Litliwakga xlakata tlan natayaniyaw putum tuku nitlan

«Kkgalhiy litliwakga nema putum kmatlaniy, xlakata tiku kimaxkiy litliwakga.» (FILI. 4:13, NM)

1. ¿Tuku xlakata xlakskujnin Dios kgalhiyaw lhuwa taʼakglhuwit?

AKININ xtatayananin Jehová min kilhtamaku na titaxtuyaw tuku nitlan. Taʼakglhuwit nema kgalhiyaw max wa xlakata kgalhiyaw talakgalhin, kkakilhtamaku niku lamaw o xlakata ni kinkaʼakxilhputunkgoyan xtalamakgasitsin Dios (Gén. 3:15). Jehová, chuntiya la makgasa kamakgtaya xkachikin xlakata tlan natayanikgo akxni kaputsastalanikan xlakata xtakanajlakan, akxni latamanin wi tuku nitlan kamatlawiputun chu atanu taʼakglhuwit. Xlikana, espíritu santo tlan nakinkamaxkiyan kinchatunukan litliwakga xlakata ni namakgxtakgaw.

Litliwakga xlakata ni nalaktlawakan kintakanajlakan

2. ¿Tuku xlakata kinkaputsastalanikanan chu la tlawakgo?

² Akxni kinkaputsastalanikanan xlakata kintakanajlakan, masputuputunkgo tuku kanajlayaw, akxni ni mastakgo talakaskin nalichuwinanaw o nialh natlawayaw tuku kanajlayaw. Pulaklhuwa tuku limaklakaskin Satanás. Biblia  tamalakxtumi la tantum león akxni nipara tsinu tatsekga, chu la tantum cobra akxni tsekg kinkaputsastalaniyan (kalikgalhtawakga Salmo 91:13).

3. ¿Tuku xlakata wanaw pi Satanás kinkaputsastalaniyan la tantum león o la tantum cobra?

³ Xtachuna la tantum lipekua león, Satanás lhuwa kinkaputsastalaniman, tlawa pi nakinkatlawanikanan tuku nitlan, nakinkatamaknukanan kpulachin o nialh nakinkamaxkikanan talakaskin nalichuwinanaw Dios (Sal. 94:20). Anuario, nema lichuwinan xtaskujut xtatayananin Jehová xala uku lichuwinan lhuwa tuku nitlan tlawama Satanás. Kawiliw akgtum liʼakxilhtit, klakalhuwa, latamanin tamakxtumikgo xlakata nakinkatlawanikgoyan tuku nitlan, min kilhtamaku pulalinkgo sacerdotes o políticos. Uma tlawa pi lhuwa kstalaninanin Cristo namakgxtakgkgo Dios. Lakgachunin Akgskgawini xtachuna la cobra litaxtu. Tlan nawanaw pi tatsekga chu kaj xalan kinkaxkayan, lakglakgalhi kintalakapastaknikan chu kinkaʼakgskgawiyan xlakata natlawayaw tuku xla lakaskin. Akxni chuna tlawa lakaskin pi naxlajwanan o lakglakgalhiputun kintakanajlakan. Pero xlakata kgalhiyaw espíritu santo, tlan tayaniyaw umakgolh taputsastalanit.

4, 5. ¿Tuku kilitlawatkan akxni nina kinkaputsastalanikanan, chu tuku xlakata? Kalichuwinanti akgtum liʼakxilhtit.

⁴ Maski kimputumkan liwana kilikatsitkan tuku natlawayaw akxni nakinkaputsastalanikanan, tuku tlakg tlan natlawayaw ni wa nalakpuwanaw taʼakglhuwit nema max nakgalhiyaw. Niti la katsi tuku nakinkaʼakgspulayan chali tuxama, wa xlakata ni kalilakgaputsaw tuku ni katsiyaw pi nakinkaʼakgspulayan. Pero wi tuku tlan natlawayaw: chuna la kstalaninanin Cristo tiku tayanikgolh akxni kaputsastalanika. Lhuwa tayanikgolh xlakata xlilakapastakkgonit tuku lichuwinan Biblia xlakata xlakskujni Dios tiku nikxni makgxtakgkgolh, na lilakapastakkgolh xtamasiy Jesús chu xliʼakxilhtit. Akxni chuna tlawakgolh tlakg paxkikgolh Jehová chu uma kamakgtayalh tlan xtayanikgolh putum taʼakglhuwit nema kgalhikgolh.

