«Xtatlaw espíritu santo» malanki Jehová
«Xtatlaw espíritu santo» malanki Jehová
«Wa [...] litamatlankiy nkinTlat, mpi namastayatit lhuwa xatawakat.» (JUAN 15:8)
1, 2. 1) ¿La tlan nakamakgtayayaw amakgapitsin? 2) ¿Tuku kinkamakgtayayan xlakata tlakg tlan naskujnaniyaw Dios?
KALILAKPUWANTI uma. Chatum tala puskat tiku tliwakga wi xtakanajla akxilha pi chatum tsumat xalak xcongregación wi tuku lilipuwama, wa xlakata wani kaʼalh talichuwinan Dios. Akxni titaxtukgo kʼakgatunu chiki, uma tsumat wani tuku lilipuwama, alistalh maxki paxtikatsinit Jehová xlakata uma tala kgaxmatnilh; xlakaskima tiku namakgtaya. Alakatanu, kʼakgtum convivio chatum tala chu xpuskat lu lipaxaw lichuwinankgo tuku titaxtukgolh akxni kskujnimakgolh Dios alakatanu kachikin. Chatum kgawasa kgaxmatma tuku lichuwinamakgolh pero nitu wan. Akglhuwa kata titaxtulh, uma kgawasa takaxma xlakata naʼan skujni Dios niku malakgachaka chu lakapastaka xtakgalhchuwinkan umakgolh natalan nema makgtayalh misionero nawamputun.
2 Max uma tuku lichuwinaw kinkamalakapastakniyan chatum tala tiku kinkamakgtayan wi tuku natlawayaw, o wi tiku akinin makgtayaw. Maski ni putum tiku natachuwinanaw nalakgpali xlatamat, chali chali wi tuku tlan natlawayaw xlakata nakamatliwakglhaw amakgapitsin. Kaj kalakpuwanti pi wi tuku tlan xkinkamakgtayan nema tlakg tlan chuna xtlawaw, tlakg tlan xlikatsiw chu tlakg tlan xkamakgtayaw kinatalankan chu kskujniw Dios. Max lu xpaxtikatsiniw. Jehová kinkamaxkiyan tuku nakinkamakgtayayan: xʼespíritu santo (Luc. 11:13). Akxni kgalhiyaw xlitliwakga Dios kinkamakgtayayan, kgalhiyaw lakstlan tayat xlakata tlakg tlan nakakninaniyaw. ¡Lu tlan tamaskiwin! (Kalikgalhtawakga Gálatas 5:22, 23.)
3. 1) ¿La limalankiyaw Dios akxni lilatamayaw xtatlaw «espíritu» santo? 2) ¿Tukuya takgalhskinin nakgalhtiyaw?
3 Xlakata espíritu santo wa xla Jehová, tlawa pi nakgalhiyaw tayat nema na watiya kgalhi Jehová (Col. 3:9, 10). Pero ¿tuku xlakata lu naliskujaw nachuna nalikatsiyaw la Dios? Jesús kawanilh xtamakgalhtawakgen tuku xlakata lu xlakaskinka: «Wa [...] litamatlankiy nkinTlat, mpi namastayatit lhuwa xatawakat» (Juan 15:8). * Akxni kgalhiyaw «xtatlaw espíritu», anta litasiya la chuwinanaw chu la likatsiyaw nema malanki kiMalakatsukinakan (Mat. 5:16). ¿Tukuya tayat kgalhikgo kstalaninanin Cristo nema ni kgalhikgo xalak kakilhtamaku? ¿Tuku natlawayaw xlakata nakgalhiyaw xtatlaw espíritu? ¿Tuku xlakata lu tuwa chuna nalilatamayaw? Kaʼakxilhwi umakgolh takgalhskinin chu pulaktutu xtatlaw espíritu: tapaxkit, tapaxuwan, chu takaksni, o tlan makglhkatsikan.
Tapaxkit nema takilhtinit kBiblia tlakg tlan
4. ¿La napaxkinankgo xtamakgalhtawakgen Jesús?
