¿Tiku tlakg xlakaskinka naʼakxilhaw kkilatamatkan?
¿Tiku tlakg xlakaskinka naʼakxilhaw kkilatamatkan?
«Wata wix Dios xala talhman, ti mapakgsinan nak ixlitilanka katiyatni.» (SAL. 83:18)
1, 2. ¿Tuku xlakata nikaj talakaskin nakatsiyaw xtukuwani Dios xlakata nalakgtaxtuyaw?
MAX, akxni xlimakgtumku akxilhwi xtukuwani Dios wa akxni wi tiku kinkamasiyanin Salmo 83:18 chu likgalhtawakgaw, max ni xkanajlayaw niku wan: «Katakatsilh [...] xlakata wata wix Dios, y Jehová mintukuwani. Wata wix Dios xala talhman, ti mapakgsinan nak ixlitilanka katiyatni». Ama kilhtamaku asta la uku makglhuwa limaklakaskinitaw uma texto xlakata nakamakgtayayaw latamanin nalakgapaskgo Jehová, Dios xapaxkina (Rom. 10:12, 13).
2 Maski lu xlakaskinka nakatsiniyaw xtukuwani Dios, uma ni nakinkalakgmaxtuyan. Kaʼakxilhwi pi salmista na wi tuku lu xlakaskinka kinkawaniyan: «Wix Dios xala talhman, ti mapakgsinan nak ixlitilanka katiyatni». Xlikana Jehová wa Tiku tlakg xlakaskinka. Wa tlawalh putum kakilhtamaku, wa xlakata lakgchan pi putum tiku kgalhikgo liskgalala nakgalhakgaxmatkgo (Apo. 4:11). Wa xlakata tlan xtlawaw uma takgalhskinin: «¿Tiku tlakg xlakaskinka kakxilha kkilatamat?». Lu xlakaskinka nalilakpuwanaw uma takgalhskinin.
Taʼakglhuwit nema lakatsukulh kjardín xaʼEdén
3, 4. ¿Tuku limaklakaskilh Akgskgawini akxni tachuwinalh Eva, chu tuku kitaxtulh?
3 Akxilhaw tuku xlakata lu xlakaskinka uma takgalhskinin, akxni akgatekgsaw tuku lalh kʼEdén. Kjardín chatum ángel tiku ni kgalhakgaxmatli Dios tiku alistalh talilakgapasli Satanás, tlawalh pi Eva tlakg xlakaskinka xakxilhli tuku xlakaskin chu ni wa tuku xlimapakgsinit Dios (Gén. 2:17; 2 Cor. 11:3). Eva tlawalh tuku nitlan chu walh tawakat nema xwanikanit ni nawa, chuna ni limasiyalh pi Dios lakgchan namapakgsinan xlikalanka kakilhtamaku. Ni limasiyalh pi Jehová wa tiku tlakg xlakaskinka xliʼakxilhat kxlatamat. Pero ¿tuku limaklakaskilh Akgskgawini xlakata naʼakgskgawi?
4 Akxni Satanás tachuwinalh Eva, liwana lakputsalh la naʼakgskgawi (kalikgalhtawakga Génesis 3:1-5). Pulana, ni mapakuwilh xtukuwani Jehová wata kaj wa “Dios”, pero tiku tsokgli Génesis limaklakaskilh xtukuwani Jehová kxapulana versículo kcapítulo 3 chuna limasiyalh pi lu xlakaskinka xakxilha xtukuwani Jehová. Xlipulaktiy kgalhskininalh tuku «xwanit» Dios, chu ni kgalhskilh tuku “xkalimapakgsinit” Dios (Gén. 2:16). Max akxni chuna wanilh, tsekg xmalakpuwanima Eva pi ni lu xlakaskinka xlimapakgsin Dios. Xlipulaktutu maski xakstu xwi puskat akxni tachuwinalh, takgaxmatli la chatiy tiku xtachuwinama, wanilh «wixin». Max xlakaskin pi Eva lu xlakaskinka xmakgkatsika, chuna xpalakachuwinalh xchixku. Maski ni liwana katsiyaw, Eva tlawalh tuku ni xlakgchan, palakachuwinalh xchixku chu wa: «Xtawakat kiwi nema wilakgolh kjardín tlan nakwayaw».
