Dios limasiya pi kinkapaxkiyan
Dios limasiya pi kinkapaxkiyan
«Xpalakata xtalakgalhaman Dios [...] nakinkamaxkiyan yama latamat watu [latamat nema ni kgalhi xlisputni].» (ROM. 5:21)
1, 2. ¿Tuku tlakg xlakaskinka tamaskiwin makglhtinanitaw?
CHATUM makgalhtawakgana xla Universidad xalak Melbourne, Australia wan pi limapakgsin nema xkgalhikgo romanos akgtum tamaskiwin nema kamakgtaya latamanin. Pero, Biblia kinkawaniyan pi Dios kinkamaxkinitan akgtum tamaskiwin nema tlakg lanka xtapalh. Akgtum tamaskiwin nema kinkamaxkin Jehová: wa tuku nalilakgtalakatsuwiyaw, nalilakgtaxtuyaw chu nakgalhiyaw latamat nema ni kgalhi xlisputni.
2 Tlan nawanaw pi Jehová maklakaskilh xalakatitum xlimapakgsin xlakata kinkamaxkin uma tamaskiwin. Kcapítulo 5 xla Romanos, Pablo ni lichuwinan uma la xlimapakgsin lakchixkuwin. Wata maklakaskin tachuwin nema tlan kinkamamakgkatsiniyan: «Dios xalakatitum kinkalimaxtun xtachuna pala nialhtu laklenaw kxlakatin kaj xpalakata pi Kimpuchinakan Jesucristo [...], chu lhuwa anan tapaxuwan». ¿La akxilhkgo uma tamaskiwin tiku makgamakglhtinankgo? Pi Jehová lu kinkapaxkiyan chu nachuna lu paxkiputunaw. Tiku chuna tlawalh wa Pablo chu tsokgli: «Spiritu Santo wantu kinkamaxkinitan [kinkalimasiyaniyan] lantla Dios xlikana kinkapaxkiman» (Rom. 5:1, 5; Hua Xasasti Talaccaxlan, 1999).
3. ¿Tukuya takgalhskinin akstu nakinkatlawanikanan?
3 ¿Tuku xlakata talakaskilh pi nakinkamaxkiyan Dios lu tlan xtamaskiwin? ¿La tlawalh Dios xlakata xtamakgantaxtilh xtamapakgsin chu putum latamanin tlan xmakgamakglhtinankgolh uma tamaskiwin? ¿Tuku kilitlawatkan xlakata namakglhtinanaw uma tamaskiwin? Kaʼakxilhwi takgalhtin nema masta Biblia chu la limasiya pi Jehová kinkapaxkiyan.
Maski chixku lakgalhinalh Dios paxkilh
4, 5. 1) ¿La limasiyalh Jehová pi lu kinkapaxkiyan? 2) ¿Tuku lalh makgasa kinkawaniyan tuku wamputun Romanos 5:12?
4 Xlakata Jehová lu kinkapaxkiyan makamilh xKgawasa xlakata nakinkamakgtayayan. Pablo chuna wa: «Wampi wa Dios, kinkalimaʼukxilhniyan xtapaxkit, mpi akxni lakgalhinaninku xwanitaw, wa nCristo nti nkintikapalakanin» (Rom. 5:8). Uma likatsiyaw la xwilaw kxlakatin Dios akxni nina xmasta xlatamat Jesús: «lakgalhinaninku xwanitaw». Kaʼakxilhwi tuku xlakata chuna kinkaʼakgspulan.
5 Pablo kinkawaniyan tuku xlikana lalh makgasa: «Ntsukulh ntalakgalhin nkatuxawat nkaj xpalakata nchatum chixku, pus wa linin nkitaxtunilh ntalakgalhin; cha nchu linin, chuna nkgalhikgolh xlipaks nchixkuwin xampi paks lakgalhinankgolh» (Rom. 5:12). Atanu textos xalak Biblia, Dios kinkawaniyan la tlan naʼakgatekgsaw umakgolh tachuwin. Chuna la katsiyaw, akxni Jehová katlawalh Adán chu Eva, ni xkgalhikgo talakgalhin. Alistalh kamaxkilh akgtum tamapakgsin nema tlan xmakgantaxtikgolh, kawanilh komo ni xkgalhakgaxmatkgolh xnikgolh (Gén. 2:17). Lu nitlan tuku tlawakgolh kinatlatnikan, ni kgalhakgaxmatkgolh Jehová, chuna limasiyakgolh pi ni xlakgachixkuwikgo Tiku Masta Limapakgsin chu lakgchan namapakgsinan (Deu. 32:4, 5).
