Tuku katsiputunkgo tiku likgalhtawakgakgo

¿Xlakaskinka namakgtapakgsiyaw kʼakgtum takanajla?

▪ ¿Ni makgtapakgsiputuna kʼakgtum takanajla xlakata nitlan akxilha pi tiku ankgo kaj limasiyakgo pi tlan likatsikgo pero ni latalalin asta wantiku pulalinkgo takanajla? Komo chuna lakpuwana, max nawana pi xlikana tuku wan uma refrán xaʼespañol: «Maski ksikulan tawilakan pero makgat tawilanikan Dios».

Max wix kanajlaniya Biblia chu lakpuwana pi mapakgsinanin xlimaxkitkan talakaskin latamanin nalaksakkgo takanajla nema nalakgatikgo. Pero max natlawaya uma takgalhskinin: «¿Pi xlikana Dios skin pi tiku kakninaniputunkgo chuna la xlilat, talakaskin namakgtapakgsikgo kaj kʼakgtum takanajla?».

Chuna lakaskin. ¿Tuku xlakata liwana katsiyaw pi chuna? ¿Pi tlan namakgtapakgsiyaw ktakanajla nema kaj akinin nalaksakaw?

Xlakata nakatsiyaw xtakgalhtin umakgolh takgalhskinin, kaʼakxilhwi tuku tlawalh Jesús. ¿Xtapakgsi kʼakgtum takanajla? Xfamilia Jesús chu amakgapitsi judíos xʼankgo ktemplo xalak Jerusalén xlakata namakgantaxtikgo tuku xkaskinikan natlawakgo kxtakanajlakan. Akxni aktsinajku xwanit Jesús xkataʼan ktemplo (Lucas 2:41-43). Chu akxni lankata xwanit xkatatamakxtumi amakgapitsi judíos kxpukgalhtawakgakan xlakata nakakninani Dios (Lucas 4:14-16). Akxni Jesús tachuwinalh chatum puskat tiku tanu takanajla xkgalhi wanilh: «Akinin kkakninaniyaw tuku klakgapasaw» (Juan 4:22, NM). Uma tuku wa liwana limasiyalh pi xmakgtapakgsi kxtakanajlakan judíos.

Alistalh Jesús lichuwinalh pi xlakata judíos xʼamakgolh lakgmakgankgo, Dios na xʼama kalakgmakan xlakata nitlan xkakninanikgo (Mateo 23:33–24:2). Pero na wa pi tiku xkakninaniputunkgolh Dios la lakgati xtalakaskin namakgtapakgsikgo kʼakgtum takanajla nema talakkaxwilinit. Jesús kawanilh kstalaninanin: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:35). Komo chatum kstalanina Cristo ni xkatatamakxtumilh xnatalan, nila xkalimasiyanilh pi xkapaxki. Jesús na lakatanks wa pi xlakata takanajla kaj akgtiy tiji anan. Akgtum «titlanka xatiji» chu «an kputsankgan» o kpulakgsputni. Nachuna wi akgtum «titsu xamalakcha, chu xatiji, na luwa titsu wa ntu an klatamat, na [ni lhuwa] wa nti ntakgskgoy» (Mateo 7:13, 14).

Uma liwana limasiya pi Dios ni makgapaxuwa putum takanajla nema anan. Biblia wan pi makgapitsi «kaj xlimasiyakgolh pi kakninanikgo Dios, pero xlakata xtlawakgolh tuku nitlan xlimasiyakgolh pi ni xaxlikana xtakanajlakan». Chu Biblia na wan: «Nipara tsinu kakatalalipi latamanin tiku chuna likatsikgo» (2 Timoteo 3:5, Versión Popular). Komo nakaputsayaw tiku tlawamakgolh ktiji nema linan klatamat chu nakatalalinaw, nakinkamatliwakglhkgoyan la uku chu alistalh lu tlan tuku namakglhtinanaw (Hebreos 10:24, 25).

¿La tlan nakatsiya tukuya takanajla wi kxatitsu tiji? Natekgsa xtakgalhtin uma takgalhskinin klibro ¿Tuku xlikana masiyay Biblia? kcapítulo 15. * Akxni nalikgalhtawakgaya namakgtayayan nalaksaka tukuya takanajla tlan namakgtapakgsiya.

[Notas nema wilakgo kpágina]