4 Tapaxkit nema espíritu santo tlawa pi nakgalhiyaw ni xtachuna la paxkinankgo tiku xala kakilhtamaku. ¿Tuku xlakata? Xlakata kBiblia takilhtinit. Jesús wa tuku xlakata ni lakxtum anta kTakgalhchuwin xalak Sipi (kalikgalhtawakga Mateo 5:43-48). Wa pi asta makglakgalhinanin natlan kalikatsinikgo tiku tlan kalikatsini. Lakpuwankgo: «Komo tlan nakilikatsiniya na tlan naklikatsiniyan». Pero uma ni xaxlikana tapaxkit, xlakata kaj la tlawani atanu litlan. Kstalaninanin Cristo ni chuna xliwanatkan Jesús wa xlakata tlan «xkaman nawanatit minTlatkan nti wi nkgakgapun». Ni xtachuna nakalikatsiniyaw komo nitlan nakinkalikatsinikgoyan, wata tlan nakalikatsiniyaw chu nakaʼakxilhaw la tlawa Jehová. Chuna la lichuwinalh Cristo nakapaxkiyaw asta tiku kinkasitsiniyan. ¿Xlikana tlan chuna natlawayaw?
5. ¿La tlan nakapaxkiyaw tiku kinkaputsastalaniyan?
5 Kalilakapastakwi tuku tlawakgolh Pablo chu Silas. Akxni xlichuwinamakgolh Dios kFilipos, katamaknuka kpulachin, kamakgsnokgka chu tamanuka xtantunkan kcepo. Max tiku na makgtayanalh akxni kamakgsnokgka wa tiku xkuenta tlawa pulachin. Akxni talakkilh pulachin xlakata tachikilh tiyat, ni lakpuwankgolh namalakgaxokgekgo tiku xkuenta tlawa pulachin. Xlakata lu xlikana xpaxkinankgo makgtayakgolh chu putum xfamilia tunkun kanajlakgolh kxaxlikana takanajla (Hech. 16:19-34). La uku, lhuwa natalan nachuna makgantaxtimakgolh uma limapakgsin: Tlan «kalakapastaknikgotit wa nti [kasitsinikgoyan]» (Rom. 12:14).
6. ¿La kalimasiniyaw kinatalankan pi xlikana kapaxkiyaw? (Kaʼakxilhti recuadro xalak página 24.)
6 Tlakg talakaskin nakapaxkiyaw kinatalankan tiku na watiya kgalhikgo kintakanajlakan: «Nkilipalakamastatkan nkilatamatkan xpalakata natalanin» (kalikgalhtawakga 1 Juan 3:16-18). Xlikana tlan nakalimasiyaniyaw pi kapaxkiyaw maski ni lu lanka tuku natlawayaw; akgtum liʼakxilhtit, komo wi tuku waniw o tlawaw nema lisitsilh, kaskiniw kakinkatapatin (Mat. 5:23, 24). Pero ¿komo akinin wi tuku nitlan kinkatlawanikgon? ¿Putum kilhtamaku kinakujkan “tapatinan”, o ni la katapatiyaw? (Sal. 86:5.) Xlakata espíritu santo kinkamakgtayayan napaxkinanaw chu nakatapatiyaw tuku nitlan kinkatlawanikgoyan amakgapitsin chuna la Jehová “kinkamatsankgananin” (Col. 3:13, 14; 1 Ped. 4:8).
7, 8. 1) ¿Tuku xlakata talakaskin napaxkiyaw Dios chu latamanin? 2) ¿La tlan tlakg napaxkiyaw Jehová? (Kaʼakxilhti fotos kʼpágina 23.)
7 ¿Tuku talakaskin xlakata lu xlikana nakapaxkiyaw kinatalankan? Talakaskin tlakg tlan natalalinaw kinTlatkan xalak akgapun (Efe. 5:1, 2; 1 Juan 4: 9-11, 20, 21). Na talakaskin nalimaxtuyaw kilhtamaku xlakata natlawaniyaw oración, nalikgalhtawakgayaw Biblia chu nalilakapastakaw. Chuna tlakg napaxkiyaw Jehová. Xlikana talakaskin wi tuku nalimakgxtakgaw xlakata nakgalhiyaw kilhtamaku chu tlan natalakatsuwiniyaw Jehová.