⁵ Kaʼakxilhwi tuku kaʼakgspulalh chatiy kstalaninanin Cristo xalak Malaui, lhuwa latamanin tiku lu xsitsikgonit xmatamawaniputunkgo akgtum tarjeta xlakata xmakgtanukgolh akgtum partido. Kamakgsnokgka, kamakglhtinika xlhakgatkan chu kawanika pi xʼamaka kalikgamanankan. Nachuna, kaʼakgskawiputunka, kawanika pi tiku xwilakgo kBetel xtamawakgonita uma tarjeta. ¿La kgalhtinakgolh? «Kskujniyaw Jehová Dios chu komo natalan xalak Betel tamawakgolha xlakan katsikgo. ¡Akinin nichuna naktlawayaw maski nakilamakgniyaw!». Akxni akxilhkgo pi ni xpekuankgo, kamakgxtakgka.

6, 7. ¿La kamakgtaya Jehová xlakskujnin xlakata natayanikgo taputsastalanit?

⁶ Apóstol Pablo lichuwinalh pi akxni kstalaninanin Cristo xalak Tesalónica kanajlakgolh xaxlikana takanajla, kgalhikgolh «lhuwa tapatin» chu maski chuna titaxtukgolh kgalhikgolh «ntapaxuwan ntu mastay spiritu santo» (1 Tes. 1:6). Lhuwa kstalaninanin Cristo xala makgasa chu xala uku tiku tayanikgo taputsastalanit wankgo pi akxni lu tuwa xtitaxtumakgolh makgkatsikgolh takaksni. Uma tayat nema litakgatsi xtatlaw espíritu santo, kamatliwakglhnilh kxtalakapastakni chu xnaku (Gál. 5:22). Xlikana, Jehová limaklakaskin xʼespíritu santo xlakata nakamaxki litliwakga xlakskujnin chu tlan natayanikgo taʼakglhuwit chu liwana nakatsikgo tuku natlawakgo akxni natitaxtukgo talakgaputsit. *

⁷ Makgapitsi latamanin kaks lilakawankgo akxni akxilhkgo la kstalaninanin Cristo nikxni makgatsankgananikgo Dios maski lipekua kaputsastalanimaka. Akxilhkgonit pi kgalhikgo litliwakga nema ni anan xtachuna, chu chuna. Apóstol Pedro wa: «Lapi wa nkalimaxkajwalikanatit [o kalikgalhkgamanankanatit] xpalakata xtukuwini nCristo, chapaxuwana lapatit, sampi wa kspiritu, Dios wa ntu lhuwa kgalhiy xkakni, wa nkatalaman» (1 Ped. 4:14). Xlakata tuku wa Pedro, limasiyalh pi akxni kinkatlawanikanan tuku nitlan kaj xlakata tlawayaw tuku  xaʼakgstitum, limasiya pi tlan talalinaw Dios chu uma tlawa pi lu napaxuwayaw (Mat. 5:10-12; Juan 15:20).

Litliwakga xlakata ni nakinkamatlawikgoyan tuku nitlan

8. 1) ¿Tuku kamakgtayalh Josué chu Caleb ni natatayakgo amakgapitsi israelitas? 2) ¿Tuku kinkamasiyaniyan tuku tlawakgolh Josué chu Caleb?

⁸ Kstalaninanin Cristo wi atanu la kinkamatlawiputunkanan tuku nitlan: wa akxni amakgapitsin lakaskinkgo ni natlawayaw tuku xaʼakgstitum. Pero kgalhiyaw xʼespíritu Jehová nema tlakg tliwakga nixawa xʼespíritu kakilhtamaku. Xlakata uma litliwakga tlan tayaniyaw akxni latamanin kinkalilitsiyankgoyan, kinkalimawakakgoyan taʼakgsanin o lakaskinkgo nalinaw kilatamatkan chuna la xlakan. Kalilakapastakwi tuku titaxtukgolh Josué chu Caleb. ¿Tuku kamakgtayalh xlakata ni natatayakgo amakgapitsin tiku kiskgalakgolh Canaán? Wa xlitliwakga Dios nema kamaxkilh tanu talakapastakni (kalikgalhtawakga Números 13:30 chu 14:6-10, 24).

9. ¿Tuku xlakata tanu la nalinaw kilatamatkan?

