Familias tiku kstalaninanin Cristo, kuenta katlawatit

«Wixin, [skgalalh] katawilatit, xampi akxni yama hora, ni kgalhkgalhipatit akxni namin Xkam nchixku.» (LUC. 12:40)

1, 2. ¿Tuku xlakata lu xlakaskinka naʼakxilhaw uma xtastakyaw Jesús: «Wixin, [skgalalh] katawilatit»?

¿TUKU naʼakgspula kifamiliajkan akxni Jesús «natawilay kxlaktawilh xlitlanka xpumapakgsin» chu «na namapapitsikgoy nchatunu amakgapitsin»? (Mat. 25:31, 32.) Xlakata ni katsiyaw akxni namin Jesús, talakaskin lu xlakaskinka naʼakxilhaw uma xtastakyaw: «Wixin, [skgalalh] katawilatit» (Luc. 12:40).

² Artículo nema akxilhwi, talichuwinalh pi xlakata familias skgalalh natawilakgo chu tliwakga natawila xtakanajlakan talakaskin pi chatunu chatunu namakgantaxtikgo tuku kalakgayawakanit. La uku naʼakxilhaw la tlan chatunu chatunu tlan namakgtayanan xlakata tlan natawila xtakanajla familia.

«Tlan» kakgalhiw kilakgastapukan

3, 4. 1) ¿Tuku kuenta xlitlawatkan familias tiku kstalaninanin Cristo? 2) ¿Tuku wamputun «tlan» nakgalhiyaw kilakgastapukan?

³ Komo lakaskinaw pi kifamiliajkan skgalalh natawila akxni namin Cristo, ni kilimastatkan talakaskin wi tuku natlawa nialh liwana naskujniyaw Jehová, lu skgalalh kilitawilatkan. Makgapitsi familias nialh liwana skujnanimakgolh Dios xlakata lhuwa tuku kgalhiputunkgo. Wa xlakata lu kinkamakgtayayan xtastakyaw Jesús niku kinkawaniyan pi «tlan» nakgalhiyaw kilakgastapukan  (kalikgalhtawakga Mateo 6:22, 23). Chuna la akgtum lámpara kinkamakgtayayan naʼakxilhaw akxni kapukswa chu ni nalhtujaw, nachuna tlan natamalakxtumiyaw xtachuna la kinakujkan xkgalhilh xlakgastapu, tlan nakinkapulalinan chu nakinkamakgtayayan ni naʼakgtsankgayaw la nalinaw kkilatamatkan (Efe. 1:18).

⁴ Xlakata liwana naliʼakxilhnanaw kilakgastapukan talakaskin tlan natawila chu liwana naʼakxilhaw tuku anan. Na xtachuna nema litaxtu xlakgastapu kinakujkan. Tlan natawila kilakgastapukan wamputun pi namakgantaxtiyaw tuku lakapastaknitaw natlawayaw. Kilhchanima naskujnaniputunaw Dios chu nikaj nalatamayaw xlakata lhuwa tuku nakgalhiyaw o kaj xlakata nakamaxkiyaw tuku maklakaskinkgo kifamiliajkan (Mat. 6:33). Wamputun pi nalipaxtikatsiniyaw tuku kgalhiyaw chu tlakg xlakaskinka kiliʼakxilhatkan naskujnaniyaw Dios (Heb. 13:5).

5. ¿La limasiyalh chatum tsumat xalak Etiopía pi liwana xlakapastaknit naskujni Dios?

