«Kakuentajtlawatit xborregos Dios nema kamakuentatlawiman»
«Kakuentajtlawatit xborregos Dios nema kamakuentatlawiman»
«Kakuentajtlawatit xborregos Dios nema kamakuentatlawiman ni kaj xafuerza, wata xatapaxuwan katlawatit.» (1 PED. 5:2, NM)
1. ¿Tuku xtitaxtumakgolh kstalaninanin Cristo akxni Pedro katsokgnilh xapulana carta?
AKXNI Pedro tsokgli xapulana xcarta, nialh makgas xtsankga akxni mapakgsina Nerón xkaputsastalanilh kstalaninanin Cristo kRoma. Pedro xkamatliwakglhniputun xtakanajlakan, xlakata Diablo xputsama la nakamatlawi tuku nitlan. Xlakata xtayanikgolh, xtalakaskin pi “lakatitum xlakapastakkgolh” (1 Ped. 5:6, 8). Na xtalakaskin makxtum xtawilakgolh. Pedro kawanilh: Ni la kaj «nalaxkaputunatit». Komo chuna xtlawakgolh xkitaxtulh la kaj “xlawaputunkgolh chatunu amakgapitsin” (Gál. 5:15).
2, 3. ¿Tiku ni natamastaniyaw nakinkamatlawiyan tuku nitlan, chu tuku naʼakxilhaw kʼuma artículo chu nema aku mima?
2 Chuna la ama kilhtamaku, la uku Akgskgawini putsama la nakinkamatlawiyan tuku nitlan (Apo. 12:12). Nachuna talakatsuwima «tlanka takatsanajwat, lantla niʼukxniku alay xtachuna, asta akxni Dios timalakatsukilh katuxawat» (Mat. 24:21). Chuna la natalan kxapulana siglo, na nakuentajtlawayaw pi ni nalatakgalhiyaw taʼakglhuwit. Xlakata tlan nalatalalinaw na talakaskin pi nakinkamakgtayakgoyan lakgkgolotsin xalak congregación.
3 ¿Tuku nakamakgtaya lakgkgolotsin xalak congregación pi tlakg xlakaskinka naʼakxilhkgo uma limapakgsin: «Kakuentajtlawatit xborregos Dios nema kamakuentatlawiman»? (1 Ped. 5:2, NM.) ¿La xlitlawatkan uma taskujut? Kʼuma artículo naʼakxilhaw uma pulaktiy. Chu artículo nema aku namin naʼakxilhaw la putum natalan namakgantaxtikgo uma tastakyaw: «Kakamaxkitit kakni tiku lhuwa skujkgo kmilakgstipankan» (1 Tes. 5:12, NM). Tuku naʼakxilhaw nakinkamakgtayayan ni nakinkaʼakgchipayan kintalamakgasitsinkan chu na liwana nakatsiyaw pi wa kinkatalachipaman (Efe. 6:12).
«Kakuentajtlawatit xborregos Dios»
4, 5. ¿La xliʼakxilhatkan lakgkgolotsin congregación? Kalichuwinanti akgtum liʼakxilhtit.
4 Pedro kalistakyawalh lakgkgolotsin xapulana siglo pi liwana xkuentajtlawakgolh xkachikin Dios nema xkalakgayawakanit (kalikgalhtawakga 1 Pedro 5:1, 2). Maski Pedro xpulalin congregación, liwana katachuwinalh amakgapitsi lakgkgolotsin chu ni takgaxmatli la tiku mapakgsinan, xkatsi pi na kaj kgolotsin xwanit (Gál. 2:9). Lakgkgolotsin tiku Pulalinkgo xTatayananin Jehová, na kawanikgo lakgkgolotsin xalak congregación liwana nakuentajtlawakgo xkachikin Dios.