8 Kalakpuwanti pi akgatunu kilhtamaku kaj akgtum hora xkgalhi xlakata tlan xlikgalhtawakga Biblia, xlilakapastakti chu xtlawani oración Jehová. ¿Ni xlikana pi lu xlakaskinka xakxilhwi chu ni xmastaw talakaskin pi wi tuku xtlawalh pi nialh xtachuwinaw kinTlatkan? ¡Lu tlan pi nichuna! Ni anan tiku natlawa pi nialh natachuwinanaw Jehová akxni lakaskinaw, lhuwa akinin tlan likgalhtawakgayaw xTachuwin. Pero ni kamastaw talakaskin pi xlakata lhuwa tuku tlawayaw natlawa pi nialh nakgalhiyaw kilhtamaku nema limaxtuyaw natachuwinanaw Dios. ¿Limaxtuyaw kilhtamaku xlakata tlan nalakgtalakatsuwiyaw?
«Ntapaxuwan ntu mastay spiritu santo»
9. ¿Tuku tlan xlichuwinaw xlakata tapaxuwan nema kinkamaxkiyan espíritu santo?
9 Putum tayat nema matlawinan espíritu santo ni lakgsputa maski naʼanan lhuwa taʼakglhuwit. Xlipulaktiy tuku matlawinan espíritu santo nema aku naʼakxilhaw: wa tapaxuwan. Xlikana, tapaxuwan la kgantum kiwi nema staka chu xana maski niku lu kaskakni. Lhuwa kstalaninanin Cristo «lhuwa tapatin ntikgalh[ikgolh] akxni ntimakgamaklhtinan[kgolh] ntachuwin» pero makgkatsikgolh «ntapaxuwan ntu mastay spiritu santo» (1 Tes. 1:6). La uku lhuwa titaxtumakgolh tuwa taʼakglhuwit chu ni kgalhikgo tumin. Pero Jehová limaklakaskin xʼespíritu santo xlakata nakalimatliwakglha chu “nalitayanikgo ntu nakaminini, chu napaxuwakgo” (Col. 1:11). Pero ¿la tlawa Jehová xlakata nakgalhiyaw tapaxuwan?
10. ¿La tlawa Jehová xlakata napaxuwayaw?
10 Wantuku masta xkakilhtamaku Satanás kaj watiya masta, «tumin wa ntu nkaj xalan nalakgsputa», pero tuku kinkamaxkiyan Dios xlakata takanajla nikxni katisputli (1 Tim. 6:17; Mat. 6:19, 20). Jehová tlawa pi lu napaxuwayaw akxni kinkawaniyan pi tlan xliputum kilhtamaku nalatamayaw. Na tlawa pi napaxuwayaw akxni kinkamaxkiyan talakaskin namakgtapakgsiyaw kxkachikin nema wi xlikalanka kakilhtamaku. Tlakg lipaxuwayaw akxni katsiyaw pi tlan talalinaw. Makgkatsiyaw chuna la David, akxni xputsastalanimaka chuna kilhtlinilh Jehová: «Porque tlakg liwaka klakgati mintalakgalhaman [nixawa] kilatamat. ¡Oh Dios, snun naklikgalhchiwinan mililanka! Chu jee nakpaxkatlikatsiniyan nak wakg kilhtamakuj» (Sal. 63:3, 4). Chuna la akxilhaw maski titaxtumaw lhuwa taʼakglhuwit tlan xatapaxuwan kilhtliniyaw Dios.
11. ¿Tuku xlakata lu xlakaskinka napaxuwayaw akxni kakninaniyaw Dios?
11 Apóstol Pablo uma tuku kawani putum kstalaninanin Cristo: «Xaliʼankgalhin kapaxuwatit xpalakata nkimPuchinakan, na amakgtum kkawaniyan mpi kapaxuwatit» (Fili. 4:4). ¿Tuku xlakata lu xlakaskinka napaxuwayaw akxni kakninaniyaw Jehová? Xlakata chuna limasiyayaw pi tatayayaw pi wa lakgchan namapakgsinan xlikalanka kakilhtamaku. Kalakapastakwi pi Satanás wan pi niti xatapaxuwan kgalhakgaxmata Dios (Job 1:9-11). Wa xlakata, komo kakninaniyaw Dios kaj xlakata chuna kilitlawatkan chu ni xatapaxuwan, ni xatakgatsin skujnanimaw. Wa xlakata tlawayaw chuna la wa salmista: «Lipaxaw kalakgachixkuwitit Kimapakgsinakan; katantit nak ixlakatin kun tapaxawan» (Sal. 100:2). Xlikana xlakata namalankiyaw Dios talakaskin xatapaxuwan chu lu naskujnaniputunaw.
