Kalipawaw Jehová la uku xlakata talakatsuwinita lisputni
Kalipawaw Jehová la uku xlakata talakatsuwinita lisputni
«Xliputum kilhtamaku kalipawantit Jehová.» (ISA. 26:4)
1. ¿Tuku xlakata ni xtachuna wilakgolh xlakskujnin Dios chu amakgapitsi latamanin?
KKAKILHTAMAKU niku lamaw, lhuwa millón latamanin ni katsikgo tiku nalipawankgo xlakata lhuwa tuku nitlan kaʼakgspulanit chu kaʼakgskgawikanit. Pero ¡akinin xlakskujnin Jehová nichuna kinkaʼakgspulayan! Xlakata kinkapulalinan xliskgalala Dios katsiyaw pi lu nitlan nalipawanaw uma kakilhtamaku chu «[x]mapakgsinanin» (Sal. 146:3). Wata mastayaw talakaskin pi Jehová napulalin kilatamatkan chu tuku tlawaputunaw, xlakata katsiyaw pi xla kinkapaxkiyan chu putum kilhtamaku makgantaxti xTachuwin (Rom. 3:4; 8:38, 39).
2. ¿Tuku wa Josué nema limasiya pi tlan lipawankan Dios?
2 Akglhuwata ciento kata, Josué lichuwinalh pi lu tlan lipawankan Dios. Akxni xʼamaja niy kawanilh israelitas: «Wixin liwana katsiyatit xliputum minakujkan chu xliputum milatamatkan pi putum xalakwan tachuwin wantuku wanit Jehová miDioskan paks kgantaxtunit. Putum makgantaxtilh mimpalakatakan» (Jos. 23:14).
3. ¿Tuku limasiya xtukuwani Dios xlakata la likatsi?
3 Jehová makgantaxti tuku wan xlakata kapaxki xlakskujnin. Pero wi atanu tuku tlakg xlakaskinka limakgantaxti xtachuwin: xlakata xtukuwani (Éxo. 3:14; 1 Sam. 12:22). Tuku litsuku maktum Biblia nema wanikan The Emphasized Bible chu tsokgli, J. B. Rotherham wan pi xtukuwani Dios wamputun pi Dios tlan natlawa putum tuku natalakaskin xlakata namakgantaxti tuku wanit. Akxni kgaxmataw xtukuwani, lakapastakaw pi putum kilhtamaku makgantaxti tuku wan. Dios tlan tlawa tuku xlitlawat akxni nalakaskin chu niku natalakaskin. Ni anan tuwa makgkatsi. Putum kilhtamaku chuna natlawa la wamputun xtukuwani.
4. 1) ¿Tuku kinkawaniyan natlawayaw Isaías 26:4? 2) ¿Tuku naʼakxilhaw kʼuma artículo?
4 Akstu kakinkakgalhskinkan: «¿Liwana kkatsi pi tlan naklipawan Jehová? ¿Ni lu klilakgaputsa tuku aku namin xlakata kkatsi pi putum tlan lakkaxtlawa?». Isaías 26:4 kinkawaniyan: «Xliputum kilhtamaku kalipawantit Jehová, xlakata Jah Jehová wa la akgtum lanka Chiwix nema xliputum kilhtamaku natawila». Xlikana pi la uku nialh tlawa tuku nila tamakanajla chuna la tlawalh akxni tsokgka Biblia. Pero chuntiya litaxtu «la akgtum lanka Chiwix nema xliputum kilhtamaku natawila» wa xlakata tlan «xliputum kilhtamaku» nalipawanaw. Jehová tiku ni kinkamakgxtakgan, ¿la kinkamakgtayayan akinin tiku liwana skujniyaw? Pulaktutu la kinkamakgtayayan: kinkamaxkiyan litliwakga xlakata ni natlawayaw tuku nitlan, kinkamakgtayayan akxni ni kinkakgaxmatnikanan o akxni kinkaputsastalanikanan chu kinkamatliwakglhan akxni kgalhiyaw taʼakglhuwit. Chuna la naʼakxilhtilhayaw uma pulaktutu kalilakapastakwi la tlan tlakg nalipawanaw Jehová.
Kalipawaw Jehová xlakata ni natlawayaw tuku nitlan
5. ¿Tuku tlawa pi tlakg tuwa nalipawanaw Dios?