⁵ Lu tlan kitaxtu akxni kamasiyanikan lakkamanan nakgalhikgo tlan xlakgastapukan. Kalichuwinaw akgtum liʼakxilhtit. Chatum tsumat xalak Etiopía akxni makgasputulh xtakgalhtawakga xlakata lu tlan calificaciones maxtulh xmaxkiputunkan akgtum beca xlakata tlakg xkgalhtawakgalh. Pero ni makglhtinamputulh, xlakata liwana xlakapastaknit tlakg naskujnani Jehová. Titaxtulh kilhtamaku xmaxkiputunkan akgtum taskujut niku xtlajalh 3,000 euros, max 48,000 pesos akgatunu papaʼ, lu lhuwa tumin, xlakata kxkachikin nichuna tlajakgo amakgapitsin. Ni makglhtinalh taskujut xlakata liwana xlakapastaknit precursora nawan. Chu ni talakaskilh nakakgalhskin xnatlatni komo xmakglhtinalh taskujut. ¿Tuku wankgolh xnatlatni akxni katsikgolh tuku tlawalh? Lu lipaxuwakgolh chu wanikgolh pi kamakgapaxuwalh xlakata chuna tlawalh.

6, 7. ¿Tuku xlakata lu “kuenta kilitlawatkan”?

⁶ Anta kMateo 6:22, 23 Jesús kinkamaxkiyan akgtum tastakyaw xlakata ni lhuwa tuku nakgalhiputunaw. Tachuwin «nitlan» lakgastapu, na wamputun lakgkatsaninan, uma wamputun putum xla tlawaputun chu lhuwa tuku kgalhiputun (Mat. 6:23). ¿Chu la akxilha Jehová tiku putum xla tlawaputun? Biblia wan: «Talakgxtumit nema ni xlitatlawat, chu tuku xalixkajni, o lhuwa tuku kgalhiputunkan, nipara tsinu kalichuwinantit» (Efe. 5:3, NM; nota).

⁷ Lakapala akxilhaw akxni wi tiku lhuwa tuku kgalhiputun, pero ni akxilhaw akxni akinin chuna wilaw. Wa xlakata tlan namakgantaxtiyaw xtastakyaw Jesús: «Lhuwa kuintaj katlawatit ni tiʼakgtsankgayatit, chu nalakgatiyatit nakgalhiputunatit [...] lhuwa tumin» (Luc. 12:15; Hua Xasasti Talaccaxlan, TXS, 1999). Talakaskin liwana naʼakxilhaw tuku wi kkinakujkan. Putum familias liwana xliʼakxilhatkan la xlilhuwa kilhtamaku chu tumin limaxtukgo xlakata nalilakgastanankgo chu natamawakgo tuku lakaskinkgo.

8. ¿Tuku kilitlawatkan xlakata “kuentaj natlawayaw” akxni tamawananaw?

⁸ Akxni wi tuku natamawayaw nikaj naʼakxilhaw komo tlan xokgoyaw. Wi atanu tuku na kuenta kilitlawatkan. Katlawaw uma takgalhskinin: «¿Nak kgalhi kilhtamaku xlakata naklimaklakaskin chu nakkuentajtlawa? ¿Lhuwa kilhtamaku naklimaxtu xlakata nakatsini nakmaklakaskin?». Nachuna lakgkgawasan xlitlawatkan uma takgalhskinin: «¿Ni lhuwa tuku kskin o kkanajla tuku wan televisión chu kaj kkaskini kinatlatni nakintamawanikgo tuku lu tapalaxla?». Xlikana putum xalak familia xlilakpuwanatkan uma: «Komo wi tuku naktamawa, ¿naklimakgtaya kifamilia xlakata skgalalh natawila akxni namin xKgawasa Chixku?». Putum kilhtamaku kalipawaw Jehová, xla wan: «Ni lhtuj kaktimakgaxtakgni, na ni kaktimakgaxtakgni» (Heb. 13:5).

 Kalakkaxwiliw naskujnaniyaw Dios

9. ¿La litamakgtayakgo familias akxni lakkaxwilikgo naskujnanikgo Dios?

⁹ Atanu tuku na tlan nalimatliwakglhkgo xtakanajlakan familias wa nalakkaxwilikgo wi tuku lu tlan natlawakgo chu naliskujkgo xlakata namakgantaxtikgo. Uma nakamakgtayayan naʼakxilhatit la skujnanipatit Jehová chu naʼakxilhatit tuku tlakg xlakaskinka militlawatkan (kalikgalhtawakga Filipenses 1:10).

