Litliwakga xlakata ni natlawayaw tuku nitlan chu ni naxlajwananaw

«Namakglhtinanatit litliwakga akxni namin spiritu santo kmiʼokgspunkan.» (HECH. 1:8)

1, 2. ¿Tuku tamakgtay wa Jesús pi xʼama kamaxki kstalaninanin chu tuku xlakata xʼamakgolh maklakaskinkgo?

JESÚS xkatsi pi kstalaninanin nila kxakstukan xmakgantaxtikgolh tuku xkaliyawanit. Xkatsi pi lu lanka taskujut nema xkalakgayawama, na xkatsi pi lhuwa litliwakga xkgalhikgo tiku ni xkaʼakxilhputunkgo chu xkatsi pi latamanin ni kgalhikgo lhuwa litliwakga, liwana xkatsi pi xmaklakaskinkgo xtamakgtay Dios. Wa xlakata akxni xʼamaja kʼakgapun wa: «Wampi namakglhtinanatit litliwakga akxni namin spíritu santo kmiʼokgspunkan, na nalichuwinanatit kJerusalén nkimpalakata, chu xlikalanka Judea, chu kSamaria, chu asta awatiya [niku kichan tiyat]» (Hech. 1:8).

² Uma tuku kawanilh pi xʼama kamaxki, tsukulh kgantaxtu kPentecostés xla kata 33 akxni kstalaninanin makgamakglhtinankgolh xlitliwakga espíritu santo nema kamakgtayalh xlikalanka Jerusalén xlichuwinankgolh Dios. ¡Niti la kamachokgolh! (Hech. 4:20.) Ama kilhtamaku chu «asta akxni nasputa katuxawat [o kakilhtamaku]», putum kstalaninanin Cristo tiku ni makgxtakgaw Dios limaklakaskinitaw litliwakga nema Jehová kinkamaxkiyan (Mat. 28:20).

3. 1) ¿Tuku wamputun espíritu santo chu tuku wamputun litliwakga? 2) ¿La kinkamakgtayayan litliwakga nema kinkamaxkiyan Jehová?

³ Kalakapastakwi tuku Jesús kawanilh kstalaninanin: «Namakglhtinanatit litliwakga akxni namin spiritu santo kmiʼokgspunkan». Pero liwana kilikatsitkan pi tachuwin espíritu chu litliwakga ni watiya tuku wamputun. Espíritu santo wa litliwakga nema liskuja Dios; wa litliwakga nema limaklakaskin xlakata namatlawi chatum latamat xtalakaskin. Pero litliwakga wamputun «tuku kinkamakgtayayan xlakata tlan namakgantaxtiyaw tuku tlawaputunaw». Litliwakga makgtaya chatum lataman o máquina xlakata natlawa tuku talakaskin. Xlakata tuku akxilhwi espíritu santo tlan natamalakxtumiyaw luz nema licargarlikan acomulador, pero litliwakga tlan natamalakxtumiyaw tuku kgalhi akgtum acomulador xlakata tlan wi tuku namapasi. Litliwakga nema Jehová kinkalimaxkiyan espíritu santo kinkamakgtayayan tlan namakgantaxtiyaw tuku waniw akxni tamakamastaniw chu ni natlawayaw tuku nitlan kinkamatlawiputunkanan (kalikgalhtawakga Miqueas 3:8 chu Colosenses 1:29).

4. ¿Tuku nakatsiniyaw kʼuma artículo chu tuku xlakata?

⁴ ¿La limasiyayaw litliwakga nema kinkamaxkiyan espíritu santo? ¿Tuku tlan tlawayaw xlakata kinkamakgtayayan espíritu santo? Maski liwana skujnaniputunaw Dios, Satanás lhuwa taʼakglhuwit kinkawiliniyan, nachuna kakilhtamaku chu kintalakgalhinkan. Lu xlakaskinka natayaniyaw umakgolh taʼakglhuwit, xlakata chuna nikxni namakgxtakgaw Jehová, putum kilhtamaku nalichuwinanaw xtukuwani chu tlan natalalinaw. Kaʼakxilhwi la kinkamakgtayayan espíritu santo xlakata ni natlawayaw tuku nitlan, ni natlakgwanaw chu ni naxlajwananaw.