5 Max nituwa lipawanaw pi Jehová namakgantaxti tuku kgalhkgalhimaw nema wanit pi nalimin, Paraíso o nakamalakastakwani tiku nikgonita. Pero tlakg tuwa makgkatsiyaw nalinaw kilatamatkan chuna la lakaskin. Wa xlakata talakaskin liwana nakanajlayaw pi akxni makgantaxtiyaw xlimapakgsin chu xtastakyaw wa tuku tlakg tlan chu nalipaxuwayaw. Mapakgsina Salomón kinkamaxkiyan uma tastakyaw: «Kalipawanti Jehová xliputum minaku, chu ni wa mintalakapastakni kalipawanti. Chu xliputum mintiji kuentajkatlawani, chu xla namatsaja mintiji» (Pro. 3:5, 6). Uma texto lichuwinan “tiji”. Uma tachuwin limasiya pi nakanajlaniyaw Dios ni kaj natasiya pi kanajlayaw tuku Dios wanit natlawa na talakaskin nalimasiyayaw kkilatamatkan. La uku kaʼakxilhwi la tlan nalimasiyayaw pi lipawanaw Jehová akxni tlawaputunaw tuku nitlan.
6. ¿Tuku tlan natlawayaw xlakata nalakgmakganaw nixatlan talakapastakni?
6 Xlakata nitlan talakapastakni kinkamatlawiyan tuku nitlan, talakaskin kuenta natlawayaw kintalakapastaknikan (kalikgalhtawakga Romanos 8:5 chu Efesios 2:3). ¿Tuku tlan natlawayaw xlakata nalakgmakganaw ni xatlan talakapastakni? Kaʼakxilhwi pulakkitsis: 1. Naskiniyaw xtamakgtay Dios (Mat. 6:9, 13). 2. Nalilakapastakaw liʼakxilhtit xalak Biblia, xlakata tiku kgalhakgaxmatkgolh Jehová chu tlan kakitaxtunilh chu tiku ni kgalhakgaxmatkgolh chu nitlan kakitaxtunilh (1 Cor. 10:8-11). * 3. Nalilakapastakaw talipuwan chu talakgaputsit nema nakgalhiyaw chu tiku kapaxkiyaw komo natlawayaw talakgalhin. 4. Nalakapastakaw la makgkatsi Jehová akxni chatum xlakskujni tlawa akgtum lanka talakgalhin (kalikgalhtawakga Salmo 78:40, 41). 5. Nalilakapastakaw la lipaxuwa Dios akxni akxilha pi xlakskujnin tiku ni makgxtakgkgo ni tlawakgo tuku nitlan wata tlawakgo tuku tlan, kxlakatin amakgapitsin chu akxni xakstu wilakgolh (Sal. 15:1, 2; Pro. 27:11). Xlikana komo chuna natlawayaw, tlakg nalipawanaw Jehová.
Kalipawaw Dios akxni ni kinkakgaxmatnikanan chu kinkaputsastalanikanan
7. ¿La liʼakxilhka xtakanajla Jeremías chu la makgkatsilh?
7 Lhuwa xlakskujnin Jehová lichuwinankgo Dios niku talakaskin lu natayanikgo. Chuna titaxtulh Jeremías, tiku lichuwinalh kJudá, akxni xʼamakaja malakgsputukan chu lhuwa taʼakglhuwit xʼanan. Chali chali xlimasiya pi xkanajlani Dios akxni xlichuwinan tuku nitlan xʼama akgspula kachikin maski lu tuwa xwanit. Milh kilhtamaku akxni asta Baruc, wa pi ni xlakgati la xtitaxtumakgolh (Jer. 45:2, 3). Chu Jeremías ¿na xlajwanalh? Makgtum lu nitlan makgkatsilh asta wa: «¡Lu nitlan kilhtamaku akxni klakachilh! [...] ¿Tuku xlakata ktaxtulh kxpan kintse xlakata nak akxilha palha taskujut chu talipuwan chu xlakata kkilatamat kaj naktamamaxani?» (Jer. 20:14, 15, 18).
8, 9. Chuna la wan Jeremías 17:7, 8 chu Salmo 1:1-3, ¿tuku tlan natlawayaw xlakata chuntiya naskujnaniyaw Dios?
8 Maski chuna titaxtulh nikxni makgxtakgli Jehová. Chuntiya lipawalh. Wa xlakata akxilhli la kgantaxtulh xtachuwin Dios nema tatsokgnit kJeremías 17:7, 8: «Jehová sikulunatlawa chixku tiku xlikana lipawan, chu litamakgtaya Jehová. Chu xlikana nawan la kgantum kiwi nema wi kxkilhtun chuchut, nema malakgacha xtankgaxekg niku an chuchut; ni katimakgkatsilh akxni lu nachichinan chu xtuwan lu stlan natasiya. Chu kata akxni ni nasenan ni katilipuwa chu chuntiya namasta xtawakat».
