Skgalalh katawilaw chuna la Jeremías
Skgalalh katawilaw chuna la Jeremías
«[Akit, Jehová] skgalalh kwi xlakata liwana nakgantaxtu kintachuwin.» (JER. 1:12)
1, 2. ¿La limasiya almendro pi Jehová skgalalh wi?
KASIPIJNI xalak kʼIsrael chu kLíbano, xapulana kiwi nema xana akxni titaxtunita lonkgni wa almendro, tsuku masta xalakstlan xanat, xalaksnapapa chu makgapitsi xa rosa, kxkgalhsputat enero chu akxni tsuku febrero. Xtukuwani uma kiwi xahebreo wamputun «tiku lakgawan».
2 Akxni Jehová laksakli Jeremías xlakata palakachuwina nawan, limaklakaskilh almendro xlakata wi tuku lu xlakaskinka namasiyani. Maʼakxilhnilh xkgalhapu uma kiwi chu alistalh wanilh tuku xwamputun: «Skgalalh kwi xlakata liwana nakgantaxtu kintachuwin» (Jer. 1:11, 12). Xtachuna la almendro sokg «xanay», nachuna Jehová «tsisa» xkamalakgacha xpalakachuwinanin xlakata nakamakatsini judíos tuku lu nitlan xʼama katlawani xlakata ni xkgalhakgaxmatkgo (Jer. 7:25). Chu Dios ni xʼama jaxa, wata chuntiya «skgalalh» xtawilalh asta akxni xmakgantaxtilh xtachuwin. Kata 607 akxni nina xmin Jesús, kilhtamaku akxni xlaklhkawilinit, Dios kamalakgaxokgelh judíos tiku xmakgxtakgkgonit.
3. ¿Tuku liwana katsiyaw xlakata Jehová?
3 La uku, Jehová na skgalalh wi xlakata namakgantaxti tuku wanit natlawa. Putum makgantaxti tuku wan. Pero ¿la kinkamakgtayayan uma? ¿Xlikana kanajlayaw pi uma kata 2011, Dios «skgalalh» wi chu namakgantaxti tuku wanit natlawa? Komo wi tuku nialh kanajlayaw chu xlajwanama kintakanajlakan, ni kalhkititnaw kaliskujwi xlakata natatliwakglhpara (Rom. 13:11). Chatum tiku skgalalh tawi xlakata namakgantaxti xtaskujut wa Jeremías. Komo naʼakxilhaw la tlawalh chu tuku makgtayalh namakgantaxti xtaskujut, tlakg nituwa putum kilhtamaku namakgantaxtiyaw taskujut nema Jehová kinkalakgayawanitan.
Lu xlakaskinka tamakatsin
4. ¿Tukuya taʼakglhuwit kgalhilh Jeremías xlakata xmakgantaxtilh xtaskujut chu tuku xlakata lakapara xmakatsininalh?
4 Max 25 kata xkgalhi Jeremías akxni Jehová wanilh pi xmakatsininalh tuku xʼama tlawa (Jer. 1:1, 2). Maski chixkuta xwanit, kajku aktsu kgawasa xmakgkatsikan, xmakgkatsi pi nila xkatachuwinalh lakgkgolotsin xalak kachikin chu lakchixkuwin tiku xkgalhikgo lhuwa limapakgsin chu lakgskgalalan (Jer. 1:6). Xʼama kawani tuku nitlan xʼama katlawani Dios chu xʼama kawani tuku nitlan xtlawamakgolh sacerdotes, tiku xpulalinankgo chu putum latamanin tiku «xtlawakgo tuku amakgapitsin xtlawakgo» chu «xliputum kilhtamaku xʼakgskgawinankgo» (Jer. 6:13; 8:5, 6). Xastlan xtemplo mapakgsina Salomón niku xkakninanikan xaxlikana Dios nema liwakaya akgtati ciento kata xwi xʼamaka malakgsputukan. Nachuna Jerusalén chu Judá xʼamaka kamalakgsputukan chu tiku anta xwilakgolh xʼamaka kachilinkan alakatanu kkachikin. ¡Lu xlakaskinka tuku xʼama makatsininan Jeremías!
5, 6. 1) ¿La kalimaklakaskima Jehová la uku kstalaninanin Cristo tiku litaxtukgo la Jeremías? 2) ¿Tuku nalichuwinanaw kʼuma artículo?
