Kapaxkiw tuku xaʼakgstitum
Kapaxkiw tuku xaʼakgstitum
«Paxkinita tuku xaʼakgstitum.» (SAL. 45:7, NM)
1. ¿Tuku nakinkamakgtayayan natlawanaw tuku «tankswa tijia»?
JEHOVÁ limaklakaskin xtachuwin chu xʼespíritu, chu kinkapulalinan xlakskujnin «nak tankswa [o akgstitum] tijia» (Sal. 23:3). Pero xlakata akinin lakgalhinanin, min kilhtamaku tiyayaw nixatlan tiji. Xlakata natiyaparayaw tiji nema xatlan, talakaskin fuerza natlawayaw. ¿Tuku nakinkamakgtayayan chuna natlawayaw? Natlawayaw la Jesús, tiku lu xlikana xtlawa tuku xatsajwa (kalikgalhtawakga Salmo 45:7).
2. ¿Tuku umakgolh «tankswa tijia»?
2 Kaʼakxilhwi tachuwin «nak tankswa tijia». Umakgolh tiji laktsu chu laktitsu. ¿Tuku xlakata tawan, pi umakgolh tiji kilhchanima wantuku xaʼakgstitum? Xlakata Dios kalitlawanit wantuku xaʼakgstitum xtalakaskin. Tachuwin «xaʼakgstitum» nema minitancha ktachuwin hebreo chu griego kilhchanima wantuku xatsajwa, wamputun liwana linkan latamat chuna la xtalakaskin Dios. Xlakata Jehová «anta wi niku xaʼakgstitum», akinin xlakskujni xatapaxuwan skiniyaw kakinkapulalin kkilatamatkan chu kakinkamasiyanin tukuya tiji natiyayaw (Jer. 50:7).
3. ¿La tlakg nakatsiyaw tuku xaʼakgstitum xlakata Dios?
3 Komo makgapaxuwaputunaw Jehová, lu naliskujaw natlawayaw tuku xatsajwa xtalakaskin (Deu. 32:4). Pero, talakaskin pulana liwana nakatsiniyaw xlakata Dios kBiblia. Akxni tlakg nalakgapasaw Dios, tlakg natlawaputunaw tuku xaʼakgstitum chu namakgkatsiyaw pi tlakg tlan talalinaw (Sant. 4:8). Chu, akxni wi tuku natlawayaw kkilatamatkan nema lu xlakaskinka namastayaw talakaskin pi kakinkapulalin xTachuwin.
Kaputsaw tuku xaʼakgstitum xlakata Dios
4. ¿Tuku wamputun putsakan xtalakaskin Dios?
4 (Kalikgalhtawakga Mateo 6:33.) ¿Tuku wamputun pulana naputsayaw xtalakaskin Dios? ¿Kajwatiya talakaskin nalichuwinanaw Dios? Ni. Wi tuku tlakg talakaskin. Xlakata namakglhtinan kintaskujutkan talakaskin liwana namakgantaxtiyaw xlimapakgsin. Wantiku tlawaputunkgo tuku xaʼakgstitum kawanikan: «Na kalilakgpalinantit xasasti tayat nema tlawaka chuna la xtalakaskin Dios, kxaʼakgstitum chu ni makgxtakgnan» (Efe. 4:24, NM).
5. ¿Tuku nakinkamakgtayayan ni naxlajwananaw?
5 Pero maski lu fuerza natlawayaw xlakata nakgalhakgaxmataw Dios, namin kilhtamaku wi tuku natlawayaw nema nitlan. ¿Tuku nakinkamakgtayayan xlakata ni naxlajwanan kintakanajlakan chu chuntiya natlawaputunaw tuku xaʼakgstitum? (Pro. 24:10.) Wantuku nakinkamakgtayayan, wa chali chali natlawaniyaw oración chu «xlipaks kinakujkan» chu «luwa wa [...] nkintakanajlakan» (Heb. 10:19-22). Xlikana, putum kstalaninanin Cristo max para tiku naʼankgo kʼakgapun o tiku nalatamakgo Katiyatni kililakapastakatkan pi lu xlakaskinka nakanajlayaw pi Cristo kilakgmaxtunakan chu xaPuxku Sacerdote (Rom. 5:8; Heb. 4:14-16). Kxapulana número xla uma revista xaʼinglés (julio kata 1879) lichuwinalh xlakata la xlitliwakga xkgalhni Cristo nema kinkalilakgmaxtun (1 Juan 1:6, 7). Kpágina 6 xlichuwinan pi: «Tuku xaspinini, xasnapapa tasiya akxni liʼakxilhaw maktum vidrio xaspinini. Nachuna maski lu laklixkajni kintalakgalhinkan chuna la escarlata o tuku spinini, akxni akxilhaw chuna la akxilha Dios, akxni limaklakaskin xkgalhni Cristo, xasnapapa wan». ¡Lu tlan limakgkatsiyaw xlakata katsimaw pi Jehová wi tuku tlawalh xlakata kinkalilakgmaxtun xKgawasa nema tlakg paxki! (Isa. 1:18.)
