¿Mastayaw talakaskin nakinkapulalinan xʼespíritu santo Dios?
¿Mastayaw talakaskin nakinkapulalinan xʼespíritu santo Dios?
«Mi espíritu wa xatlan; kakimpulalilh xlakata naktlawa tuku xaʼakgstitum.» (SAL. 143:10, NM)
1, 2. 1) Kalichuwinanti akxni Jehová kalimakgtayalh xʼespíritu santo xlakskujnin. 2) ¿Kajwatiya makgtayanan espíritu santo akxni tuku lu xlakaskinka o akxni lu talakaskima? Kawanti tuku xlakata chuna kgalhtinana.
¿TUKU lakapastaka akxni kgaxpata lichuwinankan la makgtayanan espíritu santo? Max lakapastaka akxni Gedeón chu Sansón kamakgatlajakgolh xtalamakgasitsinkan (Jue. 6:33, 34; 15:14, 15). O lakapastaka natalan xalak pulana siglo tiku ni pekuankgolh chu akxni Esteban xwi xlakatin Sanedrín (Hech. 4:31; 6:15). Komo nalilakapastaka tuku lama uma kilhtamaku, max akgtum xalanka tamakxtumit xaʼakgtati kilhtamaku niku anan lhuwa tapaxuwan, natalan tiku katamaknuka kpulachin xlakata ni makgxtakgkgolh Jehová o xlakata lhuwa lichuwinamaka Dios. Putum umakgolh limasiya pi xʼespíritu santo Dios kamakgtayama.
2 Xlakata tuku lichuwinaw, ¿wamputun pi espíritu santo kaj makgtayanan akxni tuku lu xlakaskinka o niku lu talakaskima? Ni chuna. Biblia wan pi kstalaninanin Cristo «lilama[kgolh] espíritu» chu «espíritu nkapulali[ma]» (Gál. 5:16, 18, 25). Umakgolh tachuwin limasiya pi xʼespíritu santo Dios putum tlan kinkamakgtayayan. Wa xlakata, chali chali kaskiniw Jehová kakinkalipulalin xʼespíritu kkintalakapastaknikan, kkintachuwinkan chu tuku tlawayaw (kalikgalhtawakga Salmo 143:10). Komo namastayaw talakaskin pi kakinkapulalin xʼespíritu santo, nakinkamakgtayayan nakgalhiyaw tayat nema nalimakgtayayaw amakgapitsin chu nalimalankiyaw Dios.
3. 1) ¿Tuku xlakata lu xlakaskinka kakinkapulalin espíritu santo? 2) ¿Tukuya takgalhskinin naʼakxilhaw?
3 ¿Tuku xlakata lu xlakaskinka namastayaw talakaskin kakinkapulalin espíritu santo? Xlakata wi tuku lu kinkamatlawiputunan tuku nitlan. Wa «ntiyat liwat», Biblia wan pi uma wamputun wa tuku ni tlan tlawaputunaw xlakata Adán kinkamatitaxtinin talakgalhin (kalikgalhtawakga Gálatas 5:17). Wa xlakata, ¿la mastayaw talakaskin pi espíritu santo nakinkapulalinan? ¿Tuku natlawayaw xlakata ni natlawaputunaw tuku nitlan? Kaʼakxilhwi umakgolh takgalhskinin chu apulakchaxan «xtatlaw espíritu» santo la umakgolh «tiku lu kgalhkgalhinan, tlawakan tuku tlan, tlan talikatsit, takanajla, ni lakapala sitsikan, tiku machokgoy tuku nitlan tlawaputun» (Gál. 5:22, 23, NM).
Ni lakapala sitsikan chu lu kgalhkgalhinankan makgtayanan ni naʼanan taʼakglhuwit kcongregación
4. ¿La makgtayanan nakgalhkgalhinanaw chu ni lakapala nasitsiyaw, ni naʼanan taʼakglhuwit kcongregación?
4 (Kalikgalhtawakga Colosenses 3:12, 13.) Xlakata ni naʼanan taʼakglhuwit chu tlan nakatalalinaw kinatalankan wa ni lakapala sitsikan chu lu kgalhkgalhinankan. Uma pulaktiy tuku tlawa espíritu santo kinkamakgtayayan tlan nalikatsiyaw akxni kinkamakgasitsimakan chu ni nakamalakgaxokgeyaw tiku kinkawaniyan tuku nitlan. Akxni takgalhiyaw taʼakglhuwit chatum tala, xlakata ni lakapala sitsiyaw kinkamakgtayayan chuntiyaku tlan natalalinaw uma tala. Lu talakaskin kcongregación ni lakapala nasitsiyaw chu lu nakgalhkgalhinanaw xlakata akinin putum lakgalhinanin.
