¿Xkajniyaw tuku nitlan?
¿Xkajniyaw tuku nitlan?
«Xkajninita wantu nitlan.» (HEB. 1:9)
1. ¿La xlatalalinkgolh kstalaninanin Cristo?
AKGTUM kilhtamaku, Jesús kawanilh xtamakgalhtawakgen tukuya tayat tlakg xlakaskinka xlikgalhitkan: «Limapakgsin xasasti kkamakgaxtakgniyan: Kalapaxkitit nchatunu chatunu; lantla nkit kkapaxkinitan, mpi na chuna nkalapaxkitit [...]. Wa yuma nakalilakapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit» (Juan 13:34, 35). Uma tachuwin xkalimapakgsima pi lu xlapaxkikgolh, chu uma xkalilakgapaska pi xaxlikana kstalaninanin. Chu atanu kilhtamaku Jesús kawanilh: «Kapaxkitit [mintalamakgasitsinkan], [...] chu na kapalakatlawakgotit oración wa nti xalikgaman katlawakgoyan, chu nkasokgalikoyan» (Mat. 5:44).
2. ¿Tuku naxkajniyaw kstalaninanin Cristo?
2 Pero Jesús ni kajwatiya kawanilh kstalaninanin tuku xpaxkikgolh na kawanilh tuku kxkajnikgolh. Pulaktum tuku xtawanitta nema xama makgantaxti Cristo wan: «Paxkinita [tuku xaʼakgstitum], na xkajninita wa ntu nitlan» (Heb. 1:9; Sal. 45:7). Jesús wililh liʼakxilhtit pi nikaj watiya natlawapuntunkan tuku xaʼakgstitum, na talakaskin naxkajniyaw talakgalhin, putum tuku lakatsala xtamapakgsin Jehová. Apóstol Juan liwana wa: «Kaxati kawa nti ntlaway ntalakgalhin, laktukxyawa limapakgsin; xampi wa ntalakgalhin wa xlaktukxyawana limapakgsin» (1 Juan 3:4).
3. ¿Tuku pulaktati nalimasiyayaw pi xkajniyaw tuku nitlan nema naʼakxilhaw la uku?
3 Chatunu kstalaninanin Cristo xlitlawat uma takgalhskinin: «¿Kxkajni tuku xlimapakgsin Dios wan pi ni xlitatlawat?». Chu uku kaʼakxilhwi pulaktati la namasiyayaw pi xkajniyaw tuku nitlan: 1) akxni lhuwa wakan kuchu, 2) tuku xla skuwana, 3) talakgxtumit nema xalimaxana chu 4) la nakatalalinaw tiku ni makgxtakgkgo talakgalhin.
Kuentajkatlawaw xlakata kuchu
4. ¿Tuku xlakata Jesús tlan wa pi ni lhuwa xwaka vino?
4 Jesús namakglhuwa walh vino, xkatsi pi Jehová kinkamaskiwin (Sal. 104:14, 15). Pero nikxni lhuwa walh (Pro. 23:29-33). Wa xlakata tlan wa pi ni lhuwa nawayaw (kalikgalhtawakga Lucas 21:34). Akxni lu lhuwa wakan kuchu linan klaklanka talakgalhin. Wa xlakata Pablo tsokgli: «Chu na ni tilikgachiyatit vino, wantu malukujniy wanti lixkan lay; chi wampi wa nkalitaxajtit [o kalitatsamatit] Spíritu» (Efe. 5:18). Nachuna kawanilh natalan xalakpuskatin tiku xlinkgoya kata ni «xakgotnin» xwankgolh (Tito 2:3).
5. ¿Tukuya takgalhskinin xlitlawat chatunu kstalanina Cristo tiku wakgo kuchu?
5 Komo nitu limakgkatsi kintalakapastaknikan akxni wayaw kuchu, katlawaw umakgolh takgalhskinin: «¿Nachuna kakxilha pi nitlan lhuwa wakan kuchu chuna la Jesús? Komo xkilakgchalh nakstakyawa chatum tala xlakata lhuwa way kuchu, ¿tlan xakwanilh pi nitlan? ¿Kway kuchu xlakata nialh naklakapastaka kintaʼakglhuwit o kaj xlakata tlan naklimakgkatsi? ¿La xlilhuwa kwa kuchu akgatunu semana? ¿Tuku kwan akxni wi tiku kiwani pi kmalakatsalima la kwa kuchu? ¿Klisitsi akxni chuna kiwanikan?». Komo nialh la namakgxtakgaw kuchu nialh lu tlan nalakapastaknanaw chu nila tlan nalaksakaw tuku natlawayaw kkilatamatkan. Chu akinin kstalaninanin Cristo ni namastayaw talakaskin xlakata kilikuentajtlawatkan kintalakapastaknikan (Pro. 3:21, 22).