Kaʼakxilhwi la wi tuku litamakgtaya kintakanajlakan
6. ¿Tuku xlakata lu xlakaskinka ni namakgxtakgaw kilitamakgtaykan?
6 Putum kilhtamaku nawiliyaw tuku litamakgtaya kintakanajlakan wa uma: «tuku litamakgtayakan kkuxmun xla xaʼakgstitum» (Efe. 6:11, 14, NM). Max para nina makgas tamakamastaniw Jehová o akglhuwata kata skujnanimaw, lu xlakaskinka chali chali nawiliyaw tuku kinkamaxkinitan nema nalitamakgtayayaw. ¿Tuku xlakata? Xlakata Satanás chu xdemonios kamakaminkanit kKatiyatni (Apo. 12:7-12). Lu sitsinit xlakata katsi pi nialh lhuwa kilhtamaku kgalhi. Tlakg putsama la nakatlawani nitlan xkachikin Dios. Wa xlakata lu xlakaskinka pi putum kilhtamaku nawiliyaw «tuku litamakgtayakan kkuxmun xla xaʼakgstitum».
7. ¿Tuku natlawayaw komo liwana akgatekgsaw pi lu xlakaskinka «tuku litamakgtayakan kkuxmun xla xaʼakgstitum»?
7 ¿Tuku limaklakaskinkan litamakgtay kkuxmun? Xlakata nakuentajtlawa kinkuxmunkan chu nitu naʼakgspula kinakujkan. ¿Tuku xlakata kilikuentajtlawatkan nema kaj wanaw pi kinakujkan? Xlakata kinkamatlawiputunan tuku nitlan chu makglakgalhinanin akinin (Gén. 8:21). Katsiyaw pi kinakujkan kinkaʼakgskgawiyan chu tatlakgaja (Jer. 17:9). Wa xlakata lu xlakaskinka liwana namasiyaniyaw chu ni natlawa tuku nitlan. Katsiyaw pi «tuku litamakgtayakan kkuxmun xla xaʼakgstitum» lu xlakaskinka, wa xlakata nipara tsinu namaxtuyaw. Chuna, ni akxilhaw tuku Dios nipara tsinu akxilhputun chu ni nalakpuwanaw nema linan ktalakgalhin. Na ni kaj nalaktlawamiyaw kinkilhtamakujkan ktelevisión. Wata, fuerza tlawayaw xlakata putum kilhtamaku nalimakgapaxuwayaw Jehová kintayatkan. Pero ¿komo natsukuyaw lakpuwanaw tuku nitlan o natlawayaw tuku nitlan? Ni natamakgxtakgaw, chuntiya fuerza natlawayaw xlakata Dios tlan nakinkamakgtayayan (kalikgalhtawakga Proverbios 24:16).
8. ¿Tuku xlakata lakaskinaw «xalanka escudo xla takanajla»?
8 Litamakgtay xlakata kintakanajlakan na kilhchanima «xalanka escudo xla takanajla» nema lu xlakaskinka xlakata tlan «nalimamixiyatit tuku lakgpasama nakinkamalakgachaniyan» Akgskgawini (Efe. 6:16, NM). Takanajla kinkamakgtayayan chuntiya natlawayaw tuku xatsajwa, nema linan klatamat nema ni kgalhi xlisputni. Pero na talakaskin lu napaxkiyaw Jehová, komo lu napaxkiyaw, tlakg natlawaputunaw tuku xaʼakgstitum. Nachuna kinkamakgtayayan kintalakapastaknikan. ¿La makgtayanan uma xlakata nalimasiyayaw pi tlawaputunaw tuku Dios paxki?
Xatlan talakapastakni kakgalhiw
9. ¿Tuku tlan nakitaxtu komo tlan natawila kintalakapastaknikan?