⁹ Kxapulana siglo, espíritu santo kamaxkilh litliwakga apóstoles xlakata tlan xkgalhakgaxmatkgolh Dios chu ni xtlawakgolh tuku xkamatlawiputunkgo tiku xwankgo pi xmasiyakgo xaxlikana takanajla (Hech. 4:21, 31; 5:29, 32). La uku lhuwa latamanin tlawakgo tuku amakgapitsin lakaskinkgo xlakata ni nakatakgalhikgo taʼakglhuwit. Pero akinin kstalaninanin Cristo nichuna tlawayaw, tanu la linaw kilatamatkan chu tlawayaw tuku xaʼakgstitum. Pero kaj xlakata litliwakga nema kinkamaxkiyan espíritu santo ni pekuanaw akxni tanu la linaw kilatamatkan (2 Tim. 1:7). Kaʼakxilhwi niku ni kilimastatkan talakaskin natlawayaw tuku lakaskinkgo amakgapitsin.

10. ¿Tuku taʼakglhuwit kgalhikgo makgapitsi kstalaninanin Cristo chu ni katsikgo tuku natlawakgo?

¹⁰ Makgapitsi lakgkgawasan ni katsikgo tuku natlawakgo akxni akxilhkgo pi chatum xʼamigo tlawama tuku nitlan. Lakpuwankgo pi komo kskinkgolh tamakgtay xtachuna la xlaʼakgskgawilh. Chu xlakata lakpuwankgo pi chuna lalimasiyanikgo pi ni lamakgxtakgkgo, nitu wankgo. Chu min kilhtamaku tiku tlawanit tuku nitlan skini xʼamigo nitu kawa. Pero uma taʼakglhuwit ni kajwatiya lakgkgawasan kgalhikgo. Makgapitsi tiku laklankata tuwa makgkatsikgo nawanikgo chatum kgolotsin akxni chatum amigo o xalak xfamilia tlawama talakgalhin. ¿Tuku kilitlawatkan akxni kgalhiyaw uma taʼakglhuwit?

11, 12. ¿Tuku kilitlawatkan komo chatum tala kinkawaniyan nitu nawanaw akxni katsiyaw pi tlawalh talakgalhin? Kawanti tuku xlakata.

¹¹ Kalilakpuwaw pi chuna titaxtumakgolh Luis chu Carlos, chatiy lakgkgawasan tiku akxtum ankgo kcongregación. Akxni Luis katsi pi xʼamigo akxilha tiku ni lhakganankgonit, wani pi nitlan tuku tlawama chu kakawanilh lakgkgolotsin xalak congregación. Carlos lakpuwan pi ni xlakaskinka, ni kuenta tlawani xtastakyaw xʼamigo chu wani pi komo xlikana xʼamigo nitu nawan. ¿Tlan xkitaxtulh komo Luis xpekualh  xlakata max Carlos nasitsini? Max nalakpuwan: «Komo nakkawani lakgkgolotsin chu Carlos nawan pi ni xlikana, ¿tiku nakanajlanikan?». Pero na katsi pi komo nitu nawan, xʼamigo ni katilakgpalilh xlatamat; asta max nialhla natalalin Jehová. Nachuna lakapastaka pi «kapekuanikan latamanin, wa [...] kgantum tasiw [nema tlawa tuku nitlan], pero tiku lipawan Jehová nitu katiʼakgspulalh» (Pro. 29:25). Luis lakaskin pi Carlos nitu nalani, ni pekuan chu tachuwinampara xʼamigo, chu lakpuwan pi napaxtikatsini xlakata makgtayaputun. Luis wanipara pi kakawanilh lakgkgolotsin chu na wani pi namaxki kilhtamaku xlakata nawan chu komo ni nakawani lakgkgolotsin xla nakatachuwinan (Lev. 5:1).

¹² Max namin kilhtamaku nachuna nakinkaʼakgspulayan. Max kiʼamigojkan ni katilakgatilh akxni namakgtayaputunaw. Pero alistalh max naʼakgatekgsa pi kaj xlakaskinaw nitu naʼakgspula. Komo xla namasta talakaskin namakgtayayaw, max nakinkapaxtikatsiniyan xlakata ni pekuaw chu ni makgxtakgwi. Pero komo nakinkasitsiniyan, ¿talalimputunaw tiku chuna likatsi? Akxni chuna nakinkaʼakgspulayan tlakg tlan namakgapaxuwayaw tlakg xatlan amigo: Jehová. Komo tlakg paxkiyaw Dios nixawa atanu tuku anan, latamanin tiku na paxkikgo Dios xlakaskinka nakinkaʼakxilhkgoyan chu tlan nakatalalinaw. Ni kamaxkiw talakaskin Akgskgawini nalakglakgalhi congregación. Komo xmaxkiw talakaskin namakgalipuwanaw espíritu santo, xlakata ni mastamaw talakaskin nakinkapulalinan. Wa xlakata kiliskujatkan xlakata nitu nalakglakgalhi congregación (Efe. 4:27, 30).

