Xalakwan tamakatsin nema lu lakaskinaw
Xalakwan tamakatsin nema lu lakaskinaw
«Xatlan tamakatsinin; mpi wa xlitliwakga Dios, lantla nalilakgtaxtukgoy.» (ROM. 1:16)
1, 2. ¿Tuku xlakata lu lichuwinanaw «xatlan tamakatsin xla tapakgsin»?
MAX milh kilhtamaku wix wanti o lakpuwanti: «Lu klakgati chali chali klichuwinan xalakwan xalaksasti». Xlakata akinin xlakskujnin Jehová akgatekgsaw o makgachakgxiyaw pi lu xlakaskinka nalichuwinanaw «xatlan tamakatsin xla tapakgsin». Max liwana katsiyaw tuku Jesús tiwa xlakata uma taskujut (Mat. 24:14).
2 Akxni lichuwinanaw «xatlan tamakatsin xla tapakgsin» chuntiya tlawamaw taskujut nema Jesús malakatsukilh (kalikgalhtawakga Lucas 4:43). Xlikana pulaktu tuku lu kamasiyaniyaw wa pi Dios nialh makgas nalakkaxwili tuku lipatinamakgolh latamanin. Akxni namin «ntlanka takatsanajwat», namalakgsputu nixaxlikana takanajla chu namalakgsputu putum tuku nitlan (Mat. 24:21). Xlikana, na kawaniyaw pi xTamapakgsin Dios natlawa pi Katiyatni akgtum paraíso nawan niku lu xatapaxuwan natawilayaw. Xlikana, «xatlan tamakatsin xla tapakgsin» na watiya xkilhchanima akxni «Dios ntiʼalimakatsinilh Abraham xatlan tamakatsinin, tiwanilh: “Wix mimpalakata nalisikulunalakgoy xlikatlanka nkatuxawat”» (Gál. 3:8).
3. ¿Tuku xlakata wanaw pi Pablo lu lichuwinalh xatlan tamakatsin kRoma?
3 Pero max wi tuku nitu lu lichuwinamaw nema lu xlakaskinka xlakata «xatlan tamakatsin» nema lu xlikgaxmatatkan latamanin. Kaʼakxilhwi pi kcarta nema Pablo kamalakgachanilh Romanos, makgkututu limaklakaskilh tachuwin «xatlan tamakatsin» pero kaj makgtum lichuwinan Tamapakgsin (kalikgalhtawakga Romanos 14:17). ¿Tuku xkilhchanima xatlan tamakatsin nema makglhuwa lichuwinalh chu tuku xlakata lu xlakaskinka kiliʼakxilhatkan? ¿Tuku xlakata putum kilhtamaku nakawaniyaw latamanin xlakata «xatlan tamakatsinin xla xtapakgsin Dios»? (Mar. 1:14; Rom. 15:16; 1 Tes. 2:2.)
¿Tuku xtalakaskin nakgaxmatkgo xalak Roma?
4. Akxni xapulana xatachin xlinkanit Pablo kRoma, ¿tuku pulaktiy nema lu xlakaskinka xlichuwinan?
4 Wantuku nakinkamakgtayayan liwana naʼakgatekgsaw uma wa naʼakxilhaw temas nema Pablo lichuwinalh kxapulana akxni tachin xwi kRoma. Biblia masiya pi akxni makgapitsi judíos kilakgapaxialhnankgolh, pulaktiy tuku tlawalh. Pulaktu «ntimalakatanksakgolh, chu lixakatlikgolh xtapakgsin Dios». Chu xlipulaktiy «xmakgpuwantinikgoy xpalakata Jesús». ¿La kitaxtulh? «Xkanajlakgoy makgapitsin wa ntu xlichuwinan, chi nchu wa amakgapitsin, ni xkanajlakgoy.» Alistalh Biblia na kinkawaniyan pi Pablo «lipaxuw xmakgamakglhtinankgoy wanti xla xlakgapaxialhnankgoy» chu chuntiya tlan xkalikatsini: «xliʼakgchuwinama xlimapakgsin Dios, chu na xmasiyuma xtamasiyun xpalakata [...] Jesucristo» (Hech. 28:17, 23-31). Chuna la akxilhaw makglhuwa xkawani xlakata xTamapakgsin Dios. Pero ¿tuku tlakg xlichuwinan? Wantuku tlakg xlakaskinka xlakata tamapakgsin: tuku lakgayawakanit Jesús xlakata natamakgantaxti tuku Dios lakapastaknit.
