Familias tiku kstalaninanin Cristo skgalalh katawilatit
Familias tiku kstalaninanin Cristo skgalalh katawilatit
«Ni nalhtatayatit lantla amakgapitsin; [...] wampi skgalalh natawilayaw.» (1 TES. 5:6)
1, 2. ¿Tuku talakaskin xlakata familias tiku kstalaninanin Cristo skgalalh natawilakgo?
AKXNI lichuwinalh «akxni namin xalanka xkilhtamaku Jehová nema lu makgapekuanan», apóstol Pablo kawanilh kstalaninanin Cristo xalak Tesalónica: «Wixin natalanin, ni kapakglhtuta [o kapukswa] lapatit mpala kaj ni katikatsitit nakalakgchinan xtachuna nkgalhana akxni yama nkilhtamaku. Xampi paks xala kaxkgakgana wixin, chu na wa xala kakuwini wixin; ni wa ntsisni ntapakgsiniyaw nkin». Alistalh apóstol na wa: «Ni nalhtatayatit lantla amakgapitsin; [...] wampi skgalalh natawilayaw» (Joel 2:31; 1 Tes. 5:4-6).
2 Tachuwin nema katsokgnanilh natalan xalak Tesalónica na lu kinkamakgtayakgoyan tiku lamaw la uku «xlikgalhsputat kilhtamaku» (Dan. 12:4). Xlikana lu kuenta kilitlawatkan chu skgalalh kilitawilatkan. ¿Tuku xlakata? Xlakata xlisputni uma xalixkajni kakilhtamaku lakatsu wi chu Satanás lu tlawaputun pi kstalaninanin Cristo nialh kaskujnikgolh Dios. ¿Tuku tlan natlawakgo familias tiku kstalaninanin Cristo xlakata ni namakgxtakgkgo Dios? Talakaskin pi chatunu chatunu namakgantaxtikgo tuku kalakgayawanit Jehová. Kaʼakxilhwi la tlan namakgtayanankgo xachixku, xapuskat chu lakkamanan xlakata putum familia skgalalh natawilakgo.
Lakchixkuwin, nachuna katlawatit la «xatlan mapuchwanina»
3. Chuna la wan 1 Timoteo 5:8, ¿tuku talakaskin natlawa tiku pulalin akgtum familia?
3 Biblia wan pi «wa nchixku, na wa xpuxku mpuskat» (1 Cor. 11:3). ¿Tuku xlitlawat xachixku xlakata tlan napulalin xfamilia? Biblia wan tuku xlitlawat: «Lapi winti ni kuintaj tlaway[...], na tlakg xaliwaka wanti xala kxchik, kaj likgamananit xtakanajla, na tlakg xaliwaka nitlan xtayat, ni xawa ntini kanajlay» (1 Tim. 5:8). Xlikana, talakaskin pi xatlat nakakuentajtlawa xfamilia. Pero ni kajwatiya talakaskin nakamaxki tuku lakaskinkgo. Komo lakaskin pi putum xfamilia skgalalh natawilakgo, nakamakgtaya xlakata natatliwakglha xtakanajlakan chu tlan natalalinkgo Dios (Pro. 24:3, 4). ¿La tlan chuna natlawa?
4. ¿Tuku xlitlawat xachixku xlakata namatliwakglha xtakanajla xfamilia?
4 «Wa xchixku mpuskat, wa xpuxku mpuskat, xtachuna lantla nCristo, xpuxkukan nkgamputum nkanajlanin» o congregación. Wa xlakata xachixku xliʼakxilhat la Jesús pulalin congregación chu nachuna natlawa akxni napulalin xfamilia (Efe. 5:23). Kalilakapastakwi la Jesús tamalakxtumilh la xkatalalin kstalaninanin (kalikgalhtawakga Juan 10:14, 15). Jesús litaxtulh «xatlan mapuchwanina». Wa xlakata chixku tiku matliwakglhputun xtakanajla xfamilia xlikgalhtawakgat tuku wa chu tuku tlawalh Cristo chu “nastalani lantla ntlawanit” (1 Ped. 2:21).
5. ¿La xlilhuwa kalakgapasa congregación xaTlan Mapuchwanina?