9 Kilhtamaku akxni tamunukan «skinikan [...] xatlan talakapastakni» Jehová (1 Ped. 3:21, NM). Xlakata kanajlayaw ktalakgmaxtut, xkgalhni Jesús kinkalitapatikanan kintalakgalhinkan, uma tlawa pi tlan natalalinaw Dios. Pero xlakata chuntiya natlawanaw ktiji nema linan ktalakgmaxtut xlakaskinka tlan natawila kintalakapastaknikan. Akxni kinkawaniyan pi wi tuku nitlan tlawamaw, napaxtikatsiniyaw. ¿Tuku xlakata? Xlakata chuna limasiya pi tlan wi kintalakapastaknikan chu chuntiya tlawaputun tuku xaʼakgstitum xlimapakgsin Jehová (1 Tim. 4:2). Pero kintalakapastaknikan na kinkamakgtayayan xlakata natlawaputunaw tuku xaʼakgstitum.
10, 11. 1) Kalichuwinanti tuku limasiya pi lu tlan kgaxmatnikan kintalakapastaknikan nema limasiyaninitaw Biblia. 2) ¿Tuku xlakata tlan kitaxtu xatsajwa linkan latamat?
10 Komo natlawayaw tuku nitlan, kintalakapastaknikan nakinkawaniyan pi nitlan tuku tlawaw chu asta lu nalilakgaputsayaw. Chuna akgspulalh chatum kgawasa tiku makgxtakgli «tankswa tijia» akxni kajku xtsukunit likgalhtawakga Biblia. Tsukulh akxilha tiku nitu lhakganankgonit chu tsukulh xkuli marihuana. Akxni xwi ktamakxtumit nitlan xlimakgkatsi chu akxni xlichuwinan Dios xmakgkatsi pi nitu xmakgantaxtima tuku xlichuwinan. Wa xlakata makgxtakgli xkachikin Dios. Pero wan: «Ni xaklakpuwan pi kintalakapastakni chuntiya xkiwanilh tuku nitlan xaktlawama. Maski chuna xkiwani, akgtati kata chuntiya lu nitlan kintayat xakkgalhi». Alistalh tsukulh lakpuwan nataspitpara kxaxlikana takanajla. Maski xlakpuwan pi Jehová ni xkgaxmatnilh, tlawanilh oración chu skinilh xtapatilh. Nipara akgkaw minutos titaxtulh lakgapaxialhnalh xtse chu wanilh pi kaʼampa ktamakxtumit. Tlawalh kuenta tastakyaw chu skinilh chatum kgolotsin pi xlitakgalhtawakgalh Biblia. Alistalh tamunulh chu la uku paxtikatsini Jehová pi lakgmaxtulh xlatamat.
11 ¡Ni anan atanu tuku tlakg makgapaxuwanan kaj watiya linkan xatlan latamat! Komo paxkiyaw tuku xaʼakgstitum chu fuerza tlawayaw chali chali tlakg tlan namakgantaxtiyaw, lu tlan nalimakgkatsiyaw xlakata limakgapaxuwamaw Jehová kintayatkan. ¡Kaj kalakpuwanti! Namin kilhtamaku akxni putum latamanin nalinkgo xlatamatkan chuna la kinTlatikan xalak akgapun, xlakata xtalakapastaknikan nialh katikamalakapastakalh tuku nitlan xtlawakgonit. Pero la uku xlakaskinka pi kkinakujkan tlakg natlawaputunaw tuku xaʼakgstitum chu namakgapaxuwayaw Jehová (Pro. 23:15, 16).
12, 13. ¿La tlan namasiyaniyaw kintalakapastaknikan?
12 ¿La masiyaniyaw kintalakapastaknikan? Akxni likgalhtawakgayaw xtachuwin Dios, takgalhtawakga nema takilhtinit kBiblia chu makgantaxtiyaw uma talakapastakni: «Xnaku tiku xaʼakgstitum liwana lakapastaka» (Pro. 15:28). Kalakpuwaw la uma, lu xlakaskinka lilakapastakkan akxni kgalhiyaw takgalhskinin xlakata akgtum taskujut. Min kilhtamaku skujni xalipaw wan pi makgapitsi taskujut ni xlitatlawat xlakata lakatsala xlimapakgsin Dios wa xlakata kstalaninanin Cristo ni makglhtinankgo. Pero makgapitsi taskujut ni liwana wan komo tlan o nitlan natlawakan, chatunu chatunu naskiniyaw Dios pi kakinkamakgtayan liwana nalakputsananiyaw xtastakyaw akxni nina lakpuwanaw tuku natlawayaw. * Akgtum xtastakyaw Dios wa nakuentajtlawayaw ni nakamaʼakgchakgxniyaw amakgapitsin (1 Cor. 10:31-33). Pero wantuku tlakg kuentajtlawayaw, wa lu tlan natalalinaw Dios. Komo kiʼamigojkan naʼakxilhaw Jehová, pulana nalakpuwanaw: «¿Naklimakgalipuwan Jehová uma taskujut?» (Sal. 78:40, 41).
