La nalimaklakaskinaw kilhtamaku akxni ni tamakgaxtokgnitaw
La nalimaklakaskinaw kilhtamaku akxni ni tamakgaxtokgnitaw
«Pus wanti matlaniy pi chuna nalatamay lantla kkawaninitan uku, pus xlikana pi chuna kalitsakgsalh.» (MAT. 19:12, Hua Xasasti Talaccaxlan, TXS, 1999)
1, 2. 1) ¿La xliʼakxilhkgo ni tamakgaxtokgkgan lhuwa skujnanin Jehová, la Pablo chu Jesús? 2) ¿Tuku xlakata makgapitsi ni akxilhkgo ni natamakgaxtokgkgo la akgtum tamaskiwin xla Dios?
XLIKANA pi tamakgaxtokgat akgtum lu tlan tamaskiwin nema Dios kinkamaxkinitan (Pro. 19:14). Maski chuna lhuwa kstalaninanin Cristo tiku ni tamakgaxtokgkgonit chu lu paxuwakgo kxlatamatkan. Harold, tiku kgalhi 95 kata chu nikxni tamakgaxtokgli wan: «Maski lhuwa tiku katalalin chu lu klakgati nakilakgapaxialhnankan, na lu klipaxuwa akxni kiʼakstu kwi. Max kimaxkikanit tasikulunalin pi akstu naklatama».
2 Xlikana pi Jesucristo chu apóstol Pablo wankgolh pi akxni nina tamakgaxtokgnitaw akgtum tamaskiwin xla Dios xtachuna la tamakgaxtokgat (kalikgalhtawakga Mateo 19:11, 12 chu 1 Corintios 7:7). Putum tiku nina tamakgaxtokgkgonit ni kaj xlakata chuna laksakkgolh. Makgapitsi nina tekgskgo tiku natatamakgaxtokgkgo xlakata katuwa tuku nitlan kakitaxtuninit xlatamatkan. Makgapitsin akglhuwa kata xtamakgaxtokgkgonita, pero lakxtlawakgolh xtamakgaxtokgatkan xlakatin mapakgsinanin o nilh tiku xtatamakgaxtokgkgonit. ¿Tuku xlakata wanaw pi akxni nina tamakgaxtokgaw akgtum tamaskiwin xla Dios? ¿La tlan lhuwa tuku natlawayaw?
Akgtum tamaskiwin nema ni anan xtachuna
3. ¿Tuku tlan tlawakgo lhuwa kstalaninanin Cristo tiku ni tamakgaxtokgkgonit?
3 Tiku ni tamakgaxtokgkgonit tlakg lhuwa kilhtamaku kgalhikgo chu kaniwa niku tlan ankgo, wa xlakata tlakg tlan lhuwa naskujnikgo Dios, tlakg lhuwa tiku natalalinkgo chu tlakg tlan natalalinkgo Jehová (1 Cor. 7:32-35). Xlakata uma, lhuwa tuku tlan tlawakgo kstalaninanin Cristo «wanti matlanikgo [ni natamakgaxtokga]», maski ni lhuwa kilhtamaku. Nachuna wilakgo tiku ni xakstu xtamakgaxtakgputunkgo. Pero akxni talakgpalilh xlatamatkan, tlawakgolh oración, liwana lakapastakkgolh tuku xʼamakgolh tlawakgo chu akxilhkgolh pi Jehová tlan xkamakgtayalh maski ni xtamakgaxtokgkgolh. Wa xlakata laksakkgolh ni natamakgaxtokgkgo (1 Cor. 7:37, 38).
4. ¿Tuku xlakata ni anan tuku natlawa pi tiku ni tamakgaxtokgnit ni napaxuwakgo akxni naskujnikgo Jehová?
4 Tiku ni tamakgaxtokgkgonit liwana katsikgo pi ni talakaskin natamakgaxtokgkgo xlakata Jehová chu xkachikin lu nakapaxkikgo chu lanka xtapalh nakaʼakxilhkgo. Jehová putum chu chatunu chatunu xlakskujnin kapaxki (Mat. 10:29-31). Ni anan tuku natlawa pi Jehová nialh nakapaxki (Rom. 8:38, 39). Wa xlakata, maski tamakgaxtokgnitaw o ni tamakgaxtokgnitaw, ni anan tuku xlakata ni napaxuwayaw akxni naskujnaniyaw Jehová.
