Katalakatsuwini Dios

«Jehová kiMapuchwayanina»

KAʼAKXILHTI dibujo xla uma página. ¿Akxilha pi ni pekuan uma aktsu borrego xlakata chaxnit xmapuchwayanina? Anta kSalmo 23 Traducción del Nuevo Mundo, lichuwinan chatum mapuchwayanina chu xborrego xlakata nalimasiyakan la kapaxki Jehová xlakskujnin. Xla lakaskin namakgkatsiyaw chuna la makgkatsikgo tiku wankgo la salmista: «Jehová kimapuchwayanina» (versículo 1). *

David, mapuchwayanina litaxtulh akxni kgawasaku xwanit chu xkatsi tuku xlakaskinkgo borregos chu tuku xlakgchan natlawa mapuchwayanina. Na xʼakxilhnit la Jehová liwana xkuentatlawanit, wa xlakata tsokgli tuku talilakgapasa «salmo nema tlan lipawankan». Xtukuwani Dios, Jehová, tatakgsa akxni tsuku chu akxni kgalhsputa uma salmo (versículo 1chu 6). Versículos 2 asta 5 lichuwinankgo pulaktutu la Jehová kakuentajtlawa xlakskujnin la chatum mapuchwayanina kakuentajtlawa xborregos (Salmo 100:3).

Jehová kapulalin xlakskujnin. Akxni borregos nitu kgalhikgo tiku nakapulalin tsankgakgo. Nachuna, lakaskinaw tamakgtay xlakata natekgsaw xatlan tiji (Jeremías 10:23). David kinkawaniyan pi Dios kapulalin xlakskujnin «latani wi xtakni sakgat» chu «niku wi lhuwa chuchut» chu niku «xatankswa tiji» (versículo 2 chu 3). Liʼakxilhtit xla chatum mapuchwayanina tlawa pi tlakg nalipawanaw Jehová. Komo tlawayaw tuku wan Biblia mastayaw talakaskin nakinkapulalinan xʼespíritu Dios, chuna nakgalhiyaw tapaxuwan, ni katipekuaw chu tlan natawilayaw.

Jehová kuentajtlawa xborregos. Akxni ni wi xmapuchwayanina, borregos pekuankgo chu nituwa wi tuku nakatlawanikan. Jehová liwana kawani kskujnin pi ni xlipekuanatkan maski natawilayaw «latani lijikwa [o lipekua] y snun kapokglhwa», uma wamputun akxni lu tuwa titaxtumakgolh kxlatamatkan (versículo 4). Putum kilhtamaku kakuentajtlawa chu skgalalh wi xlakata nakamakgtaya. Na tlan nakamaxki liskgalala chu litliwakga xlakata tlan natayanikgo taʼakglhuwit (Filipenses 4:13; Santiago 1:2-5).

Jehová kamawi xborregos. Chuna la borregos lakaskinkgo xtamakgtay xmapuchwayanina xlakata tlan nawayankgo, akinin lakaskinaw pi Dios nakinkamasiyaniyan tuku namatliwakglha kintakanajlakan (Mateo 5:3). Tlan limakgkatsiyaw xlakata katsiyaw pi Jehová kinkamaxkiyan tuku maklakaskinaw chu lu lhuwa tuku kamaxki xlakskujnin (versículo 5). Biblia chu likgalhtawakga nema anta takilhti, la revista nema likgalhtawakgapat, kinkamakgtayayan nalakgapasaw Dios, xlakata lamaw chu tuku natlawa Dios xpalakata latamanin.

David liwana xkatsi pi komo ni xtamakgatlinilh xMapuchwayanina xalak akgapun wa xkuenta tlawalh “chali chali kxlatamat” (versículo 6). ¿Makgkatsiputuna chuna la David? Talakaskin nakatsiniya la nalakgtalakatsuwiniya Jehová, akxni chuna natlawaya namakgkatsiya pi kuentajtlawaman Xalanka Mapuchwayanina tiku kamasiyani, xatapaxuwan kakuentajtlawa chu kamawi xlakskujnin tiku ni makgxtakgkgo (Isaías 40:11).

TEXTOS XALAK BIBLIA NEMA TLAN NALIKGALHTAWAKGAYA UMA PAPAʼ:

◼ Job 38 asta Salmo 25

[Notas nema wilakgo kpágina]