5. ¿Tuku lu xlakaskinka kalitachuwinalh Pablo xalak Roma?
5 Xtalakaskin pi putum xlakgapaskgolh Jesucristo chu xkanajlanikgolh. Carta nema Pablo kamalakgachani xalak Roma lichuwinan xlakata uma tuku lu talakaskin. Xapulana versículo wan, «Dios nti lhuwa xlipaks kinaku klakgachixkuwiy lantla kliʼakgchuwinan xatlan xtamakatsinin xKam». Alistalh na wa: «Ni klimaxanan xatlan tamakatsinin; mpi wa xlitliwakga Dios, lantla nalilakgtaxtukgoy xlipaks wa nti yama nkanajlay». Chu alistalh wampa «akxni nachin nkilhtamaku, wa Jesucristo naliwili Dios naputsananiy nchixkuwin [...] xtachuna lantla wan xatlan tamakatsinin». Chu uma tuku awatiya wan: «Asta kJerusalén, chu kxtuntamakni, chu asta kIlirico, kmakgantaxtinit nkaniwa ntani kliʼakgchuwinanit xatlan xtamakatsinin Cristo» (Rom. 1:9, 16; 2:16; 15:19). * ¿Tuku xlakata Pablo lhuwa kalitachuwinalh xlakata Cristo natalan xalak Roma?
6, 7. ¿La tsukulh congregación xalak Roma chu niku xalanin xwankgonit natalan?
6 Ni lu liwana katsiyaw la tsukulh congregación xalak Roma. Max makgapitsi judíos ankgolh tawilakgo kRoma o tiku ni judíos xwankgonit nema nakanajlanikgolh Jesús akxni xʼankgonit kJerusalén kPentecostés kata 33 chu alistalh amparakgolh kRoma (Hech. 2:10). Max kstalaninanin Cristo tiku xʼankgo stanankgo o paxialhnankgo kRoma lichuwinankgolh xaxlikana takanajla. Maski ni lu liwana katsiyaw, akxni Pablo tsokgli xcarta kata 56, congregación akglhuwata kata xwi (Rom. 1:8). ¿La xlikatsikgo natalan xalak Roma?
7 Makgapitsi judíos xwankgonit. Akgtum liʼakxilhtit, Pablo kamalakgachanilh tamakgachipat Andrónico chu Junias, tiku kawani “natalan”, max xlakata xparientes chu na judíos xwankgonit. Áquila chu Priscila na judíos xwankgonit chu nawatiya xliskujkgo kRoma tuku xliskuja Pablo, xtlawakgo laktsu chiki (Rom. 4:1; 9:3, 4; 16:3, 7; Hech. 18:2). Chu amakgapitsi natalan tiku kamalakgachanilh tamakgachipat ni judíos xwankgonit. Makgapitsi max «skujkgoy kxchik ntlanka puxku César» tiku xlakskujnikgo mapakgsina chu soldados xwankgonit (Fili. 4:22; Rom. 1:6; 11:13).
8. ¿Tuku tuwa xtitaxtumakgolh romanos?
8 Chuna la akinin, natalan xalak Roma, tuwa tuku xtitaxtumakgolh. Pablo wan: «Xpalakata mpi paks lakgalhinankgolh, na lu wa makgat lamanikgo [...] Dios» (Rom. 3:23). Chuna la akxilhaw lu xtalakaskin putum tiku Pablo xkamalakgachanima carta. Xkanajlakgolh pi lakgalhinanin chu xmakgamakglhtinankgolh tuku Dios xkamaxkima.
Kilikatsitkan pi lakgalhinanin
9. Chuna la lichuwinan Pablo, ¿la kinkamakgtayayan xatlan tamakatsinin?
9 Xapulana versículos kcarta nema kamalakgachanilh, Pablo lichuwinalh la lu tlan xkamakgtayalh xalakwan xalaksasti tamakatsin nema makglhuwa lichuwinalh: «Ni klimaxanan xatlan tamakatsinin; mpi wa xlitliwakga Dios, lantla nalilakgtaxtukgoy xlipaks wa nti yama nkanajlay, wa judío, chu xawa griego». Chuna la wan apóstol, putum judíos chu tiku ni judíos tlan xlakgtaxtukgolh. Pero xtalakaskin xlimasiyakgolh pi xkanajlakgo, Pablo kamalakapastakalh tuku lu xaxlikana lichuwinalh palakachuwina Habacuc Pablo wa: «Wa nti akgstitum liʼukxilha Dios, kaj xtakanajla nalilatamay» (Rom. 1:16, 17; Hab. 2:4; Gál. 3:11; Heb. 10:38). Pero ¿tuku xlakata akxtum talichuwinan xatlan tamakatsinin nema lakgmaxtunan chu “paks [latamanin] lakgalhinankgonit”?
