Kamakglhtinaw xʼespíritu Dios chu ni xtalakapastakni kakilhtamaku
Kamakglhtinaw xʼespíritu Dios chu ni xtalakapastakni kakilhtamaku
«Wa kin makgamaklhtinanitaw, ni wa ntalakapastakna ntu xala katuxawat, wampi wa Spiritu ntu miniyacha Dios lakimpi nalakgapasaw wa ntu Dios nkinkalilakgalhamanitan.» (1 COR. 2:12)
1, 2. 1) ¿Tukuya guerra kgalhiyaw xaxlikana kstalaninanin Cristo? 2) ¿Tukuya takgalhskinin naʼakxilhaw la uku?
KSTALANINANIN Cristo kgalhiyaw akgtum guerra. Tiku kinkasitsiniyan lu tliwakga chu skgalala xlakata klhuwa tiku katalachipanit. Chu tuku tlakg nitlan, kgalhi tuku lu makgtayanit xlakata nakaʼakgchipa lu lhuwa latamanin. Pero ni kapekuaw chu ni kalakpuwaw pi nakinkatlajayan (Isa. 41:10). Kgalhiyaw lu lanka tamakgtay, nema tlan nalitayaniyaw putum tuku nitlan nakinkatlawaniputunkanan.
2 Talachipat nema kgalhiyaw xaʼespiritual ni xla kimaknikan. Tiku kinkasitsiniyan wa Akgskgawini, chu tuku tlakg maklakaskin wa «ntalakapastakna ntu xala katuxawat» (1 Cor. 2:12). Chu tuku tlan nalitamakgtayayaw wa espíritu santo. Wa xlakata talakaskin naskiniyaw Dios chu nalimasiyaw kkilatamatkan pi kgalhiyaw espíritu santo. Komo chuna natlawayaw tlan natayaniyaw uma guerra chu tliwakga natawila kintakanajlakan (Gál. 5:22, 23). Pero ¿tuku uma xtalakapastakni kakilhtamaku? ¿Tuku xlakata lhuwa latamanin chuna lakapastakkgo? ¿La tlan nakatsiyaw komo nachuna lakapastakaw? ¿La tlawalh Jesús xlakata ni xkgalhilh xtalakapastakni kakilhtamaku chu xmakgamakglhtinalh xʼespíritu santo Dios chu tuku kinkamasiyaniyan?
¿Tuku xlakata lhuwa tiku kgalhikgo xtalakapastakni kakilhtamaku?
3. ¿Tuku kilhchani xtalakapastakni kakilhtamaku?
3 Satanás, «xapuxku yunu katuxawat», makilhtsukilh uma talakapastakni nema lakataya espíritu santo (Juan 12:31; 14:30; 1 Juan 5:19). Wa xtalakapastakni kakilhtamaku, talakapastakni nema kgalhikgo lhuwa latamanin xala uku nema tlawa nalakatayakgo xtalakaskin chu tuku Dios lakapastaknit natlawa.
4, 5. ¿Tuku xlakata lhuwa latamanin kgalhikgo xtalakapastakni kakilhtamaku?
4 ¿Tuku xlakata lhuwa latamanin kgalhikgo xtalakapastakni kakilhtamaku? Kjardín xaʼEdén, Satanás akgskgawilh Eva, akxni wanilh pi tlakg tlan xlatamalh komo xmakgxtakgli Dios (Gén. 3:13). ¡Lu xaʼakgsanina! (Juan 8:44.) Alistalh limaklakaskilh Eva xlakata Adán na xmakgxtakgli Jehová. Xlakata Adán ni liwana laksakli tuku natlawa, latamanin kgalhikgo talakgalhin wa xlakata nachuna ni kgalhakgaxmatnankgo chu chuna limasiyakgo xtalakapastakni Akgskgawini (kalikgalhtawakga Efesios 2:1-3).
5 Satanás na kaʼakgskgawilh lhuwa ángeles tiku makgxtakgkgolh Dios chu demonios litaxtukgolh (Apo. 12:3, 4). Chuna lalh akxni nina xmin Munkaklat kxkilhtamaku Noé. Ángeles lakpuwankgolh pi tlakg tlan xtawikgolh komo xmakgxtakgkgo xtaskujutkan kʼakgapun chu xminkgolh kKatiyatni xlakata xtlawakgolh tuku nitlan (Jud. 6). Alistalh espíritus wamparakgolh chu la uku taskujkgo Satanás, tiku «akgskgawi xlipaks ntachixkuwitat» (Apo. 12:9). Lu nitlan pi lhuwa ni katsikgo pi anan uma nixatlan litliwakga (2 Cor. 4:4).