5 Mapuchwanina chu borregos nema lichuwinaw tlan latalalinkgo xlakata lalakgapasa chu lalipawan. Mapuchwanina liwana kalakgapasa xborregos chu borregos na lakgapaskgo chu lipawankgo; wa xlakata kgalhlakgapaskgo chu kgalhakgaxmatkgo akxni chuwinan. Jesús wa: «Klakgapasa nkinkalhniluj [borregos], na kilakgapaskgoy». Jesús liwana kalakgapasa tiku xalak congregación. Tachuwin xagriego nema xatotonaco matitaxtikan «lakgapaskan» na wamputun akxni wi tuku «lu liwana lakgapasa». Xatlan Mapuchwanina liwana kalakgapasa chatunu chatunu xborregos: tuku lakaskinkgo, tuku lu tlan tlawakgo chu tuku nitlan tlawakgo. Putum akxilha. Nachuna borregos liwana lakgapaskgo xmapuchwanina chu lipawankgo la kapulalin.
6. ¿La tlan nachuna natlawa xachixku chuna la xaTlan xKuentajtlawana borregos?
6 ¿La tlan xachixku nalikatsini xfamilia chuna la Jesús? Nalitaxtu la chatum xmapuchwanina borregos chu xfamilia nakaliʼakxilha la laktsu borregos nema xlikuetajtlawat. Talakaskin liwana nakalakgapasa. ¿Tlan chuna natlawa? Tlan, pero talakaskin liwana nakatachuwinan chatunu chatunu chu nakakgaxmatni tukuya taʼakglhuwit kgalhikgo. Nachuna nakamaxki xatlan liʼakxilhtit chu liwana xlilakkaxwilit tuku natlawakgo chatunu chatunu, la akxni Kakninanikan Dios kFamilia, naʼankgo ktamakxtumit, nalichuwinankgo Dios chu tuku nalilakgastanankgo. Komo tuku lakkaxwili natlawakgo xfamilia takilhtinit kBiblia chu tuku katsinikgo chatunu chatunu, tlakg nalipawankgo chu nalipaxuwa xlakata makxtum naskujnanikgo Jehová.
7, 8. ¿La tlan xatlat nalimasiya pi paxkinan chuna la xaTlan Mapuchwanina?
7 Talakaskin nakalakgapasa xborregos, pero na talakaskin lu nakapaxki. ¿Tuku katsiniyaw akxni likgalhtawakgayaw la lilh xlatamat Jesús chu la skujnanilh Dios? Kaʼakxilhwi la lu tlan xkalikatsini kstalaninanin. Asta “palakamastalh xlatamat xkalhniluj” o xborregos. Xachixku tiku lakaskin tlan naʼakxilha Dios natlawa chuna la tlawalh Jesús chu lu nakapaxki xfamilia. Nitlan kaj namapakgsinanputun chu nitlan nalikatsini xpuskat, wata paxki «xtachuna lantla mpaxkilh nCristo nkgamputum nkanajlanin» (Efe. 5:25). Limasiyani pi paxki akxni tachuwinan chu tlan likatsini, xlakata minini namaxki kakni xpuskat (1 Ped. 3:7).
8 Akxni xatlat nakamasiyani xkamanan tastakyaw xalak Biblia, xaʼakgstitum nakawani pero nakalimasiyani pi kapaxki. Chuna xla, akxni nakastakyawakan na nakalimasiyanikan pi kapaxkikan. Wilakgolh kamanan tiku ni lakapala akgatekgskgo tuku talakaskin natlawakgo. Akxni xatlat chuna naʼakxilha, talakaskin ni tunkun nasitsi. Komo naliskuja xlakata natlawa chuna la Jesús, xfamilia tlan natawila, nalalipawan chu tlan natawila xtakanajlakan chuna la lichuwinalh salmista (kalikgalhtawakga Salmo 23:1-6).