Ni kamakgtanuw tuku xla skuwana
6, 7. 1) ¿La tlawalh Jesús akxni Satanás chu xdemonios xmatlawiputunkgo tuku nitlan? 2) ¿Tuku xlakata lu talakgatuminit xlakata taskuwan?
6 Akxni Jesús xlama unu kKatiyatni, nikxni mastalh talakaskin pi Satanás chu xdemonios xmatlawikgolh tuku nitlan. Chu akxni Akgskgawini xmatlawiputun tuku nitlan Jesús nikxni makgxtakgli Dios (Luc. 4:1-13). Chu nachuna tayanilh akxni Akgskgawini xlakglakgalhiputun xtalakapastakni chu xtayat (Mat. 16:21-23). Nachuna, kamaxtunilh demonios tiku xkalaktanunit (Mar. 5:2, 8, 12-15; 9:20, 25-27).
7 Kata 1914, akxni Jesús mapakgsina tlawaka, katamakxtulh kakgapun Satanás chu xdemonios xlakata nialh xmaxkajwanikgolh akgapun. Wa xlakata, Akgskgawini tlakg lakpuwanit na «akgskgawi xlipaks ntachixkuwitat» o latamanin (Apo. 12:9, 10). Wa xlakata tlakg katsiputunkgokan xlakata taskuwan. Xlikana, lu talhuwinit chu kilikuentajtlawatkan ni namaklakaskinaw. Pero ¿la natlawayaw?
8. ¿Tukuya takgalhskinin kilitlawatkan xlakata tuku lilakgastananaw?
8 Biblia liwana kinkawaniyan pi nitlan tuku xla taskuwan chu amakgapitsi tuku na wa litaxtu (kalikgalhtawakga Deuteronomio 18:10-12). La uku Satanás chu xdemonios limaklakaskinkgo películas, libros chu videojuegos xlakata nakatamaknuni kxtalakapastakni latamanin tuku xla taskuwan. Wa xlakata xlakaskinka liwana nalaksakaw tuku lilakgastananaw. Katlawaw uma takgalhskinin: «Umakgolh papaʼ nema titaxtulh, ¿klilakgastananit películas, programas xla televisión, videojuegos o klikgalhtawakganit libros nema lichuwinan taskuwan chu xlakata espíritus? ¿Kakxilha pi lu xlakaskinka ni nakmakgtanu xlakata taskuwan o klakpuwan pi nitu kintitlawanilh? ¿Klakpuwanit la akxilha Jehová tuku klilakgastanan? ¿Nialh lu kkuentajtlawa xlakata ni nakmakgtanu tuku nixatlan espíritus? Komo chuna, ¿nakmakgxtakga putum umakgolh chu nipara tsinu ktimastalh talakaskin natanu kkintalakapastakni chu naklimasiya pi kpaxki Jehová chu tuku xaʼakgstitum limapakgsin?» (Hech. 19:19, 20).
Kakgalhakgaxmatwi Jesús chu ni katlawaw talakgxtumit xalimaxana
9. ¿Tuku max natlawa pi chatum chixku o puskat natsuku tlawaputun tuku nitlan?
9 Akxni Jesús xlichuwinan xlakata talakgxtumit xlimaklakaskin xlimapakgsin Dios. Jesús wa: «¿Tu [ni] alikgalhtawakgayatit ntani wan, mpi wa nti ntimalakatsukunalh kxkilhtsukut, chixku, chu xawa mpuskat ntitlawakgolh? Chu na waj: “Wa cha xpalakata, mpiwa nchixku nalimakgaxtakga xtlat, chu xtsi, nawa natatalakgxtumiy xpuskat, [...] akgtum liwa nawankgoy. Chuna mpi nialh xchatuykan, [...] watiya akgtum liwa wankgonit. Chuna mpi wantu Dios makxtum tlawalh, ni kamapapitsilh nchixku”» (Mat. 19:4-6). Cristo xkatsi pi tuku akxilhkan chan knaku. Wa xlakata anta kTakgalhchuwin xalak Sipi wa: «Wixin katsiyatit la wan yama limapakgsin [...], nama wan: “Ni kaxakgatli tanuj puskat pala wi mimpuskat”. Wanti maski kaj naʼukxilha chatum puskat, chu xla napuwan pi tunkan xla xtlawalh, pus tama chixku aya tlawanit talakgalhin kxnaku» (Mat. 5:27, 28, Hua Xasasti Talaccaxlan, 1999). Wantiku ni kuentajtlawa uma xtastakyaw Jesús tlakg napaxki tuku nitlan.