9 Xtachuna la kgantum lu stlan «kiwi nema wi kxkilhtun chuchut», Jeremías putum kilhtamaku xtachuna la “xmastama xtawakat”. Ni kuenta tlawalh akxni latamanin xlikgalhkgamanankgo, wata lipawalh Jehová tiku Masta «chuchut» xla latamat chu makgantaxtilh putum tuku Jehová wanilh (kalikgalhtawakga Salmo 1:1-3; Jer. 20:9). ¡Lu tlan liʼakxilhtit kinkawilinin, chu tlakg kamakgtaya tiku lichuwinankgo Dios niku ni kakgaxmatniputunkan! Komo chuna titaxtumaw, putum kilhtamaku katalakatsuwiniw Jehová. Xla nakinkamakgtayayan xlakata chuntiya namaxkiyaw «nkintachuwinkan ntu limaxkiyaw nkakni xtukuwini Dios» (Heb. 13:15).
10. ¿Tukuya tasikulunalin kgalhiyaw la uku chu tukuya takgalhskinin kilitlawatkan?
10 Jehová kinkalimakgtayayan akgtum paraíso xaʼespiritual umakgolh xaʼawatiya kilhtamaku. Atanu tasikulunalin nema na kinkamaxkinitan wa xatakgatsin Biblia, nema liwana tamatitaxtima kʼakglhuwa tachuwin. Nachuna limaklakaskin skujni xalipaw xlakata nakinkamaxkitilhayan tuku maklakaskinaw xlakata kintakanajlakan. Na tlan katalalinaw lhuwa natalan tiku kinkamatliwakglhkgoyan ktamakxtumit xalak congregación chu klaklanka tamakxtumit. ¿Litamakgtayamaw putum uma tasikulunalin? Putum tiku chuna natlawakgo, «nalipaxuwakgo xlakata tlan natawila xnakujkan». Pero tiku ni nakgaxmatnikgo Dios «lu nalilipuwankgo chu natasakgo xlakata nitlan namakgkatsikgo» (Isa. 65:13, 14).
Kalipawaw Jehová akxni titaxtumaw taʼakglhuwit
11, 12. Xlakata kkakilhtamaku anan lhuwa taʼakglhuwit, ¿tuku tlakg tlan kilitlawatkan?
11 Chuna la xlichuwinanit Biblia pi xʼama la, uku latamanin kgalhikgo lhuwa taʼakglhuwit (Mat. 24:6-8; Apo. 12:12). Komo kminchik xlitatsamalh chuchut, tunkun xtawaka kxaʼakgstin o xputsa niku katalhman xlakata ni namuxtuya. Nachuna xlakata la uku anan lhuwa taʼakglhuwit, lhuwa millón latamanin putsakgo niku lakpuwankgo pi tlan natamakgtayakgo, la kʼakgtum banco, kpolítica, xliskgalala lakchixkuwin o tuku aku taxtuma. Pero umakgolh ni xaxlikana tamakgtay (Jer. 17:5, 6). Pero akinin xlakskujnin Dios, kgalhiyaw akgtum putatsekgni nema tlan nalipawanaw: «la akgtum lanka Chiwix nema xliputum kilhtamaku natawila» (Isa. 26:4). Salmista chuna wa: «[Jehová] wa kilekgawa y kilakgmaxtuj, xla kimaxki litliwekge» (kalikgalhtawakga Salmo 62:6-9). ¿Tuku kilitlawatkan xlakata tlan nalitamakgtayayaw uma lanka Chiwix?
12 Lu lipawanaw Jehová akxni liwana makgantaxtiyaw xTachuwin, maski latamanin lakpuwankgo pi nitlan (Sal. 73:23, 24). Max tiku lakpuwankgo chuna la kakilhtamaku nakinkamaxkikgoyan uma tastakyaw: «Kaj akgtum latamat kgalhiyaw, liwana kamaklakaskinti». «Kakgalhi akgtum tlan taskujut.» «Katlaja lhuwa tumin.» «Katamawa putum tuku lakaskina.» «Kapaxialhnanti chu kalakgapasti kakilhtamaku.» Pero tiku paxkikgo xliskgalala Dios makgantaxtikgo uma tamapakgsin: «Wa nti mpala tu maklakaskinkgoy wa ntu xala katuxawat, xtachuna kawankgolh [la] wa nti ni lhuwa maklakaskimputunkgoy. Sampi wa ntu stlan ntasiyuy xala yunu nkatuxawat, kaj titaxtuma, nalakgsputa» (1 Cor. 7:31). Na makgantaxtikgo xtastakyaw Jesús niku wa pi pulana nawiliyaw xTamapakgsin Dios chu namastokgwiliyaw «tuku laklanka xtapalh anta kʼakgapun» chu anta niti la katikgalhalh (Mat. 6:19, 20, NM).