9. Chuna la Noé, ¿tuku kalakgayawakanit lakchixkuwin tiku kstalaninanin Cristo chu tuku nakamakgtaya namakgantaxtikgo?
9 Chu kalilakapastakwi Noé, xlama akxni xʼamakaja malakgsputukan xamakgan kakilhtamaku chu lakgmaxtuka, «[Jehová] na timalakgtaxtilh nkgalhatujun amakgapitsin, timakamilh chi nchu munkaklat muxtukgolh wa nti lakgachixkuwimakgankgolh Dios» (2 Ped. 2:5). Xlakata Noé xpulalin xfamilia, xtalakaskin xkamakgtayalh xlakata xlakgtaxtukgolh Munkaklat o lanka sen. Watiya taskujut kalakgayawakanit natlatni xala uku (Mat. 24:37). ¿Tuku nakamakgtaya xlakata namakgantaxtikgo? Nalikgalhtawakgakgo la likatsilh xaTlan Mapuchwanina chu nachuna natlawakgo.
Lakpuskatin kalakkaxwilitit minchikkan
10. ¿Tuku kilhchanima limapakgsin: «lakchajan, kalakgachixkuwikgolh [...] xchixkukan»?
10 Apóstol Pablo tsokgli: «Wanti mpuchuwa lakchajan, kalakgachixkuwikgolh [...] xchixkukan, xtachuna lantla lakgachixkuwikgoy nkimPuchinakan» (Efe. 5:22). Uma limapakgsin ni wamputun pi kaj nitu kaliʼakxilhkan lakpuskatin. Akxni Jehová nina xtlawa xapulana puskat wa: «Nitlan xakstu nalatama chixku. Naktlawani xmakgtayana xlakata nalitakgatsi» (Gén. 2:18). Tachuwin makgtayana o tatakgatsin, wamputun pi xapuskat makgtaya xchixku xlakata tlan napulalin xfamilia, uma akgtum lu tlan taskujut.
11. ¿La «liwana lakkaxwilima xchiki» xaskgalala puskat?
11 Xatlan puskat makgtayanan xlakata tlan natawila xfamilia (kalikgalhtawakga Proverbios 14:1). Ni xtachuna la xatonto puskat nema lichuwinalh Salomón, xaskgalala puskat xlikana maxki kakni xchixku. Ni xakstu tapakgsiputun chuna la tiku xalak kakilhtamaku, wata masta talakaskin pi xchixku napulalin (Efe. 2:2). Puskat nema xatonto nitlan lichuwinan xchixku. Pero xaskgalala puskat makgtayanan xlakata xkamanan chu amakgapitsi latamanin namaxkikgo kakni. Nachuna, lu kuentajtlawa ni nalakatsala xlimapakgsin xchixku, ni lixkajni lichuwinan chu ni tataʼakglhuwi xchixku. ¿Chu la limaklakaskin tumin? Puskat nema xatonto kaj laktlawami tumin nema tuwa tlajakan. Pero xaskgalala puskat liwana lakapastaka chu makgtaya xchixku xlakata ni laktlawami tumin chu ni skini tlakg lhuwa kilhtamaku naskuja.
12. ¿Tuku tlan natlawa xapuskat xlakata skgalalh natawilakgo chu tliwakga natawila xtakanajlakan?
12 Xatlan puskat tiku kstalanina Cristo makgtaya xchixku xlakata nakamasiyanikgo xkamanan naskujnikgo Jehová, chuna makgtayanan xlakata xfamilia skgalalh natawila chu tliwakga natawila xtakanajlakan (Pro. 1:8). Makgtayanan xlakata nakakninanikgo Dios kfamilia. Nachuna akxni xchixku kastakyawa xkamanan, kgalhmakgtaya. ¡Xaskgalala puskat ni xtachuna la xatonto puskat nema lhuwa tuku nitlan katlawani xkamanan, ni kamakgtaya xlakata tliwakga natawila xtakanajlakan!
13. ¿Tuku xlakata lu xlakaskinka pi xapuskat namakgtaya xchixku xlakata namakgantaxti tuku lakgaya kcongregación?