Ni natlawayaw tuku nitlan

5. ¿La tlan nakinkamatliwakglhan oración?

⁵ Jesús kamasiyanilh kstalaninanin naskinkgo:  «Ni timastaya ntalakaskin mpala nakinkatokglhan wa ntu nitlan, wampi kakinkamalakgtaxti ntu nitlan» (Mat. 6:13). Jehová putum kilhtamaku nakamakgtaya xlakskujnin tiku ni makgxtakgkgo chu chuna skinikgo. Atanu kilhtamaku Jesús wa «minTlatikan nti wi nkakgapun namaxkikgoy spiritu santo wa nti kskinikgolh» (Luc. 11:13). ¡Lu tlan limakgkatsiyaw pi Dios nakinkamaxkiyan uma lanka litliwakga xlakata tlan natlawayaw tuku xaʼakgstitum! Pero uma ni wamputun pi ni katimastalh talakaskin ni nakinkamatlawiputunkanan tuku nitlan (1 Cor. 10:13). Wata wamputun pi akxni nakinkamatlawiputunkanan tuku nitlan, talakaskin tlakg natlawayaw oración (Mat. 26:42).

6. ¿Tuku limaklakaskilh Jesús xlakata likgalhtilh Satanás?

⁶ Jesús limaklakaskilh xtachuwin Dios xlakata likgalhtilh Akgskgawini. Liwana litasiya pi xlikgalhtawakga. Jesús chuna wanilh: «Chuna ntatsokgnit», «Chuna litum ntatsokgnit» chu «Kakintapanuni Satanas; xampi chuna ntatsokgnit: “Wa mimPuchina [Jehová] Dios nalakatakilhputaya, chu na xman wanti nalakgachixkuwiya”». Xlakata Jesús lu xpaxki Jehová chu xTachuwin makgtayalh ni natlawa tuku xmatlawiputun Satanás (Mat. 4:1-10). Akxni Satanás akxilhli pi Jesús ni tlawalh tuku nitlan alh.

7. ¿La kinkamakgtayayan Biblia xlakata ni natlawayaw tuku nitlan?

⁷ Jesús limaklakaskilh xTachuwin Dios xlakata Akgskgawini ni xmatlawilh tuku nitlan, wa xlakata ¡tlakg talakaskin pi akinin chuna natlawayaw! Tuku pulana kilitlawatkan wa liwana nakatsiyaw xtastakyaw Jehová chu namakgantaxtiyaw, chuna tlan natamakgatliniyaw Satanás chu ni natalakatsuwiniyaw xliʼakgsiyat. Lhuwa latamanin tsukukgo makgantaxtikgo uma limapakgsin akxni likgalhtawakgakgo Biblia chu akxilhkgo pi lu xlakaskinka nakatsiniyaw xliskgalala chu xaʼakgstitum tuku tlawa Dios. Xlikana «xtachuwin Dios» kgalhi lhuwa litliwakga, xlakata «tlan lilakgapasa xatu ntalakapastakna» (Heb. 4:12). Nachuna akxni tlakg lhuwa nalikgalhtawakgayaw Biblia chu nalilakapastakaw, tlakg naʼakgatekgsaw pi Jehová ni makgxtakgnan chu xaxlikana (Dan. 9:13). Xlakata lhuwa litliwakga kgalhi Biblia, kalimaxtuw kilhtamaku nalilakapastakaw tuku nakinkamakgtayayan ni natlawayaw tuku nitlan.

8. ¿La kinkamaxkikanan espíritu santo?

⁸ Jesús ni kajwatiya ni tlawalh tuku nitlan xlakata xkatsi tuku wan xTachuwin Dios, ni tlawalh xlakata «luwa xlitaxajnit [o xkgalhi] Spiritu Santo» (Luc. 4:1). Chuna la Jesús, na tlan tlakg nakgalhiyaw litliwakga chu tlan natalalinaw Jehová. Pero ¿la tlan natalakatsuwiniyaw Dios? Kalimaklakaskiw tuku Jehová kinkalimaxkiyan espíritu santo, makgapitsi wa uma, nalikgalhtawakgayaw Biblia, natlawayaw oración chu congregación (Sant. 4:7, 8). Lhuwa natalan akxilhkgonit pi makgtayanan akxni kskujnanikgo Dios. Makgapitsi wankgo pi akxni skujnanikgo Dios tlawa pi tlakg natatliwakglha xtakanajlakan.