5. ¿Tuku kaʼakgspulalh Pablo chu Bernabé chu tuku kinkamasiniyan?
5 Kalakapastakwi Pablo chu Bernabé. Xchatiykan tliwakga xwi xtakanajlakan chu akglhuwata kata akxtum xlichuwinamakgolh xalakwan xalaksasti tamakatsin. Pero, milh kilhtamaku «kaj lakapala lamakgasitsilh, chu tanu tanu niku ankgolh» (Hech. 15:36-39, NM). Uma tuku lalh wi tuku kinkamasiniyan: pi asta natalan tiku ni makgxtakgkgo Dios na lamakgasitsi. Komo nachuna nakinkaʼakgspulayan, ¿tuku tlan natlawayaw xlakata ni nalakilhniyaw chu natlawa pi nialh nikxni nalatalalinaw?
6, 7. 1) ¿Tukuya tastakyaw xalak Biblia nakinkamakgtayayan ni nalakilhniyaw akxni talakkaxtlawamaw akgtum taʼakglhuwit kintalakan? 2) ¿Tuku tlan kitaxtu akxni “liwana kgaxmataw, pero ni lu lakapala chuwinanaw chu ni lu lakapala nasitsiyaw”?
6 Tachuwin «kaj lakapala lamakgasitsilh» limasiya pi Pablo chu Bernabé kaj lakapala chu lu lamakgasitsilh. ¿Tuku kinkamasiyaniyan uma? Akxni talakaxtlawamaw akgtum taʼakglhuwit chatum tala chu akxilhaw pi tsukuyaw sitsiyaw, tlakg tlan namakgantaxtiyaw xtastakyaw Santiago 1:19, 20, kBiblia Traducción del Nuevo Mundo wan: «Chatum lataman pulana liwana kakgaxmatli, pero ni lu lakapala nachuwinan chu ni lu lakapala nasitsi; xlakata xtasitsin chixku ni watiya xtasitsin Dios». Max tlakg tlan atanu tuku nalichuwinana o alimakgtum natachuwinana o nawaniya pi katapatin chu kapit xlakata ni tlakg naʼan taʼakglhuwit (Pro. 12:16; 17:14; 29:11).
7 ¿La kinkamakgtayayan namakgantaxtiyaw uma tastakyaw? Akxni kgalhkgalhiyaw asta akxni nialh sitsimaw, tlawaniyaw oración Jehová chu lakapastakaw la nakgalhtinanaw, chuna mastayaw talakaskin pi nakinkapulalinan espíritu santo (Pro. 15:1, 28). Uma nakinkamakgtayayan ni lakapala nasitsiyaw chu lu nakgalhkgalhinanaw. Chuna tlakg tlan namakgantaxtiyaw tuku wan Efesios 4:26, 29: «Maski nasitsiyatit, wa mpi ni tililakgalhinanatit;[...] Nitu mpala tu nitlan tachuwin nataxtuy kminkilhnikan, wa mpi xman wa ntu xlilat lakimpi chuna nalistakkgoy ktakanajla, chu nalimakgamakglhtinankgoy lipaxkatsinit wa nti nkgaxmatkgoy mintachuwinkan». Xlikana, akxni ni lakapala sitsiyaw chu lu kgalhkgalhinanaw makgtayananaw xlakata ni naʼanan taʼakglhuwit kcongregación.
Tlawakan tuku tlan chu tlan likatsikan makgtayanan kfamilia
8, 9. ¿La tlawakan tuku tlan chu tlan likatsikan chu la makgtayanan kfamilia?
8 (Kalikgalhtawakga Efesios 4:31, 32; 5:8, 9.) ¡Lu tlan limakgkatsiyaw akxni lu lhkaknan chu wayaw xaskgawiwi chuchut! Nachuna limakgkatsiyaw akxni tlawayaw tuku tlan chu tlan likatsiyaw. Kfamilia makgtayanan xlakata tlakg naʼanan tapaxuwan. Pero ¿tuku kilhchanima uma pulaktiy tuku tlawa espíritu santo? Tachuwin xagriego nema matitaxtikan xaLiputsan
onaco «tlawakan tuku tlan» kilhchanima tiku kamakgtaya amakgapitsin chu tlan katachuwinan xlakata lu xlikana kamakgtayaputun. Nachuna tachuwin tlan likatsikan kilhchanima akxni lu kamakgtayayaw amakgapitsin (Hech. 9:36, 39; 16:14, 15). Pero, tlan likatsikan wi atanu tuku kilhchanima.