12, 13. ¿Tuku tlan natlawayaw akxni kgalhiyaw ni xatlan talakapastakni?
12 Pero na liwana kililakapastakatkan pi min kilhtamaku asta xlakskujni Jehová wi tuku lilipuwanaw akxni chuna titaxtuyaw talakaskin naliskujaw xlakata xatapaxuwan nalatamayaw (Fili. 2:25-30). ¿Tuku kinkamakgtayayan akxni chuna titaxtuyaw? Namakgantaxtiyaw tuku wan Efesios 5:18, 19: «Wa nkalitaxajtit Spíritu. Akxni nakgalhchuwinanatit, nalitliyatit xtachuwin Dios, chu ntatlin xla lipaxkatsinit, chu ntatlin ntu masiyuy Spíritu Santo, xlipaks minakukan nalitliniyatit, chu nalimaxkiyatit nkakni nkimPuchinakan». ¿La tlan namakgantaxtiyaw uma tastakyaw?
13 Akxni ni tlan makgkatsiyaw katlawaniw oración Dios chu kalilakapastakwi tuku matliwakglhnan chu tuku laktlan (kalikgalhtawakga Filipenses 4:6-9). Makgapitsi tlakg tlan makgkatsikgo akxni kgaxmatkgo takilhtlin nema kilhtlikan ktamakxtumit chu likilhtlikgo. Chatum tala xmakgkatsi pi nila tuku xtlawa chu nitlan xmakgkatsi xlakata xkgalhi akgtum lanka taʼakglhuwit. ¿Tuku xmakgtaya? Xla wan: «Makglhuwa xaktlawa oración chu kkatsinilh makgapitsi takilhtlin. Lu tlan xaklimakgkatsi akxni xakkilhtlini Jehová umakgolh lu lakstlan takilhtlin maski ni xtakgaxmata. Akxni ama kilhtamaku mastaka libro Acerquémonos a Jehová. Akgtum kata makgtiy klikgalhtawakgalh uma libro. Uma xtlawa pi lu tlan xaklimakgkatsilh. Liwana kkatsi pi Jehová sikulunatlawalh putum tuku ktlawalh».
Tlan latalalinkan tlawa pi makxtum natawilayaw
14. ¿La liwana litasiya pi espíritu santo tlawa pi tlan nalatalalinaw?
14 Xalanka tamakxtumit xaʼakgtati kilhtamaku anta natalan lakchixkuwin chu lakpuskatin lu tlan latalalin maski tanu tanu niku xalanin. Xlakata chuna la lalikatsini litasiya pi xkachikin Dios lu tlan latalalin. Latamanin lu kaks lilakawankgo akxni akxilhkgo pi lhuwa kstalaninanin Cristo maski minkgoyacha kkachikin nema ni laʼakxilhputunkgo, liskujmakgolh “ni tu nakalaktlawani wa ntu makxtum kalitlawanit Spiritu” (Efe. 4:3). Lu nila kanajlakan la lu tlan latalalin, xlakata lhuwa natalan liskujkgolh xlakata nalapaxki.
15, 16. 1) ¿Tuku xlakata tuwa makgkatsilh Pedro nalakgpali la xkaʼakxilha tiku atanu xkachikin? 2) ¿La makgtayalh Jehová nalakgpali la xlakapastaka?
