¿Tiku lamakgolh kxpulatamatkan espíritus?

Kʼakgtum sikulan xalak Europa, chatum puskat kgalhtawakgani virgen María akgtum rosario. Chatum chixku xalak África chu xpuskat limunuwilimakgolh ginebra anta niku maknuka o akgtapuka xpariente nema lu xlakgapaskan. Chatum kgawasa xalak América ni wayan chu lilakpuwan xlakata tachuwinamputun xʼángel de la guarda. Chatum sacerdote xalak Asia lhkuyu lhuwa kapsnat nema tanu tanu xcolor xlakata nakamakamastani xʼespíritus xnatlatni nema makgasa nikgonit.

PUTUM umakgolh latamanin wi tuku lakxtum kanajlakgo: kanajlakgo pi wi niku wilakgolh espíritus nema kinkamakgtayakgoyan o kinkatlawanikgoyan tuku nitlan chu tlan nakatachuwinanaw. Chu maski lhuwa chuna kanajlakgo, wi tuku ni akxtum kanajlakgo: tiku lamakgolh kxpulatamatkan espíritus.

Akgtum liʼakxilhtit, musulmanes wankgo pi kʼakgapun kaj chatum Dios lama: Alá. * Tiku kaj wankgo pi kstalaninanin Cristo, kanajlanikgo Trinidad, wankgo pi chatutu dioses kaj chatum Dios: Dios xaTlat, Dios xaKgawasa chu Dios Espíritu Santo. Hindúes, liwaka akgtum mil dioses chu diosas kakninankgo. Nachuna makgapitsin wankgo pi kkiwi, kchiwix, kkgalhtuchokgo chu animales kgalhikgo espíritus. Chu lhuwa tiku likgalhtawakgakgo novelas, akxilhkgo kcine chu ktelevisión, kanajlakgo pi anankgo tipalhuwa ángeles, demonios chu fantasmas.

Pero ni kajwatiya ni akxtum kanajlakgo xlakata tiku lamakgolh kxpulatamatkan espíritus, na ni akxtum kanajlakgo xlakata la nakatachuwinanaw. Ni putum tuku maklakaskinkan xlakata nakatachuwinankan espíritus tlan kitaxtu o makgtayanan. ¿Tuku xlakata? Xlakata naʼakgatekgsaw, o namakgachakgxiya, katamalakxtumiw akxni chuwinanaw kteléfono. Niti lakgati akxni katsi pi número nema markarlilh ni anan. Nachuna kaj paxkat nawan min kilhtamaku nachuwinana kteléfono niku niti nakgalhtiyan. Chu komo wi tiku nakinkakgalhtiyan ni xlakgatiw nakinkakgalhtiyan tiku kaj nalitaxtu tiku putsamaw. Max nachuna nakinkaʼakgspulayan akxni nakatachuwinanputunaw espíritus.

¿Tiku lamakgolh kxpulatamatkan espíritus? ¿Tlan nakatachuwinanaw? ¿Wi tuku limaklakaskinkgo xlakata nakinkakgalhtikgoyan? Chuna la naʼakxilhaw kʼumakgolh artículos, Biblia masta xtakgalhtin umakgolh takgalhskinin. Chu max asta nalikgalhtawakgaya tuku ni xkatsiya.

[Notas nema wilakgo kpágina]