10. Kawanti liʼakxilhtit niku limasiya pi tiku akxilha tiku ni lhakganankgonit tlan namakgxtakga.
10 Xlakata Satanás lu kamatlawiputun tuku xalimaxana tlawa pi kaniwa natasiya tiku ni lhakganankgonit. Akxni wi tiku akxilhnit umakgolh lu tuwa namaxtu kxtalakapastakni chu max nalismani. Chuna akgspulalh chatum tala tiku, wa: «Tsekg xaklilakgastanan tiku ni lhakganankgonit. Xakmakgkatsi pi la komo alakatanu niku xaklama chu ni xlakgsakgali la xakskujni Jehová. Xakkatsi pi nitlan tuku xaktlawama, pero xakpuwan pi Dios xmakgamakglhtinanku la xakkakninani». ¿Tuku makgtayalh nalakgpali xtayat? Tala wan: «Maski lu tuwa kmakgkatsilh, kkawanilh lakgkgolotsin kintaʼakglhuwit». Titaxtulh kilhtamaku makgxtakgli uma tuku lu lixkajni xtlawama. «Akxni nialh ktlawalh uma talakgalhin, kmakgkatsilh pi kintalakapastakni lu xlikana tlan xwi.» Uma limasiya pi tlan naxkajniyaw lilakgastastan niku taxtu tiku nitu lhakganankgonit komo xlikana xkajniyaw tuku nitlan.
11, 12. ¿La nalimasiyayaw pi xkajniyaw tuku nitlan akxni laksakaw tukuya tatlakgni nakgaxmataw?
11 Tatlakgni chu xaletra takilhtlin tlawa pi kachalh kkinakujkan tuku wan. Xlikana tatlakgni kinkamaskiwinitan Dios chu lhuwata kata limaklakaskinkan xlakata nalikakninanikan (Éxo. 15:20, 21; Efe. 5:19). ¿Pero ni xlikana pi lhuwa tatlakgni xala kakilhtamaku lichuwinan talakgxtumit xalimaxana? (1 Juan 5:19.) ¿Tuku nakinkamakgtayayan nakatsiyaw komo tuku kgaxmatmaw ni maxkajwanima kintalakapastaknikan?
12 Tlan xtlawaw uma takgalhskinin: «¿Tuku wankgo takilhtlin nema kkgaxmata? ¿Lichuwinan pi tlan makgninankan, laʼakgskgawikan, talakgxtumit nema ni xlitatlawat chu lixkajni tachuwin? Komo xaklikgalhtawakganilh xaletra achatum, ¿nalakpuwan pi kxkajni tuku nitlan o nalakpuwan pi xalixkajni wi kinaku?». Nila nawanaw pi xkajniyaw talakgalhin komo kgaxmataw takilhtlin nema lichuwinan tuku nitlan. Chuntiya kalakapastakwi uma tuku wa Jesús: «Wa ntu ntaxtuy kxkilhni, anta minacha kxnaku; na wa yuma wa ntu lakgalhiy nchixku. Sampi anta kxnaku nchixku ntaxtuy ni lakwan talakapastakna, lamakgnit, chu [tiku akgskgawi xchixku o xpuskat], chu [talakgxtumit nema ni xlitatlawat], takgalhan, chu ntamaxtun takgsanin xla achatum, chu xkajwachuwinat» (Mat. 15:18, 19; katamalakxtumi Santiago 3:10, 11).
Nachuna kaʼakxilhwi tiku lakgalhinankgo la Jesús kaʼakxilha
13. ¿La xkaʼakxilha Jesús latamanin tiku ni xmakgxtakgkgo talakgalhin?