Litliwakga xlakata natayaniyaw taʼakglhuwit

13. ¿Tukuya taʼakglhuwit kgalhiyaw xlakskujnin Dios chu tuku xlakata anan lhuwa taʼakglhuwit?

¹³ Pulaklhuwa tuku tlawa nakgalhiyaw taʼakglhuwit, max akxni ni anan tumin, makgatsankgayaw kintaskujutkan, akxni min tuku malakgsputunan, akxni niy chatum tiku xpaxkiyaw o kgalhiyaw akgtum tajatat. Lamaw “kxaʼawatiya kilhtamaku luwa skalajwa” o katuwa, chu wa xlakata nakgalhiyaw taʼakglhuwit (2 Tim. 3:1). Akxni chuna nakinkaʼakgspulayan lu xlakaskinka ni napekuanaw. Espíritu santo nakinkamaxkiyan litliwakga xlakata natayaniyaw katuwa taʼakglhuwit nema nakgalhiyaw.

14. ¿Tuku makgtayalh Job xlakata xtayanilh taʼakglhuwit?

¹⁴ Job lhuwa tuku makgatsankgalh. Makgatsankgalh tuku xkgalhi, xkamanan, xʼamigos chu tatatlalh chu tuku tlakg nitlan, xpuskat nialh lipawa Dios (Job 1:13-19; 2:7-9). Pero akxni xkgalhi lanka taʼakglhuwit kgawasa nema xwanikan Elihú matliwakglhli. Tastakyaw nema maxkilh alistalh nachuna wanilh Jehová, uma tuku xwaniputun: «Kaks kataya chu liwana kaʼakxilhti tuku lakglilakgatit tlawanit Dios» (Job 37:14). Uma tachuwin limasiya pi Job kgalhilh tamakgtay xlakata xtayanilh talakgaputsit. ¿Akxilhwi tuku limakgtayaka? Lilakapastakli la Jehová xlimaklakaskinit xʼespíritu chu xlitliwakga (Job 38:1-41; 42:1, 2). Na wa tuku nakinkamakgtayayan akinin. Max lakapastakaw akxni makgkatsinitaw pi Jehová kinkapaxkiyan. Chu la uku chuntiyaku kinkapaxkiyan.

15. ¿Tuku makgtayalh Pablo xlakata xtayanilh talakgaputsit?

¹⁵ Xlakata xtakanajla, Pablo lhuwa tuku nitlan titaxtulh nema kalipekua wililh xlatamat (2 Cor. 11:23-28). ¿Tuku makgtayalh xlakata  ni xlajwanalh chu ni xlilipuwa? Wa oración chu xlakata xlipawan Jehová. Akxni xtitaxtuma lhuwa talakgaputsit, nema max likgalhsputli xtapatin, tsokgli: «Wampi wa nkimPuchinakan xkintawi, chu na kimatliwakglhli, lakimpi luwa xakchan xakliʼakgchuwinalh xatlan tamakatsinin, chu na paks xkgaxmatkgolh xakgmakgat chixkuwin. Chuna nkilakgmaxtulh kxkilhni lapanit» (2 Tim. 4:17). Apóstol liwana xkatsi tuku xwan akxni kawanilh natalan: «Ni tu [...] ntililakgaputsayatit» (kalikgalhtawakga Filipenses 4:6, 7, 13).

16, 17. Kalichuwinanti liʼakxilhtit nema limasiya la kamakgtaya Jehová xlakskujnin xlakata natayanikgo talakgaputsit.