5 Apóstol makglhuwa kawanilh lakgkgolotsin pi «xborregos Dios» nema xkalakgayawakanit. Liwana xkatsikgolh pi congregación xla Jehová chu Jesucristo, chu xʼamakgolh mastakgo kuenta xlakata la xkakuentajtlawakgolh. Kawiliw akgtum liʼakxilhtit: Chatum amigo wi niku an lakgamakgat chu kinkaskiniyan kakuentajtlawaniw xkamanan. ¿Ni xlikana pi liwana xkakuentajtlawaw? Chu komo chatum xtatatlalh tunkun xliw kpumakuchin. Nachuna, lakgkgolotsin katsikgo pi kalakgayawakanit xcongregación Dios nema «Jesús limakamastalh xlatamat chu stajmakgalh xkgalhni» (Hech. 20:28). Liwana katsikgo pi chatunu chatunu xalak congregación xkgalhni Jesucristo litamawakanit, xlakata katsikgo pi namastakgo kuenta, kamaxkikgo tuku lakaskinkgo chu kuentajtlawakgo.
6. ¿La xlituwa xwanit xtaskujutkan tiku xkuentajtlawakgo borregos nema lichuwinan Biblia?
6 Tlan natamalakxtumiyaw la xkuentajtlawakgo borregos nema lichuwinan Biblia, taskujut nema tlawakgo tiku pulalinankgo congregación la uku. Akxni xmapuxwayanikgo borregos, lipekua xchichinan chu xmin kilhtamaku xlonkgnan chu asta tantaskaka xkakuentajtlawakgo (Gén. 31:40). Chu xlatamat kalipekua xwilikgo xlakata nakalakgmaxtukgo xborregos. Chuna tlawalh David akxni kgawasaku xwanit akxni kalakgmaxtulh xborregos xlakata tantum león chu tantum oso xkawaputun. Lichuwinalh pi kalichipalh xkgalhchixit, kamalakanilh chu kamakgnilh (1 Sam. 17:34, 35). ¡Lu litasiyalh pi ni xpekuan akxni katalakatsuwinilh xalaklipekua animales! Nituku xmakgakglha akxni xtalakaskin pi nalakgmaxtu xborregos.
7. ¿Tuku tlawakgo lakgkgolotsin akxni chatum tala akgskgawima Satanás?
7 La uku, lakgkgolotsin skgalalh wilakgolh xlakata Satanás ni nakaʼakgskgawi xkachikin Dios. Komo chatum tala naʼakgskgawi Satanás, na limasiyakgo pi ni pekuankgo la David chu kalakgmaxtukgo. Akxni akxilhkgo pi chatum tala tlawama tuku tasiya pi nalin ktalakgalhin, tunkun tachuwinankgo (kalikgalhtawakga Judas 22, 23). Chu komo chatum tala wi tuku akgspulalh, makgtayakgo la akxni kamakuchikan laktsu borregos chu likgalhtawakganikgo xTachuwin Dios nema tlan nalimakgkatsi xtachuna akxni wi tiku limaktlawakan pomada. Xlikana pi nila chuna xtlawakgolh komo ni xkgalhikgolh xtamakgtay Jehová.
8. ¿Niku kapulalinkgo lakgkgolotsin natalan chu la tlawakgo?
8 Chuna la maputswayananin xkalinkgo borregos niku xʼanan xalakwan sekget niku anan chuchut, lakgkgolotsin na kapulalinkgo natalan kcongregación. ¿La tlawakgo? Kawanikgo pi ni kamakgxtakgkgolh tamakxtumit, xlakata anta «kxkilhtamaku nakamaxki[kan] tuku nawakgo» chu natatliwakglha xtakanajlakan (Mat. 24:45, NM). Nachuna limaxtukgo kilhtamaku xlakata nakamakgtayakgo tiku xlajwanama xtakanajlakan chu liwana kamasiyanikgo tuku wan xTachuwin Dios. Chu ¿tuku tlawakgo komo chatum tala makgxtakgnit Jehová pero taspitputumpara? Ni makgapekuankgo, wata tlan likatsinikgo chu masiyanikgo la namakgantaxtikgo tastakyaw xalak Biblia.
9, 10. ¿La nakamakgtayakgo lakgkgolotsin xnatalan tiku xlajwanama xtakanajla?
9 Akxni tatatlayaw, ¿tukuya makuchina lakaskinaw nakinkamakuchiyan? Wantiku kaj lakapala kinkakgalhskinan tuku laniyaw xlakata lhuwa tiku nakamakuchi? ¿O lakaskinaw tiku liwana kinkakgaxmatniyan chu kinkawaniyan tuku tajatat kgalhiyaw chu tuku natlawayaw xlakata napaksaw? Xlikana pi wa tiku liwana kinkakgaxmatniyan.