6. 1) Kawanti tuku xlakata xkamanan Adán xlinitkan xwanit chu tuku talakgpalilh akxni Dios kamaxkilh Limapakgsin. 2) ¿Tuku xlakata talakgalhin tamalakxtumiyaw akgtum tajatat?
6 Xkamanan Adán chu Eva lakachinkgolh akxni xlakgalhinankgonita kʼEdén. Wa xlakata putum makglhtinankgolh talakgalhin chu putum tuku nitlan limin. Pero Jehová ni kalimawakalh xtalakgalhin Adán, xlakata ni wa xkamanan lakatsalakgolh limapakgsin; ama kilhtamaku nina xmasta Limapakgsin (Gén. 2:17). Pero kamatitaxtinika talakgalhin. Wa xlakata talakgalhin chu linin putum kgalhiyaw, chu akxni Dios kamaxkilh Limapakgsin Israelitas liwana masiyalh pi chuna wilaw (kalikgalhtawakga Romanos 5:13, 14). Talakgalhin nema kamatitaxtinilh Adán tlan natamalakxtumiyaw akgtum tajatat nema natlatni kamatitaxtini xkamanankan. Pero makgapitsi xkaman ni kapasay. Pero talakgalhin nema kinkamatitaxtinin Adán ni xtachuna la uma, putum kgalhiyaw. Kinatlatnikan kinkamatitaxtinikgon talakgalhin chu akinin kamatitaxtiniyaw kinkamanankan chu na niyaw. ¿Tlan natalakkaxtlawa uma?
Dios kinkalilakgmaxtun Jesucristo
7, 8. ¿Tuku kitaxtulh tuku tlawalh Adán chu Jesús?
7 Dios tiku lu xapaxkina wi tuku tlawalh xlakata nakinkalakgmaxtuyan ktalakgalhin. Pablo wa pi tlan chuna xlalh, xtalakaskin chatum tiku ni xkgalhilh talakgalhin xtachuna la Adán chu kaj «xaʼawatiya Adán» tlan kinkalakgmaxtun (1 Cor. 15:45). Chuna la naʼakxilhaw, wantuku tlawakgolh tanu tanu la kakitaxtunilh (kalikgalhtawakga Romanos 5:15, 16).
8 Pablo kinkawaniyan pi ni akxtum kitaxtu «xtamaskiwin Dios [...] chu talakgalhin». ¿Tuku lalh xlakata Adán “lakgalhinalh”? Wanika pi xʼama niy xlakata xtalakgalhin. Pero chuna la wan apóstol ni kaj xakstu nilh: «Xlakata xtalakgalhin chatum chixku lhuwa nikgolh». Putum xkamanan Adán kaminini nanikgo xlakata lakgalhinanin. Pero lu tlan limakgkatsiyaw pi Jesús tiku ni kgalhi talakgalhin tlan kinkalakgmaxtun. Pablo wan pi lhuwa «xalakatitum kaʼakxkilhkan xlakata tlan nakgalhikgo latamat» (Rom. 5:18, NM).
9. Akxni Dios xalakatitum kaʼakxilha latamanin chuna la wan Romanos 5:16, 18, ¿tuku tlawa xpalakatakan?
9 ¿Tuku kilhchanima tachuwin xagriego nema tamatitaxti kxatotonaco «xalakatitum xkinkaliʼakxilhkan»? Uma tuku tsokgli makgalhtawakgena nema lichuwinawa: «Kinkamalakapastakan la akxni kgalhiyaw akgtum taʼakglhuwit xlakatin mapakgsinanin. Ni kilhchanima akxni chatum lataman lakgpali xlatamat, kilhchanima la wi chatum lataman kxlakatin Dios [...]. Kʼuma liʼakxilhtit Dios wi tuku lakkaxwili xlakata namakgtaya tiku malakgsiyakanit, tlan nawanaw pi uma tasanikan xlakatin xpumapakgsin Dios, pero nitu tlawanit tuku limawakakanit, chu Dios tapati xtalakgalhin».
10. ¿Tuku tlawalh Jesús xlakata Jehová tlan xkamakgamakglhtinalh xkamanan Adán?