13. Akxni katsiyaw tuku wan 1 Juan 2:15-17, ¿tukuya takgalhskinin akstu kilitlawatkan?
13 Akstu kakinkatlawanikan umakgolh takgalhskinin: «¿Klimasiya chuna la kakxilha “katuxawat” chu “ntu anan nkatuxawat” pi lu klipawan Jehová?» (1 Juan 2:15-17). «¿Tlakg xlakaskinka kakxilha nakskujni Dios chu taskujut nema klakgaya kcongregación nixawa tuku kakilhtamaku masta?» (Fili. 3:8.) «¿Kliskuja xlakata “kilakgastapu, lhuwa tlan”?» (Mat. 6:22.) Dios ni lakaskin pi akglakgwa nalikatsiyaw chu ni makgantaxtiyaw tuku kilitlawatkan, tlakg kuenta kilitlawatkan komo kgalhiyaw familia (1 Tim. 5:8). Pero lakaskin pi putum kilhtamaku nalipawanaw chu ni nalipawanaw xkakilhtamaku Satanás nema sputmaja (Heb. 13:5).
14-16. ¿Tuku tasikulunalin makglhtinankgonit makgapitsi natalan xlakata “xlakgastapukan, lhuwa tlan” chu pulana wilikgo xTamapakgsin Dios?
14 Kalichuwinaw Richard chu Ruth, xlakan kgalhikgo chatutu laktsu kamanan. Richard wan: «Xakmakgkatsi pi tlan tlakg xakskujnilh Jehová. Xaklipaxuwa pi tlan xakwi, pero xakmakgkatsi pi xakmaxkima Dios tuku xkiʼakgataxtuni. Akxni xaktlawanitaw oración chu klakxkaxwiliw la xakamaw maklakaskinaw tumin, akit chu Ruth klakkaxwiliw pi xakama skini kimpuxku pi xkimaxkilh talakaskin kaj akgtati kilhtamaku xakskujli, maski kkachikin ni lhuwa tumin xʼanan. Kimaxkika talakaskin kaj akgtati kilhtamaku nakskuja chu titaxtulh akgtum papaʼ chuna xakskujmaja». ¿La makgkatsi Richard la uku?
15 «Maski nialh ktlaja la xapulana, la uku akgatunu kata kkgalhi tipuxumakaw kilhtamaku xlakata akxtum nakkatatawila kifamilia chu nakkamasiyani kinkamanan. Nachuna kmaliwakanit la xlilhuwa horas klichuwinan Dios, tlakg lhuwa tiku kkamakgalhtawakga chu tlakg tlan kskuja kcongregación. Chu xlakata tlakg lhuwa kilhtamaku katatawila kinkamanan, Ruth tlan liskujnit la precursora auxiliar makgapitsi papaʼ. Liwana klakapastaknit pi chuntiya naktlawa komo nakmatlani.»
16 Na kaʼakxilhwi tuku tlawakgolh Roy chu Petina, maski chatum xtsumat anta katawilakgolhku, nialh lhuwa kilhtamaku skujkgo xlakata nakgalhikgo kilhtamaku precursores nawankgo. Roy wan: «Akgatunu semana kaj akgtutu kilhtamaku kskuja chu kimpuskat akgtiy kilhtamaku. Nachuna kputsaw kʼakgtum aktsu chiki nema tlakg nituwa kuentajtlawakan. Precursores xakwanitaw akxni nina xakkgalhiyaw chatiy kamanan, chu xaklakapastakaw pi tlan precursores nakwamparayaw. Wa xlakata akxni stakkgolh kinkamanankan precursores kwamparaw. Oro nema anan kkakilhtamaku nila tamalakxtumiyaw tasikulunalin nema kmakglhtinanitaw».
Kamastaw talakaskin pi «xtatanksni Dios» nakuentajtlawa kinakujkan
17. ¿La makgtayanitan Biblia maski kkakilhtamaku anan lhuwa taʼakglhuwit?