10 Uma liʼakxilhtit limasiya tuku lu xlakaskinka natlawakgo lakgkgolotsin, akxni tachuwinankgo chatum tala tiku xlajwanama xtakanajla, liwana nakgaxmatnikgo chu namakgtayakgo natatliwakglhpara xtakanajla akxni «kxtukuwani Jehová naʼakmawakakan aceite» (kalikgalhtawakga Santiago 5:14, 15, NM). Chuna, xalakwan xTachuwin Dios nakamakgtayakgo tlakg tlan namakgkatsikgo, chuna la xlitamakgkatsi bálsamo xalak Galaad (Jer. 8:22; Eze. 34:16). Akxni makgantaxtikgo tuku wan Biblia, tiku xlajwanama xtakanajla, natatliwakglhpara. ¡Lu tlan komo lakgkgolotsin nakakgaxmatnikgo xnatalan chu nakatatlawakgo oración!
«Ni kaj xafuerza, wata xatapaxuwan»
11. ¿Tuku kamakgtaya lakgkgolotsin liwana nakakuentajtlawakgo xnatalan?
11 Alistalh, Pedro kamalakapastakalh tiku xpulalinkgo congregación tuku xtlawakgolh chu tuku ni xtlawakgolh akxni xkastakyawakgolh natalan. Pulana kawanilh: «Ni kaj xafuerza, wata xatapaxuwan katlawatit». ¿Tuku xlakata lu xatapaxuwan nakamakgtayakgo lakgkgolotsin xnatalan? ¿Tuku xlakata Pedro lu xkamakgtayaputun xnatalan tiku xborregos Jesús litaxtukgo? Xlakata lu xpaxki Jesús (Juan 21:15-17). Xlakata paxkikgo, lakgkgolotsin “nialh wa akstu kalatamanikan, wampi wa latamanikgo yama nti mpalakanikgolh” Cristo (2 Cor. 5:14, 15). Xlakata paxkikgo Jesús, Dios chu xnatalan, uma kamakgtaya pi lu tlan naskujnikgo xkachikin Dios chu nalimaxtukgo kilhtamaku, xtuminkan chu xlitliwakgakan (Mat. 22:37-39). Chu xatapaxuwan tlawakgo chu ni kaj xatasitsin.
12. ¿La xlilhuwa xkamakgtaya Pablo xnatalan?
12 ¿La xlilhuwa kamakgtayakgo xnatalan lakgkgolotsin? Kuentajtlawakgo chuna la xtlawa Pablo, tiku nachuna xtlawa la Jesús (1 Cor. 11:1). Apóstol chu tiku xtalatapulikgo lu xkapaxkikgo xnatalan xalak Tesalónica wa xlakata ni kajwatiya pi xkamasiyanikgo «xasasti xtamakatsinin Dios, wa mpi na xawa ntu lhuwa [x]latamatkan» xmastakgo. Chu putum kilhtamaku lu limasiyakgolh pi lu xkapaxkikgo, «xtachuna nchatum mpuskat nti lakgkatsan [...] xlakgskgatan» (1 Tes. 2:7, 8). Apóstol xkatsi pi chatum xatse lhuwa tuku limakgxtakga kaj xlakata tlan nakuentajtlawa kskgata, asta taki makgat tsisni chu matsiki.
13. ¿Tuku xlitlawatkan lakgkgolotsin xlakata tlan nakakuentajtlawakgo xfamilia chu congregación?
13 Pero, lu xlakaskinka liwana nalakkaxwilikgo xtaskujutkan lakgkgolotsin xalak congregación, xlakata na tlan nakuentajtlawakgo xfamilia (1 Tim. 5:8). Katsiyaw pi kilhtamaku nema limaklakaskinkgo xlakata kamakgtayakgo congregación tlan xlimaklakaskinkgolh xlakata xkatatawilakgolh xfamilia. Wantuku nakamakgtaya nakuentajtlawakgo xfamilia chu congregación, wa nakawanikgo amakgapitsi natalan kaminkgolh akxni kakninanikgo Dios kfamilia. Chuna tlawa Masanao chu xfamilia. Uma kgolotsin xalak Japón akglhuwata kata kawani kaminkgolh kxchik tiku nina tamakgaxtokgkgo, tiku xtlat o xtse ni xtatayana Jehová. Chu chuna la titaxtutilhalh kilhtamaku makgapitsi na lakgkgolotsin litaxtukgolh chu nachuna tlawakgo la Masanao.