¿Nachuna lakapastaknanaw la kakilhtamaku?
6. ¿La tlan xkinkaʼakgchipan xtalakapastakni kakilhtamaku?
6 Maski lhuwa tiku ni katsikgo tukuya liʼakgsiyat limaklakaskin Satanás, xaxlikana kstalaninanin Cristo ni chuna kaʼakgspula (2 Cor. 2:11). Kxtalakapastakni kakilhtamaku nakinkaʼakgchipayan komo namastayaw talakaskin. Kaʼakxilhwi akgtati takgalhskinin nema nakinkamakgtayayan nakatsiyaw komo kgalhiyaw xtalakapastakni kakilhtamaku o xʼespíritu Dios.
7. ¿Tuku limaklakaskin Satanás xlakata natamakgatliniyaw Jehová?
7 ¿Tuku klimasiya akxni klaksaka tuku naklilakgastanan? (Kalikgalhtawakga Santiago 3:14-18.) Satanás katsi pi Jehová ni kaʼakxilhputun tiku paxkikgo tuku xalixkajni wa xlakata tlawaputun nialh natalalalinaw chu kapaxkiw tuku xalixkajni (Sal. 11:5). Xlakata natlawayaw tuku xalixkajni Satanás limaklakaskin likgalhtawakga, películas chu tatlin, nachuna videojuegos nema tiku likgamanankgo litaxtukgo tiku lixkajni likatsikgo chu tlawakgo talakgxtumit xalimaxana. Akgskgawini ni lilakgaputsa o lilipuwan komo kinakujkan na paxki tuku xaʼakgstitum. Lipaxuwa maski kinakujkan kaj tsinu napaxki tuku nitlan (Sal. 97:10).
8, 9. ¿Tukuya takgalhskinin kilitlawatkan xlakata tuku lilakgastananaw?
8 Pero xʼespíritu Dios makgtayanan xlakata nitu nalixkajwananaw, ni tunkun nasitsiyaw chu nalakgalhamananaw. Wa xlakata tlan natlawayaw uma takgalhskinin: «¿Kimakgtaya tuku klilakgastanan nakkgalhi lakwan tayat?». Tiku kgalhi liskgalala xala talhman ni “lakgaputiy” lin xlatamat. Tiku masta talakaskin pi espíritu santo napulalin xlatamat, ni lichuwinan xlakata tuku xaskulunku chu ni natakgalhiyaw taʼakglhuwit amakgapitsi chu alistalh kxchik lilakgastanan niku masiyakan tuku xalixkajni o talakgxtumit xalimaxana.
9 Jehová lakaskin pi kaj wa nakakninanikan. Pero Satanás ni lhuwa tuku skin. Chuna likatsiyaw xlakata tuku kskinima Jesús, Satanás kaj lakaskin makgtum nakakninanikan (Luc. 4:7, 8). Wa xlakata, akstu kakinkakgalhskinkan: «¿Tuku klilakgastanan limasiya pi kajwatiya Dios kakninani? ¿Kimakgtaya ni naklakapastaka chuna la kakilhtamaku o tlawa pi tuwa nakmakgkatsi? ¿Talakaskin tlakg liwana naklaksaka tuku naklilakgastanan?».
10, 11. 1) ¿Tukuya talakapastakni kgalhikgo lhuwa latamanin xlakata tumin? 2) ¿Tukuya talakapastakni kinkamaxkiyan espíritu santo?
10 ¿La kaʼakxilha tumin chu lhuwa tuku nakkgalhi? (Kalikgalhtawakga Lucas 18:24-30.) Satanás limaklakaskin xtalakapastakni kakilhtamaku xlakata lu nakgalhiputunaw tuku kgalhi achatum chu lhuwa tuku nakgalhiputunaw, «tuku akxilhputun kilakgastapukan» (1 Juan 2:16, NM). Tlawa pi latamanin lu napaxkikgo tumin (1 Tim. 6:9, 10). Lakaskin nakanajlayaw pi tlan natawilayaw komo lhuwa tuku nakgalhiyaw (Pro. 18:11). Akgskgawini nakinkatlajayan, komo namastayaw talakaskin pi tumin natlawa pi nialh napaxkiyaw Dios. Wa xlakata kimputumkan kilitlawatkan uma takgalhskinin: «¿Klimasiya pi kaj tlan ktawilaputun chu lhuwa tuku klipaxuwaputun?».