9, 10. 1) ¿Tuku nitlan kinkamatlawiputunkanan niku akinin wilaw? 2) ¿La tlan kinkamakgtayayan nalilakpuwanaw chu natlawayaw oración xlakata ni nakinkamatlawikanan tuku ni tlan, max akxni tlakgwananitaw?

⁹ Kalakpuwaw akxni max xkinkamatlawiputunkanan tuku nitlan. Komo tamakgaxtokgnitaw, ¿minit kilhtamaku akxni lakpuwaw wi tiku nalimasiyaniyaw pi lakgatiyaw? Komo ni tamakgaxtokgnitaw chu chatum tiku ni xtatayana Jehová, kinkalimasiyanin pi kinkalakgatiyan chu kinkawanin nataʼanaw paxialhnanaw, ¿tuwa makgkatsiw nawaniyaw pi ni? Komo akxni akxilhmaw televisión o Internet taxtu tuku xalixkajni, ¿chuntiya akxilhputunaw? Xlakata ni natlawayaw tuku nitlan, tlakg tlan nalilakpuwanaw tuku nitlan nakitaxtu: komo natlawayaw tuku nitlan nakinkamatlawiyan atanu tlakg lanka talakgalhin (Sant. 1:14, 15). Na kililakpuwanatkan pi nalimakgalipuwanaw Jehová, congregación chu kifamiliajkan komo natlawayaw tuku nitlan. Pero komo namakgantaxtiyaw xlimapakgsin Dios, tlan natawila kintalakapastaknikan (kalikgalhtawakga Salmo 119:37 chu Proverbios 22:3). Akxni natitaxtuyaw taʼakglhuwit nema  lichuwinawa, kaskiniw litliwakga Jehová xlakata tlan natayaniyaw.

¹⁰ Tuku lichuwinan Biblia akxni Jesús xmatlawiputunkan tuku nitlan, wi atanu tuku kinkamasiyaniyan. Akxni Satanás lakgalh kdesierto, xKgawasa Dios tipuxum kilhtamaku ni xwayanit. Max Akgskgawini akxilhli pi tlan “natokglha” xlakata namatlawi tuku nitlan (Luc. 4:13). La uku nachuna kinkaliʼakxilhan: akxni akxilha pi ni tliwakga wi kintakanajlakan. Wa xlakata lu xlakaskinka tliwakga natawila kintakanajlakan. Akxni lu xlajwananaw, tlakg talakaskin pi natasaskiniyaw Jehová xlakata nakinkakuentajtlawayan chu kakinkamaxkin xʼespíritu (2 Cor. 12:8-10).

Tuku nakinkamakgtayayan akxni tlakgwanitaw chu xlajwananitaw

11, 12. 1) ¿Tuku xlakata la uku lhuwa latamanin xlajwanankgo? 2) ¿Tuku nakinkamakgtayayan xlakata ni naxlajwananaw?

¹¹ Xlakata akinin lakgalhinanin, wa xlakata min kilhtamaku xlajwananaw, chu xlakata kakilhtamaku niku lamaw la uku tlakg anan taʼakglhuwit chu max tlakg anan talakgaputsit nixawa makgasa (2 Tim. 3:1-5). Chuna la natalakatsuwitilha akxni namin Armagedón, tlakg naʼanan taʼakglhuwit, max ni nakgalhiyaw tumin, wi tuku nalilipuwanaw o atanu taʼakglhuwit. Wa xlakata makgapitsi lu tuwa makgkatsikgo nakuentajtlawakgo xfamiliajkan. Lhuwa taʼakglhuwit kgalhikgo chu nema lu kamakgatlakgwan. Komo chuna titaxtupat, ¿tuku tlan namakgtayayan natayaniya taʼakglhuwit?