9 Tlan likatsikan chuna tlakg tlan la nalinaw kilatamatkan. Kinkamakgtayayan akxni wi tuku natlawayaw chu la nalikatsiyaw. Xtachuna la akgtum xtawakat kiwi nema chatum tse lakchuku chu kamaxki xfamilia. Uma tawakat ni xamasni, xasakgsi chu xachan xliwanat. Na xtachuna, espíritu santo tlawa pi tlan nakalikatsiniyaw amakgapitsin.
10. ¿Tuku nakamakgtaya familias nakgalhikgo tayat nema masta espíritu santo?
10 ¿Tuku nakamakgtaya familias xlakata tlan nalalikatsini? Xlakaskinka liwana nakatsikgo tuku wan Biblia (Col. 3:9, 10). Wilakgolh natlatni tiku lakkaxwilikgo nalikgalhtawakgakgo xtatlaw espíritu santo akxni katakakninanikgo Dios kxfamilia. ¿Na tlan chuna xtlawa? Ni tuwa tlawakan. Tlan nalimaklakaskina likgalhtawakga nema anan xlakata nalakputsananiya pulaktu pulaktu xtatlaw espíritu santo. Tlan ni lhuwa párrafos kalikgalhtawakga makgatunu akxni nakgalhtawakgaya chu kalimaxtu lhuwa semanas xlakata nalikgalhtawakgaya pulakatunu. Akxni nalikgalhtawakgayatit libros chu revistas kalikgalhtawakgatit textos nema tatsokgtawilakgonit chu kalichuwinantit. Chu alistalh kalilakpuwantit la nalimaklakaskinatit tuku katsinitit chu kaskinitit Jehová kasikulanatlawalh tuku natlawayatit (1 Tim. 4:15; 1 Juan 5:14, 15). Pero ¿xlikana nakamakgtayayan la nalalikatsiniyatit kminchikkan?
11, 12. ¿La kamakgtayalh natalan lakputsananikgolh tlan likatsikan chu tlawakan tuku tlan?
11 Chatum tala chu xpuskat xlakaskinkgo tlan xtawi xtamakgaxtokgatkan wa xlakata tsukukgolh lakputsananikgo tuku tlawa espíritu santo chu xkatsiputunkgo la tlakg tlan likatsikan. Xpuskat wan la kamakgtayalh: «Kakxilhwi pi tapaxkit nema ni makgxtakgnan akgtum tayat nema kinkamakgtayan ni naklamakgxtakgaw chu ni naklaʼakgskgawiyaw chu kinkamakgtayan tlakg tlan naklalikatsiniyaw. Nachuna kkatsiniw klatapatiyaw komo ni tlan tuku ktlawaw chu klapaxtikatsiniyaw».
12 Atanu tala chu xpuskat na lakkaxwilikgolh nalakputsananikgo xlakata tlawakan tuku tlan. ¿Tuku xlakata? Xlakata akxilhkgolh pi xkgalhikgo taʼakglhuwit xlakata ni xkgalhikgo uma tayat nema masta espíritu santo. Xchixku wan tuku lu tlan kitaxtulh: «Kkatsiniw pi tlakg tlan naklalimasiyaniyaw pi klalipawanaw chu ni wa nakakxilhaw tuku nitlan tlawa achatum. Chatunu chatunu tlakg ktsukuw klamakgtayayaw. Kakxilhli pi xlakata tlan xaktlawalh, xtalakaskin pi xakwanilh kimpuskat nakiwani tuku lakpuwan chu akit ni xaklisitsilh komo ni xaklakgatilh tuku xkiwanilh. Xtalakaskin pi ni tlankajwa xakwa. Chuna la titaxtulh kilhtamaku tlakg tlan ktsukuw latalalinaw chu nialh xaklamakgastsiyaw. Lu tlan kmakgkatsiw». ¿Nachuna akgspulaman wix chu mifamilia? ¿Tlan xkamakgtayan nalakputsananiyatit xtatlaw espíritu santo?