5. ¿Tuku talakaskin xlakata nalipaxuwayaw akxni nina tamakgaxtokgaw?
5 Pero nachuna la amakgapitsi xtamaskiwin Dios la akxni wi tiku tlan tlakgnan o tlan kgamanan, nachuna talakaskin naliskujaw xlakata liwana nalimaklakaskinaw kilhtamaku akxni nina tamakgaxtokgnitaw. Xlikana lu tlan nalimaklakaskinaw uma kilhtamaku maski chixku o puskat, kgawasaku o tiku lina kata, o xlakata xakstu chuna laksakli ni natamakgaxtokga o xlakata talakgpalilh xlatamat. Kaʼakxilhwi makgapitsi liʼakxilhtit xalak congregación kxapulana siglo nema nakinkamasiyaniyan la nachuna natlawayaw.
Lakgkgawasan chu laktsuman tiku ni tamakgaxtokgkgonit
6, 7. 1) ¿Tuku lu tlan tamaskiwin makglhtinankgolh xlaktsuman Felipe tiku nina xtamakgaxtokgkgonit? 2) ¿La limaklakaskilh Timoteo kilhtamaku akxni xakstu xlama chu tukuya tasikulunalin makglhtinalh xlakata xatapaxuwan skujnanilh Jehová akxni kgawasaku xwanit?
6 Felipe tiku xlichuwinan Dios chu kgalhtati xlaktsuman tiku nina xtamakgaxtokgkgonit na chuna lu lhuwa xlichuwinankgo Dios (Hech. 21:8, 9). Umakgolh laktsuman liwana limaklakaskinkgolh pi tlan xwankgo tuku aku nala, pulaktum tamaskiwin nema kamaxkilh espíritu santo nema xlichuwinanit Joel 2:28, 29.
7 Atanu kgawasa tiku lu tlan limaklakaskilh kilhtamaku akxni xakstu xlama wa Timoteo. Xlakata xtse Eunice chu xnana, o xtsiyuna, Loida lu tlan xmasiyanikgonit akxni aktsujku xwanit «xtatsokgnun Dios» (2 Tim. 1:5; 3:14, 15). Alistalh xchatutukan kanajlanikgolh Cristo, max kata 47, akxni xlimakgtumku xkalakgapaxialhnama Pablo kListra, kachikin niku xlamakgolh. Akgtiy kata alistalh, akxni Pablo xlimakgtiy xkalakgapaxialhnama uma kachikin, max Timoteo xkgalhiya 20 kata. Pero maski kgawasaku xwanit chu ni lhuwa kilhtamaku xlakgapasa xaxlikana, lakgkgolotsin xalak Listra chu xalak Iconio «luwa [...] [tlan] xlichuwinankgo xpalakata yuma nkgawasa» (Hech. 16:1, 2). Xlakata lu tlan xlichuwinankan, apóstol Pablo wanilh pi xtaʼalh lichuwinantapuli Dios (1 Tim. 1:18; 4:14). Ni katsiyaw komo Timoteo tamakgaxtokgli. Tuku liwana katsiyaw wa pi lipaxuw taʼalh Pablo akxni xakstu xlama chu lhuwa kata lichuwinantapulilh Dios chu superintendente litaxtulh (Fili. 2:20-22).
8. ¿Tuku makgtayalh Juan Marcos xlakata na lu naskujnani Dios, chu tukuya tasikulunalin makglhtinalh xlakata xatapaxuwan tlawalh?