5 ¿Chu tuku tlan nawanaw xlakata kinkilhtamakujkan? Xlakata Jehová lu kapaxki latamanin, kaliyawanit kstalaninanin Cristo tiku kalaksakkanit, xlakata namakatsininankgo lisputni nema Dios nialh makgas nalimin. Akglhuwata kata, umakgolh tiku kalaksakkanit tiku litaxtukgo la Jeremías kawanimakgolh putum latamanin pi lu talakatsuwinit lisputni (Jer. 6:17). Biblia liwana wan pi Jehová xMalana kilhtamaku, chu ni nalakpuwanaw pi makgapalama. Xkilhtamaku nachin akxni lakkaxwilinit, chu latamanin nipara katikatsikgolh akxni nakalakgchin (Sof. 3:8; Mar. 13:33; 2 Ped. 3:9, 10).
6 Kalakapastakwi pi Jehová skgalalh wi chu xlikana nalimin xasasti kakilhtamaku, ni katimakgapalalh. Kstalaninanin Cristo tiku litaxtukgo la Jeremías liwana katsikgo pi chuna, chu wa uma kamakgtaya lu tlan namakgantaxtikgo xtaskujutkan. Chu nachuna tlawakgo xcompañeros tiku nalatamakgo kkatiyatni, skgalalh wilakgolh chu liwana katsikgo pi chuna la titaxtulha kilhtamaku xtamakatsinkan tlakg xlakaskinka. Jesús lichuwinalh pi putum latamanin nakamaxkikan talakaskin nalaksakkgo komo natatayakgo xTamapakgsin Dios o ni. Kʼuma artículo naʼakxilhaw pulaktutu tayat nema makgtayalh Jeremías xlakata skgalalh xtawilalh chu xmakgantaxtilh xtaskujut, chu na nakinkamakgtayayan nachuna natlawayaw.
Xkapaxki latamanin
7. ¿Tuku xlakata wanaw pi Jeremías xkapaxki latamanin chu lhuwa lichuwinalh Dios maski kgalhilh taʼakglhuwit?
7 ¿Tuku xlakata Jeremías lichuwinalh xtamakatsin Dios maski lhuwa taʼakglhuwit kgalhilh? Xlakata xkapaxki xnatalan judíos. Jeremías xkatsi pi lhuwa xkamakgapatinamakgolh nixatlan pulalinanin (Jer. 23:1, 2). Wa xlakata Jeremías xkalakgalhaman chu xatapaxuwan xtlawa xtaskujut. Xlakaskin pi xkgaxmatkgolh xtamakatsin Dios chu nitu xkaʼakgspulalh. Lu nitlan xlimakgkatsi tuku xʼama kaʼakgspula asta kalakgtasalh (kalikgalhtawakga Jeremías 8:21 chu 9:1). Nachuna xlimaktuminika libro nema wanikan Lamentaciones liwana tasiya la lu xpaxki xtukuwani Dios chu xkachikin (Lam. 4:6, 9). ¿Tuku limakgkatsiyaw akxni akxilhaw pi latamanin “kaj lhtuj tamakgaxtakgkgonit takgawanikgonit xtachuna [borregos] ntu ni kgalhikgoy xmapuchwanina”? ¿Kalitachuwinamputunaw xtamakatsin Dios nema tlan nalimakgkatsikgo? (Mat. 9:36.)
8. ¿La likatsiyaw pi Jeremías ni lisitsilh maski lhuwa taʼakglhuwit kgalhilh?
8 Judíos ni lakaskinkgolh nakamakgtaya Jeremías wata lhuwa makgapatinankgolh. Pero Jeremías ni lisitsilh chu nitu kawanilh. Putum kilhtamaku tlan kalikatsinilh, asta mapakgsina Sedequías tiku lu lixkajni xlikatsi. Maski uma mapakgsina xmakamastanit Jeremías kxmakan tiku xmakgniputunkgo, pero palakachuwina skinilh mapakgsina pi xkgalhakgaxmatli Jehová (Jer. 38:4, 5, 19, 20). ¿Kapaxkiyaw latamanin chuna la Jeremías?
Dios makgtayanan xlakata ni napekuanaw
9. ¿La likatsiyaw pi wa Jehová xmakgtaya Jeremías xlakata ni xpekuan?
