¿Tiku xwanit Jesús?

«Akxni Jesús tanucha kJerusalén, putum latamanin tsukukgolh paxuwakgo, chu xwankgo: “¿Tiku uma chixku?”. Latamanin xwankgo: “Wa yuma Jesús xpalakachuwina Dios, xala kNazaret [...] Galilea”.» (MATEO 21:10, 11)

AKXNI Jesucristo tanucha kJerusalén kprimavera kata 33 lhuwa tiku kaks lakawankgolh chu tsukukgolh lichuwinankgo. * ¿Tuku xlakata? Lhuwa tiku anta xalanin xkgaxmatkgonit la xlichuwinankan chu la xtlawa milagros, wa xlakata putum latamanin xlichuwinamakgolh (Juan 12:17-19). Nipara tsinu xlakpuwankgo pi ama chixku tlakg xlakaskinka xʼama litaxtu xliputum kilhtamaku. Wantuku masiyalh xama talakgatumi xlikalanka katiyatni asta la uku.

Kaʼakxilhwi makgapitsi liʼakxilhtit nema limasiya pi lhuwa tiku lu xlakaskinka liʼakxilhkgo.

▪ Xlikalanka katiyatni, kcalendario takilhti kata, akxni lakpuwankgo pi lakachilh Jesús.

▪ Akgtiy mil millones latamanin, atsinu ni putum wankgo pi kanajlanikgo Jesús.

▪ Islam akgtum takanajla nema kgalhi akgtum mil millones tiku stalanikgo wankgo pi Jesús wa «tlakg xalanka palakachuwina nixawa Abrahán, Noé chu Moisés».

▪ Lhuwa tuku lichuwinalh Jesús, refranes limaxtukgolh chu la uku lhuwa lichuwinankgo, makgapitsi wa umakgolh:

Ni xman wa kaxtalanchu katililatamalh nchixku (MATEO 4:4).

Kawili alakgxtitu milakan (MATEO 5:39).

Ni kaʼakxilhti sekget nema lakpitanuma achatum (MATEO 7:3).

Wantuku lakaskinatit nakatlawanikgoyan amakgapitsin, na chuna wixin natlawanikgoyatit (MATEO 7:12).

Kaxokgonitit César wantu xla César (MATEO 22:21).

Niti xpalakachuwina Dios katiliʼakxilhka kxkachikin (LUCAS 4:24).

Putum uma tuku tlawalh Jesús lhuwa kanajlakgokan. Maski chuna, lhuwa tuku ni lakxtum kanajlakgokan xlakata Jesús. ¿Katsiputuna tiku xwanit Jesucristo? Kajwatiya Biblia kinkawaniyan tuku xaxlikana xlakata xlakatsukut, xlatamat chu asta akxni nilh. Chuna la naʼakxilha kʼartículo nema aku mima, nalakgapasa xtamasiy nema nalakgpali milatamat xliputum kilhtamaku.

[Notas nema wilakgo kpágina]