«Ni [...] kaj natlajaputunatit ntumin, wampi xlipaks mintakgpuwantinkan nalitlawayatit»
14, 15. ¿La tlan natlawakgo lakgkgolotsin xlakata ni “nalitlajaputunkgo ntumin”, chu la natlawakgo la tlawalh Pablo?
14 Pedro na lichuwinalh pi lakgkgolotsin ni nakuentajtlawakgo congregación kaj xlakata “nalitlajaputunkgo ntumin, wampi xlipaks xtaʼakgpuwantinkan xtlawayakgolh”. Maski lhuwa kilhtamaku limaxtukgo xlakata natlawakgo tuku kalakgayawakanit, ni skinkgo nakaxokgonikan. Pero Pablo akxilhli pi lu xtalakaskin xkawanilh pi ni “xtlajaputunkgolh ntumin”. Max nituwa natsukukgo akxilhkgo xtaskujutkan xlakata tlan nalitlajakgo tumin, chu na natlawakgo la amakgapitsi tiku pulalinkgo «xaLanka Babilonia», tiku lu lhuwa kgalhikgo tuku xalakswan chu taparaxla pero lhuwa tiku katapakgsinikgo nitu kgalhikgo (Apo. 18:2, 3). Lakgkgolotsin nipara tsinu chuna xlitlawatkan.
15 Lu tlan komo chuna natlawakgo chuna la tlawalh Pablo. Xlakata apóstol xwanit tlan kaj “xkamamakgatsankganilh” natalan xalak Tesalónica. Pero Pablo «tantaku tantaskaka» kskuja chu wa: «Na ni mpala kaj xakmakgwayaw» chu ni kxokgolh (2 Tes. 3:8). La uku, lhuwa lakgkgolotsin chu superintendentes viajantes na lu tlan liʼakxilhtit wilikgo. Maski xatapaxuwan makglhtinankgo tuku katawakgo o kamaxkikgo xnatalan, pero “ni kamamakgatsankgakgo” (1 Tes. 2:9).
16. ¿Tuku kilhchanima “lhuwa naskujkgo” akxni napulalinkgo congregación?
16 Nachuna tiku pulalinkgo congregación “lhuwa skujkgo”. Xlikana xatapaxuwan skujkgo chu lu kamakgtayakgo natalan. Pero maski lu kamakgtayaputunkgo ni fuerza kawanikgo wi tuku natlawakgo o kaj nalatlajaputunkgo (Gál. 5:26). Katsikgo pi tanu tanu la likatsikgo chatunu chatunu natalan chu kamakgtayakgo xlakata xatapaxuwan naskujnikgo Jehová.
«Ni tlanka nakamakgkatsikanatit, [...] wata xliʼakxilhtit kxkachikin Dios nawanatit»
17, 18. 1) ¿Tuku xlakata tuwa xmakgkatsikgo apóstoles nataktujukgo? 2) ¿Tuku kinkamasiyaniyan nema ni kilitlawatkan?
17 Chuna la akxilhwi, lakgkgolotsin xlilakapastakatkan pi congregación xla Jehová. Wa xlakata, ni xmapakgsinakan nalitaxtuputunkgo, tiku Dios “kamakuentajlima” (kalikgalhtawakga 1 Pedro 5:3). Milh kilhtamaku xʼapóstoles Jesús xlakaskinkgo wi tuku xkalakgayawaka xlakata xlakaskinka xkaliʼakxilhka. Chuna la mapakgsinanin tiku xlamakgolh ama kilhtamaku, max apóstoles na lu xkgalhiputunkgo limapakgsin (kalikgalhtawakga Marcos 10:42-45).