9 Akxni Jehová maxkilh taskujut, Jeremías ni xmakglhtinamputun, uma limasiya pi maski alistalh ni pekualh chu liwana makgantaxtilh xtaskujut nichuna xwanit akxni lakachilh. Xlakata ni xpekuan akxni tlawalh xtaskujut limasiya pi lu xlipawan Dios. Chuna, Jehová kxpaxtun xwi «la chatum tiku lu tliwakga» tiku xmakgtaya chu xmatliwakglha xlakata xmakgantaxtilh xtaskujut (Jer. 20:11). Lu xlilakgapaskan pi ni xpekuan wa xlakata akxni xtitaxtunita akglhuwa siglos, makgapitsi judíos lakpuwankgolh pi Jesús wa Jeremías xwanit akxni akxilhkgolh pi ni xpekuan (Mat. 16:13, 14).
10. ¿Tuku wamputun pi tiku kalaksakkanit wilakgolh «xakgspun laklanka kachikinin chu tamapakgsin»?
10 Jehová wa «xMapakgsina laklanka kachikinin». Wa xlakata xlakgchan namalakgacha xpalakachuwina xlakata xkawanilh tuku nitlan xʼama kaʼakgspula laklanka kachikinin nema xʼanankgo (Jer. 10:6, 7). Kstalaninanin Cristo tiku kalaksakkanit chu lamakgolhku unu kKatiyatni na wilakgolh «xakgspun laklanka kachikinin chu tamapakgsin» (Jer. 1:10). ¿Tuku wamputun uma tachuwin? Tiku xMapakgsina xlikalanka katiyatni kamaxkinit akgtum taskujut xtachuna la Jeremías, wa xlakata kamakatsinikgo mapakgsinanin chu laklanka kachikinin pi nakamalakgsputukan kilhtamaku akxni Dios lakkaxwilinit chu chuna la lakapastaknit. Lichuwinankgo uma tamakatsin xlakata Dios xalatalhman kamaxkinit limapakgsin chu liwana kawanikgo chuna la wan xTachuwin Dios (Jer. 18:7-10; Apo. 11:18). Tiku litaxtukgo «Jeremías» liwana lakapastakkgonit chuntiya namakatsininankgo. Xlakan putum kilhtamaku namakgantaxtikgo taskujut nema kalakgayawakanit, nalichuwinankgo xlikalanka Katiyatni tuku nakatlawani Dios tiku ni kgalhakgaxmatnankgo.
11. ¿Tuku nakinkamakgtayayan chuntiyaku nalichuwinanaw Dios maski nakgalhiyaw taʼakglhuwit?
11 Min kilhtamaku lixlajwananaw akxni latamanin ni kgaxmatputunkgo, kinkaputsastalanikanan o kgalhiyaw atanu taʼakglhuwit (2 Cor. 1:8). Pero, chuna la Jeremías ni tamakgxtakgaw. Wata “tatliwakglhaw” akxni lipawanaw Jehová chu tlawayaw oración (1 Tes. 2:2). Lu xlakaskinka skgalalh natawilayaw xlakata tlan namakgantaxtiyaw taskujut nema kinkalakgayawanitan kinTlatikan. Liwana kililakapastakatkan putum kilhtamaku nalichuwinanaw tuku naʼakgspula nixaxlikana takanajla chuna la akgspulalh Jerusalén tiku xmakgxtakgkgonit Dios. Kstalaninanin Cristo tiku kalaksakkanit liwana lakapastakkgonit chuntiya nalichuwinankgo xlakata «Jehová tlanku kamakgamakglhtinan» chu na lichuwinankgo «kilhtamaku akxni [Dios] nakamalakgaxokge» latamanin (Isa. 61:1, 2; 2 Cor. 6:2).
«Paxuwalh kinaku»
12. 1) ¿Tuku likatsiyaw pi Jeremías chuntiya paxuwalh? 2) ¿Tuku makgtayalh palakachuwina xlakata ni naxlajwanan?