10, 11. ¿Tuku lakkaxwilinitantit natlawayatit kmifamilia chu tuku lakpuwanatit pi tlan natlawayatit alistalh?

¹⁰ Asta tuku ni lu xlakaskinka nalakkaxwiliyatit natlawayatit lu nakamakgtayayan komo putum familia makgtayanankgo. Pulaktum wa makxtum nalikgalhtawakgayatit texto xala chali chali. Tuku nakgalhtinankgo chatunu chatunu namakgtaya xatlat naʼakxilha la tatliwakglhma xtakanajlakan. Na lu makgtayanan akxni familia akxtum likgalhtawakgakgo Biblia, xlakata kamanan tlan tlakg nakatsinikgo kgalhtawakgakgo chu tlakg naʼakgatekgsnikgo o natamakgachakgxi Biblia (Sal. 1:1, 2). Na tlan xwa tlakg liwana natlawayaw kiʼoracioneskan. Nachuna tlan naliskujaw xlakata nakgalhiyaw tayat nema masta espíritu santo (Gál. 5:22, 23). Atanu tuku na tlan natlawayaw wa nakalakgalhamanaw tiku kalitachuwinanaw Dios. Chuna nakamasiyaniyaw kinkamankan tlakg nalakgalhamanankgo chu max asta precursores o misioneros nawamputunkgo.

¹¹ ¿Tuku na tlan nalakkaxwiliyatit natlawayatit? ¿Tlan tlakg lhuwa kilhtamaku nalimaxtuya xlakata nalichuwinana Dios? ¿Tlan xliskujti xlakata nialh xpekuanti akxni nalichuwinan Dios kteléfono, ktiji chu knegocios?  ¿Tlan xmakgtayananti niku tlakg talakaskin tiku nalichuwinankgo xTamapakgsin Dios? ¿Tlan chatum xalak mifamilia nakatsini atanu tachuwin xlakata nakamasiyani xlakata Dios tiku tanu chuwinankgo?

12. ¿La tlan xatlat namatliwakglha xtakanajla xfamilia?

¹² Tlan xwa komo xatlat nalakpuwan tuku tlan nakalimakgtaya xfamilia tlakg tlan naskujnikgo Dios chu alistalh tlan nalakkaxwili tuku xlitlawatkan pero xliʼakxilhat komo tlan namakgantaxtikgo (Pro. 13:12). Xlikana, tuku lu tlan lakkaxwiliyaw natlawayaw, lin lhuwa kilhtamaku. Wa xlakata max natalakaskin nialh lhuwa horas nalimaxtuyaw naʼakxilhaw televisión wata nalimaklakaskinaw naliskujnaniyaw Dios (Efe. 5:15, 16). Akxni naliskujatit, nakamakgtayayan namakgantaxtiyatit tuku lakxkaxwilinitantit natlawayatit (Gál. 6:9). Chuna amakgapitsin «naʼuxilhkgoy lantla nalitaliwakay[...]» xtakanajla mifamilia (1 Tim. 4:15).

Akgatunu semana kakakninaniw Dios kfamilia

13. ¿Tuku talakgpalilh xlakata la xtatlawa tamakxtumit akgatunu semana, chu tuku takgalhskinin tlan natlawayaw?

¹³ Kilhtamaku 1 xla enero kata 2009 lakgpalika la xʼama tatlawa tamakxtumit akgatunu semana, uma lu kamakgtayanit familias skgalalh natawilakgo akxni namin xKgawasa chixku. Tamakxtumit nema xtalilakgapasa niku Talikgalhtawakga maktum Libro tanu kilhtamaku xtlawakan, la uku akxtum tlawakan akxni matitaxtikan Niku Masiyakan xlakata la Lichuwinankan Dios chu Tamakxtumit xlakata xTaskujut Dios. Chuna putum familias tlan xmatliwakglhkgolh xtakanajlakan chu xlimaxtukgolh akgtum kilhtamaku akgatunu semana akxtum xkakninanikgolh Jehová. La uku xlakata liwakaya akgtiy kata titaxtunit, katlawaw umakgolh takgalhskinin: «¿Klimaklakaskima uma kilhtamaku xlakata nakkakninani Dios kfamilia o akstu kkgalhtawakgama? ¿Klitamakgtayama uma tuku lakkaxwililh xkachikin Jehová?».

