PULAKTUM

Napaxkiyaw latamanin chu ni wantuku nakgalhiputunaw

BIBLIA WAN: «Wanti xman [laka]pastakmakgo nakgalhikgoy lhuwa tumin katuwa wantu lixkajnit tsukuy lakapastakgoy» (1 Timoteo 6:10, Hua Xasasti Talaccaxlan, 1999).

¿TUKU XLAKATA? Radio chu televisión kinkamalakpuwanikgoyan pi wi tuku kinkatsankganiyan. Chu kinkamalakpuwaniyan pi natamawayaw wantuku aku taxtulh, wantuku tlakg tlan chu wantuku tlakg lanka, maski lu lhuwa naskujaw xlakata nakgalhiyaw. Chu lakapara lakgatiyaw tumin chu tuku tlan litamawakan. Biblia kinkamalakapastakayan pi wantiku lu lhuwa lakgati tumin nikxni akchani. Mapakgsina Salomón lichuwinalh, «wantiku lu lakgati plata nikxni katiʼakchanilh xplata, chu wantiku rico na ni akchani xtumin» (Eclesiastés 5:10).

¿TUKU KILITLAWATKAN? Natlawayaw la Jesús, Jesús tlakg xkapaxki latamanin nixawa tuku xkgalhilh. Wa xlakata makamastalh putum tuku xkgalhi: xlatamat (Juan 15:13). Jesús lichuwinalh: «Xaliwaka ntlan [...] nalilatapaya ntu natakinana, ni xawa ntu namakgamakglhtinana» (Hechos 20:35). Komo nakamaxkiyaw kinkilhtamakujkan chu tuku kgalhiyaw amakgapitsin na nakinkamaxkiputunkgoyan tuku kgalhikgo. Wa xlakata Jesús listakyawanalh uma tachuwin: «Kamastatit [o kamaskiwinantit], lakimpi na nakamaxkikanatit» (Lucas 6:38). Wantiku lu lakgatikgo tumin nikxni kaʼakchani chu lu lipatinankgo (1 Timoteo 6:9, 10). Pero akxni paxkinanaw, chu makgkatsiyaw pi na kinkapaxkikanan lu xlikana lipaxuwayaw.

Akstu kakinkatlawanikan uma takgalhskinin: «¿Tlan ni lhuwa tuku xakkgalhilh? ¿Tlan wi tuku nialh xakmaklakaskilh? ¿Xlikana kmaklakaskin tuku ktamawaputun?». Komo nakuentajtlawayaw kinkilhtamakujkan chu kilitliwakgakan, tlan pulana natlawayaw tuku tlakg xlakaskinka: nakamakgtayayaw amakgapitsin chu naskujnaniyaw Dios, wantiku kinkamaxkiyan putum tuku kgalhiyaw (Mateo 6:24; Hechos 17:28).

[Epígrafe xla página 4]

«Kamastatit, lakimpi na nakamaxkikanatit»