Tuku katsiputunkgo tiku likgalhtawakgakgo

¿Nalakgachaniyaw akxni nalatamayaw kParaíso?

▪ Biblia kinkawaniyan pi tlan nalatamayaw putum kilhtamaku kʼakgtum paraíso unu kKatiyatni (Salmo 37:29; Lucas 23:43). Pero ¿nalakgachaniyaw akxni nalatamayaw kparaíso niku ni katiʼanalh talakgalhin?

Lhuwa chuna lakpuwankgo xlakata lakgskgalalan lakchixkuwin akxilhkgonit pi tiku lhuwa lakgachanikgo kxlatamat tsukukgo lu lilipuwankgo chu lu lilakgaputsakgo chu katuwa tuku nitlan nakaʼakgspula. Nachuna, tiku nialh latamaputunkgo o nialh lakgatikgo tuku tlawakgo max natsukukgo lhkititnankgo. Pero ¿nitu katilipaxuwaw kparaíso? ¿Kaj akgtum taskujut natlawayaw putum kilhtamaku?

Pulana, kalakapastakwi pi Jehová Dios, Tiku matsokgninalh Biblia, wa tiku malaknu latamat nema ni kgalhi lisputni (Juan 3:16; 2 Timoteo 3:16). Tuku liwana talilakgapasa Dios wa tapaxkit (1 Juan 4:8). Lhuwa kinkapaxkiyan chu kinkamaxkinitan putum tuku lipaxuwayaw (Santiago1:17).

Kimalakatsukinakan katsi pi xlakata napaxuwayaw kilikgalhitkan akgtum taskujut nema tlan nalimakgkatsiyaw (Salmo 139:14-16; Eclesiastés 3:12). Anta kParaíso niti katimakgkatsika la akgtum máquina, xlakata putum tuku natlawakgo nalipaxuwakgo chu nachuna tiku kapaxkikgo (Isaías 65:22-24). ¿Xlakgachani komo putum kilhtamaku xtlawa tuku lu lakgatiya?

Nachuna kalakapastakwi pi Jehová ni kaj katiwa tiku nakamaxki latamat kParaíso, kajwatiya tiku natlawakgo la xKgawasa, tlan nalatamakgo (Juan 17:3). Akxni Jesús xlama kKatiyatni, xatapaxuwan tlawalh xtalakaskin xTlat. Kamasiyanilh kstalaninanin xlakata tuku kawanilh chu tuku tlawalh, pi tapaxuwan nema ni sputa kgalhiyaw akxni kamaxkiyaw amakgapitsin tuku kgalhiyaw nixawa akxni makglhtinanaw (Hechos 20:35). Akxni Katiyatni akgtum Paraíso nawan, putum latamanin namakgantaxtikgo uma akgtiy lanka limapakgsin: napaxkiya Dios chu nakapaxkiya latamanin (Mateo 22:36-40). Kalakpuwanti pi katawila tiku tlan likatsikgo chu paxkikgoyan chu lakgatikgo taskujut nema tlawakgo. ¿Xlakgachani komo xkatalalipi tiku chuna likatsikgo?

¿Tuku na natlawayaw kParaíso? Chali chali wi tuku nakatsiniyaw xlakata kiMalakatsukinakan. Lhuwa tuku takatsi tuku tlawanit Jehová (Romanos 1:20). Pero asta la uku, kaj tsinu lakgapasaw xlakata tuku tlawanit kiMalakatsukinakan. Akglhuwata mil kata, Job tiku ni xmakgxtakga Dios tsukulh lakpuwan xlakata tuku xlakgapasa nema xtlawanit Dios, chu uma tuku wa nema lu xlikana. «Umakgolh [kaj] xkilhpan xtiji, ¡kaj tsinu tuku takatsi xlakata tuku tlawanit! Chu jilinat nema palha takgaxmata, ¿tiku naʼakgatekgsa?» (Job 26:14.)

Maski putum kilhtamaku nalatamayaw, nikxni putum nakatsiyaw xlakata Jehová chu tuku tlawanit. Biblia kinkawaniyan pi Dios wilinit kkinakujkan pi putum kilhtamaku nalatamaputunaw. Pero na kinkawaniyan pi «nikxni katikatsiw putum tuku tlawanit xaxlikana Dios la matsukilh chu makgalhsputulh» (Eclesiastés 3:10, 11). ¿Nalakgachaniya chu nialh katikatsiputu xlakata kiMalakatsukinakan?

La uku, tiku lu skujkgo xlakata nakamakgtayakgo amakgapitsi chu malankikgo Dios ni lakgachanikgo. Komo chuna nalimaklakaskinaw kinkilhtamakujkan nikxni katilakgachaniw maski putum kilhtamaku nalatamayaw.

[Epígrafe xla página 21]

Globo terráqueo: xla Image Science and Analysis Laboratory, NASA-Johnson Space Center; galaxia: The Hubble Heritage Team (AURA/STScI/NASA)