8 Juan Marcos nachuna liwana limaklakaskilh kilhtamaku akxni xakstu xlama. Juan Marcos chu xtse María, chu xtapuxnimat Bernabé, na xmakgtapakgsikgo congregación xalak Jerusalén. Max akgtum familia tiku xkgalhi tumin xlakata xkgalhikgo akgtum chiki chu tiku xkamakgtaya xchikkan (Hech. 12:12, 13). Maski chuna, Marcos ni chatum kgawasa tiku kaj xakstu xlipaxuwaputun tuku xkgalhi. Nachuna ni kajwatiya xkgalhiputun akgtum familia chu xlipaxuwalh tuku xkgalhi. Max xlakata lhuwa kata xkatalalin apóstoles makgtayakgolh pi na xlichuwinantapulilh Dios, wa xlakata akxni milh kilhtamaku pi xkamakgtayalh Pablo chu Bernabé akxni xapulana ankgolh lichuwinantapulikgolh Dios lakapala chu xatapaxuwan kataʼalh (Hech. 13:5). Alistalh taʼalh Bernabé chu makgtayalh Pedro anta kBabilonia (Hech. 15:39; 1 Ped. 5:13). Maski ni katsiyaw la xlilhuwa kilhtamaku xakstu latamalh, Biblia masiya pi xlilakgapaskan xlakata lu xkamakgtayaputun amakgapitsin chu tlakg xlichuwinamputun Dios.
9, 10. ¿La tlan lhuwa naskujnanikgo Dios tiku nina tamakgaxtokgkgonit? Kalichuwinanti akgtum liʼakxilhtit.
9 La uku nawilakgolh lhuwa lakgkgawasan chu laktsuman kstalaninanin Cristo tiku na limaklakaskinkgo xkilhtamakujkan xlakata tlakg naskujnanikgo Dios. Xtachuna la Marcos chu Timoteo, akgatekgskgo, o tamakgachakgxi, pi xlakata ni tamakgaxtokgkgonit “nitu nakasokgali chu xlipaks xnakujkan naliskujnikgo Kimpuchinakan” (1 Cor. 7:35). Xlikana tiku ni tamakgaxtokgkgonit lhuwa kilhtamaku kgalhikgo. Chu lhuwa tuku tlan natlawakgo: max tlan precursores nawankgo, tlan naʼankgo alakatanu niku ni anankgo lhuwa tiku nalichuwinankgo Dios, nakatsinikgo atanu tachuwin, namakgtayanankgo akxni tlawakan Pukgalhtawakga xla xTatayananin Jehová chu sucursales, naʼankgo Escuela de Entrenamiento Ministerial o naskujkgo kBetel. Komo nina tamakgaxtokga, ¿liwana limaklakaskimpat min kilhtamaku?
10 Chuna tlawalh Mark, tiku precursor wa akxni nina xkgalhi 20 kata, alh Escuela de Entrenamiento Ministerial chu lhuwa laklanka kachikinin makgtayananit. Xlakata puxamakitsis kata nema putum kilhtamaku skujnima Dios wa: «Putum kilhtamaku kliskuja nakamagtayaya putum tiku wilakgo kcongregación: kkataʼan litachuwinantapuli Dios, kalakgapaxialhnan xlakata nakamatliwakglha kxtakanajlakan, kkatawayan kinchik chu asta klakaxwili convivios xlakata nakamatliwakglha xtakanajlakan natalan. ¡Lu lhuwa la klipaxuwanit!». Xlakata tuku wan Mark, tlakg kgalhiyaw tapaxuwan akxni wi tuku tlawayaw xlakata amakgapitsin, wa uma tuku tlan tlawakgo tiku putum kilhtamaku skujnanikgo Dios (Hech. 20:35). Kgawasa chu tsumat, maski lhuwa tuku lu lakgatiya chu tuku tlan tlawaya, lhuwa tuku tlan natlawaya kxtaskujut kiMalanakan (1 Cor. 15:58).
11. ¿Tukuya tasikulunalin makglhtinankgo tiku ni lakapala tamakgaxtokgkgo?