11 Xʼespíritu santo Dios kinkalimakgtayayan Biblia xlakata naʼakxilhaw tumin chuna la xlilat chu naskujaw xlakata tlan natamawayaw tuku maklakaskinkgo kifamiliajkan (1 Tim. 5:8). Espíritu santo na kinkamakgtayayan namaskiwinanaw chuna la Jehová. Putum kaʼakxilhkgolh pi tlakg mastaputunaw chu ni kaj makglhtinamputunaw. Tlakg xlakaskinka naʼakxilhaw latamanin nixawa tuku kgalhiyaw, chu komo matlaniyaw nakamaxkiyaw amakgapitsin tuku kgalhiyaw (Pro. 3:27, 28). Chu pulana naskujnaniyaw Jehová nixawa tuku kgalhiputunaw.
12, 13. ¿La kinkamakgtayayan xlitliwakga Jehová xlakata natlajayaw xtalakapastakni kakilhtamaku?
12 ¿Klimasiya kintayat pi kkgalhi xʼespíritu Dios o xtalakapastakni kakilhtamaku? (Kalikgalhtawakga Colosenses 3:8-10, 13.) Wantuku nakinkamakgtayayan nakatsiyaw, wa naʼakxilhaw tuku tlawayaw akxni wi tuku nitlan titaxtuyaw. ¿Akxni chuna titaxtumaw limasiyayaw tayat xalak kakilhtamaku, xtatlaw kimaknikan? (Gál. 5:19-21.) Kawiliw akgtum liʼakxilhtit, ¿tuku tlawayaw akxni chatum tala ni kuentaj kinkatlawaniyan, wi tuku nitlan kinkawaniyan o kinkatlawaniyan? Atanu tuku na nalilakapastakaw wa la linaw kintayatkan kkinchikkan, xlakata anta tasiya tukuya espíritu kgalhiyaw. Akstu kakinkakgalhskinkan: «Uma akgchayan papaʼ nema titaxtulha, ¿tlakg klimasiyama pi xaxlikana kstalanina Cristo, o ktlawamapa tuku nitlan, max chuna la kchuwinan o la klikatsi?».
13 Espíritu santo kinkamakgtayayan nakgalhakgaxmataw uma xlimapakgsin Dios: «Lakgmakganitantitta wa ntu xamakgan mintayatkan mpaks xawa xtatlaw. Na wa [kalilhakganantit] xasasti mintayatkan». Akxni chuna natlawayaw, tlakg napaxkinanaw chu tlakg tlan nalikatsiyaw, nakatapatiyaw amakgapitsin, maski wi tuku nitlan kinkatlawanikan. Akxni lakpuwanaw pi ni xlilat tuku kinkatlawanikan, wata “nialh katilakapastakwi tuku nitlan kinkatlawanikan” nipara «tasitsi, takgaw» o «xalixkajni tachuwin». Wata naliskujaw xlakata “nalalakgalhamanaw” (Efe. 4:31, 32).
14. ¿Tuku lakpuwankgo xlakata Biblia lhuwa latamanin?
14 ¿Klimasiya pi kkgalhakgaxmata chu kpaxki tuku wan Biblia xlakata la klin kilatamat? (Kalikgalhtawakga Proverbios 3:5, 6.) Xlakata latamanin kgalhikgo xtalakapastakni kakilhtamaku ni kgalhakgaxmatkgo tuku wan xTachuwin Dios. Makgapitsi ni likgalhtawakgakgo versículos nema ni lakgatikgo wata tlawakgo tuku lismanikanit kxkachikinkan chu xtalakapastaknikan latamanin (2 Tim. 4:3, 4). Amakgapitsi wankgo pi ni xlikana tuku wan Biblia. Lakpuwankgo pi tlakg lakgskgalalan chu wankgo pi ni xtalakapastakni Dios tuku wan Biblia chu na wankgo pi la uku ni kinkamakgtayayan, wa xlakata ni xlakaskinka akxilhkgo limapakgsin nema masta xlakata tiku akgskgawi tiku tatamakgaxtokgnit, tiku tatalakgxtumi xtachixku o xtapuskat chu tiku lakxtlawakgo xtamakgaxtokgatkan. Wa uma tuku lakpuwankgo, «wankgo pi tuku tlan nitlan chu tuku nitlan xatlan» (Isa. 5:20). ¿Nachuna lakapastakaw la kakilhtamaku? Akxni kgalhiyaw taʼakglhuwit, ¿limaklakaskinaw xliskgalala lakchixkuwin xlakata nalakkaxtlawayaw, o putsayaw xtastakyaw Biblia?
15. ¿Tuku natlawayaw xlakata ni kiliskgalalakan nakinkapulalinan?