5. 1) ¿Tuku tlawalh Satanás pi xakxilhli Eva? 2) ¿Tuku limasiyalh Eva akxni walh tawakat nema xkawanikanit ni nawakgo?
5 Satanás ni lichuwinalh tuku xaxlikana. Na malakpuwaninanputulh pi Dios ni xaʼakgstitum, xlakata kamapakgsilh: «Ni nawayatit xtawakat putum kiwi nema wilakgolh kjardín». Alistalh malakpuwanilh Eva pi tlakg xlakaskinka xwamputulh, la tlakg tlan xlatamalh chu “la Dios xwankgolh”. Tlawalh pi katsukulh akxilha kiwi chu xtawakat, chu nialh xlakapastakli la xtalalin xTlat xalak akgapun, tiku xmaxkinit putum tuku xkgalhi (kalikgalhtawakga Génesis 3:6). Eva walh tawakat, chuna limasiyalh pi ni xlakaskinka xakxilha Jehová kxlatamat.
Taʼakglhuwit akxni xlama Job
6. ¿Tuku wa Satanás xlakata la Job kskujnanima Dios, chu tuku maxkika talakaskin natlawa Job?
6 Titaxtulh lhuwa siglos, milh kilhtamaku Job tiku nikxni makgxtakgli Dios limasiyalh tiku tlakg xlakaskinka xakxilha kxlatamat. Akxni Jehová lichuwinalh la Job liwana kskujni, Satanás kgalhtilh: «¿Lakpuwana pi Job kaj chuntiya pekuani Dios?» (kalikgalhtawakga Job 1:7-10). Satanás ni wa pi ni xlikana xkgalhakgaxmata Dios wata limasiyaputulh pi ni akgstitum kskujnanima. Limasiyaputulh pi Job kaj kskujni Jehová xlakata wi tuku xmakglhtinan chu ni kaj xlakata xpaxki. ¿Tiku tlan xlimasiyalh pi ni xlikana tuku xwan Satanás? Wa Job, maxkika talakaskin chuna nalimasiya.
7, 8. ¿Tuku tuwa titaxtulh Job, chu tuku limasiyalh xlakata ni makgxtakgli Dios?
7 Jehová mastalh talakaskin pi Satanás lhuwa tuku nitlan xtlawanilh Job (Job 1:12-19). ¿Tuku tlawalh Job akxni lhuwa talakgaputsit titaxtulh? Biblia wan pi «ni lakgalhinalh, chu ni limawakalh Dios tuku nitlan» (Job 1:22). Maski chuna, Satanás ni anta tamakgxtakgli, chu alistalh wampa. «Putum tuku kgalhi chatum chixku namasta kaj xlakata nalilakgmaxtu xlatamat.» (Job 2:4.) Satanás wa pi komo Job wi tuku xlipatinalh, xlimasiyalh pi ni xlakaskinka xakxilha Jehová kxlatamat.
8 Job chipalh lixkajni tajatat nema tlawalh nitlan xtasiyalh xlakan. Nachuna, xpuskat wanilh: «¡Lixkajni kawani Dios, chu kanit!». Chu xaʼawatiya, kgalhtutu tiku xwankgo pi xʼamigos limawakakgolh pi xtlawanit talakgalhin (Job 2:11-13; 8:2-6; 22:2, 3). Pero maski Job lhuwa xpatinama, nikxni makgxtakglhi Dios (kalikgalhtawakga Job 2:9, 10). Xlakata patinalh chu ni makgxtakgli Dios limasiyalh pi wa Jehová tiku tlakg xlakaskinka kxlatamat. Chu limasiyalh pi maski tiku lakgalhinanin tlan nalimasiyakgo pi Akgskgawini xakgsanina (katamalakxtupi Proverbios 27:11).
Xatlan takgalhtin nema mastalh Jesús
9. 1) ¿La limaklakaskilh Satanás pi Jesús xtsinksma xlakata xmatlawiputun tuku nitlan? 2) ¿Tuku tlawalh Jesús akxni xmatlawiputunkan tuku nitlan?