11 Max nachuna la lhuwa latamanin namin kilhtamaku natamakgaxtokgputuna. Pero kalakapastakti: wi lhuwa tuku xlakata ni lakapala katamakgaxtokgti. Pablo waniyan pi natamakgaxtokga asta akxni “akchanitan minkata” uma wamputun akxni titaxtunita kilhtamaku tlakg talakgxtumiputuna (1 Cor. 7:36). Pulana liwana miakstu nalakgapaskana chu liwana nakatsiya la nalaksaka tiku natatamakgaxtokga chu uma lin lhuwa kilhtamaku. Kalakapastakti pi tuku lamalaknunikgo wantiku tamakgaxtokgmakgo ni kaj takgaman xlakata wa tuku lakkaxwilikan putum latamat namakgapala (Ecl. 5:2-5).
Kstalaninanin Cristo tiku laklankata chu xakstukan latamakgolh
12. 1) ¿Tuku tlawalh Ana akxni nilh xchixku? 2) ¿Tukuya lanka talakgalhaman kgalhilh Ana?
12 Evangelio xla Lucas lichuwinan Ana, chatum puskat tiku nilh xchixku akxni kajku akgtujun kata xtamakgaxtokgkgonit. Biblia ni kinkawaniyan komo xkgalhi kamanan o lakpuwa natamakgaxtokgpara pero kinkawaniyan pi akxni xkgalhiya 84 kata niti xtawi. Nachuna, kinkamasiyaniyan pi xlakata ni xkgalhi chixku makgtayalh tlakg xtalalilh Jehová. Xlikana, putum kilhtamaku xʼan xtemplo Dios, «tantaku tantaskaka xlakatakilhputanan, [...] [ni xwayan], chu na xtlaway xʼoración» (Luc. 2:36, 37). La akxilhaw lu xlakaskinka xakxilha naskujnani Dios. Ana lu fuerza tlawanilh xlakata chuna xtlawalh pero makglhtinalh lanka talakgalhaman, akxilhli akxni Jesús skgataku xwanit chu na lichuwinalh pi xʼama lakgmaxtunan akxni Mesías xwa (Luc. 2:38).
13. 1) ¿La likatsiyaw pi Dorcas kstalanina Cristo, lu skulujwa xwanit? 2) ¿Tuku lu tlan makglhtinalh Dorcas xlakata lu xkalakgalhaman amakgapitsin?
13 Dorcas tiku na xwanikan Tabita kstalanina Cristo tiku xlama kJope kachikin niku xchinkgo barcos, chu xwi kxpakxtu Jerusalén. Akxni lichuwinankan kBiblia max ni xtamakgaxtokgnit, ni wankan pi xkgalhi xchixku. Dorcas «tlan xkatsiy, chu ankgalhin xmakgtayakgoy laklimaxkganin, chu luwa xlakgalhaman[nan]». Xkatlawani lhakgat tiku nialhti xkgalhikgo xchixkukan chu max na xkatlawani amakgapitsin, uma tlawalh pi putum xpaxkikgolh. Pero tatatlalh chu nilh, wa xlakata putum congregación malakgachanikgolh tamakatsin Pedro xlakata xmilh, tasaskinikgolh pi xmalakastakwanilh uma tala tiku lu xpaxkikgo. Xlikalanka Jope katsikgolh pi uma tala xmalakastakwanikanit chu lhuwa tsukukgolh kanajlakgo tuku xaxlikana (Hech. 9:36-42, TXS, 1999). Max makgapitsin natalan tiku aku tsukukgolh kgalhtawakgakgo na makglhtinankgolh tuku xtlawa Dorcas.
14. ¿Tuku xlakata lhuwa tiku ni tamakgaxtokgkgonit tlakg tlan talalinkgo Jehová?