13 ¿La limakgkatsi xatlan puskat akxni akxilha pi xchixku liwana skujma kcongregación? Lu lipaxuwa akxni akxilha pi kataskuja natalan, max akxni siervo ministerial o kgolotsin, akxni makgtayanan kComité de Enlace con los Hospitales, kʼakgtum Comité Regional de Construcción o atanu taskujut. Xlikana, maski tlakg naskuja, xatapaxuwan makgtaya xlakata katsi pi tlan nakitaxtu, komo xchixku lu skujnanima Dios, familia skgalalh chu tliwakga natawila xtakanajla.
14. 1) ¿Tuku max lu tuwa namakgkatsi puskat chu tuku namakgtaya? 2) ¿La tlan namakgtayanankgo lakpuskatin xlakata tlan natawila xfamilia?
14 Puskat max tuwa namakgkatsi namakgtaya xchixku akxni ni lu lakgati tuku tlawaputun. Maski chuna xapuskat «kakswa chu ni lakapara sitsi» chu makgtayanan xlakata tlan nakitaxtu tuku tlawa xchixku (1 Ped. 3:4, NM). Nachuna tlawa la tlawakgolh lakpuskatin xalamakgasa nema lu tlan kskujnikgo Dios, la Sara, Rut, Abigail chu María, xtse Jesús (1 Ped. 3:5, 6). Nachuna tlawa la natalan tiku linkgoya kata xala uku, tiku “lilatamakgo lantla xtalakaskin Dios” (Tito 2:3, 4). Akxni puskat paxki chu maxki kakni xchixku makgtayanan xlakata tlan natawila xtamakgaxtokgat, tlan natawila xfamilia, ni naʼanan taʼakglhuwit chu xatapaxuwan tawilakgo. Chatum chixku tiku lu liwana skujnani Jehová lhuwa xtapalh akxilha chatum puskat tiku chuna likatsi (Pro. 18:22).
Kamanan chuntiya xlakaskinka kaʼakxilhtit wantuku ni tasiya
15. ¿La tlan namakgtayakgo lakkamanan xnatlatni xlakata xfamilia skgalalh chu tliwakga natawila xtakanajla?
15 ¿La tlan nakamakgtayaya minatlatni xlakata mifamilia skgalalh chu tliwakga natawila xtakanajla? Kalilakapastakti tuku Jehová maxkiputunan. Max akxni aktsinajku xwanita minatlatni xmasiyanikgoyan dibujos nema tasiya la nawan Paraíso, chu chuna la staktilha limaklakaskinkgonit Biblia amakgapitsi libros xla kstalaninanin Cristo xlakata nakatsiya la nawan latamat nema ni kgalhi xlisputni kxasasti kakilhtamaku. Komo putum kilhtamaku nalakapastaka naskujniya Jehová chu wa tuku tlakg xlakaskinka naʼakxilha kmilatamat, tlakg ni tuwa skgalalh natawilaya.
16, 17. ¿Tuku tlan natlawakgo lakgkgawasan chu laktsuman xlakata namakglhtinankgo latamat?
16 Kamakgantaxti xtastakyaw apóstol Pablo nema wi 1 Corintios 9:24 (kalikgalhtawakga). Kakgosnanti xlakata tlan namaxkikana latamat nema ni kgalhi xlisputni. Kalaksakti tiji nema namakgtayayan namakglhtinana latamat nema ni kgalhi xlisputni. Lhuwa lakgkgawasan wata tsukukgo skujkgo xlakata lhuwa tumin nakgalhikgo. Pero uma nitlan. Nalatamayaw kaj xlakata nakgalhiyaw lhuwa tumin ni limin xaxlikana tapaxuwan. Nachuna, tuku kgalhiyaw kaj lakapala makgatsankgayaw. Tlakg tlan «nkuintaj natlawayaw wa [...] yuma ntu nkaj ni tasiyuj». ¿Tuku xlakata? Xlakata «xaliankgalhin naʼanan» o putum kilhtamaku natawila (2 Cor. 4:18).
