Jesús: xlatamat

«Wa nkiliwat, wa naktlaway xtalakaskin nti nkimalakgachalh, chu na nakmasputuy xtaskujut ntu nkimaxkinit.» (JUAN 4:34)

¿TUKU xwamputun Jesús akxni chuna wa? Tuku wankgo amakgapitsi textos nakinkamakgtayayan naʼakgatekgsaw. Tsisa akglhuwata horas xtlawani chu nachuna kstalaninanin xlakgstipan sipi xalak Samaria (Juan 4:6). Wa xlakata kstalaninanin lakpuwankgolh pi xmakgalhtawakgana xtsinksmaja chu kgalhskinkgolh komo wi tuku xwaputun (Juan 4:31-33). Jesús kakgalhtilh chuna la wan Juan 4:34, chu uma tuku wa limasiyalh tuku xtlawaputun kxlatamat. Natlawa tuku Dios xlimalakgachanit tlakg xlakaskinka xakxilha nixawa nawayan. Tuku xwan chu tuku xtlawa limasiyalh pi putum kilhtamaku xmakgantaxtiputun xtalakaskin Dios. ¿Tuku wamputun uma? Kaʼakxilhwi.

▪ Nalichuwinan chu namasiya xlakata xTamapakgsin Dios Biblia wan pi: «Jesús [tilakgatsalalh] xlikatlanka kGalilea, xmakgalhtawakganama [...], chu na xliakgchuwinama xatlan tamakatsinin xla xtapakgsin Dios» (Mateo 4:23). Chuna la akxilhaw nikaj xlichuwinantapuli xTamapakgsin Dios, na liwana xkamakgatekgsni chu xtlawa pi latamanin nakanajlakgo chu na xkamasiyani xlakata uma Tamapakgsin.

Akxni xlama unu kKatiyatni, Jesús kawanilh kstalaninanin tuku uma tamapakgsin chu tuku natlawa. La uku naʼakxilhaw makgapitsi tuku masiyalh chu kversículos xalak Biblia niku tatsokgtawilakgonit.

▪ Uma xTamapakgsin Dios akgtum tamapakgsin xalak akgapun chu Jehová laksaknit Jesús xlakata namapakgsinan (MATEO 4:17; JUAN 18:36).

▪ Uma Tamapakgsin nasantujtlawa xtukuwani Dios chu natlawa kakgantaxtulh xtalakaskin kKatiyatni chuna la kʼakgapun (MATEO 6:9, 10).

▪ Akxni natawila xTamapakgsin Dios, Katiyatni akgtum paraíso nawan (LUCAS 23:42, 43).

▪ Nialh makgas namin uma Tamapakgsin chu katiyatni nawan chuna la xlakaskin Dios (MATEO 24:3, 7-12). *

▪ Tlawalh milagros Kstalaninanin xlimapakuwikgo «Makgalhtawakgana» (Juan 13:13). Pero akgtutu kata aitat nema lichuwinalh Dios, na lilakgapaska tiku xtlawa milagros. ¿Tuku xlakata chuna tlawalh? Pulana, xlakata xlimasiyalh pi Dios xmakaminit chu xlipulaktiy xlakata namasiya tuku xʼama tlawa akxni xmapakgsinalh (Mateo 11:2-6). Makgapitsi milagros nema tlawalh wa umakgolh:

▪ Makaksalh pupunu chu tlawalh pi katakaksli un (MARCOS 4:39-41).

▪ Kamapaksalh tiku ni xlakawanankgo, akgatapa, tiku nila xtlawankgo chu chalhuwa tiku xtatatlakgo (LUCAS 7:21, 22).

▪ Kamawilh lhuwa latamanin akxni tlawalh pi natalhuwi liwat (MATEO 14:17-21; 15:34-38).

▪ Kamalakastakwanilh kgalhtutu latamanin (LUCAS 7:11-15; 8:41-55; JUAN 11:38-44).

Xlikana lu tlan nawan akxni nalatamayaw kKatiyatni chu namapakgsinan uma lu tlan mapakgsina.

 ▪ Limasiyalh la likatsi Jehová Jesucristo, xKgawasa Dios wa tiku tlakg tlan nakinkamasiyaniyan la likatsi Jehová. Wa «xakgasiyaj xwija lantla xlipaks tamalakatsukun» chu wa xlakata tlakg lhuwa kilhtamaku xtawilacha Dios kʼakgapun nixawa atanu (Colosenses 1:15). Makglhuwa limaxtulh kilhtamaku xlakata xkatsinilh tuku xtalakaskin xTlat chu katsinilh la xlikatsi, la xlakapastaka chu tuku xtlawa xTlat.

Wa xlakata wa: «Xman wa Dios katsi pi xlikana kit xKam; chu nachuna litum niti lu wa katsi lantla xla xtalakapastakni Dios, kaj xman nkit kakatsi [...] chu kaj xman wa tlan nalakgapasa wati kit nakmalakgapasniputun» (Lucas 10:22; Hua Xasasti Talaccaxlan, 1999). Pero Jesús, lu xatapaxuwan xkamasiyaniputun latamanin la xlikatsi xTlat. Niti xlichuwinan chuna la xlichuwinan, xlakata putum tuku xmasiya xkatsininit kʼakgapun, kxlakatin Jehová (Juan 8:28).

Tlan nawanaw pi chuna la Jesús kinkamasiyanin la likatsi xTlat tlan natamalakxtumiyaw tuku tlawa akgtum transformador xla luz. Uma transformador tiya luz kcables niku lhuwa titaxtuma luz chu kaj tsinu kinkamatitaxtiniyan kkinchikkan xlakata tlan nalimaklakaskinaw chu ni nalhku tuku kgalhiyaw. Jesús tiyalh tuku xkatsinit xlakata xtlat chu kamasiyanilh chuna la tlan xʼakgatekgskgolh latamanin.

¿Tuku limaklakaskilh xlakata tlan xlakgapaswi la likatsi xTlat?

▪ Xlakata tuku masiyalh, liwana takatsilh tiku Jehová, xtalakaskin chu la likatsi (JUAN 3:16; 17:6, 26).

▪ Tuku tlawalh, limasiyalh lu stlan tayat nema kgalhi Dios. Chu chuna la akgtum espejo, Jesús liwana limasiyalh la xlikatsi xTlat. Kitaxtu la chuna xwa: «Komo katsiputunatit la likatsi kinTlat, kaʼakxilhtit la klikatsi» (JUAN 5:19; 14:9).

Xlikana, lhuwa tuku tlan tlawalh Jesús. Pero ¿tuku xlakata makgnika? Chuna la naʼakxilhaw akxni akgatekgsaw tuku xlakata nilh chu natlawayaw tuku natalakaskin namakglhtinanaw lhuwa tasikulunalin.

[Notas nema wilakgo kpágina]