Kalimasiyaw kintakanajlakan maski kaj kiakstukan wilaw
13. ¿Tuku kuenta kilitlawatkan xlakata ni naxkajwananaw?
13 Akinin kstalaninanin Cristo putum kilhtamaku namastayaw talakaskin nakinkapulalinan espíritu santo, maski niti kinkaʼakxilhman. La uku kakilhtamaku lu lixkajnit tuku lilakgastanankgo chu kaniwa niku tasiya tuku xalixkajni, chu uma lakglakgalhi kintakanajlakan. ¿Tuku tlan natlawayaw xlakata Satanás ni nakinkaʼakgskgawiyan? Namakgantaxtiyaw uma tastakyaw xalak Biblia: «Cha ntu mpaks nalimakgaxtakgatit lixkajwalan, chu xlipaks ntu [nitlan], lhuwa nataktujuyatit nalimakgamakglhtinanatit ntachuwin ntu ntachanit kminakukan, wa ntu ntlan nalimalakgtaxtiy milistaknakan» (Sant. 1:21). Wantuku nakinkamakgtayayan nitu nalixkajwananaw kxlakatin Jehová wa kintakanajlakan. Kalakputsananiw la kinkamakgtayayan uma tuku masta espíritu santo.
14. ¿La kinkamatlawiyan talakgalhin akxni ni kanajlayaw pi Dios lama?
14 Kgalhikan takanajla wa akxni liwana katsiyaw pi Jehová lama. Komo ni chuna xakxilhwi lakapala xtlawaw tuku nitlan. Kalakapastakwi tuku lalh akxni xlama Ezequiel. Dios maʼakxilhnilh tuku lu nitlan tsekg xtlawamakgolh makgapitsi israelitas chu wanilh: «¿Akxilhnita wix xkgawasa chixku, tuku tlawamakgolh niku kapukswa lakchixkuwin xalak kʼIsrael tiku linkgoya kata, chatunu chatunu xpulakni kxchikkan? Xlakata wankgo: “Jehová nitu kinkaʼakxilhman. Jehová makxtakgnit katiyatni”» (Eze. 8:12). ¿Akxilhwi la xlakpuwankgo? Xlakpuwankgo pi Dios ni xakxilhma tuku ni tlan xtlawamakgolh. Xlakpuwankgo pi Dios nitu xlama.
15. ¿La kinkamakgtayayan akxni tliwakga wi kintakanajlakan?
15 ¡José ni chuna tlawalh! Maski ni anta xkatawi xfamilia, ni tatalakgxtumilh xpuskat Potifar. José wa: «¿La naktlawa lanka talakgalhin chu naklakgalhinan kxlakatin Dios?» (Gén. 39:7-9). Xlikana, lu xkanajla pi Jehová xlama. Komo nachuna akxilhaw, ni tsekg katitlawaw tuku ni lakgati, la uma, ni nalilakgastananaw tuku xalixkajni. Nachuna nalakpuwanaw chuna la wa salmista: «Ni kama lakani tu lixkajnit, nakxkajni tu tatlawa ti takgtsankganit» (Sal. 101:2, 3).
Akxni machokgoyaw tuku nitlan tlawaputunaw makgtaya kinakujkan
16, 17. 1) Chuna la wan Proverbios, ¿tuku xlakata tlawalh talakgalhin uma «kgawasa tiku nitlan kgalhi xnaku»? 2) Chuna la akxilhaw kpágina 29, ¿tuku max na nakinkalakglakgalhiyan maski laktsinajku o laklankata akinin?
16 Machokgokan tuku nitlan tlawaputunaw wa xaʼawatiya xtatlaw espíritu santo. Akxni machokgoyaw tuku nitlan tlawaputunaw kinkamakgtayayan ni natlawayaw tuku Dios ni lakgati chu kuentanatlawayaw kinakujkan (Pro. 4:23). Kaʼakxilhwi tuku lichuwinan Proverbios 7:6-23. «Chatum kgawasa tiku nitlan kgalhi xnaku» akgskgawikan, akgskgawi chatum puskat tiku stay xmakni anta «ktiji niku wi uma puskat». ¿Tuku xlakata alh anta niku xwi uma puskat? Max kaj xakxilhputun. Pero, nipara katsilh la matlawika tuku nitlan chu kalipekua wililh «xlatamat».
