Jesús: xlakatsukut

«[Pilato] tanupa amakgtum kpumapakgsin, wanilh Jesús: “¿Ni kminkachikin wix?” Wampi ni kgalhtilh Jesús.» (JUAN 19:9)

MAPAKGSINA Poncio Pilato tlawanilh uma takgalhskinin akxni xlakputsananimaka xlakata xʼamaka makgnikan. Pero Pilato xkatsiya pi Jesús xalak Israel xwanit (Lucas 23:6, 7). Nachuna xʼakxilhnit pi ni kaj chatum chixku tiku nitu xlakgasi xwanit. Wa xlakata, ¿pi xlikana xkatsiputun komo Jesús xlamaja makgasa? ¿Xlikana uma mapakgsina xʼama kanajla xlakata la lakatsukulh Jesús chu xʼama tlawa tuku talakaskin? Ni katsiyaw. Pero Jesús ni kgalhtilh chu alistalh tasiyalh pi Pilato ni xkatsiputun tuku xaxlikana chu tuku xaʼakgstitum, wata xlakaskin xmakgtayaka xlakata chuntiyaku xmapakgsinalh (Mateo 27:11-26).

Pero wilakgolh tiku xlikana katsiputunkgo la lakatsukulh Jesús, xlakata chuna la naʼakxilhaw, kBiblia liwana kinkawaniyan.

▪ Niku lakachilh Lakachilh kBelén xalak Judea, kʼakgtum familia tiku ni lhuwa tuku xkgalhikgo. Xlakata mapakgsina César Augusto matlawinalh akgtum censo, José chu María ankgolh tatsokgtawilakgo kBelén xlakata xnatlatni José anta xala xwankgonit. María atsinu xtsankgani nalakachin kskgata chu kBelén ni tekgskgolh niku namakglhtatakgo, tamakgxtakgkgolh niku katamaknukan animales. Chu anta lakachilh Jesús (Lucas 2:1-7).

Akglhuwata siglos Biblia xlichuwinanita niku xʼama lakachin Jesús: «Wix Belén Efrata, nema tlakg xaʼaktsu xlilhuwa kachikinin nema anan kJudá, anta nalakachin tiku namapakgsinan kʼIsrael» (Miqueas 5:2). * Chuna la akxilhaw, uma aktsu kachikin ni xtaputlakgekan amakgapitsi kachikinin xalak Judá, xlakata lu aktsina xwanit. Maski chuna maxkika lanka talakgalhaman: anta xlakachilh Mesías nema xwankanit pi xʼama min (Mateo 2:3-6; Juan 7:40-42).

▪ Niku stakli Ni makgas kilhtamaku latamalh kʼEgipto. Pero akxni nina xmakgatsi akgtutu kata, ankgolh tawilakgo kNazaret, nema xtapakgsi kʼGalilea, max 100 kilómetros xlimakgat niku xwilacha Jerusalén. Kʼuma kachikin niku xwilakgolh tiku xchananankgo, xkuentajtlawakgo borregos chu xchipakgo skiti, o tamakgnin, anta stakli Jesús chu lanka xfamilia xwanit chu max ni lhuwa tuku xkgalhikgo (Mateo 13:55, 56).

Anta kBiblia na xtalichuwinanit pi Mesías na xʼamaka lilakgapaskan «Nazareno». Chu asta Mateo na lichuwinalh pi Jesús «ntitawilakgolh [...] ntani wanikan Nazaret», xlakata  xkgantaxtulh tuku xlichuwinankgonit palakachuwinanin, pi xʼama wanikan «Nazareno», uma tukuwani minitancha kʼakgtum tachuwin xahebreo nema wamputun “kgalhapu” (Mateo 2:19-23). Mateo xlichuwinama tuku xwanit Isaías, tiku xwanit pi Mesías xʼama litaxtu “xkgalhapu” Jesé, uma wamputun pi Jesús xfamilia xʼama wan Jesé, tiku xtlat mapakgsina David xwanit (Isaías 11:1). Chu chuna kitaxtulh: chuna la wan Biblia, Jesé chu David xfamilia Jesús litaxtukgolh (Mateo 1:6, 16; Lucas 3:23, 31, 32).

▪ Niku mincha Xtachuwin Dios masiya pi Jesús xlamaja akxni nina xlakachin kBelén. Tuku lichuwinalh palakachuwina Miqueas nema lichuwinawa wan: «Tiku makgasa lakatsukulh, tiku lu lhuwata kilhtamaku latamanit» (Miqueas 5:2). Jesús xapuxku xKgawasa Dios, chatum espíritu xwanit akxni nina xlakachin la chatum chixku unu Katiyatni. Jesús wa: «Kakgapun ktaktanitanchi» (Juan 6:38; 8:23). Pero ¿la chuna lalh?

Jehová limaklakaskilh xʼespíritu santo xlakata chuna xtlawalh. * Wililh xlatamat xKgawasa kxpan María, chatum tsumat xalak Judá tiku nina xkgalhi xchixku, xlakata xlakachilh la chixku pero ni xkgalhilh talakgalhin. Jehová ni tuwa chuna tlawalh. Chuna la wa ángel nema tachuwinalh María, «xampi wa Dios, nitu ananiy mpala tu ntuwa» (Lucas 1:30-35, 37).

Anta kBiblia tlakg kinkamasiniyan xlakata Jesús. Xlakata tuku tsokgkgolh Mateo, Marcos, Lucas chu Juan, tlan nakatsiyaw lhuwa tuku tlawalh kxlatamat.

[Notas nema wilakgo kpágina]