15 Espíritu santo, kinkamakgtayayan lu xlakaskinka naʼakxilhaw xTachuwin Dios. Xtachuna la salmista kaliʼakxilhwi la akgtum lámpara chu maxkgakge kintijikan (Sal. 119:105). Wa xlakata kalipawaw tuku wan Biblia xlakata liwana nakatsiyaw tuku tlan chu tuku nitlan chu ni wa kiliskgalalakan. Ni kajwatiya kgalhakgaxmataw, wata paxkiyaw (Sal. 119:97).
Katlawaw chuna la Jesús
16. ¿Tuku talakaskin xlakata nakgalhiyaw «xtalakapastakni Cristo»?
16 Komo makglhtinamputunaw xʼespíritu santo Dios talakaskin nakgalhiyaw «xtalakapastakni Cristo» (1 Cor. 2:16, NM). Uma wamputun “nawatiya ntalakapastakni nakgalhiniyatit lantla xtalakaskin nCristo Jesús”; xlakata chuna natlawayaw talakaskin nakatsiyaw la lakapastaknan, tuku tlawalh chu alistalh nachuna natlawayaw (Rom. 15:5; 1 Ped. 2:21). Kaʼakxilhwi la pulaklhuwa tlan nachuna natlawayaw.
17, 18. 1) ¿Tuku liʼakxilhtit kinkawilinin Jesús xlakata oración? 2) ¿Tuku xlakata talakaskin pi kstalaninanin Cristo chuntiya “naskinkgo”?
17 Kaskiniw Dios kakinkamaxkin xʼespíritu santo. Akxni xʼama kgalhi taʼakglhuwit Jesús kskini xTlat kalimakgtayalh xʼespíritu (Luc. 22:40, 41). Akinin nachuna kilitlawatkan. Komo xlikana lipawanaw akxni kskiniyaw xla xatapaxuwan nakinkamaxkiyan (Luc. 11:13). Cristo kinkawanin: «Kaskintit, na nakamaxkikanatit; kaputsatit, na natakgsatit; kachuwinantit, na nakamalakkinikanatit. Sampi kaxati kawa nti skin, makglhtinan; chu wa nti mputsay, takgsa; chu wa nti nchuwinan, malakkinikan» (Mat. 7:7, 8).
18 La akxilhmaw, talakaskin makglhuwa naskinaw xtamakgtay chu xʼespíritu Jehová. Max talakaskin pi tlakg lhuwa chu makgas natlawayaw oración. Min kilhtamaku, Jehová kinkamaxkiyan talakaskin nalimasiyaniyaw pi xlikana lakaskinaw chu kanajlayaw chu alistalh kinkamaxkiyan tuku skiniyaw. *
19. ¿Tuku tlawalh Jesús chu tuku xlakata nachuna kilitlawatkan?
19 Putum kilhtamaku kakgalhakgaxmatwi Jehová. Jesús putum kilhtamaku tlawalh tuku Dios xlakgati. Pero, milh kilhtamaku akxni ni xtlawaputun chuna la xTlat xlakaskin. Maski chuna, lipawalh chu wanilh: «Wampi ni wa kalalh kintalakaskin, wata xatlan wa kakgantaxtulh mintalakaskin» (Lucas 22:42, Hua Xasasti Talaccaxlan, 1999). Akstu kakinkakgalhskinkan: «¿Kkgalhakgaxmata Dios maski tuwa kmakgkatsi?». Komo chuna natlawayaw tlan namakglhtinanaw latamat. Kililakapastakatkan pi talakaskin nakgalhakgaxmataw Dios xlakata kinkamaxkinitan latamat chu putum tuku maklakaskinaw (Sal. 95:6, 7). Lu xlakaskinka nakgalhakgaxmatnanaw. Komo ni nakgalhakgaxmataw nikxni tlan nakinkaʼakxilhan Dios.
20. ¿Tuku tlakg xlakaskinka xakxilha Jesús, chu la tlan nachuna natlawayaw?
20 Liwana nalikgalhtawakgayaw Biblia. Akxni Satanás lu xmatlawiputun tuku nitlan, Jesús lichuwinalh tuku wan xtachuwin Dios (Luc. 4:1-13). Chu na limaklakaskilh xlakata nakawani tuku nitlan xtlawamakgolh tiku ni xʼakxilhputunkgo (Mat. 15:3-6). Putum xlatamat limaklakaskilh xlakata nalakgapasa chu xmakgantaxtilh xlimapakgsin Jehová (Mat. 5:17). Akinin nachuna putum kilhtamaku nalimatliwakglhaw kintakanajlakan xTachuwin Dios (Fili. 4:8, 9). Makgapitsi kstalaninanin Cristo lakpuwankgo pi ni kgalhikgo kilhtamaku xlakata xakstukan nakgalhtawakgakgo chu nakatakgalhtawakgakgo xfamilia. Komo chuna, kililakpastakatkan pi ni talakaskin nakgalhiyaw kilhtamaku, kilimaxtutkan kilhtamaku (Efe. 5:15-17).