14 La uku na wilakgolh lhuwa kstalaninanin Cristo tiku laklankata xtachuna la Ana chu Dorcas nema ni tamakgaxtokgkgonit. Makgapitsin nina tekgskgo tiku natatamakgaxtokgkgo, chu makgapitsin lakxtlawakgolh xtamakgaxtokgatkan xlakatin mapakgsinanin o nilh tiku xtatamakgaxtokgkgonit. Xlakata ni kgalhikgo tiku nakamakgtaya tlakg lipawankgo Jehová (Pro. 16:3). Silvia chatum tala tiku liwaka puxamakutsayan kata skujma kBetel, akgtum tasikulunalin akxilha pi xakstu lama. «Xlikana pi minkilhtamaku tuwa kmakgkatsi nakamatliwakglha amakgapitsin chu kinkgalhskinkan. “Chu akit ¿tiku nakimatliwakglha?” Pero akxni kkatsi pi wa Jehová tiku liwana katsi tuku kmalakaskin ni xawa akit, tlakg ktalakatsuwini. Nachuna, kimakgtayakan akxni ni para tsinu xaklakpuwan.» Xtachuna la Silvia, akinin tlan lipawanaw pi komo natalakatsuwiniyaw Jehová, xla nakinkamatliwakglhan chu xatapaxuwan nakinkamakgtayayan.
15. ¿Tuku tlan natlawakgo kstalaninanin Cristo tiku ni tamakgaxtokgkgonit xlakata tlakg lhuwa tiku nakapaxkikgo?
15 Nachuna tiku ni tamakgaxtokgkgonit tlan tlakg lhuwa tiku nakapaxkikgo (kalikgalhtawakga 2 Corintios 6:11-13). Jolene, kstalanina Cristo tiku puxamakutati kata skujnanima Jehová wan: «Lhuwa tiku katalalin, chu ni kajwatiya tiku na watiya kata kgalhikgo. Tiku ni tamakgaxtokgnitaw tlan tlakg naskujnaniyaw Jehová, tlakg tlan nakamakgtayayaw familia, natalan chu putum latamanin. Akxni tlakg titaxtu kata, tlakg klipaxuwa». Xlikana natalan tiku linkgoya kata, tiku tatatlakgo, natlatni tiku nialh kgalhi xchixku o xpuskat, lakgkgawasan chu amakgapitsi xalak congregación lu paxtikatsininankgo akxni tiku ni tamakgaxtokgkgonit kamakgtayakgo. Akxni kalimasiyaniyaw tapaxkit amakgapitsin tlakg tlan makgkatsiyaw. Wa xlakata kakinkakgalhskinkan: «¿Na tlan tlakg lhuwa tiku xakkapaxkilh?».
Nikxni tamakgaxtokgkgolh
16. 1) ¿Tuku xlakata Jesús ni tamakgaxtokgli? 2) ¿La limaklakaskilh Pablo kilhtamaku xlakata ni xtamakgaxtokgnit?
16 Jesús nikxni tamakgaxtokgli. Xlilakkaxwilit xwanit la xʼama tlawa chu xʼama makgantaxti taskujut nema xlakgayawakanit. Nachuna, anu anu xʼan, tsisa xtsuku skuja chu xtapaki asta akxni xtsiswanita, chu xaʼawatiya makamastalh xlatamat. Xlakata ni xtamakgaxtokgnit lhuwa tuku tlan xtlawa. Na kalilakapastakwi Pablo tiku lhuwa kilómetros tlawalh chu lhuwa taʼakglhuwit kgalhilh akxni skujnanilh Jehová (2 Cor. 11:23-27). Xakstu xwi, maski max pulana xtamakgaxtokgnit pero nialh tamakgaxtokgli akxni apóstol litaxtulh (1 Cor. 7:7; 9:5). Jesús chu Pablo kawanikgolh amakgapitsin pi komo xmatlanikgolh ni xtamakgaxtokgkgolh xlakata tlakg lhuwa kskujnanikgolh Dios. Pero Jesús chu Pablo ni wankgolh pi xtalakaskin ni natamakgaxtokgaw xlakata tlan kskujniw Dios (1 Tim. 4:1-3).
17. 1) Chuna la tlawalh Jesús chu Pablo, ¿tuku nachuna tlawakgonit makgapitsi kstalaninanin Cristo? 2) ¿La likatsiyaw pi Jehová lu xlakaskinka akxilha tuku tlawakgo makgapitsi xlakata naskujnanikgo?