¹² Kalakapastakti, Jesús wa pi nakinkamaxkiyan tuku nakinkamakgtayayan: espíritu santo (kalikgalhtawakga Juan 14:16, 17). Wa tlakg lanka litliwakga nema anan xlikalanka kakilhtamaku. Jehová kinkamaxkiyan «tlakg [...] ni xawa wa ntu skinaw» xlakata tlan nalakkaxtlawayaw katuwa taʼakglhuwit nema nakgalhiyaw (Efe. 3:20). Apóstol Pablo wa pi espíritu limakglhtinanaw «lanka litliwakga, ni kilakan, wa ntapakgsiniy Dios» maski min kilhtamaku lhuwa «ntasokgalin» kgalhiyaw (2 Cor. 4:7, 8). Xlikana Jehová ni kinkawaniyan pi namasputu taʼakglhuwit, pero wan pi nakinkamaxkiyan xʼespíritu nema nakinkamatliwakglhan (Fili. 4:13).

13. 1) ¿La makgamakglhtinanit Stephanie litliwakga xlakata tlan natayani laklanka taʼakglhuwit? 2) ¿Lakgapasa tiku nachuna titaxtuma?

¹³ Kaʼakxilhwi tuku akgspulalh Stephanie, chatum precursora regular nema kgalhi 19 kata. Akxni xkgalhi 12 kata pankgli kxnujut kxakskitit chu tekgsnika akgtum tumor. Asta la uku xlimakgtiy chukuka, maxkikanit radioterapia chu amakgtiy pankgli kxnujut  kxakskitit, uma tlawanit pi nialh liwana nalakawanan chu nila matsuwi itat xmakni. Stephanie makgataxti xlitliwakga xlakata natlawa tuku tlakg xlakaskinka akxilha, naʼan ktamakxtumit chu nalichuwinan Dios. Pero xla akxilha la pulaklhuwa Jehová matliwakglha xlakata chuntiyaku naskujni. Biografías nema taxtukgo kkilikgalhtawakgakan matliwakglha akxni lipuwama o lakgaputsama. Natalan limatliwakglhkgo akxni malakgachanikgo cartas chu akxni tachuwinankgo akxni nina tsuku chu akxni kgalhsputa tamakxtumit. Chu makgapitsi latamanin tiku katsiputunkgo xaxlikana ankgo kxchik xlakata nakamakgalhtawakga. Xlakata Jehová chuna matliwakglha, Stephanie makgkatsi pi lhuwa laklini chu lakpuwan pi Salmo 41:3 texto nema tlakg lakgati kgantaxtuma kxlatamat.

14. ¿Tuku ni kilitlawatkan komo tlakgwanitaw chu tuku xlakata?

¹⁴ Komo tlakgwanitaw o lhuwa taʼakglhuwit kgalhiyaw, max nalakpuwanaw pi tlakg tlan namakgkatsiyaw komo nialh lhuwa kilhtamaku nalikgalhtawakgayaw Biblia kiakstukan o nakatalikgalhtawakgayaw kifamiliajkan, nialh lhuwa nalichuwinanaw Dios chu ni naʼanaw ktamakxtumit. Pero wa uma tuku tlakg nitlan xtlawaw. ¿Tuku xlakata? Xlakata akxni skujniyaw Dios makglhtinanaw espíritu santo, chu uma putum kilhtamaku kinkamatliwakglhan chu tlan limakgkatsiyaw (kalikgalhtawakga Mateo 11:28, 29). ¿Ni xlikana pi min kilhtamaku lu tlakgwanitaw akxni chanaw ktamakxtumit, pero akxni kgalhsputa tlan makgkatsiyaw? Lu tatliwakglhpara kintakanajlakan.

15. 1) ¿Kinkawaniyan Jehová pi ni katiliskujwi xlakata nikxni namakgxtakgaw? Kalimaklakaskinti Biblia xlakata nalikgalhtinana. 2) ¿Tuku kinkawaniyan Dios pi natlawa chu tuku takgalhskinin tlan natlawayaw?

¹⁵ Uma ni wamputun pi nituwa kstalanina Cristo nawanaw. Talakaskin naliskujaw xlakata ni namakgxtakgaw Dios (Mat. 16:24-26; Luc. 13:24). Pero komo naxlajwananaw, Jehová tlan nakinkalimaxkiyan litliwakga espíritu santo. Palakachuwina Isaías wa: «Wantiku lipawankgo Jehová natatliwakglhparakgo. Nakgoskgo xtachuna la águilas. Nakgosnankgo [o natatsalanan], chu ni katitlakgwankgolh; natlawankgo; chu ni katitlakgwankgolh» (Isa. 40:29-31). Wa xlakata katlawaw uma takgalhskinin: ¿tuku xlakata wilakgolh tiku wankgo pi lu litlakgwa naskujnaniyaw Dios?