15 Lu tuwa pi tiku tanu tanu niku xalanin tlan nalatalalin. Xlakata naʼakgatekgsaw la xlituwa, naʼakxilhaw tuku akgspulalh apóstol Pedro kxapulana siglo. Pulana, ¿la xkaʼakxilha tiku ni israelitas xwankgonit? Pedro wa: «Katsiyatit wixin, mpi wa nchatum judío, ni [...] lakxtum nata[lalin] atanuj chixku» tiku ni judío. Pero alistalh na wa: «Wa mpi kimasiyuninit nchu Dios, mpi tini chatum nchixku mpala naklimapakuwiy mpi ni liʼukxilhputu, su lixkajnit» (Hech. 10:24-29; 11:1-3). Uma limasiya pi akxni aktsinajku xwanit masiyanika chuna la amakgapitsi israelitas, xlakata Limapakgsin xwan pi kaj xpaxkikgolh tiku na judíos xwankgonit. Max pulana xlakpuwan pi tlan xtalamakgasitsin xkaʼakxilhka tiku ni judíos. *
16 Kaj kalakpuwanti la max nitlan makglhkatsilh Pedro akxni tanulh xchik Cornelio. Xlakata lhuwa kilhtamaku xlaksakpaxkinanit, ¿“tlan akxtum xkatatawilakgolh” latamanin chu “makxtum xkalitlawalh Spiritu”? (Efe. 4:3, 16). Tlan katalalilh, xlakata nina makgas kilhtamaku xtitaxtunit lakgpalilh la xkaʼakxilha tiku xala alakatanu kachikinin. ¿Tuku makgtayalh? Espíritu santo chu Jehová wi tuku limaʼakxilhnilh xlakata nialh xakxilhli pi makgapitsi tlakg tlan chu amakgapitsin ni tlan kaj xlakata atanu xkachikin (Hech. 10:10-15). Wa xlakata wanilh Cornelio: «Dios, ni [laksakpaxkinan] [...]; wampi kaxani kawa xala, wanti mpikuaniy Dios, chu na wa ntu xlilat ntu ntlaway, tlan tlaway» (Hech. 10:34, 35). Chuna la akxilhaw Pedro lakgpalilh xtalakapastakni nema makgtayalh tlan nakatalalin «xlipaks natalanin» (1 Ped. 2:17).
17. ¿Tuku xlakata ni naʼan xtachuna la latalalin xkachikin Dios?
17 Tuku tlawalh Pedro liwana limasiya tuku tlawamakgolh la uku lhuwa kstalaninanin Cristo (kalikgalhtawakga Isaías 2:3, 4). Lhuwa lakchixkuwin chu lakpuskatin tiku xala «tanu tanu kachikinin, laklanka kachikinin chu tanu tanu tachuwin» nachuna lakapastakkgo chuna la «xatlan, chu lilakgatit, chu xalakatanks xtalakaskin Dios» (Apo. 7:9, NM; Rom. 12:2). Lhuwa xlikatsikgo chuna la lakapastakkgo kakilhtamaku, tiku ni laʼakxilhputunkgo, ni latalalinkgo chu lamakgasitsikgo. Pero xlakata likgalhtawakgakgo Biblia chu espíritu santo kamakgtaya, putsakgo «tuku makgtayanan tlan nalatalalinaw» (Rom. 14:19, NM). Wa xlakata tlan latalalinkgo chu uma malanki Jehová.
18, 19. 1) ¿Tuku tlan natlawayaw xlakata ni naʼanan taʼakglhuwit chu tlan nalatalalinaw kcongregación? 2) ¿Tuku naʼakxilhaw kʼartículo nema aku mima?
18 ¿Tuku tlan natlawayaw xlakata ni naʼanan taʼakglhuwit chu tlan nalatalalinaw kxkachikin Jehová? Lhuwa congregaciones wilakgolh natalan tiku alakatanu niku xalanin chu katsinimakgolh Liputsan
onaco. Min kilhtamaku tanu la lakpuwankgo chu ni lu liwana chuwinankgo kintachuwinkan. ¿Katalakatsuwiniyaw chu katachuwinanaw? Wa uma tuku Biblia kinkawaniyan natlawayaw. Carta nema Pablo kamalakgachanilh congregación xalak Roma anta xʼanan judíos chu tiku ni judíos xwankgonit xla kawanilh: «Kalamakgamakglhtinantit nchatunu amakgapitsin xtachuna lantla nCristo, kintikamakgamakglhtinan, lakimpi chuna nalikgalhiy nkakni Dios» (Rom. 15:7). ¿Wi chatum tala kkincongregacionkan nema tlakg lakgapasputunaw?