9 Akxni Jesús aku xtamununit, Satanás xtlawaputun pi akstu xpaxkika chu nialh xlimasiyalh pi Jehová tiku tlakg xlakaskinka kxlatamat. Akgskgawini pulaktutu tuku xmatlawiputun. Pulana, xlakata xtsinksma wanilh pi chiwix kaxtalanchu xtlawalh (Mat. 4:2, 3). Cristo tipuxum kilhtamaku ni xwayanit wa xlakata lu xtsinksnima. ¿Tuku tlawalh Jesús akxni akgskgawini xlakaskin pi nitlan xlimaklakaskilh litliwakga nema xkgalhi? Ni tlawalh la Eva, tunkun wanilh pi ni, chu limaklakaskilh xTachuwin Jehová (kalikgalhtawakga Mateo 4:4).
10. ¿Tuku xlakata Satanás wanilh Jesús pi lhkgan xmincha kxakgstin templo?
10 Satanás xlakaskin pi Jesús xlakpuwa pi putum tlan xtlawalh tuku xwanika chu wanilh lhkgan xmincha akxni xwi xʼakgstin templo (Mat. 4:5, 6). ¿Tuku xlakaskin Satanás? Akgskgawini wanilh Jesús pi komo nitu xlanilh xlitasiyalh pi «xkam Dios». Xlakaskin pi Cristo xlimasiyalh pi niti xmamaxanilh chu tlan xtlawalh tuku kskinikan. Akgskgawini xkatsi pi lhuwa latamanin tlawakgo tuku kalipekua wili xlatamat kaj xlakata tlanka kamakgkatsikan o ni tamamaxaniputunkgo. Xlakata xakgskgawiputun, Satanás nitlan limaklakaskilh akgtum texto xalak Biblia, pero Jesús limasiyalh pi liwana xlakgapasa xTachuwin Jehová (kalikgalhtawakga Mateo 4:7). Akxni Cristo ni tlawalh tuku skinika limasiyalh pi wa Jehová tlakg xlakaskina xakxilha kxlatamat.
11. ¿Tuku xlakata Jesús ni mapakgsinamputulh kkakilhtamaku nema xmaxkiputun Akgskgawini?
11 Chu xaʼawatiya tuku nitlan xmatlawiputun, wanilh xKgawasa Dios pi tlan xmapakgsilh putum tuku anan kkakilhtamaku (Mat. 4:8, 9). Pero Jesús ni lakaskilh, xlakata xkatsi pi komo chuna xtlawalh xlimasiyalh pi Jehová ni lakgchan namapakgsinan xlikalanka kakilhtamaku (kalikgalhtawakga Mateo 4:10). Wantuku lu xlakaskinka, uma pulaktutu tuku nitlan xmatlawiputun Satanás, Jesús likgalhtinalh tuku wan xTachuwin Dios niku xwi xtukuwani Jehová.
12. ¿Tukuya tuwa talakgaputsit titaxtulh Jesús akxni xʼamakaja makgnikan chu tuku kinkamasiyaniyan?
12 Akxni atsinu xtsankga namakgnikan Jesús, titaxtulh lanka talakgaputsit. Akxni xlama unu kKatiyatni xwanit pi xatapaxuwan xʼama makamasta xlatamat (Mat. 20:17-19, 28; Luc. 12:50; Juan 16:28). Pero na xkatsi pi judíos wantiku xʼamakgolh makgnikgo chu xʼamaka limawakakan pi nitlan lichuwinalh Dios. Lu nitlan xlimakgkatsi xlakata chuna la xʼamaka makgnikan xʼama tamamaxani. Wa xlakata wanilh xTlat: «Tataj, wa lapi xlilat, kakintapanunilh yuma ntu nakiakgspulay». Pero na wa: «Wampi ni wa lantla klakaskin nkit, wampi wa lantla wix mintalakaskin» (Mat. 26:39). Xlikana: xlakata nikxni makgxtakgli Dios asta akxni nilh , Jesús limasiyalh pi Jehová wa tiku tlakg xlakaskinka xakxilha kxlatamat.
Tuku natlawayaw akinin
13. ¿Tuku katsiniw xlakata Eva, Job chu Jesucristo?