10, 11. ¿Tuku xlakata makgapitsi tunkun akgatekgskgo tuku wamputun Romanos 3:23 chu amakgapitsi ni?
10 Xlakata natatliwakglha xtakanajla chatum lataman chu tlan nalakgtaxtu, pulana xlikatsit pi lakgalhina. Tiku stakkgonit niku kanajlanikan Dios chu tsinu lakgapaskgo Biblia ni tuwa akgatekgskgo (kalikgalhtawakga Eclesiastés 7:20). Niku chuna kamakgastakkan chu asta tiku ni lu kanajlakgo tuku wa Pablo pi «paks [latamanin] lakgalhinankgolh» tsinu akgatekgskgo tuku xwamputun (Rom. 3:23). Pero min kilhtamaku natalan akxni ankgo lichuwinankgo Dios katekgskgo tiku ni akgatekgskgo tuku xwamputun Pablo.
11 Kmakgapitsi países, latamanin ni katsikgo pi akxni lakachinaw lakgalhinanin akinin chu talakgalhin lamatitaxtinikan. Pero katsikgo pi minkilhtamaku tlawakgo tuku nitlan. Na akxilhkgo pi putum nachuna kaʼakgspula. Pero xlakata la kamakgastakka ni kamakgtaya naʼakgatekgskgo tuku xlakata anan talakgalhin. Chu tuku tlakg nitlan, max kxtachuwin nema chuwinankgo takgatekgsa pi wantiku lakgalhina litaxtu wa tiku lakatsala limapakgsin o tlawa tuku nitlan. Akxni wi tiku chuna makgastakkan ni akgatekgsa tuku Pablo wa, xlakata lakpuwan pi ni lakgalhina.
12. ¿Tuku xlakata lhuwa latamanin ni kanajlakgo pi akinin lakgalhinanin?
12 Asta kmakgapitsi kachikinin niku wankgo pi kstalaninanin Cristo, lhuwa tiku ni kanajlakgo pi lakgalhinanin akinin. ¿Tuku xlakata? Xlakata maski minkilhtamaku ankgo ksikulan, wankgo pi tuku wan Biblia xlakata Adán chu Eva kaj akgtum cuento. Amakgapitsin stakkgonit niku kaj tsinu o nipara tsinu kanajlanikgo Dios. Ni kanajlakgo pi lama Dios chu lakkaxwilinit la nalinaw kilatamatkan, chu na ni kanajlakgo pi talakgalhin komo ni nakgalhakgaxmatkgo tuku Dios lakaskin. Xtachuna la tiku kalichuwinalh Pablo chu kawanilh: «Ni mpala xkgalhiyatit ntakgalhkgalhitin, chu na ni xkgalhiyatit Dios lantla xlapatit yunu nkatuxawat» (Efe. 2:12).
13, 14. 1) ¿Tuku xlakata nila katapatikan tiku ni kanajlanikgo Dios chu talakgalhin? 2) ¿Tuku tlawamakgolh makgapitsin xlakata ni kanajlanikgo xaxlikana Dios?
13 Pablo lichuwinalh pi maski wi tiku chuna makgastakka, uma ni tlawa pi nialh nakanajlani Dios chu pi lakgalhinanin akinin. Xapulana tuku xlakata kanajlayaw pi lama Dios wa tuku anan xlikalanka kakilhtamaku (kalikgalhtawakga Romanos 1:19, 20). Chu uma kinkamasiyaniyan tuku akxilhli Pablo akxni xwi kRoma chu kamalakgachanilh carta Hebreos anta wan: «Wampi xlipaks nchiki, fuerzaj wi nti ntlawanit; wampi wa nti malakatsukulh xlipaks nkatuwaj, wa Dios» (Heb. 3:4). Chu uma tuku lichuwinan limasiya pi wi chatum Malakatsukina tiku tlawalh putum tuku anan kkakilhtamaku.