21. ¿Tuku tlan nalimaklakaskinaw xlakata tlakg lhuwa nakatsiniyaw chu namakgantaxtiyaw tuku wan xTachuwin Dios?
21 «Skujni xatalipaw chu xaskgalala» kinkamakgtayayan nalakkaxwiliyaw kinkilhtamakujkan xlakata akstu nakgalhtawakgayaw chu nakatakgalhtawakgayaw kifamiliajkan (Mat. 24:45, NM). Wa xlakata lakkaxwilinit pi akgatunu semana nakakninaniyaw Dios kfamilia. ¿Limaklakaskimaw xlakata nakinkamakgtayayan nalakapastakaw la Cristo? Tuku nakinkamakgtayayan wa pi akxni natakgalhtawakgayaw kifamiliajkan nalikgalhtawakgayaw makgapitsi tuku masiyalh Jesús. Tlan naputsayaw tuku tlakg katsiputunaw chu tlan nalimaklakaskinaw Índice de las publicaciones Watch Tower. Kawiliw akgtum liʼakxilhtit, max nalimaklakaskimputunaw pulakkutiy artículos nema kawanika: «Enseñanzas de Jesús», nema taxtukgolh kata 2008 asta 2010, xla La Atalaya xaʼespañol. Na tlan nalimaklakaskinaw takgalhskinin nema tsukulh limin ¡Despertad! kata 2006 nema wanikan «¿Qué respondería usted?» chu kinkamakgtayayan tlakg lhuwa nakatsiniyaw xlakata xTachuwin Dios. Tlan xwa komo xlimaklakaskiw akxni nakakninaniyaw Dios kfamilia.
Tlan namakgatlajayaw kakilhtamaku
22, 23. ¿Tuku kilitlawatkan xlakata ni nakgalhiyaw xtalakapastakni kakilhtamaku?
22 Komo lakaskinaw pi xʼespíritu Dios nakinkapulalinan, talakaskin nalakgmakganaw xtalakapastakni kakilhtamaku. Chu tuwa chuna natlawayaw. Chu talakaskin lhuwa naliskujaw xlakata ni nakinkatlajayan (Jud. 3). Pero tlan natlajananaw. Jesús kawanilh kstalaninanin: «Anta nkatuxawat, kgalhiyatit ntakatsanajwat, wampi kakilipawantit, sampi ktlajanit nkatuxawat» (Juan 16:33).
23 Akinin na tlan namakgatlajayaw kakilhtamaku komo ni namastayaw talakaskin nachuna nalakpuwanaw chu wata liskujaw xlakata namakglhtinanaw xʼespíritu santo Dios. Xlikana, «lapi wa Dios nti nkimakgtayanakan, ¿ti nchu wa ntlan nakinkatalatlawayan?» (Rom. 8:31). Akxni makglhtinanaw espíritu santo chu namastayaw talakaskin nakinkapulalinan chuna la wan Biblia, nakgalhiyaw takaksni, napaxuwayaw chu tlan namakgkatsiyaw, xlakata nialh makgas nalipaxuwayaw latamat nema ni kgalhi xlisputni kxasasti kakilhtamaku.
[Notas nema wilakgo kpágina]
^ párr. 18 Xlakata tlakg nakatsiya, kaʼakxilhti libro ¿Tuku xlikana masiyay Biblia? kpágina 170 asta 173.
¿Akgatekgswi tuku talichuwinalh?
• ¿Tuku xlakata lhuwa latamanin kgalhikgo xtalakapastakni kakilhtamaku?
• ¿Tukuya akgtati takgalhskinin akstu nakinkatlawanikanan?
• ¿La pulaktutu tlan natlawayaw chuna la Jesús xlakata namakglhtinanaw xʼespíritu santo Dios?
[Takgalhskinin]
[Epígrafe xla página 15]
¿Tuku xlakata makgapitsi ángeles demonios litaxtukgolh?
[Epígrafe xla página 17]
Satanás limaklakaskin xtalakapastakni kakilhtamaku chu kaliʼakgskgawi latamanin pero akinin ni kintikaʼakgskgawin
