¿Tuku xlakata lamakgxtakgkgo?

Ama kilhtamaku «ntilakgminkgoIh fariseos, kgalhputsakgolh [Jesús], wanikgolh: “¿[...] Xlilat wa nchixku, namakgan [o namakgxtakga] xpuskat mpala kaxatu kawa ntu xpalakata?”» (Mateo 19:3)

¿TLAN nikxni nalamakgxtakga tiku tamakgaxtokgkgonit? Akxni kgalhskinkgolh Jesús komo tlan kaxatukawa tlan xlilakxtlawaka tamakgaxtokgat kxlakatin pumapakgsin, Jesús kawanilh pi xliputum kilhtamaku xlimakgapalat: «¿Tu [ni] alikgalhtawakgayatit ntani wan, mpi wa nti ntimalakatsukunalh kxkilhtsukut, chixku, chu xawa mpuskat ntitlawakgolh? Chu na waj: “Wa cha xpalakata, mpiwa nchixku nalimakgaxtakga xtlat, chu xtsi, nawa natatalakgxtumiy xpuskat, [...] akgtum liwa nawankgoy. Chuna mpi nialh xchatuykan, [...] watiya akgtum liwa wankgonit. Chuna mpi wantu Dios makxtum tlawalh, ni kamapapitsilh nchixku”» (Mateo 19:4-6). * Liwana litasiya pi Dios lakaskin pi tiku tamakgaxtokgkgonit xliputum kilhtamaku akxtum natawilakgo.

Pero klakalhuwa kachikinin xliputum tiku tamakgaxtokgkgo atsinu ni itat laxtlawakgo xtamakgaxtokgatkan kxlakatin mapakgsinanin. ¿Wamputun uma pi tastakyaw xlakata tamakgaxtokgat nialh kinkamakgtayayan? ¿Pi nitlan tamakgaxtokgkan?

Kawiliw uma liʼakxilhtit. Kalilakapastakwi pi chatiy latamanin tamawakgo putlaw nema lakxtum tasiyakgo. Chatum liwana matlawani chu kuentajtlawa wa xlakata tlan natawila. Chu achatum kaj akglakgwa matlawani xputlaw chu ni kuentajtlawa. Alistalh xputlaw talakgalhi chu makgan. ¿Tiku xkuenta pi talakgalhilh putlaw? ¿Nitlan xwanit putlaw? Ni, wa xkuenta tiku ni kuentajtlawalh.

Nachuna, xlakata lhuwa tiku lamakgxtakgkgo ni wamputun pi nitlan natamakgaxtokgkan. Chuna limasiyakgo lhuwa tiku tamakgaxtokgkgonit xatapaxuwan wilakgolh chu makgtayanankgo xlakata tlan natawila latamanin. Pero tlan nawanaw pi tamakgaxtokgat xtachuna la akgtum putlaw: xlakata namakgapala chu tlan natawila, talakaskin liwana nakuentajtlawakan.

Biblia kgalhi lhuwa tastakyaw nema kamakgtaya tiku tamakgaxtokgkgonit xlakata tlakg tlan nalatalalin, maski makgasa tamakgaxtokgkgonit. ¿Katsiputuna makgapitsi tastakyaw? Kalikgalhtawakga artículo nema aku mima.

[Notas nema wilakgo kpágina]