19 Wa xlakata, ¿tuku na kilitlawatkan xlakata espíritu santo napulalin kilatamatkan? Kʼartículo nema aku mima naʼakxilhaw xlakata uma chu amakgapitsi xtatlaw espíritu santo.
[Notas nema wilakgo kpágina]
^ párr. 3 Xtatlaw espíritu santo nema lichuwinalh Jesús «xatawakat» nawatiya «nkintachuwinkan ntu limaxkiyaw nkakni [...] Dios» akxni anaw lichuwinanaw xTamapakgsin (Heb. 13:15).
^ párr. 15 Levítico 19:18 wan: «Ni namalakgaxokgeya, na ni nakasitsiniya xkamanan xalak minkachikin; chu napaxkiya mintalataman xtachuna la paxkikana». Wantiku xpulalinkgo takanajla xwankgo pi tachuwin «mintalataman» na watiya xwamputun «xkamanan xalak minkachikin» chu xlakpuwankgo pi kajwatiya judíos xkapaxkikgolh. Maski Limapakgsin xwan pi israelitas ni xtalalinkgolh amakgapitsi kachikinin. Pero ni xwan ni nakaʼakxilhputunkgo tiku ni judíos xwankgonit chuna la xmasiyakgo tiku xpulalinkgo takanajla kxapulana siglo.
¿La xkgalhtinaw?
• ¿La kalimasiyaniyaw pi lu xlikana kapaxkiyaw natalan?
• ¿Tuku xlakata lu xlakaskinka napaxuwayaw akxni kakninaniyaw Jehová?
• ¿Tuku tlan natlawayaw xlakata ni naʼanan taʼakglhuwit chu tlan nalatalalinaw kcongregación?
[Takgalhskinin]
[Epígrafe xla página 24]
«Wa umakgolh xaxlikana kstalaninanin Cristo»
Maktum libro nema lichuwinan la xtatayananin Jehová ni lamakgxtakgkgolh akxni xmapakgsinankgo Nazis, wan tuku akxilhli chatum kgawasa judío akxni chalh kpulachin xalak Neuengamme akxni kalakgapasli kstalaninanin Cristo:
«Akxni akinin judíos xalak Dachau kinkatamaknukan kpulachin, amakgapitsi judíos matsekgkgolh tuku xkgalhikgo xlakata ni xkinkatawakgon. [...] Akxni nina xkinkatamaknukanan [kpulachin] xaklamakgtayayaw, chu akxni kinkatamaknukan, chatunu chatunu kajwatiya xaklakgmaxtuputunaw kilatamatkan chu nialh xaklapastakaw amakgapitsin. Pero ¿tuku xtlawakgo tiku xLikgalhtawakgananin Biblia ama kilhtamaku? Lhuwa xkamaskujumaka nakaxtlawakgo tubos niku an chuchut. Lu xlonkgnan chu tantaku xlakgtajukgo lu xakgawiwi chuchut. Niti xakgatekgsa la tlan xtayanikgo. Xlakan xwankgo pi wa Jehová xkamaxki litliwakga. Nachuna kxtsiknimakgolh. Maski chuna, ¿tuku xtlawakgo? Xmastokgwilikgo kaxtalanchu nema xkgalhikgo, kaj itat xtiyakgo chu nema xaʼakgataxtu xkamaxkikgo xnatalankan xalak Dachau tiku kajku xchimakgolh. Lu tlan xkamakgamakglhtinankgo chu xkalakatsukkgo, o xkalakasputa. Akxni nina xwayankgo xtlawakgo akgtum oración. Alistalh lu xpaxuwakgo chu xkgalhkgaskgonit xtasiyakgo. Xwankgo pi nialh xtsinkskgo. Chu akxni ama kilhtamaku klakpuwa: “Wa umakgolh xaxlikana kstalaninanin Cristo”.» (Between Resistance and Martyrdom—Jehovahʼs Witnesses in the Third Reich [Entre la resistencia y el martirio: los testigos de Jehová durante el Tercer Reich].)
[Dibujo xla página 23]
¿Wi tuku tlan nalimakgxtakgaw xlakata chali chali tlakg natalakatsuwiniyaw Jehová?