17 ¿Tuku xtimakgtayalh nichuna xtitlawalh? Xtikgalhakgaxmatli uma tastakyaw: «Nipara [...] katanu kxtiji» (Pro. 7:25). ¿Tuku kinkamasiyaniyan? Komo lakaskinaw pi espíritu santo nakinkapulalinan, kuenta natlawayaw nitu nakinkamatlawiputunan tuku nitlan. Katiwa tlan nachuna natlawa la uma «kgawasa tiku nitlan kgalhi xnaku». Max nachuna nakinkaʼakgspulayan komo kajwatiya lakgpalitilhamaw canales xla televisión o akxni tanu tanu tuku akxilhaw kʼInternet. Maski ni putsamaw tuku xalixkajni, max naʼakxilhaw niku nitu lhakganankgonit chu asta max nalismaniyaw. Uma lu lakglakgalhi kintalakapastaknikan chu la talalinaw Dios chu max asta namakgatsankgayaw kilatamatkan (kalikgalhtawakga Romanos 8:5-8).
18. ¿Tuku tlan natlawayaw xlakata nakuentajtlawayaw kinakujkan chu la kinkamakgtayayan namachokgoyaw akxni tlawaputunaw tuku nitlan?
18 Pero, komo nataxtu tuku natlawa pi nakgalhiyaw ni tlan talakapastakni ni chuntiya naʼakxilhaw. Kilimachokgotkan tuku nitlan tlawaputunaw chu lakapala chuna natlawayaw. Pero tlakg tlan nipara tsinu naʼakxilhputunaw tuku nakinkamatlawiyan tuku nitlan (Pro. 22:3). Limasiyayaw pi machokgoyaw tuku nitlan tlawaputunaw akxni wi tuku lakaxwiliyaw xlakata nakuentajtlawayaw chu makgantaxtiyaw. Makgapitsi wilikgo xcomputadorajkan ni putum tlan naʼakxilhkgo tuku tlawama. Makgapitsi ni akxilhkgo Internet o televisión akxni kaj xakstukan wilakgolh. Chu wilakgolh tiku nipara limaklakaskinkgo Internet (kalikgalhtawakga Mateo 5:27-30). Kiliʼakxilhatkan tuku talakaskin natlawayaw xlakata nitu nalixkajwananaw chu nitu nalixkajwanan kifamiliajkan, chu chuna tlan nalikakninaniyaw Jehová “kinakujkan”, “kintalakapastaknikan” chu «wa ntu akgstitum [...]takanajla» (1 Tim. 1:5).
19. ¿La kinkamakgtayayan akxni mastayaw talakaskin pi espíritu santo kakinkapulalin?
19 Xlikana, tayat nema masta espíritu santo lu kinkamakgtayayan. Ni lakapala sitsikan chu lu kgalhkgalhinankan makgtayanan ni naʼanan taʼakglhuwit kcongregación. Tlawakan tuku tlan chu tlan talikatsit tlawa pi xatapaxuwan natawila familia. Takanajla chu machokgokan tuku nitlan tlawaputunaw kinkamakgtayayan tlan natalalinaw Jehová chu nitu nalixkajwananaw kxlakatin. Liwana kinkawaniyan Gálatas 6:8: «Wampi wanti Spiritu lichan[anan], wa latamat xlipan nakitaxtuniy». Xlikana xlakata Cristo makamastalh xlatamat, Jehová nalimaklakaskin xlakata nakinkamaxkiyan latamat nema ni kgalhi xlisputni. Pero kajwatiya nakasikulunatlawa tiku mastakgo talakaskin pi espíritu santo nakapulalin.
¿Lakapastaka tuku akxilhwi?
• ¿La makgtayanan ni lakapala sitsikan chu lu kgalhkgalhinankan xlakata ni naʼanan taʼakglhuwit kcongregación?
• ¿Tuku namakgtaya chatum kstalanina Cristo natlawa tuku tlan chu tlan nalikatsi kxchik?
• ¿La kinkamakgtayayan takanajla xlakata nakuentajtlawayaw kinakujkan chu namachokgoyaw tuku nitlan tlawaputunaw?
[Takgalhskinin]
[Epígrafe xla página 27]
¿Tuku tlan natlawayaw xlakata ni nalakilhniyaw?
[Epígrafe xla página 28]
Familias lu kamakgtaya akxni likgalhtawakgakgo tayat nema masta espíritu santo
[Epígrafe xla página 29]
¿La kinkamakgtayayan kintakanajlakan chu machokgoyaw tuku nitlan tlawaputunaw?
