PULAKTATI

Liwana nalaksakaw kiʼamigoskan

BIBLIA WAN: «Wantiku katalalin xalakgskgalalan latamanin, xaskgalala nawan» (Proverbios 13:20).

¿TUKU XLAKATA? Xtayatkan chu la chuwinankgo tiku katalalinaw kinkapasayan chu max natlawa pi nialh tlan nalimputunaw kilatamatkan (1 Corintios 15:33).

Kaʼakxilhwi tuku lalh akxni kgalhkutiy israelitas taspitkgolh xlakata kiskgalakgolh Canaán niku xlamakgolh xtalamakgasitsinkan. Anta kBiblia wan pi kgalhkaw tiku kiskgalakgolh ama tiyat «nitlan tuku kawanikgolh israelitas xlakata tiyat nema kiskgalakgolh». Chatiy lu tlan lichuwinankgolh Canaán chu wankgolh pi «lu xatlan tiyat». Lu nitlan kitaxtulh, xlakata israelitas nachuna tsukukgolh lakpuwankgo la xkgalhkawkan tiku nitlan chuwinankgolh. Wa xlakata, «putum israelitas pixlanka tsukukgolh wankgo, [...] tuku nitlan» (Números 13:30–14:9).

La uku nachuna lhuwa tiku «wankgo tuku nitlan kaʼakgspula kxlatamatkan» (Judas 16, NM). Akxni kiʼamigoskan tiku kajwatiya lakpuwankgo tuku nitlan kakitaxtuni, maski akinin tlan lakapastaknanaw max na nakinkamapasikgoyan nitlan xtalakapastaknikan.

¿TUKU KILITLAWATKAN? Liwana nakgaxmataw tuku lichuwinankgo tiku katalalinaw xlakata nakatsiyaw la xtayatkan. Kawiliw akgtum liʼakxilhtit, ¿kajwatiya lichuwinankgo tuku kgalhikgo? O max ¿putum kilhtamaku lichuwinamakgolh tuku kgalhiputunkgo? Chu akinin, ¿wi tuku tlawayaw xlakata amakgapitsin nakinkalakgkatsananikgoyan, o kamakgtayayaw ni nalilakgaputsakgo tuku ni kgalhikgo?

Biblia lichuwinan David chu Jonatán nema kinkawilinikgon akgtum lu tlan liʼakxilhtit xlakata la nalatalalin amigos. Xtlat Jonatán xwanikan Saúl, mapakgsina xalak Israel, wa xlakata alistalh wa xlakgchalh mapakgsina nalitaxtu. Pero Dios xwanit pi wa David mapakgsina xʼama wan. Wa xlakata Saúl xmakgniputun David, pero tsalalh kdesierto chu ni lhuwa kata anta tamakgxtakgli. Pero ¿tuku tlawalh Jonatán? Xla ni sitsilh, wata makgamakglhtinalh tuku Jehová lakkaxwililh chu makgtayalh xʼamigo (1 Samuel 19:1, 2; 20:30-33; 23:14-18).

Tiku xlikana kiʼamigoskan lakaskinkgo tlan kakinkakitaxtunin, chu ni kinkalakgkatsananikgoyan (Proverbios 17:17). Pero xlakata nakgalhiyaw amigos tiku chuna likatsikgo, akinin nachuna kilikatsitkan (Filipenses 2:3, 4).

[Epígrafe xla página 7]

¿Kinkamakgtayakgoyan kiʼamigoskan natlawayaw tuku tlan?