13 Akxni likgalhtawakgayaw Makatsinina xlakata tlan nakgalhtinanaw chu nachuna kTakgalhtawakga nema takilhtinit kBiblia kCongregación, liwana kalilakapastakwi tuku likgalhtawakgayaw. ¿Lismaninitaw kaj lakapara nalhtitaw niku wi xtakgalhtin? Komo chuna natlawayaw ni kintikamakgtayan liwana namasiyaniyaw kintalakapastaknikan chu na ni kintikamakgtayan tlakg natlawaputunaw tuku xaʼakgstitum. Xlakata xlikana nakinkamakgtayayan, lu nalimaxtuyaw kilhtamaku liwana nakgalhtawakgayaw chu nalilakpuwanaw la nakinkamakgtayayan xTachuwin Dios. Komo lakaskinaw pi natamakgxtakga kkinakujkan xtamapakgsin Dios talakaskin liwana namakgantaxtiyaw tuku katsiniyaw.
Kalimasiyaw pi tlawaputunaw tuku xaʼakgstitum
14. ¿La lakaskinkgo Jehová chu Jesucristo nakaskujnaniyaw?
14 Jehová chu xKgawasa lakaskinkgo pi akxni nakaskujnaniyaw xatapaxuwan natlawayaw. ¿Tuku nakinkamakgtayayan chuna natlawayaw? Wa akxni natlawayaw tuku xaʼakgstitum. Chuna la Jesús wa kTakgalhchuwin xalak Sipi: «Laklipaxaw [...] wanti kalanchu xlipaks xnakukan putsakgoy, [...] akgstitum nalatamakgoy, sampi xlikana pi wa Dios namaxkikgoy wantu xlakan putsakgoy» (Mat. 5:6, Hua Xasasti Talaccaxlan, TXS, 1999). ¿Tuku wamputun umakgolh tachuwin xpalakatakan tiku lu tlawaputunkgo tuku xatsajwa xtamapakgsin Dios?
15, 16. ¿Tuku natlawa Jehová xlakata natatlawa tuku xaʼakgstitum?
15 Kakilhtamaku likatsikgo chuna la Satanás (1 Juan 5:19). Xlikalanka Katiyatni, kperiódicos tlakg talichuwinan xlakata tuku lu nitlan tatlawama. Putum tiku ni akxilhputunkgo tuku ni xaʼakgstitum lipekuankgo akxni akxilhkgo pi lakchixkuwin lu lixkajni lalikatsini (Ecl. 8:9). Xlikana tiku paxkikgo Jehová chu makgantaxtiputunkgo xlimapakgsin katsikgo pi kaj watiya Dios tlan nakamaxki tuku nalitatliwakglha xtakanajlakan. Nialh makgas wantiku lu lixkajni likatsikgo nakamalakgsputukan. Wantiku xalakatitum nialh katilipatinankgolh kaj xlakata tiku lakgalhinankgo chu tiku katlawani tuku nitlan (2 Ped. 2:7, 8). ¡Lu tlan namakgkatsiyaw!
16 Akinin tiku stalaniyaw Cristo chu skujnaniyaw Jehová, katsiyaw pi tiku lakaskinkgo katatlawalh tuku xaʼakgstitum, Dios «namaxkikgoy wantu xlakan putsakgoy». Xlikana, nalipaxuwakgo xlakata natawila xasasti akgapun chu xasasti katiyatni niku «akgstitum nalatamakan» (2 Ped. 3:13, TXS, 1999). Maski akxilhaw pi kakilhtamaku tlawakgo tuku lakaskin Satanás, lu lixkajni likatsikan uma ni tlawa pi naxlajwanan kintakanajlakan (Ecl. 5:8). Jehová tiku wilacha talhman putum akxilha chu nialh makgas nakalakgmaxtu tiku tlawakgo tuku xaʼakgstitum.