14. 1) ¿Tuku xlakata kakninaniyaw Dios kfamilia chu kiʼakstukan kgalhtawakgayaw? 2) ¿Tuku xlakata lu xlakaskinka nalimaxtuyaw kilhtamaku xlakata nakgalhtawakgayaw?

¹⁴ Lakkaxwilika nakatakgalhtawakgayaw kifamiliajkan chu kiʼakstukan nakgalhtawakgayaw xlakata tlakg natalakatsuwiniyaw Dios (Sant. 4:8). Akxni limaxtuyaw kilhtamaku akgatunu semana xlakata tlakg nalakgapasaw Jehová chu xTachuwin, tlakg tlan talalinaw. Chu akxni tlakg tlan talalinaw tlakg paxkiyaw xliputum kinakujkan, kilatamatkan, kintalakapastaknikan chu kilitliwakgakan (Mar. 12:30). Nachuna tlakg kgalhakgaxmatputunaw chu likatsiputunaw la Jehová (Efe. 5:1). Wa xlakata lu xlakaskinka pi akgatunu semana nakakninaniyaw Dios kfamilia xlakata putum skgalalh natawilayaw akxni nachin lanka «takatsanajwat» (Mat. 24:21). Lu xlakaskinka chuna natlawayaw xlakata tlan nalakgtaxtuyaw.

15. ¿La makgtayanan Kakninanikan Dios kFamilia xlakata tlakg tlan nalatalalin familia?

¹⁵ Xlipulaktiy tuku xlakata lilakkaxwilika Kakninanikan Dios kFamilia: tlakg tlan nalatalalinkgo familia. Akxni limaxtukgo kilhtamaku akgatunu semana akxtum natawilakgo xlakata nalichuwinankgo Dios lu makgtayanan tlakg tlan nalatalalin. Akgtum liʼakxilhtit, tiku tamakgaxtokgkgonit tlakg tlan latalalin akxni lu lipaxuwakgo xlakata akgatekgskgo tuku lu xalaktuwa xlakata Dios (kalikgalhtawakga Eclesiastés 4:12). Nachuna xanatlatni chu kamanan tiku akxtum kakninanikgo Jehová tlakg tlan latalalin xlakata lapaxkikgo chu uma tlawa «xlikana makxtum» natawilakgo (Col. 3:14, TXS, 1999).

16. ¿La kamakgtayanit chatutu natalan tiku tamakxtumikgo akgatunu semana xlakata nalikgalhtawakgakgo Biblia?

¹⁶ Kalichuwinaw chatutu natalan tiku  nikgonitta xchixkukan chu linkgoya kata la litamakgtayakgonit uma tuku aku talakkaxwililh. Umakgolh natalan akglhuwata kata lu tlan latalalinkgo. Xlakata watiya kachikin wilakgolh, tlakg lhuwa kilhtamaku akxtum xtawilaputunkgo, pero ni kaj xlakata xkgalhchuwinankgolh na xlalitachuwinamputunkgo xlakata Dios. Wa xlakata lakkaxwilikgolh pi akgatunu semana xʼamakgolh tamakxtumikgo akgtum katsisni xlakata nalikgalhtawakgakgo Biblia. Tsukukgolh likgalhtawakgakgo libro “Testimonio cabal” del Reino de Dios. Chatum wan: «Lu klakgatiyaw, wa xlakata liwaka akgtum hora kkgalhtawakgayaw. Klilakpuwanaw tukuya taʼakglhuwit xkgalhikgo natalan xalak pulana siglo chu klichuwinanaw tuku xaktlawaw komo akinin nachuna xaktitaxtuw. Alistalh, tuku kkatsiniyaw klimaklakaskinaw akxni kanaw lichuwinanaw Dios. Xlakata chuna ktlawayaw tlakg klipaxuwayaw akxni kanaw lichuwinanaw Dios chu kkamasiyaniyaw latamanin». Pero ni kaj kamakgtayanit xlakata tlakg tlan natawila xtakanajlakan, na kamakgtayanit tlakg tlan nalatalalin. Xlakan wankgo: «Lu xlakaskinka kakxilhaw akxni ktamakxtumiyaw xlakata nakgalhtawakgayaw».