13 Jesús xminit kawani tiku xlakatsalakgonit xlimapakgsin Dios pi xmakgxtakgolh ni xatlan tayat (Luc. 5:30-32). ¿La xkaʼakxilha Jesús tiku ni xmakgxtakgkgo tuku nitlan? Jesús wa pi nitlan xkatalalinka (Mat. 23:15, 23-26). Akxni wa: «Ni xlipaks wa nti nkiwaniy: “Tlati, Tlati”, natanuy kxtapakgsin akgapun, wampi xman wa nti xtlawalh xtalakaskin nkin Tlat wa nti wi nkakgapun. Nakiwanikgoy akxni yama nkilhtamaku [akxni nakalakputsananikan]: “Tlati, Tlati, ¿tu ktiʼakgchuwinaw kmintukuwini, chu na kmintukuwini ktilimaxtuw akgskgawini, chu na kmintukuwini ktilitlawaw lhuwa likakni?”». Umakgolh latamanin tiku ni makgxtakgkgo tuku nitlan tlawamakgolh, Cristo nakawani: «Kakintapanunitit» (Mat. 7:21-23). ¿Tuku xlakata nipara tsinu katikalakgalhamalh? Xlakata tlawamakgolh tuku nitlan ni lakgachixkuwilimakgolh Dios chu katlawanikgo tuku nitlan amakgapitsin.
14. ¿Tuku xlakata tamakxtukan kcongregación tiku tlawama tuku nitlan?
14 Xtachuwin Dios wan pi katamakxtuka kcongregación tiku ni makgxtakga nixatlan tayat (kalikgalhtawakga 1 Corintios 5:9-13). Pulaktutu tuku xlakata chuna xlitatlawat: 1) xlakata ni lixkajni natalichuwinan xtukuwani Jehová, 2) ni natamaxkajwani congregación chu 3) tiku lakgalhinanit namakgxtakga tuku ni tlan tlawama.
15. ¿Tuku lu xlakaskinka takgalhskinin xlitlawat tiku ni makgxtakgputun Jehová?
15 ¿Nachuna kaʼakxilhaw tiku lakatsalakgo xlimapakgsin Dios chuna la kaʼakxilha Jesús? Putum kilitlawatkan uma takgalhskinin: «Komo wi tiku xmaxtuka kcongregación o tiku makgxtakga xkachikin Jehová, ¿chuntiyaku tlan xaktalalilh? ¿Chu komo xmaxtuka chatum tiku xalak kifamilia nema nialh kkinchik wi?». Akxni chuna titaxtuyaw, taliʼakxilha komo xlikana paxkiyaw tuku xaʼakgstitum chu ni makgxtakgaw Jehová. *
16, 17. ¿Tuku lu tuwa titaxtulh kintalakan, chu tuku makgtayalh nakgalhakgaxmata tuku wanika?
16 Kalichuwinaw tuku titaxtulh chatum tala. Uma tala akxilhli la xkgawasa tiku lankata xwanit nialh xpaxki Jehová chu xtlawana talakgalhin chu nipara tsinu xlimasiya pi nitlan xlimakgkatsi chu tamakxtuka kcongregación. Tala lu xpaxki Jehová, pero na xpaxki xkgawasa, wa xlakata lu tuwa xmakgkatsi namakgantaxti tuku wan Biblia xlakata ni nakatalalinkan tiku ni makgxtakgkgo talakgalhin.
17 ¿Tuku tlan xwaniw uma tala? Chatum kgolotsin wanilh pi Jehová xkatsi la xlilhuwa xlilipuwama. Na malakapastakalh la makgkatsilh Dios akxni akxilhli pi makgapitsi ángeles nialh kgalhakgaxmatkgolh. Na wanilh pi maski kinTlatikan katsi la xlituwa makgkatsiyaw, mapakgsinan pi natamakxtukan kcongregación tiku ni makgxtakga tuku nitlan tlawama. Tala makgamakglhtinalh uma tastakyaw chu makgantaxtilh tuku limapakgsinankan xlakata tiku kamaxtukan kcongregación. * Akxni tatayayaw Jehová makgapaxuwayaw (Pro. 27:11).
18, 19. 1) ¿Tuku limasiyayaw akxni nialh talalinaw tiku ni makgxtakgkgo talakgalhin? 2) ¿Tuku nakitaxtu komo wa Jehová natatayayaw?