12 Jeremías lu xlipaxuwa taskujut nema xtlawa. Wa xlakata wanilh Jehová: «Akxni tekgska mintachuwin, chu kwalh chu mintachuwin kimakgapaxuwalh chu na paxuwalh kinaku, xlakata klin min tukuwani, wix Jehová Dios» (Jer. 15:16). Jeremías lanka talakgalhaman xakxilha napalakachuwinan xaxlikana Dios chu nalichuwinan xtachuwin. Pero akxni xkgaxmata la xlikgalhkgamanankgo, kxlajwanan, pero akxni xlakapastaka la xlistlan chu la xlilakaskinka xwanit xtamakatsin, xpaxuwapara (Jer. 20:8, 9).
13. ¿Tuku xlakata talakaskin nakatsiniyaw tuku xaxlikana nema tuwa akgatekgskan xlakata chuntiya napaxuwayaw?
13 Xlakata chuntiya xatapaxuwan nalichuwinanaw Dios, talakaskin pi nalitatliwakglhaw «tliwakga liwat», uma wamputun tuku xaxlikana xalak Biblia nema tuwa akgatekgskan (Heb. 5:14) Akxni liwana likgalhtawakgayaw xTachuwin Dios matliwakglha kintakanajlakan (Col. 2:6, 7). Na kinkamakgtayayan naʼakgatekgsaw la xlilakaskinka akxilha Jehová tuku tlawayaw. Wa xlakata, komo makgkatsiyaw pi ni kgalhiyaw kilhtamaku xlakata nalikgalhtawakgayaw Biblia, kalakkaxwiliw kinkilhtamakujkan. Komo likgalhtawakgayaw chu lilakapastakaw, maski ni lhuwa minutos akgatunu kilhtamaku, namakgkatsiyaw pi tlakg tlan talalinaw Jehová chu «lu lipaxuw» namakgkatsiyaw chuna la titaxtulh Jeremías.
14, 15. 1) ¿Tuku kitaxtulh xlakata xtaskujut Jeremías? 2) ¿La akxilhaw akinin akxni lichuwinanaw Dios?
14 Maski Jeremías lhuwa lichuwinalh tuku nitlan xʼama katlawani Jehová, na xkatsi pi xmalakgachakanit xlakata «namastakanan chu nachananan», uma wamputun pi xkamakatsinilh pi xʼamaka kamakgtayaparakan (Jer. 1:10). Uma tuku tlawalh kamakgtayalh amakgapitsin xlakata akxni malakgsputuka Jerusalén kata 607 akxni nina xmin Jesús, lakgtaxtukgolh judíos chu tiku ni judíos xwankgonit. La umakgolh Ébed-mélec chu Baruc tiku recabitas xwankgonit (Jer. 35:19; 39:15-18; 43:5-7). Chuna la xlakapastakkgo xʼamigos Jeremías tiku ni xmakgxtakgkgo tlan nawanaw pi nachuna tlawamakgolh kstalaninanin Cristo tiku nalatamakgo kKatiyatni. Xlakan litaxtukgo xʼamigos «Jeremías» xala uku. ¡Lu lipaxuwakgo tiku kalaksakkanit naʼankgo kʼakgapun xlakata kamatliwakglhnikgo xtakanajla chu xtakgalhkgalhinkan «lhuwa ntachixkuwitat» o latamanin! (Apo. 7:9.) Nachuna umakgolh tiku kamakgtayakgo tiku kalaksakkanit lu tlan limakgkatsikgo akxni kamakgtayakgo latamanin tiku xlikana katsiputunkgo tuku xaxlikana.
15 Kstalaninanin Cristo katsiyaw pi akxni lichuwinanaw xalakwan xalaksasti ni kaj kamakgtayamaw latamanin na likakninaniyaw Jehová. Wa xlakata maski nakinkakgaxmatnikgoyan o ni, akxni likakninaniyaw Dios xlakata lichuwinanaw, lu lipaxuwayaw (Sal. 71:23; kalikgalhtawakga Romanos 1:9).
Skgalalh katawilaw kamakgantaxtiw tuku kinkalakgayawakanitan
16, 17. ¿La limasiya Apocalipsis 17:10 chu Habacuc 2:3 pi xaʼawatiya kilhtamaku lamaw?