10 ¿La xtlawalh «Juez xlikalanka katiyatni» xlakata xmakgamakglhtinalh chatum lataman tiku lakgalhina? (Gén. 18:25.) Tlan chuna tlawalh xlakata Dios makamilh Katiyatni xKgawasa chu chuna lakkaxwilh xlakata tlan xkaʼakxilhli tiku lakgalhinanin. Jesús putum makgantaxtilh xtalakaskin xTlat, maski makglhuwa xmatlawiputunkan tuku nitlan, likgalhkgamananka, chu lhuwa tlawanika tuku nitlan. Nikxni makgxtakgli xtlat, asta makamastalh xlatamat kkgantum kiwi (Heb. 2:10). Chuna makamastalh xlatamat nema ni xkgalhi talakgalhin xlakata kalakgmaxtulh xkamanan Adán ktalakgalhin chu klinin (Mat. 20:28; Rom. 5:6-8).
11. ¿Tuku litaxokgolh talakgmaxtut?
11 Kʼatanu texto, Pablo lichuwinalh «xpuxokgo nkintikalilakgmaxtun» (1 Tim. 2:6). Pero ¿tuku kilhchanima? Akxni Adán lakgalhinalh, kamatitaxtinilh putum xkamanan talakgalhin chu linin. Xlikana pi xlakata Jesús ni xkgalhi talakgalhin, tlan lhuwa kamanan xtikgalhilh nema ni xkgalhikgolh talakgalhin. * Wa xlakata, makgasa lichuwinaw pi xlatamat Jesús chu xkamanan nema tlan xtikgalhilh xlitaxtu akgtum tamakamastan nema tlan xlitaxokgolh xlatamat Adán chu xkamanan tiku xkgalhikgo talakgalhin. Pero kBiblia ni lichuwinan xkamanan Cristo nema tlan xkinkalakgmaxtukgon. Romanos 5:15-19 wata wan pi xlakata nilh «nchatum nchixku» kinkalakgmaxtun. Chuna la akxilhaw, xlatamat Jesús nema ni xkgalhi talakgalhin xtachuna litaxtu xlatamat Adán. Kajwatiya lichuwinan Jesucristo. Kajwatiya Jesucristo tlawalh pi xalakatitum xtawilakgolh xlakatin Dios chu kamaxkilh latamat «xpalakata ntu ntlawalh» xlakata kgalhakgaxmatnilh Jehová, ni makgatsankgananilh asta nilh (2 Cor. 5:14, 15; 1 Ped. 3:18). Pero la, ¿kinkalilakgmaxtuyan Dios talakgmaxtut?
Katapatika xlakata talakgmaxtut
12, 13. ¿Tuku xlakata tlan nawanaw pi Dios paxkilh chu lakgalhamalh tiku nialh lakgalhina akxilhka?
12 Jehová makgamakglhtinalh tamakamastan nema mastalh xKgawasa (Heb. 9:24; 10:10, 12). Pero ¿la xwilakgolh kstalaninanin Cristo akxni xlamakgolh kKatiyatni? Putum lakgalhinanin xwankgonit asta xʼapóstoles tiku ni xmakgxtakgkgo. Maski fuerza xtlawakgo xlakata ni xtlawakgolh tuku nitlan xmin kilhtamaku nila xmakgantaxtikgo. ¿Tuku xlakata? Xlakata talakgalhin nema makglhtinanitaw (Rom. 7:18-20). Pero Dios tlan xlakkaxtlawalh. Xlakata makgamakglhtinalh “xpuxokgo lantla kalakgmaxtulh” xlakskujnin chu chuna tlawalh.
13 Jehová tlan ni xtilimaklakaskilh talakgmaxtut xpalakata apóstoles chu amakgapitsin latamanin kaj xlakata tuku tlan xtlawakgonit. Chuna tlawalh xlakata lu kapaxkilh chu kalakgalhamalh. Xlakata chuna lakaskilh, kalakgmaxtulh ktalakgalhin chu kaʼakxilhli la komo nitu kgalhikgo talakgalhin nema kamatitaxtinilh Adán. Pablo liwana makgatekgsanalh akxni wa: «Xampi kaj lipaxkatsinit maski liʼakgaputaxtunitantit, wa xpalakata mintakanajlakan; na wa yuma ni wa xpalakata mpala tu ntlan ntlawayatit, xampi kaj litlan xtatakin [o xtamaskiwin] Dios» (Efe. 2:8).
14, 15. ¿Tuku xʼamakgolh makglhtinankgo latamanin tiku xalakatitum kaʼakxilhli Dios?
