PULAKKITSIS

Kilikatsinitkan xlakata Dios

BIBLIA WAN: «Xatapaxuwan latamakgo tiku katsikgo pi lakaskinkgo tuku xla Dios» (Mateo 5:3, NM).

¿TUKU XLAKATA? Lhuwa miles takanajla ni lakxtum masiyakgo la tlan nakatsiniyaw xlakata Dios. Wa xlakata lhuwa katsiputunkgo la lakaskin Dios nalakgapaskgo. Makgapitsi tiku lu kalakgapaskan wankgo pi ni xlakaskinka nakanajlaniyaw Dios, nakakninaniyaw chu asta kinkatlawaniyan tuku nitlan. Maktum revista nema wanikan Macleanʼs lichuwinan xlakata tuku lakpuwan chatum tiku ni kanajlani Dios nema lu lakgapaskan, anta wan: «Tuku kanajlakgo kstalaninanin Cristo, —nema wi tuku anan, nipara ciencia tlan maʼakgatekgsanan chu nipara akinin akgatekgsaw— [...] tlawa pi nialh lu xlakaskina naʼakxilhaw kilatamatkan nema kgalhiyaw chu tlawa pi tlakg nitlan nalikatsiyaw».

¿TUKU KILITLAWATKAN? Lu xlakaskinka nalakputsananiyaw komo xlikana lama Dios (Romanos 1:20; Hebreos 3:4). Ni kamastaw talakaskin pi wi tuku natlawa pi nialh naputsayaw xtakgalhtin umakgolh lu xlakaskinka takgalhskinin: ¿Tuku xlakata lamaw unu? ¿Wi niku latamayawku akxni ninitawa? ¿Tuku xlakata anan lhuwa tapatin? ¿Tuku kilitlawatkan xlakata namakgapaxuwayaw Dios? Nila xatapaxuwan nalatamayaw komo ni natekgsaw xtakgalhtin umakgolh takgalhskinin.

Na ni nakanajlayaw putum tuku nakinkawanikanan. Biblia kinkawaniyan pi nalimaklakaskinaw “kintalakapastaknikan” xlakata naliʼakxilhaw tuku Dios tlan akxilha (Romanos 12:1, 2). Xlikana pi tuwa likgalhtawakgakan Biblia chu tlawakan tuku listakyawanan pero lu makgtayanan. Pulana, kinkamakgtayayan ni nakgalhiyaw lhuwa taʼakglhuwit, tlakg tlan namakgkatsiyaw chu tlakg xatapaxuwan nalatamayaw. Chu uma tuku lichuwinamaw xaxlikana. Lhuwa millones tiku tanu tanu niku xalanin kamakgtayalh akxni katsinikgolh tuku xaxlikana xlakata Dios chu xtalakaskin.

Chu akxni akxilhaw la kinkamakgtayayan akxni kgalhakgaxmataw Dios, tlakg napaxkiyaw. ¿Wanikgonitan xtatayananin Jehová pi tlan namasiyanikgoyan tuku wan Biblia? Komo namakgalhtawakgakgoyan max nachuna nalakpuwana la apóstol Pablo, xla wa: «[Kxaxlikana] takanajla tlan natekgsa tuku lhuwa kgalhi xtapalh, uma kilhchanima nalipaxuwaya tuku kgalhiya» (1 Timoteo 6:6, La Biblia al Día, edición para España).

[Epígrafe xla página 8]

Kalakputsanani tuku lakgati Dios