16 Wantuku nakinkamakgtayayan naʼakxilhaw pi xaʼawatiya kilhtamaku lamaw wa tuku lichuwinan Apocalipsis 17:10. Anta talichuwinan xlikgalhtujun mapakgsina uma kilhchanima kachikinin nema tliwakga wilakgolh, Gran Bretaña chu Estados Unidos, nema lhuwata kilhtamaku wilakgolh. Nachuna tawan pi «kaj tsinu namakgapalay». La uku, umakgolh «kaj tsinu» kilhtamaku tsankga nakamasputakan. Palakachuwina Habacuc kinkawaniyan pi “uma tuku akxilhli [xlakata xlisputni uma kilhtamaku] nakgantaxtu akxni nachan kilhtamaku”. Chu na wan: «Skgalalh katawila; xlakata xlikana nakgantaxtu. Ni katitamakgapalilh» (Hab. 2:3).
17 Akstu kakinkakgalhskinkan: «¿Klimasiya chuna la klin kilatamat pi kkatsi pi kxaʼawatiya kilhtamaku lamaw chu xlisputni kakilhtamaku talakatsuwinitta? ¿O klimasiya tuku ktlawa chu tuku tlakg xlakaskinka kakxilha pi klakpuwan pi lisputni makgapalama o ni lu kkanajla pi namin?».
18, 19. ¿Tuku xlakata la uku ni kililhkititnatkan?
18 Kstalaninanin Cristo tiku kalaksakkanit nina makgalhsputukgo xtaskujutkan, chuntiyaku makatsininamakgolh xlakata Dios (kalikgalhtawakga Jeremías 1:17-19). ¡Lu lipaxuwayaw akxni akxilhaw pi liwana makgantaxtimakgolh xtaskujutkan xtachuna la «talayaw nema litatlawanit likan» o «lanka kachikin nema litamakgstilinit patsaps»! Chu “litatampulakgchikgo xaxlikana”, uma wamputun pi litatliwakglhkgo xTachuwin Dios xlakata namakgantaxtikgo xtaskujutkan (Efe. 6:14, NM). Chu tiku litaxtukgo lhuwa latamanin kamakgtayakgo xlakata namakgantaxtikgo xtaskujut.
19 La uku ni kililhkititnatkan wata tlakg kiliskujnitkan Dios, nalilakapastakaw uma tuku lu xlikana lichuwinalh Jeremías 12:5 (kalikgalhtawakga). ¿Ni xlikana pi putum akinin kgalhiyaw taʼakglhuwit nema litaʼakxilha la wi kintakanajlakan? Akxni lakkaxtlawayaw kintaʼakglhuwitkan kitaxtu la katakgosnamaw «lakchixkuwin tiku» kgosnamakgolh. Pero chuna la natalakatsuwitilha «lanka takatsanajwat» tlakg tuwa taʼakglhuwit nakgalhiyaw (Mat. 24:21). Tlakg tuwa nalakkaxtlawayaw, natalakaskin lhuwa naliskujaw, nakitaxtu xtachuna la «nakatakgosnanaw kawayu». Akinin katsiyaw pi tuwa nakgosnanaw chuna la tantum kawayu. Wa xlakata taʼakglhuwit nema titaxtumaw la uku nakinkamakgtayayan xlakata natayaniyaw taʼakglhuwit nema alistalh nakgalhiyaw.
20. ¿Tuku liwana lakapastaknitaw natlawayaw?
20 Chuna la Jeremías, kstalaninanin Cristo tlan namakgantaxtiyaw kintaskujutkan. Xlakata xpaxkinan, ni xpekuan chu tapaxuwan makgtayalh Jeremías xlakata liwana namakgantaxti xtaskujut max tutupuxamatujun kata. Akxni lichuwinanaw xastlan almendro nema xanama kinkamalakapastakayan pi Jehová skgalalh wi xlakata namakgantaxti xtachuwin. Akinin nachuna talakaskin skgalalh kilitawilatkan. Chu chuna la Jeremías tlan namakgantaxtiyaw tuku kinkalakgayawakanitan.
¿Lakapastaka?
• ¿Tuku xlakata wanaw pi wa tapaxkit makgtayalh Jeremías xlakata ni nalhkititnan chu namakgantaxti tuku xliyawakanit?
• ¿Tuku xlakata maklakaskinaw nakinkamakgtayayan Jehová xlakata ni napekuanaw?
• ¿Tuku makgtayalh Jeremías xlakata chuntiya xpaxuwalh?
• ¿Tuku xlakata skgalalh kilitawilatkan?
[Takgalhskinin]
[Epígrafe xla página 31]
¿Na chuntiya nalichuwinanaw Dios maski nakinkaliputsastalanikanan?