14 ¡Lu lanka talakgalhaman nema tlawa Jehová akxni tapati tiku lakgalhinanit! Chuna, komo akinin xputlakgew niku makglit tlawanitaw tuku nitlan akxni nina xwilaw kxaxlikana takanajla, nipara la xputlakgew. Chuna la tsokgnalh apóstol Pablo: «Tamaskiwin mastaka xlakata lhuwa talakgalhin chu xalakatitum nakinkaʼakxilhkanan» (Rom. 5:16, NM). Chuna, apóstoles chu amakgapitsi tiku xalakatitum kamakgamakglhtinanka xtalakaskin chuntiya xkakninanikgolh Jehová chu xkanajlanikgolh. ¿Tuku tlan xʼamakgolh makgamakglhtinankgo alistalh? «Xpalakata ntu ntlawalh Jesucristo, [...] nalikalhikgoy latamat wa nti nkaj litlan makgamakglhtinankgoy ntlanka xlipaxkatsinit Dios.» Tuku kinkamatitaxtinin Adán ni xtachuna tuku masta Jehová. Adán linan klinin chu Jehová klatamat (Rom. 5:17; kalikgalhtawakga Lucas 22:28-30).
15 Tiku kamakgamakglhtinankan la tiku nitu tlawakgonit litaxtukgo la xkamanan Dios. Na natamapakgsinankgo Cristo, uma tlawa pi tlan nalakastakwanankgo chu espíritus nawankgo tiku namapakgsinankgo kʼakgapun (kalikgalhtawakga Romanos 8:15-17, 23).
Dios na kamasiyani pi kapaxki amakgapitsin
16. ¿Tukuya talakgalhaman makglhtinankgo kstalaninanin Cristo tiku ni namapakgsinankgo kʼakgapun?
16 Pero ni putum tiku skujnanikgo Dios chu kanajlanikgo natamapakgsinankgo Cristo kʼakgapun. Xlakskujni Dios akxni nina xmin Cristo chu xlakskujni tiku lamakgolh la uku, kgalhkgalhimakgolh xliputum kilhtamaku nalatamakgo kxakastlan kKatiyatni. ¿Kamaxkinita Jehová lanka talakgalhaman xlakata nialh lakgalhinanin kaʼakxilha chu nalatamakgo kKatiyatni? Chuna la Pablo kawani romanos, tlan nawanaw pi chuna.
17, 18. 1) ¿La xakxilha Dios Abrahán tiku ni xmakgxtakga? 2) ¿Tuku xlakata Dios tlan akxilhli Abrahán la tiku xalakatitum?
17 Pablo lichuwinan akgtum liʼakxilhtit nema lu talakgapasa. Lichuwinan Abrahán, tiku latamalh makgasa akxni Jehová nina xmasta Limapakgsin chu akxni Cristo nina xmakamasta xlatamat nema tlan xtlawalh pi makgapitsi xʼankgolh kʼakgapun (Heb. 10:19, 20). Apóstol wan: «Xampi ni wa xpalakata limapakgsin ntilimaxkika ntamalaknun Abraham, su wa xkilhtsukut, mpi wa xlakan nalakgchankoy xlikatlanka nkatuxawat, wampi wa ntilimalaknunika xpalakata [...] xtakanajla» (Rom. 4:13; Sant. 2:23, 24). Chuna la akxilhaw, Dios xalakatitum xakxilha Abrahán tiku ni xmakgxtakga (kalikgalhtawakga Romanos 4:20-22).
18 Ni wamputun pi uma kskujni Dios nikxni xlakgalhinan. Ni wa xkilhchanima (Rom. 3:10, 23). Pero xlakata Jehová lu xaskgalala akxilhli tuku xtlawa nema xlimasiya pi xkanajlani. Abrahán kanajlalh pi anta kxkamanan xlakachilh tiku “xwankanit pi namin”, wa Mesías o Cristo (Gén. 15:6; 22:15-18). Xlakata “nCristo kinkapalakgaxokgon” Juez xalak akgapun tlan tapatilh xtalakgalhin Abrahán chu xla amakgapitsi lakskujni tiku ni makgxtakgkgolh Dios nema xlamakgolh akxni nina xmin Cristo, chu uma tlawa pi tlan nalakastakwanankgo alistalh (kalikgalhtawakga Romanos 3:24, 25; Sal. 32:1, 2).
