nema tlawamaw, nachuna makgkatsiyaw la tsokgli apóstol Pablo anta 1 Timoteo 2:3, 4 (kalikgalhtawakga). Xlikana, ni kaj xlakata wilaw kxaʼawatiya kilhtamaku lhuwa lichuwinanaw Dios, wata lichuwinanaw xlakata katsiyaw pi wa uma xtalakaskin. Jehová lakaskin pi latamanin nakatsikgo tuku xaxlikana, kakatsinikgolh la nakakninanikgo chu kamakglhtinankgolh xtasikulunalin. Akinin ni kaj skujnaniyaw Dios xlakata katsiyaw pi nialh lhuwa kilhtamaku tsankga, wata malankiputunaw xtukuwani, chu na masiyaputunaw xtalakaskin. Tlan nawanaw pi wa tuku tlawa pi lu tatayaputunaw xaxlikana takanajla (1 Tim. 4:16).
17 Jehová kinkasikulunatlawanitan xlakata kinkawaninitan tuku natlawa xpalakata latamanin chu Katiyatni. Xlakata katsiyaw uma, tlan nakalimakgtayayaw kintalatamankan xlakata napaxuwakgo la uku, nakgalhkgalhikgo latamat nema ni kgalhi xlisputni, chu nalakgtaxtukgo akxni namalakgsputukan xkakilhtamaku Satanás (2 Tes. 1:7-9). Wa xlakata ni kamastaw talakaskin naxlajwanan kintakanajlakan xlakata lakpuwanaw pi xkilhtamaku Jehová tamakgapalama, wata kalipaxuwaw xlakata kgalhiyawku kilhtamaku nalimasiyayaw pi lu tatayayaw xaxlikana takanajla (Miq. 7:7; Hab. 2:3). Artículo nema aku mima naʼakxilhaw tuku kilitlawatkan xlakata chuntiya nalimasiyayaw pi xlikana tatayayaw xaxlikana takanajla.
¿Tlan xkgalhtinanti?
• ¿Tuku tlawalh pi Jesús lu lhuwa lichuwinalh Dios?
• ¿Tuku wamputun «lakgkatsanankan» nema lichuwinan Biblia?
• ¿Tuku lama la uku nema tlawa pi lu xlikana natatayayaw xaxlikana takanajla?
[Takgalhskinin]
[Epígrafe xla página 10]
Jesús tlakg xlakaskinka xakxilha natlawa xtalakaskin xTlat chu nakapaxki latamanin
[Epígrafe xla página 12]
Anan lhuwa tuku xlakata nalimasiyayaw pi xlikana tatayayaw xaxlikana takanajla