¹⁶ Chatum precursora nema wanikan Roxana na akxilhnit la Jehová kamakgtaya xlakskujnin. Akxni skinilh xmalana kamaxkilh talakaskin xlakata naʼan klanka tamakxtumit, xla kilhnilh chu wanilh pi komo ni xmilh skuja xʼama makglhti xtaskujut. Roxana alh tamakxtumit maski ni maxkika talakaskin. Tasaskinilh Jehová xmakgtayalh xlakata ni xmakglhtika xtaskujut, chu tlan limakgkatsilh. Lunes akxni xkitaspitnita lanka tamakxtumit taspitli xtaskujut pero nialh maxkika chu lu lilakgaputsalh xlakata maski ni lhuwa kxokgonikan xmaklakaskin tumin xlakata nakatamawani tuku maklakaskinkgo xfamilia. Amakgtum tlawanipa oración Dios. Xla xkatsi pi xlakata Dios xmaxkinit tuku xlimatliwakglhli xtakanajla na xʼama maxki tuku xlimaklakaskin kxlatamat. Akxni xtaspitma xchik, akxilhli akgtum letrero niku xlakaskimaka tiku tlan tsapanankgo. Tlawanika makgapitsi takgalhskinin xlakata xʼakxilhka komo tlan tlawa taskujut, puxku akxilhli pi ni liwana xkatsini. Maski chuna maxkilh taskujut chu tlakg lhuwa xokgonika ni xawa kxapulana xtaskujut. Roxana liwana katsilh pi Jehová kgalhtilh xʼoraciones. Pero tuku tlakg tlan, wa pi tlan kalitachuwinalh Dios tiku xkataskuja, kgalhtati chu xpuxku tsukukgolh kgalhtawakgakgo chu tamunukgolh.

¹⁷ Namin kilhtamaku namakgkatsiyaw pi Dios ni kinkakgalhtiyan akxni tlawaniyaw oración o nitunkun kinkakgalhtiyan o nichuna kinkakgalhtiyan la akinin lakaskinaw. Wi tuku xlakata chuna tlawa maski akinin ni tunkun naʼakgatekgsaw. Pero wi tuku liwana katsiyaw: Dios nikxni kamakgxtakga tiku liwana skujnikgo (Heb. 6:10).

Natayaniyaw taʼakglhuwit chu ni natlawayaw tuku nitlan

18, 19. 1) ¿Tuku xlakata ni kaks lilakawanaw akxni kinkamatlawiputunkanan tuku nitlan chu kgalhiyaw taʼakglhuwit? 2) ¿La tlan natayaniyaw talakgaputsit?

¹⁸ Xlakskujnin Dios lamaw kakilhtamaku niku nitlan kinkalikatsinikanan, wa xlakata ni kaks lakawanaw akxni kinkamatlawiputunkanan tuku nitlan, akxni xlajwananaw, akxni kinkaputsastalanikanan chu akxni wi tiku kinkamatlawiputunan tuku nitlan (Juan 15:17-19). Pero xlakata kinkamakgtayayan espíritu santo, tlan tayaniyaw putum taʼakglhuwit nema kgalhiyaw xlakata skujniyaw Jehová. Xla ni katimastalh talakaskin nakinkamatlawiputunkanan tuku nila tayaniyaw (1 Cor. 10:13). Chu nikxni kintikaʼakgxtakgwilin (Heb. 13:5). Kinkamakgtayayan chu kinkamatliwakglhan akxni makgantaxtiyaw tuku wan Biblia. Nachuna limaklakaskin xʼespíritu xlakata natlawa pi kinatalankan nakinkamaxkikgoyan tamakgtay nema maklakaskinaw.

¹⁹ Chuntiya kaputsaw espíritu santo akxni tlawayaw oración chu akxni nalikgalhtawakgayaw Biblia. Chuna “nalitatliwakglhaw wa lantla xlitlanka xlitliwakga” Dios chu tlan “nalitayaniyaw ntu nakinkaminiyan, chu napaxuwayaw” (Col. 1:11).

[Notas nema wilakgo kpágina]

¿La xkgalhtinanti?

• ¿Tuku kilitlawatkan xlakata tlan natayaniyaw akxni nakinkaputsastalanikanan?

• ¿Tuku kilitlawatkan komo wi tiku nakinkaskiniyan ni nawanaw pi lakgalhinalh?

• ¿Tuku liwana katsiyaw akxni kgalhiyaw talakgaputsit?

[Takgalhskinin]

[Epígrafe xla página 30]

¿Tuku kinkamasiyaniyan xliʼakxilhtit Josué chu Caleb?

[Epígrafe xla página 31]

¿La tlan xmakgtayaw chatum amigo tiku lakgalhinanit?