Dios xalakatitum kinkaʼakxilhan
19. ¿Tuku lilakgapaska Abrahán nema kamatliwakglha kstalaninanin Cristo xala uku?
19 Xlakata Dios xalakatitum xakxilha Abrahán kinkamatliwakglhan putum xaxlikana kstalaninanin Cristo xala uku. Jehová ni xakxilha la tiku kalilaksaka espíritu santo xlakata «natamapakgsinankgo Cristo». Kstalaninanin Cristo tiku kalaksakkanit xlakata “xasantujlanin nawankgo” chu kamakgamakglhtinankan xtachuna «xlakgskgatan Dios» (Rom. 1:7; 8:14, 17, 33). Pero Abrahán lilakgapaska «xʼamigo Dios», chu chuna lalh akxni Cristo nina xmasta xlatamat xlakata nakinkalakgmaxtuyan (Sant. 2:23; Isa. 41:8). Wa xlakata, ¿tuku tlan nawanaw xlakata kstalaninanin Cristo tiku nalatamakgo akxni Katiyatni akgtum Paraíso nawan?
20. ¿Tuku xlitlawatkan latamanin xlakata Dios xalakatitum nakaʼakxilha chuna la Abrahán?
20 Umakgolh kstalaninanin Cristo nina «makgamakglhtinankgoy ntlanka xlipaxkatsinit [o xtalakgalhaman] Dios» chu nakamaxki latamat kʼakgapun nema “kalilakgmaxtulh nCristo Jesús” (Rom. 3:24; 5:15, 17). Pero, xlikana lipawankgo Dios chu tuku lakkaxwilinit xlakata nalakgtaxtuyaw. Chu limasiyakgo akxni tlawakgo tuku tlan, akxni «liʼakgchuwinankgo xlimapakgsin Dios, chu na masiyunikgo [latamanin] xtamasiyun xpalakata [...] Jesucristo» (Hech. 28:31). Xlakata chuna tlawakgo, Jehová xalakatitum kaʼakxilha chuna la xʼakxilhkan Abrahán. Maski ni «makgamakglhtinankgoy ntlanka xlipaxkatsinit Dios» nema kamaxkikan tiku kalaksakkanit, lu paxtikatsinikgo xlakata na kaʼakxilhkan chuna la Abrahán tiku ni xmakgxtakga Dios: xʼamigo litaxtulh.
21. ¿Tuku tlan nalipaxuwayaw xlakata Dios kinkapaxkiyan chu xalakatitum tuku tlawa?
21 Dios wanit pi tlan nalatamayaw putum kilhtamaku unu Katiyatni chu xlikana nakgantaxtu ni xtachuna la tuku wankgo políticos. Chuna nala xlakata chuna lakkaxwilinit Mapakgsina xlikalanka kakilhtamaku tiku lu xaskgalala. Jehová tlawamaja xlakata nakgantaxtu tuku lakapastaknit natlawa. Chu putum tuku lakapastaknit natlawa namakgantaxti chuna la wi xlimapakgsin. Uma limasiya pi lu xapaxkina. Xlikana Pablo xkatsi uma akxni tsokgli: «Wampi wa Dios, kinkalimaʼukxilhniyan xtapaxkit, mpi akxni lakgalhinaninku xwanitaw, wa nCristo nti nkintikapalakanin» (Rom. 5:8).
[Notas nema wilakgo kpágina]
^ párr. 11 Niku talichuwinalh pi xkamanan Jesús makgtaxtukgolh akxni tamakamastalh «xpuxokgo nkintikalilakgmaxtun nkilipakskan» anta, Perspicacia para comprender las Escrituras, volumen 2, página 825, párrafos 3 chu 4.
¿Lakapastakaw uma?
• ¿Tuku kinkamatitaxtinin Adán, chu tuku kitaxtulh?
• Kawanti la xokgolh Jesús xlakata «nkintikalilakgmaxtun» chu tuku xkilhchanima.
• ¿Tukuya takgalhkgalhin kgalhiyaw xlakata xalakatitum kinkaʼakxilhkanan?
[Takgalhskinin]
[Epígrafe xla página 18]
Chatum chixku, Adán, wa tiku lakgalhinalh. Atanu tiku ni xkgalhi talakgalhin, Jesús titamakamastalh «xpuxokgo nkintikalilakgmaxtun»
[Epígrafe xla página 20]
Lichuwinanaw xalakwan xalaksasti pi tlan xalakatitum nakinkaʼakxilhkanan xpalakata Jesús