18 La uku kstalaninanin Cristo tiku «mpuxkunaniputun [k]xtaskujut Dios» lu tlan komo natlawakgo uma takgalhskinin: «¿Tuku xlakata klakaskin nakilakgayawakan uma taskujut?» (1 Tim. 3:1). Nachuna tiku lakgkgolotsina litaxtukgo xlitlawatkan uma takgalhskinin: «¿Nachuna kiʼakgspulama la apóstoles?». Chuna la apóstoles tiku xlakaskinkgo nakamalankikan, namin kilhtamaku nachuna nakaʼakgspula lakgkgolotsin xala uku. Wa xlakata lu skgalalh xlitawilatkan.
19. ¿Tuku xlilakapastakatkan lakgkgolotsin akxni wi tuku lakkaxwilikgo xlakata kuentajtlawakgo natalan?
19 Pero na natalakaskin pi tiku pulalinkgo congregación lakatanks nakastakyawakgo natalan. La akxilhkgo pi natalan katlawaniputun tuku nitlan tiku xtachuna «xawananin lapanit» (Hech. 20:28-30). Pablo wanilh Tito: «Akgstitum milimasiyut [...] wampi na kalakakilhnikgo yama wanti lakatayaputunkgo, wampi ankgalhin kakgalhchiwinanti lantla nti xlikana kgalhi xlimapakgsin» (Tito 2:15, Hua Xasasti Talaccaxlan, 1999). Pero akxni nakastakyawakgo namaxkikgo kakni chu nakuentajtlawakgo la nakawanikgo. ¿Tuku xlakata? Katsikgo pi xlakata tastakyaw nachan kxnakujkan chu lakaskinkgo nalakgpalikgo xlatamatkan, nitlan kaj watiya naliwanikan tuku nitlan tlawakgonit wata xatapaxuwan kamakgtayakgo.
20. ¿Tuku xlakata kamakgtaya lakgkgolotsin akxni likgalhtawakgakgo tuku tlawalh Jesús?
20 Chuna la tlawalh Jesús lu makgtayanan. Xlikana akxni chatum kgolotsin likgalhtawakga tuku wankgo Evangelios, nachuna kapaxki tiku xalak congregación (Juan 13:12-15). Chu lu tlan limakgkatsiyaw akxni akxilhaw la lu tlan kamasiyanilh Jesús kstalaninanin akxni xlichuwinan Dios. Lu kamakgtayalh pi xMakgalhtawakganakan ni tlankajwa xmakgkatsikan chu wa xlakata putum kilhtamaku tsukukgolh makgantaxtikgo uma lu xlakaskinka tastakyaw: «Kalataktujunitit nchatunu amakgapitsin» (Fili. 2:3). La uku, liʼakxilhtit nema wililh Jesús kamakgtaya nachuna natlawakgo lakgkgolotsin chu “xliʼakxilhtit kxkachikin Dios nawankgo”.
21. ¿Tuku namakgamakglhtinankgo lakgkgolotsin?
21 Pedro limasputulh tastakyaw akxni kawanilh xatalaksakni tiku natatawilakgo Cristo kʼakgapun: «Namakgamakglhtinanatit wixin mincoronajkan wa ntu nkgalhiy xkakni» (kalikgalhtawakga 1 Pedro 5:4). Chu lakgkgolotsin nema litaxtukgo «amakgapitsi borregos» nakalilakgalhamankan pi wa nakakuentajtlawakgo xkachikin Dios kKatiyatni chu tiku nakapulalin wa «xapuxku xkuentajtlawana borregos» (Juan 10:16, NM). Kʼartículo nema mima natalichuwinan pulaklhuwa la tlan nakamakgtayayaw tiku pulalimakgolh congregación.
Tuku akxilhwi
• ¿Tuku xlakata lu tlan pi Pedro kastakyawalh lakgkgolotsin xlakata xkuentajtlawakgolh xborregos Dios?
• ¿La xlikuentajtlawatkan lakgkgolotsin natalan tiku xlajwanama xtakanajlakan?
• ¿Tuku kamalakpuwani lakgkgolotsin nakuentajtlawakgo xborregos Dios?
[Takgalhskinin]
[Epígrafe xla página 25]
Chuna la tiku xkuentajtlawakgo borregos xalamakgasa, lakgkgolotsin kuentajtlawakgo congregación nema kalakgayawakanit