17 La uku wilakgolh tiku na ni tamakgaxtokgputunkgo xlakata tlakg liwana naskujnanikgo Dios. Harold tiku pulana lichuwinaw liwaka tipuxamakuchaxan kata skujma kBetel. Xla wan: «Akxni kmakgatsilh akgkaw kata kBetel xakkakxilhnita lhuwa tiku tamakgaxtokgkgonit taxtukgolh kBetel max xlakata xtatatlakgolh o xlakata xʼamakgolh kuenta tlawakgo xnatlatni. Akit nialh xtalakaskin chuna naktlawa xlakata xnikgonita kinatlatni, pero lu xakpaxki kintaskujut wa xlakata ni xaktamakgaxtokgputun xlakata xaklakpuwan pi nakilimaxtukan kBetel». Nachuna, Margaret tiku lhuwata kata precursora liskujma chuna wa: «Maski makglhuwa wi tiku xkintatamakgaxtokgputun, nikxni ktamakgaxtokgli. Xlakata niti xaktapakgsini klimaklakaskilh kilhtamaku xlakata tlakg liwana xakmakgantaxtilh kintaskujut chu lu kpaxuwa». Liwana kilikatsitkan pi Jehová putum kilhtamaku kalakapastaka tiku chuna skujnanikgo (kalikgalhtawakga Isaías 56:4, 5).
Liwana kalimaklakaskinti milatamat
18. ¿La tlan nakamatliwakglhaw chu nakamakgtayayaw tiku ni tamakgaxtokgkgonit?
18 Kstalaninanin Cristo tiku ni tamakgaxtokgkgonit chu liwana skujnanimakgolh Dios, kaminini nakawaniyaw pi lu tlan taskujut tlawamakgolh. Kapaxtikatsiniyaw pi lu tlan tayat kgalhikgo chu la makgtayanankgo kcongregación. Kimputumkan nakalimasiyaniyaw pi akinin la «xnatalan, chu xtse, chu xlakgskgatan». Chuna nikxni namakgkatsikgo pi xakstu wilakgolh (kalikgalhtawakga Marcos 10:28-30).
19. ¿Tuku tlan natlawaya xlakata liwana nalimaklakaskina kilhtamaku akxni ni tamakgaxtokgnita?
19 Komo ni tamakgaxtokgnita xlakata chuna laksakti o xlakata tuku titaxtu kmilatamat, lakaskinaw pi liʼakxilhtit xala makgasa chu xala uku nema talichuwinalh uma artículo namakgtayakgoyan xlakata naʼakgatekgsa pi tlan napaxuwaya chu lhuwa tuku tlan natlawaya maski ni tamakgaxtokgnita. Kalichuwinamparaw xlakata tamaskiwin. Makgapitsi lu kgalhimaw nakinkamaxkikanan chu makgapitsi kaxalan kinkamaxkikanan. Makgapitsi akxni maxkikana tunkun paxtikatsininana chu amakgapitsi titaxtu kilhtamaku xlakata xlakaskinka naʼakxilha. Chuna la xlilakaskinka nakaʼakxilhaw wa nakinkamakgtayayan. Nachuna kitaxtu akxni wi tiku ni tamakgaxtokgnit. ¿Tuku tlan natlawaya xlakata liwana nalimaklakaskina kilhtamaku akxni ni tamakgaxtokgnita? Katalakatsuwini Dios, lhuwa kaskujnani chu tlakg lhuwa tiku kakapaxki. Xtachuna la tamakgaxtokgat, akxni wi tiku ni tamakgaxtokga chu akxilha la Dios akxilha lu lipaxuwa chu liwana limaklakaskin.
¿Lakapastaka?
• ¿Tuku xlakata tlan wanaw pi akxni wi tiku ni tamakgaxtokga na xtamaskiwin Dios?
• ¿Tuku xlakata akgtum tasikulunalin ni natamakgaxtokga akxni kajku stakpat?
• ¿Tuku tlan natlawakgo tiku ni tamakgaxtokgkgonit xlakata tlan natalakatsuwinikgo Jehová chu tlakg lhuwa tiku nakapaxkikgo?
[Takgalhskinin]
[Epígrafe xla página 20]
¿Liwana limaklakaskimpat minkilhtamaku xlakata naskujnaniya Dios?