16. ¿La tlan natlawayaw xlakata ni lu natlakgwanaw chu ni naxlajwananaw?

¹⁶ Biblia kawani putum xlakskujnin Dios: «Nakatsiniyatit nalakksakatit wa ntu xatlan» (Fili. 1:10). Pablo tamalakxtumilh xlatamat chatum kstalanina Cristo la akxni kgosnanaw chu mastalh uma tastakyaw: «Kilimakgaxtakgatkan xlipaks ntu nkinkasokgaliyan [...]. Kapaxuwanaliyaw nkalilakapalaw xatlan tiji ntu nkinkamaxkikanitan» (Heb. 12:1). Unu Pablo kinkawaniyan pi ni natlawayaw tuku ni lu xlakaskinka. Max tlakg lhuwa tuku tlawaputunaw maski lhuwata tuku tlawamaw chu uma natlawa pi natlakgwanaw. Komo chuna tlawaputunaw tlan natlawayaw uma takgalhskinin: «¿La xlilhuwa kilhtamaku chu litliwakga klimaklakaskin kintaskujut? ¿La xlilhuwa kpaxialhnan? ¿La xlilhuwa kilhtamaku klimaxtu xlakata nakkgamanan chu naklakgastanan?». Akxni liwana nalakapastakaw chu katsiyaw pi nila tlawayaw nakinkamakgtayayan ni natlawaputunaw tuku ni lu xlakaskinka.

17. ¿Tuku xlakata makgapitsi kstalaninanin Cristo xlajwanankgo chu tuku kinkawaniyan Jehová nema nakinkamatliwakglhan?

¹⁷ Makgapitsi kstalaninanin Cristo max xlajwanankgonit xlakata lhuwata kata kgalhkgalhimakgolh  namasputukan uma kakilhtamaku pero nina kgantaxtunit (Pro. 13:12). ¿Tuku tlan nakamatliwakglha? Nakamakgtaya tachuwin nema wi kHabacuc 2:3: «Uma tuku akxilhti nakgantaxtu akxni nachan kilhtamaku, kaliskujti asta akxni nachin lisputni, chu ni katiʼakgsaninalh. Maski xtamakgapalilh, skgalalh katawila; xlakata xlikana nakgantaxtu. Ni katitamakgapalilh». Chuna la akxilhwi, Jehová kinkawaniyan pi lisputni nachin akxni xla lakkaxwilinit.

18. 1) ¿Tuku kinkawaniyan Dios nakinkamaxkiyan nema kinkamatliwakglhan? 2) ¿Tuku naʼakxilhaw kʼartículo nema mima?

¹⁸ Xlikana xlakskujnin Jehová lakaskinaw kachalha kilhtamaku akxni nialh natlakgwanaw, nialh nalakgaputsayaw chu putum nalipaxuwayaw chuna la akxni “kgawasaku xwanitaw” (Job 33:25). Pero la uku tlan nalitamakgtayayaw litliwakga nema kinkamaxkiyan espíritu santo pero talakaskin naskujnaniyaw Dios (2 Cor. 4:16; Efe. 3:16). Ni kamastaw talakaskin pi kaj xlakata tlakgwanaw natlawa pi ni namakglhtinanaw tasikulunalin nema tlan nakinkamaxkikanan. Putum taʼakglhuwit nema kgalhiyaw max akxni kinkamatlawiputunkanan tuku nitlan, tlakgwanaw o xlajwananaw nasputa akxni namin xasasti kakilhtamaku. Kʼartículo nema mima naʼakxilhaw la kinkamatliwakglhan espíritu santo akxni kinkaputsastalanikanan o amakgapitsin kinkamatlawiputunkgoyan tuku nitlan chu atanu taʼakglhuwit.

¿La xkgalhtinanti?

• ¿La kinkamatliwakglhan akxni likgalhtawakgayaw Biblia?

• ¿La kinkamatliwakglhan akxni tlawayaw oración chu akxni lilakapastakaw tuku likgalhtawakgayaw?

• ¿Tuku tlan natlawayaw xlakata ni lu naxlajwananaw?

[Takgalhskinin]

[Epígrafe xla página 26]

Tamakxtumit matliwakglha kintakanajlakan