17 Ni katsiyaw tuku nala chali tuxama, xlakata «kilhtamaku chu tuku xalan lay putum kinkalakgchinan» (Ecl. 9:11). Pero maski ni katsiyaw tuku nakinkaʼakgspulayan uma ni tlawa pi lu nalilakgaputsayaw chuna la kaʼakgspula tiku ni talalinkgo Jehová (Mat. 6:34). Wata chuna natlawayaw la mastalh tastakyaw apóstol Pablo: «Nitu xatu ntu ntililakgaputsayatit; chi wampi wata paks kamasiyutit kxlakatin Dios wa ntu lakaskinatit kmiʼoraciónkan, chu lantla mpala tu nalixakgatlilakapinatit, su naskinatit, na natamastayatit mpaxkatsinit. Chu wa xkatsit xtatanksni Dios, wa ntu lakatsalaniy xlipaks kintapuwankan, naskgala minakujkan, chu mintapuwankan» (Fili. 4:6, 7).
18, 19. ¿La pulaklhuwa kinkamakgtayayan Dios? Kalichuwinanti akgtum liʼakxilhtit.
18 Akxni lhuwa natalan kgalhikgo laklanka taʼakglhuwit, makgkatsikgonit la kamakgtaya Jehová xlakata tlan namakgkatsikgo. Chatum tala wan: «Makuchina makglhuwa xkimakgakglhaputun xlakata xakmastalh talakaskin xkiwilinika kgalhni. Tuku pulana kiwanilh wa uma: “Xatonto wix ¿tuku xlakata ni makglhtinamputuna kgalhni?”. Uma kilhtamaku chu atanu kilhtamaku akxni chuna xkiwani tsekg ktlawanilh oración Jehová chu tlan kmakgkatsilh. Maski xakxlajwananit, chu xtaktujunit kihemoglobina, liwana kwa tuku wan Biblia xlakata tuku xakkanajla».
19 Min kilhtamaku Dios kinkalimakgtayayan chatum tala xlakata nakinkamatliwakglhan o na limaklakaskin likgalhtawakga nema kinkamaxkikanan akxni lu maklakaskinaw. Max kgaxmatnitaw akxni wi tiku wan: «Lu xkilhtamaku kimaxkika, wa uma tuku lu xakmaklakaskima. Tasiya la xkatsikgo tuku xakmaklakaskin». Maski tanu tanu tuku maklakaskinaw, Jehová na kinkalimasiniyan xtapaxkit komo nalipawanaw. Xlakata akinin “xkalhniluj”, o xborregos xkachikin nema lin xtukuwani (Sal. 100:3; Juan 10:16; Hech. 15:14, 17).
20. ¿Tuku xlakata nitu nalipekuankgo xlakskujni Jehová akxni namalakgsputukan xkakilhtamaku Satanás?
20 «Kilhtamaku xla lipekua xtasitsi Jehová» nema lakatsu wi namalakgsputukan putum tuku lipawankgo xkakilhtamaku Satanás. Nipara oro chu plata o atanu nema kgalhi xtapalh nakamakgtaya (Sof. 1:18; Pro. 11:4). Kaj watiya Dios «la akgtum lanka Chiwix nema xliputum kilhtamaku natawila» tlan nakinkamakgtayayan (Isa. 26:4). Wa xlakata kalimasiyaw pi lipawanaw akxni makgantaxtiyaw xlimapakgsin chu lichuwinanaw xTamapakgsin maski ni kinkakgaxmatniputunkgoyan, kinkaputsastalanikanan, chu nawaniyaw Dios kintaʼakglhuwitkan. Tiku chuna natlawa «tlan natawila chu nitu katilipekualh xlakata max wi tuku naʼakgspula» (Pro. 1:33).
[Notas nema wilakgo kpágina]
^ párr. 6 Kaʼakxilhti libro, «Katamakgxtakgtit kxtapaxkit Dios» kpáginas 102 asta 106.
¿Tlan xkgalhtinanti?
Kawanti la limasiyayaw pi lipawanaw Dios akxni:
• tlawaputunaw tuku nitlan
• kinkaputsastalanikanan chu ni kinkakgaxmatnikanan
• kgalhiyaw taʼakglhuwit
[Takgalhskinin]
[Epígrafe xla página 20]
Komo makgantaxtiyaw xlimapakgsin Dios, xalipaxaw nalatamayaw
[Epígrafe xla página 23]
Jehová «la akgtum lanka Chiwix nema xliputum kilhtamaku natawila»