13 ¿Tuku kinkamasiyaniyan párrafos nema aku likgalhtawakgaw? Tuku tlawalh Eva kinkamasiyaniyan pi komo tlanka nakinkamakgkatsikanan chu akstu nakinkapaxkikanan nalimasiyayaw pi Jehová ni wa tiku tlakg xlakaskinka akxilhaw. Pero, Job kinkamasiyaniyan pi maski lakgalhinanin akinin tlan tayaniyaw talakgaputsit, asta akxni ni liwana katsiyaw tuku xlakata chuna kinkaʼakgspulaman. Akxni chuna tlawayaw, limasiyayaw pi tlakg xlakaskinka akxilhaw Jehová kkilatamatkan (Sant. 5:11). Chu xaʼawatiya, xliʼakxilhtit Jesús kinkamasiyaniyan: naskujnaniyaw Dios maski natamamaxaniyaw chu ni lu nalilakgaputsayaw la nakinkalichuwinankanan (Heb. 12:2). Pero ¿la tlan nachuna natlawayaw uma tuku katsiniw?
14, 15. ¿Tuku tlawalh Eva chu tuku tlawalh Jesús akxni xmatlawiputunkan tuku nitlan chu la tlan natlawayaw la xKgawasa Dios? (Kalichuwinanti dibujo xla uma página.)
14 Ni kamastaw talakaskin pi akxni nakinkamatlawiputunkanan tuku nitlan natlawa pi nialh nalakapastakaw Jehová. Eva mastalh talakaskin pi Akgskgawini napulalin chu tsukulh akxilha tuku xlimatlawiputunkan tuku nitlan: «Akxilhli pi [xtawakat] kiwi lu tlan xwanit xlakata nawakan, chu liwaputu xtasiya, chuna, kiwi lu lilakgatit xtasiya» (Gén. 3:6). ¡Jesús nichuna tlawalh akxni Satanás makgtutu xmatlawiputun tuku nitlan! Ni kaj akxilhli tuku nitlan xmatlawiputunkan na lilakpuwa tuku nitlan xʼama kitaxtu xlakata tuku xtlawalh. Na limaklakaskilh xTachuwin chu xtukuwani Dios.
15 Akxni kinkamatlawiputunkanan tuku ni lakgati Jehová, ¿tuku natlawayaw? Komo tlakg nalakpuwanaw xlakata la xlistlan tuku kinkamatlawiputunkanan tlakg natlawaputunaw tuku nitlan (Sant. 1:14, 15). Wa xlakata lakapala namaxtuyaw kkinakujkan tuku nitlan tlawaputunaw, maski lu tuwa, xtachuna la xchukuktiw kimakankan (Mat. 5:29, 30). Chuna la Jesús, nalakpuwanaw tuku nitlan nakitaxtu chu tlakg kuenta kilitlawatkan pi ni natlawa nialh tlan natalalinaw kinTlatkan xalak akgapun. Na kililakapastakatkan tuku masiya Biblia. Akxni chuna natlawayaw nalimasiyayaw pi Jehová wa tiku tlakg xlakaskinka kkilatamatkan.
16-18. 1) ¿Tukuya taʼakglhuwit max lu nalilipuwanaw? 2) ¿Tuku nakinkamakgtayayan natayaniyaw akxni kgalhiyaw talakgaputsit?
16 Nikxni kamastaw talakaskin pi akxni napatinanaw natlawa pi nasitsiniyaw Jehová (Pro. 19:3). Akxni tlakg natalakatsuwi xlisputni uma xalixkajni kakilhtamaku, tlakg lhuwa xlakskujni Dios nalipatinankgo tuku malakgsputunan o akxni wi tuku nitlan la. Liwana kilikatsitkan pi la uku Dios ni kaj lakapala nakinkalakgmaxtuyan. Pero, chuna la Job, akxni niy tiku lu xpaxkiyaw chu akxni kgalhiyaw lhuwa taʼakglhuwit na lipatinanaw.