Namakglhtinanaw tasikulunalin xlakata tlawayaw tuku xaʼakgstitum
17. ¿Tuku tasikulunalin makglhtinanaw xlakata natlawayaw tuku xaʼakgstitum?
17 Anta kSalmo 146:8 Jehová wan pi: «Kapaxki ti laktankswa ixlatamatkan». Akxilhti kʼuma versículo, ¿tuku tlan kitaxtu xlakata tlawakan tuku xalakatitum? Liwana katsiyaw pi Tiku mapakgsinan xlikalanka kakilhtamaku nakinkapaxkiyan. ¡Lu lanka talakgalhaman! Wa xlakata, liwana katsiyaw pi Jehová nakinkamaxkiyan tuku namaklakaskinaw komo pulana nawiliyaw xTamapakgsin (kalikgalhtawakga Salmo 37:25 chu Proverbios 10:3). Alistalh putum katiyatni xlakan nawan tiku xaʼakgstitum (Pro. 13:22). Lhuwa xlakskujnanin Dios tiku ni makgxtakgkgo nakamaxkikan latamat nema ni kgalhi lisputni kxakalipaxaw Katiyatni. Chu la uku lipaxuwakgo xlakata tlan limakgkatsikgo chu tlan katalalinkgo xfamiliajkan chu xnatalan xla takanajla (Fili. 4:6, 7).
18. Xlakata kgalhimaw xkilhtamaku Jehová, ¿tuku kilitlawatkan?
18 Xlakata kgalhimaw akxni nachan xalanka xkilhtamaku Jehová chuntiya katlawaw xtalakaskin Dios (Sof. 2:2, 3). Kilimasiyatkan pi xlikana tlawaputunaw tuku xatsajwa. Nikxni natapuxtuyaw tuku «litamakgtayakan kkuxmun xla xaʼakgstitum», xlakata komo chuna xtlawaw kinakujkan nialhtu xlitamakgtayalh. Na lu xlakaskinka tlan kintalakapastaknikan nakgalhiyaw xlakata chuna tlan namakgkatsiyaw chu namakgapaxuwayaw kinTlatikan xalak akgapun (Pro. 27:11).
19. ¿Tuku liwana kililakapastakatkan natlawayaw, chu tuku naʼakxilhaw kʼartículo nema aku mima?
19 Jehová «lakputsanama xlikalanka katiyatni», xlakata «la nalimaklakaskin xlitliwakga xlakata nakamakgtaya tiku kgalhinikgo xatakgatsin xnaku» (2 Cró. 16:9). ¡Lu tlan limakgkatsiyaw umakgolh tachuwin, akinin tiku liskujaw xlakata nalilatamayaw chuna la xliwanat chu lamaw kkakilhtamaku niku lhuwa tuku nitlan lama chu lixkajni likatsikan! Tiku tamakgatlinikgonit Dios max kaks lilakawankgo xlakata makgantaxtiyaw xtamapakgsin Dios, pero katsiyaw pi komo chuna natlawayaw tlan nakinkakitaxtuniyan (Isa. 48:17; 1 Ped. 4:4). Wa xlakata liwana lakapastaknitaw nalimasiyayaw pi tlawaputunaw tuku xaʼakgstitum putum kkilatamatkan. Pero wi tuku na kilitlawatkan. Xlakata nalimasiyayaw pi xatakgatsin kinakujkan liskujniyaw Dios, na naxkajniyaw tuku xalixkajni. Kʼartículo nema aku mima naʼakxilhaw tuku kilhchanima.
[Notas nema wilakgo kpágina]
^ párr. 12 Xtastakyaw Biblia xlakata taskujut lichuwinan La Atalaya 15 xla abril kata 1999, kpáginas 28 asta 30.
¿La xkgalhtinaw?
• ¿La kinkamakgtayayan natlawaputunaw tuku xaʼakgstitum akxni katsiyaw la xlilakaskinka talakgmaxtut?
• ¿Tuku xlakata lu xlakaskinka putum kilhtamaku nawiliyaw tuku «litamakgtayakan kkuxmun xla xaʼakgstitum»?
• ¿La masiyaniyaw kintalakapastaknikan?
[Takgalhskinin]
[Epígrafe xla página 26]
Akxni limasiyaninitaw Biblia kintalakapastaknikan nakinkamakgtayayan nalaksakaw komo tlan o nitlan akgtum taskujut