18 Komo na natitaxtuyaw tuku lu tuwa chuna la titaxtulh kintalakan, tlan nalakapastakaw pi Jehová kinkalakgalhamanan akxni akxilha la patinanaw. Pero akxni nialh talalinaw tiku tamakxtuka kcongregación o tiku makgxtakgnit xkachikin Jehová limasiyayaw pi lu xkajniyaw tuku tlawalh nema litamakxtuka kcongregación. Pero na limasiyayaw pi paxkiyaw tiku lakgalhinalh xlakata katsiyaw pi limakgtayamaka akxni tamakxtukan kcongregación. Komo chuna natlawayaw wa tatayamaw Jehová, chu max wantiku tlawalh talakgalhin namakgxtakga tuku nitlan tlawama chu nataspitpara kxaxlikana takanajla.
19 Chatum tala tsumat tiku tamakxtuka kcongregación chu alistalh makgamakglhtinamparaka uma tuku tsokgli: «Klipaxuwa pi Jehová lu paxki xkachikin chu kuentajtlawa nitu nalixkajwanan. Tiku ni xalak xkachikin Jehová lakpuwankgo pi lu ni kalakgalhamankan, pero xlakaskinka chuna natlawakan xlakata kapaxkikan». ¿Chuna xtilakpuwa komo natalan xalak congregación chu xfamilia chuntiya tlan xtitalalinkgolh? Komo natatayayaw tuku limapakgsinan Biblia, limasiyayaw pi tlawaputunaw tuku xaʼakgstitum chu Jehová lakgchan nakinkawaniyan la nalinaw kilatamatkan.
«Kaxkajmakgantit tu nitlan»
20, 21. ¿Tuku xlakata lu xlakaskinka nakatsiniyaw naxkajniyaw tuku nitlan?
20 Apóstol Pedro kinkawaniyan: «Lakatitum nalakapastakatit, chu na skgalalh natawilayatit». ¿Tuku xlakata? Xlakata «wa akskgawini, xtachuna xatsinksni lapanit, lama kmintuntamaknikan, putsama wanti nachipay, naway» (1 Pedro 5:8). ¿Namaxkiyaw talakaskin na nakinkaʼakgchipayan Akgskgawini? Xlakata ni nakinkaʼakgchipayan, talakaskin xaxlikana naxkajniyaw tuku nitlan.
21 Tuwa naxkajniyaw tuku nitlan. Akinin makglakgalhinanin chu wilaw kkakilhtamaku nema lu kinkamatlawiputunan tuku nitlan (1 Juan 2:15-17). Pero komo natlawayaw chuna la Jesús chu tlakg napaxkiyaw Jehová, nipara tsinu katitlawaputuw talakgalhin. Lu xlakaskinka pi putum kstalaninanin Cristo uma tuku xlitlawatkan «kaxkajmakgantit tu nitlan». Wa xlakata kamakgantaxtiw uma limapakgsin, xlakata katsiyaw pi Jehová: «kamakgtakgalha ixkamanan [nema ni makgxtakgkgo] xlakata ni nakatlawanikan tu nitlan; kalakgmaxtu nak ixmakankan laktlakatni» (Sal. 97:10).
[Notas nema wilakgo kpágina]
^ párr. 15 Tlakg lichuwinan xlakata uma La Atalaya 15 xla noviembre kata 1981, página 20 chu recuadro chu página 20 asta 25.
^ párr. 17 Na kaʼakxilhti La Atalaya 15 xla enero kata 2007, páginas 17 asta 20.
¿Tuku xkgalhtinaw?
• ¿Tuku nakinkamakgtayayan nakatsiyaw la maklakaskimaw kuchu?
• ¿Tuku nakinkamakgtayayan ni namakgtanuyaw tuku xla taskuwan?
• ¿Tuku xlakata lu nitlan akxilhkan tiku nitu lhakganankgonit?
• Akxni maxtukan congregación tiku lu paxkiyaw, ¿la limasiyayaw pi xkajniyaw tuku nitlan?
[Takgalhskinin]
[Epígrafe xla página 29]
¿Tuku lu xlakaskinka xlilakapastakat kstalanina Cristo tiku nawa kuchu?
[Epígrafe xla página 30]
Kuenta katlawaw xlakata tuku lilakgastananaw ni nakinkaliʼakgskgawiyan Satanás
[Epígrafe xla página 31]
¿Tuku tamaknuma kxnaku tiku lilakgastanan tiku nitu lhakganankgonit?