17 Job ni xʼakgatekgsa tuku xlakata Dios xmasta talakaskin wi tuku xakgspulalh. Nachuna akinin max namin kilhtamaku ni naʼakgatekgsaw tuku xlakata masta talakaskin wi tuku nitlan nala. Max nakatsiyaw pi makgapitsi natalan nikgolh akxni wi tuku masputunalh, chuna la akxni tachikilh tiyat kHaití. O max wi tiku nakinkawaniyan pi chatum tala tiku liwana kskujnanima Dios wi tuku nitlan tlawanika o makgnika. Chu max asta akinin lanka talakgaputsit titaxtumaw, o max kinkaʼakgspulaman tuku lakpuwanaw pi ni xlilat, chu max nawanaw: «¿Tuku xlakata Jehová? ¿Tuku xlakata akit chuna kxtitaxtuma? ¿Tuku nitlan ktlawalh?» (Hab. 1:2, 3). ¿Tuku tlan nakinkamakgtayayan akxni kgalhiyaw umakgolh talakgaputsit?
18 Ni nalakpuwanaw pi akxni wi tiku patinan kaj xlakata Jehová nialh tlan akxilha. Akxni xlama Jesús pulaktiy wi tuku nitlan tilalh, pero limasiyalh pi nitlan nalakpuwanaw pi Dios xkalimalakgaxokgema (kalikgalhtawakga Lucas 13:1-5). Lhuwa tuku nitlan lay kaj xlakata «kilhtamaku chu tuku xalan lay» (Ecl. 9:11). Pero maski ni katsiyaw tuku xlakata chuna lama, tlan natayaniyaw putum tapatin komo nalipawanaw Dios «xmastana xlipaks ntakgtsiyajni» tiku nakinkamaxkiyan litliwakga xlakata ni namakgxtakgaw (2 Cor. 1:3-6).
19, 20. ¿Tuku makgtayalh Jesús xlakata xtayanilh akxni xmamaxanikan chu tuku nakinkamakgtayayan nachuna natlawayaw?
19 Nikxni kamastaw talakaskin pi kaj xlakata tlanka kinkamakgkatsikanan chu xlakata ni tamamaxaniputunaw natlawayaw tuku nitlan. Jesús ni tlanka xmakgkatsikan wa xlakata «akstu taktujulh, wa ntiyalh xlatamat lantla nti nkaj xachunata» o lakskujni (Fili. 2:5-8). Makglhuwa mamaxanika xlakata xlipawan xTlat tiku lu xpaxki (1 Ped. 2:23, 24). Akxni chuna tlawalh, pulana wililh xtalakaskin Jehová, wa xlakata alistalh lhuwa limapakgsin maxkika kʼakgapun (Fili. 2:9). Chu kinkawaniyan pi nachuna kaliw kilatamatkan (Mat. 23:11, 2; Luc. 9:26).
20 Min kilhtamaku na titaxtuyaw tuku lu limaxananaw. Pero nachuna kililakapastakatkan la Pablo, xla wa: «Na chuna klipatinan yunu, wampi ni klimaxanan, xampi kkatsiy nti kkanajlaninit, [...] [tiku] likgalhiy litliwakga nalimakiy wa ntu kmakamaxkinit nakimakiniy» (2 Tim. 1:12).
21. Maski latamanin xakstu kapaxkikan, ¿tuku liwana lakapastaknitaw natlawayaw?
21 Biblia xlichuwinanita pi la uku latamanin xʼamakgolh “akstu kapaxkikan” (2 Tim. 3:2). Wa xlakata la uku lhuwa kaj tlawakgo tuku lipaxuwakgo. Ni kamastaw talakaskin pi nachuna nalakpuwanaw. Wata akxni nakinkamatlawiputunkanan tuku nitlan, nakgalhiyaw akgtum lanka talakgaputsit, o wi tiku nakinkamamaxaniputunan, liwana kalimasiyaw pi Jehová wa tiku tlakg xlakaskinka akxilhaw kkilatamatkan.
Kawanti tuku kinkamasiyanikgoyan umakgolh:
• Chuna la Satanás akgskgawilh Eva.
• Tuku tlawalh Job akxni lhuwa tuku lipatinalh.
• Tuku tlakg xlakaskinka xakxilha Jesús.
[Takgalhskinin]
[Epígrafe xla página 21]
Jesús ni tlawalh tuku nitlan xmatlawiputun Satanás wata tlawalh xtalakaskin Jehová
[Epígrafe xla página 22]
Lichuwinamakgolh Dios klaktsu chiki akxni xtachikinita tiyat kHaití
[Epígrafe xla página 22]
Akxni tuwa tuku titaxtumaw lipawanaw Dios «xmastana xlipaks ntakgtsiyajni»
