Wantuku masiya xTachuwin Dios

¿Tuku xlakata kilikatsinitkan xlakata Dios?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Tuku xlakata kilikatsinitkan xlakata Dios?

Dios kinkamakatsiniyan pi wi tuku lu tlan natlawa xpalakata latamanin. Chu uma tamakatsin wi kBiblia. Biblia xtachuna maktum carta nema kinkamalakgachanin kinTlatikan xalak akgapun. (Kalikgalhtawakga Jeremías 29:11.)

2. ¿Tukuya tamakatsin lakaskin Dios nakatsiyaw?

Nipara chatum mapakgsina tlan masputu tuku nitlan latlawanikan chu tuku ni xaʼakgstitum, tajatat chu linin. Pero Dios wanit pi nalimin akgtum xatlan tamapakgsin nema xliputum kilhtamaku namasputu tuku lipatinamakgolh putum latamanin. (Kalikgalhtawakga Daniel 2:44.)

3. ¿Tuku xlakata lu xlakaskinka nakatsiniyaw xlakata Dios la uku?

Dios nialh makgas nakamasputu putum tiku nitlan likatsikgo. Pero pulana kamasiyanima lhuwa millones latamanin nakapaxkikgo xtalatamanin chu tlakg tlan nalatamakgo. Biblia kinkamasiyaniyan la nalakkaxtlawayaw kintaʼakglhuwitkan, kinkamasiyaniyan la xatapaxuwan nalatamayaw chu la namakgapaxuwayaw Dios. (Kalikgalhtawakga Sofonías 2:3.)

4. ¿Tiku xtalakapastakni tuku wi kBiblia?

Biblia kgalhi 66 libros chu 40 lakchixkuwin tsokgkgolh. Xapulana makkitsis libro tsokgli Moisés chu titaxtunita liwaka akgtutu mil akgkitsis ciento kata, chu xaʼawatiya libro tsokgli apóstol Juan chu titaxtulha akgtum mil akgnajatsa ciento kata akxni tsokgli. Nipara chatum tiku tsokgli xtachuwin Dios xakstu xlakapastakni wililh, wata tsokgkgolh xtalakapastakni Dios. Wa xlakata tuku tatsokgnit kBiblia wa xtalakapastakni Dios. (Kalikgalhtawakga 2 Timoteo 3:16 chu 2 Pedro 1:21.)

¿Tuku liwana likatsiyaw pi Biblia wa xtalakapastakni Dios? Xlakata liwana wan tuku aku nala, latamanin nila chuna tlawakgo (Isaías 46:9, 10). Anta kBiblia limasiya la lu tlan likatsi Dios. Nachuna kgalhi litliwakga xlakata nakalakgpalini xlatamatkan latamanin. Wa xlakata lhuwa millones latamanin kanajlakgo pi Biblia wa xtalakapastakni Dios. (Kalikgalhtawakga Josué 23:14 chu 1 Tesalonicenses 2:13.)

5. ¿Tuku talakaskin xlakata naʼakgatekgsaw tuku wan Biblia?

Jesús, lu liwana xmasiya xTachuwin Dios. Akxni xlama, lhuwa latamanin xlakgapaskgo xTachuwin Dios, pero ni putum xʼakgatekgskgo. Xlakata liwana xʼakgatekgskgolh tuku xwamputun xtachuwin Dios, xkalitachuwinan chu alistalh xkawani tuku xwamputun. Uma pulaktu nachuna natlawayaw, xlakata tlan nakkamakgtayayan tlakg liwana naʼakgatekgsa tuku masiya Biblia. (Kalikgalhtawakga Lucas 24:27, 45.)

Akinin katsiyaw pi wix katsiputuna xlakata Dios chu tuku xlakata lamaw unu. Lhuwa tiku ni katilakgatikgolh pi katsiputuna tuku wan Biblia. Pero lu xlakaskinka nakatsiniya. Chuna la wan Biblia, tiku nakatsinikgo xlakata Dios tlan nalatamakgo xliputum kilhtamaku. (Kalikgalhtawakga Mateo 5:10-12 chu Juan 17:3.)

Komo tlakg katsiputuna xlakata uma, kaʼakxilhti capítulo 2 xla libro ¿Tuku xlikana masiya Biblia?, nema tlawakgonit xtatayananin Jehova.

¿TUKU xlikana MASIYAY BIBLIA?