Wantuku masiya xTachuwin Dios

¿Tiku Dios?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Tiku Dios?

Dios katlawalh putum tuku anan. Biblia limapakuwi «Mapakgsina xliputum kilhtamaku», wamputun pi ni kgalhilh xlakatsukut chu putum kilhtamaku natawila (Apocalipsis [Revelación] 15:3). Xlakata Dios kinkamaxkin latamat, wa xlakata kiliskujnanitkan chu nakakninaniyaw. (Kalikgalhtawakga Apocalipsis 4:11.)

2. ¿La tasiya Dios?

Dios chatum espíritu chu nipara chatum lataman akxilhnit (Juan 1:18; 4:24). Pero tlan nakatsiyaw la likatsi Dios akxni akxilhaw tuku tlawanit. Kawiliw liʼakxilhtit, katlawanit tanu tanu tawakat chu xanat nema limasiya pi lu skgalala chu kinkapaxkiyan. Chu akxni akxilhaw la xlilanka kakilhtamaku limasiya pi kgalhi lhuwa litliwakga. (Kalikgalhtawakga Romanos 1:20.)

Atanu tuku na tlan nalilakgapasaw Dios wa nalikgalhtawakgayaw Biblia. Lichuwinan pi kalakgalhaman latamanin, na wan tuku lakgati chu tuku ni lakgati chu la tanu tanu lakkaxtlawa tuku xlitlawat. (Kalikgalhtawakga Salmo 103:7-10.)

3. ¿Kgalhi xtukuwani?

Jesús masiyalh pi Dios kgalhi xtukuwani. Jesús wa: «KinTlatikan nti wilapi nkakgapun, katamasantujlilh mintukuwini» (Mateo 6:9). Kʼakgatunu tachuwin tanu tanu la wankan. Kxatotonaco wankan xtachuna la xaʼespañol Jehová o Yavé. (Kalikgalhtawakga Salmo 83:18 [82:19 kmakgapitsi Biblias].)

Kmaklhuwa Biblias, lakgpalikgonit xtukuwani Dios chu wilikgonit tuku kaj lilakgapaskan la Dios o Malana. Akxni tsokgka Biblia max akgtujun mil tsokgwilika xtukuwani Dios. Akxni Jesús xlichuwinan tuku wan xtachuwin Dios, xlimaklakaskin xtukuwani. Xlakaskin pi latamanin tlakg xlakgapaskgolh xTlat. (Kalikgalhtawakga Juan 17:26.)

 4. ¿Kinkapaxkiyan Dios?

Kinkapaxkiyan. Limasiya pi kinkapaxkiyan akxni kgaxmata kiʼoracionkan (Salmo 65:2). Pero max wix lakpuwana: «Komo xlikana kinkapaxkiyan, ¿tuku xlakata masta talakaskin kaʼanalh lhuwa tapatin?». Wilakgolh tiku lakpuwankgo pi Dios kinkamapatiniyan xlakata nakinkaliʼakxilhan. Pero ni xlikana. Anta kʼJob 34:12 wan: «Dios ni lixkajni likatsi» uma wamputun pi nikxni tlawa tuku nitlan. (Kalikgalhtawakga Santiago 1:13.)

Jehová kinkamaxkinitan talakaskin nalaksakaw tuku natlawaputunaw kkilatamatkan. Chu tlakg tlan xwa nalaksakaw naskujniyaw (Josué 24:15). Pero lhuwa latamanin wata laksakkgo natlawakgo tuku nitlan, wa xlakata anan lhuwa tapatin. Pero Jehová nitlan makgkatsi akxni akxilha pi lhuwa tuku nitlan anan. (Kalikgalhtawakga Génesis 6:5, 6.)

Nialh makgas Dios nawani Jesús kamasputulh tuku nitlan chu tiku tlawakgo tuku nitlan. Pero Jehová wi tuku xlakata masta talakaskin kaʼanalh tapatin. Kʼatanu artículo natalichuwinan tuku xlakata. (Kalikgalhtawakga Isaías 11:4.)

5. ¿Tuku lakaskin Dios natlawayaw?

Jehová kinkatlawan xlakata tlan nalakgapasaw chu napaxkiyaw. Wa xlakata lakaskin xlikana kalakgapaswi (1 Timoteo 2:4). Akxni likgalhtawakgayaw Biblia kinkamakgtayayan natalakatsuwiniyaw Jehová chu tlan natalalinaw. (Kalikgalhtawakga Proverbios 2:4, 5.)

Xlakata Dios kinkamaxkinitan latamat, lakgchan tlakg napaxkiyaw. Limasiyaniyaw pi paxkiyaw akxni tlawaniyaw oración chu makgantaxtiyaw xlimapakgsin (Proverbios 15:8). Akgtum limapakgsin wa pi nakapaxkiyaw kintalatamankan. (Kalikgalhtawakga Marcos 12:29-31 chu 1 Juan 5:3.)

Komo tlakg katsiputuna xlakata uma, kaʼakxilhti capítulo 1 xla libro ¿Tuku xlikana masiya Biblia?, nema tlawakgonit xtatayananin Jehova.

[Epígrafe xla página 11]

Chatum tlat tlan namasta talakaskin kapatinalh xkgawasa akxni katsi pi tlan nakitaxtuni alistalh