17 «Ntu nkaj ni tasiyuj», kilhchanima tasikulunalin nema nakinkamaxkiyan xTamapakgsin Dios. Kalakkaxtlawa tuku natlawaya kmilatamat xlakata tlan namakglhtinana uma tasikulunalin. Komo xlikana paxuwaputuna, kalimaklakaskinti milatamat xlakata naskujniya Jehová. Lhuwa tuku tlan nalakkaxtlawaya natlawaya, tuku ni lhuwa kilhtamaku nalimakgantaxtiya chu tuku tlakg lhuwa kilhtamaku nalimakgantaxtiya. * Komo wa nalakkaxtlawiliya tuku tlan namakgantaxtiya tlan liwana naskujnaniya Dios, chu kaj watiya naʼakxilhlakachipina xlakata namakglhtinana latamat nema ni kgalhi xlisputni (1 Juan 2:17).
18, 19. ¿La likatsiyaw komo chatum kgawasa o tsumat paxki tuku xaxlikana?
18 Tuku pulana tlan natlawaya xlakata namakglhtinana latamat, wa napaxkiya tuku xaxlikana. ¿Chuntiya tlawapat? Akstu katlawanika umakgolh takgalhskinin: «¿Akxni kmakgtayanan kcongregación ktlawa xlakata akit chuna ktlawaputun o kaj xlakata kiskinikgo kinatlatni? ¿Kliskujma xlakata nakkgalhi tayat nema makgapaxuwa Dios? ¿Makglhuwa ktlawa oración, kkgalhtawakga, kan ktamakxtumit, klichuwinan Dios chu kmakgtayanan kcongregación? ¿Lu tlan ktalalin Jehová?» (Sant. 4:8).
19 Kalilakapastakti xliʼakxilhtit Moisés. Maski tanu tuku masiyanika nixawa tuku pulana xkatsininit, laksakli nalilakgapaskan xlakskujni Jehová chu ni xkgawasa xtsumat faraón (kalikgalhtawakga Hebreos 11:24-27). Wix nachuna militlawat komo liwana skujnaniputuna Jehová. Chuna tlakg tlan natawila milatamat, xlikana napaxuwaya chu tlan namakglhtinana «xaxlikana latamat» (1 Tim. 6:19).
20. ¿Tiku nakamaxkikan latamat nema ni kgalhi xlisputni?
20 Takgosni nema lichuwinalh Pablo kaj chatum tiku xtlajanan. Pero nakgosnanaw xlakata namakglhtinanaw latamat ni xtachuna. Dios lakaskin pi «paks naʼakgaputaxtukgoy, chu nalakgapaskgoy wa ntalulokgtat» o tuku xaxlikana (1 Tim. 2:3, 4). Lhuwa tiku tlajakgonita latamat chu la uku na wilakgolh tiku nachuna lu liskujmakgolh xlakata nakamaxkikan latamat chuna la wix (Heb. 12:1, 2). Nakamaxkikan latamat putum tiku ni natamakgxtakgkgo. Wix tlan namakglhtinana.
21. ¿Tuku naʼakxilhaw kʼartículo nema aku mima?
21 «Xalanka xkilhtamaku Jehová nema lu makgapekuanan» xlikana namin (Mal. 4:5). Familias tiku kstalaninanin Cristo skgalalh xlitawilatkan. Lu xlakaskinka pi chutunu chatunu namakgantaxti tuku Dios kalakgayawanit. Pero ¿wi atanu tuku kilitlawatkan xlakata skgalalh natawilayaw chu tlakg tlan natalalinaw Jehová? Wi. Kʼartículo nema aku mima natalichuwinan pulaktutu tuku kamakgtaya putum familia xlakata tliwakga natawila xtakanajlakan.
[Notas nema wilakgo kpágina]
^ párr. 17 Kaʼakxilhti revista Makatsinina 1 xla noviembre kata 2010, kpáginas 19 asta 23.
¿Lakapastaka uma?
• ¿Tuku xlakata lu xlakaskinka pi familias tiku kstalaninanin Cristo skgalalh xlitawilatkan?
• ¿La tlan xachixku nachuna natlawa la xaTlan Mapuchwanina?
• ¿La makgtaya xchixku xaskgalala puskat?
• ¿La tlan namakgtayanankgo kamanan xlakata xfamilia skgalalh natawila?
[Takgalhskinin]
[Epígrafe xla página 12]
Chixku tiku tlan skujnani Jehová lhuwa xtapalh akxilha puskat nema makgtayanan
