Katalakatsuwini Dios

«Komo wix naputsaya, namasta talakaskin natekgsa»

1 CRÓNICAS 28:9

¿LAKGAPASA Dios? Tuwa kgalhtikan uma takgalhskinin. Xlakata xlikana nalakgapasaw Dios, talakaskin nakatsiniyaw xtalakaskin chu la lakapastaknan. Komo chuna natlawayaw, lu tlan natalalinaw chu nakinkamakgtayayan nalinaw kilatamatkan chuna la lakaskin. Pero ¿xlikana tlan natalalinaw Dios? Komo tlan natalalinaw Dios, ¿tuku kilitlawatkan? Tekgsaw xtakgalhtin umakgolh takgalhskinin akxni nalikgalhtawakgayaw tastakyaw nema mapakgsina David maxkilh xkgawasa Salomón nema tatsokgnit 1 Crónicas 28:9.

Kalilakpuwanti uma. Max tipuxum kata David xmapakgsinamaja kʼIsrael, chu kachikin lu tlan xwi. Nialh makgas Salomón xʼama tawila kxlakgxokgo pero xla lu kgawasaku xwanit (1 Crónicas 29:1). ¿Tuku wanilh David xkgawasa akxni atsinu xtsankga nani?

Mapakgsina David lhuwata kata lu liwana kskujnanima Dios, chu uma tuku tsukulh wani xkgawasa: «Kinkgawasa Salomón kalakgapasti xDios mintlat». David ni kaj xwanima pi xkatsinilh xlakata Dios. Salomón na xkakninani Jehová, xDios David. Chu xlakata lhuwata libros xalak Biblia xaHebreo xtatsokgkgonita, Salomón xkatsi tuku xwakgo umakgolh xasanto tatsokgni xlakata Dios. Chatum tiku liskuja nalakputsanani Biblia wan pi tachuwin xahebreo nema tamatitaxti xatotonaco «lakgapaskan» kilhchanina «akxni wi tiku lu tlan latalalin». Uma liwana limasiya pi David xlakaskin pi xkgawasa lu tlan xtalalilh Dios, chuna la David lu tlan xtalalin Dios chu lu xlakaskinka xakxilha.

Akxni Salomón tlan xtalalilh Dios xʼama makgtaya xlakata tlan xlakapastaknalh chu la tlan xlilh xlatamat. Pero David na wanilh xkgawasa uma tastakyaw: «Kaskujnani [Dios] xliputum minaku [o anima] chu xatapaxuwan». * David pulana wani xkgawasa pi kalakgapasli Dios chu alistalh wani kaskujnilh. Akxni wi tiku liwana lakgapasa Dios, uma tlawa pi naskujniputun. Pero ni naliskujniyaw «akgtum naku nema lakgaputiy lakapastaknan» (Salmo 12:2, NM). David lu skinilh xkgawasa pi lu tlan kaskujnilh Dios chu xliputum xnaku.

¿Tuku xlakata David wani xkgawasa pi liwana chu tlan talakapastakni nalikakninani Dios? David kinkawaniyan: «Putum naku Jehová kalakputsananima, chu akgatekgsma putum talakapastakni». Salomón ni kaj xliskujnanit Dios xlakata namakgapaxuwa xtlat, xlakata Dios kaputsa tiku xliputum xnaku skujnaniputunkgo.

¿Xʼama skujni Salomón chuna la xtlat skujnanilh Jehová chu lu tlan xʼama talalin? Salomón xlilaksakat xwanit komo chuna xtlawaputun. David wanilh: «Komo wix naputsaya, namasta talakaskin natekgsa, pero komo namakgxtakga, xla xliputum kilhtamaku nalakgmakganan». Chuna xla, xlakata Salomón tlan xtalalilh Dios, xtalakaskin xliskujli xlakata nalakgapasa. *

Uma lu tlan tastakyaw nema David wanilh xkgawasa, kinkamasiyaniyan pi Jehová lakaskin kaliskujwi xlakata tlan natalalinaw. Pero talakaskin naputsayaw chu liwana nalakgapasaw, chu Biblia tlan nakinkamakgtayayan. Chu akxni nalakgapasaw nakinkamakgtayayan xliputum kinakujkan chu tlakg naskujnaniyaw. Jehová chuna lakaskin... chu chuna minini nakakninaniyaw (Mateo 22:37).

[Notas nema wilakgo kpágina]