17. ¿Tuku makgtayanan xlakata tlan nakinkakitaxtuniyan akxni Kakninanikan Dios kFamilia?

¹⁷ ¿La kinkamakgtayanitan akinin xlakata limaxtuyaw kilhtamaku nakakninaniyaw Dios kfamilia chu kiakstukan nakgalhtawakgayaw? Komo kaj akxni nakgalhiyaw kilhtamaku natlawayaw ni kintikamakgtayan. Na ni kilimastatkan talakaskin pi tuku ni lu xlakaskinka natlawa pi nialh natamakxtumiyaw. Putum tiku xalak familia xlitawilatkan hora nema talakkaxwilinit. Na natalakaskin nalaksakaw tuku nalikgalhtawakgayaw nema nakamakgtaya familia. ¿Tuku tlan natlawayaw xlakata putum napaxuwakgo? Nakatsiniyaw pulaklhuwa la liwana nakamasiyaniyaw chu ni kaj nalamakglhuwiyaw chu nalamaxkiyaw kakni (Sant. 3:18). *

«Skgalalh natawilayaw»

18, 19. ¿La namakgtayayan wix chu mifamilia xlakata katsiya pi nialh makgas namin xKgawasa chixku?

¹⁸ Tuku lu nitlan titaxtuma kakilhtamaku limasiya pi nialh makgas namasputukan xalixkajni xkakilhtamaku Satanás chuna tsukulh tasiya kata 1914. Lhuwa tuku litasiya pi talakatsuwinita Armagedón. Nialh makgas Jehová namakamin Jesús xlakata nakamalakgsputu lakgalhinanin (Sal. 37:10; Pro. 2:21, 22). Xlakata katsiyaw uma, nakinkamakgtayayan chu nakamakgtaya kifamiliajkan.

¹⁹ ¿Makgantaxtipat xtastakyaw Jesús niku wan pi «tlan» nakgalhiyaw kilakgastapukan? Latamanin xalak kakilhtamaku lakaskinkgo lhuwa kakalakgapaska, mapakgsinamputunkgo chu kgalhiputunkgo tumin, pero wix chu mifamilia, ¿lakkaxwilipatit la tlakg tlan naskujnaniyatit Dios? ¿Liwana kakninanipatit Dios kfamilia o miakstu kgalhtawakgapat? ¿Makgantaxtipat tuku xlakkaxwilinita natlawaya? Chuna la talichuwinalh kʼartículo nema akxilhwa, ¿makgtayanampat xlakata mi familia skgalalh natawila chu makgantaxtipat tuku Dios lakgayawanitan? (1 Tes. 5:6.) Komo chuna tlawapat, mifamilia skgalalh natawila akxni namin xKgawasa chixku.

[Notas nema wilakgo kpágina]

¿Lakapastaka?

• ¿La kamakgtaya familias uma xlakata skgalalh natawilakgo?

«Tlan» nakgalhikgo xlakgastapukan

Nalakkaxwilikgo tlakg naskujnanikgo Dios

Nakakninanikgo Dios kfamilia

[Takgalhskinin]

[Epígrafe xla página 16]

«Tlan» lakgastapu nakinkamakgtayayan ni nalakgatiyaw tuku xalak kakilhtamaku