14 Wa xlakata akxni Pablo katsokgnanilh romanos tlan lakatanks xkawani pi «ni la ntamatsankgananikgoy» o nila xkatapatikan putum latamanin, israelitas chu tiku ni israelitas xwankgonit nema xkakninanikgo ídolos. Chu nachuna tiku xtlawakgo talakgxtumit nema ni xlitatlawat, akxni nitlan xlimaklakaskinkgo xmaknikan lakchixkuwin chu lakpuskatin (Rom. 1:22-27). Alistalh Pablo uma tuku wa pi xkanajla, «judíos, chu atanuj chixkuwin, mpi paks [...] talakgalhin lamakgo» (Rom. 3:9).
Talakapastakni «lichuwinan» xlakata talakgalhin
15. ¿Tiku kgalhikgo talakapastakni chu la kamakgtaya uma xlakata la nalinkgo xlatamatkan?
15 Carta nema kamalakgachanika Romanos lichuwinan apulaktu tuku xlakata kilikanajlatkan pi akinin lakgalhinanin chu talakaskin nakinkalakgmaxtukanan ktalakgalhin. Akxni lichuwinalh Limapakgsin nema Dios kamaxkilh xamakgan Israel, Pablo tsokgli: «Wa nti ntlawakgolh ntalakgalhin akxni xlakgapaskgoya xlimapakgsin Dios, watiya limapakgsin nalitakgastakyawakgoy» (Rom. 2:12). Alistalh na lichuwinalh pi minkilhtamaku latamanin xalak atanu kachikinin o atanu tachuwin tiku ni lakgapaskgo xlimapakgsin Dios «akstu lakapastakkgoy ntu xlitlawatkan limapakgsin». Umakgolh latamanin nitlan akxilhkgo tiku tatalakgxtumi xfamilia, tiku makgninan chu tiku kgalhanan. ¿Tuku xlakata? Xlakata chuna la wan Pablo putum kgalhiyaw kintalakapastaknikan (kalikgalhtawakga Romanos 2:14, 15).
16. ¿Tuku xlakata maski kgalhiyaw talakapastakni ni wamputun pi ni katitlawaw talakgalhin?
16 Pero, putum katsiyaw pi maski kintalakapastaknikan kinkawaniyan tuku tlan chu tuku nitlan, uma ni wamputun pi putum kilhtamaku natlawayaw tuku nakinkawaniyan. Akgtum liʼakxilhtit, israelitas xalamakgasa. Makglhuwa ni kuenta xtlawanikgo xtalakapastaknikan nema xkamaxkinit Jehová nipara Limapakgsin nema xwan pi nitlan kgalhanankan chu tiku akgskgawi xpuskat o xchixku (Rom. 2:21-23). Wa xlakata, tlakg lanka talakgalhin xtlawamakgolh. Lakgalhinanin xwankgonit xlakata nila xmakgantaxtikgo xlimapakgsin Dios chu xtalakaskin Jehová. Chu uma xtlawa pi nialh la xtalalinkgolh Dios (Lev. 19:11; 20:10; Rom. 3:20).
17. ¿Tuku kinkawaniyan Romanos nema tlan limakgkatsiyaw?
17 Xlakata tuku akxilhnitawa, max wi tiku nalakpuwan pi tuku wan Romanos, limasiya pi ni lu tlan wilaw kxlakatin Jehová. Pero Pablo wi tuku tlakg kinkawaniyan. Lichuwinalh xtachuwin David nema wi kSalmo 32:1, 2, Pablo wa: «Chapaxuwana lamakgo wa yama nti [...] [katapatikanit], chu wa yama nti ntakgtlapanikgonit xtalakgalhinkan. Chapaxuwana lama wa yama nchixku wa nti nialh lakgalhina liʼukxilha Dios» (Rom. 4:7, 8). Chuna la akxilhaw, Dios kinkatapatiyan kintalakgalhinkan, chu wa xlakata wi tuku lakkaxwilinit xlakata tlan nakamakgamakglhtinan latamanin.
Xalakwan tamakatsin nema lichuwinankgo Jesús
18, 19. 1) ¿Tuku lichuwinalh Pablo xlakata «xatlan tamakatsinin» kcarta nema kamalakgachanilh Romanos? 2) ¿Tuku kilitlawatkan xlakata namakglhtinanaw xtasikulunalin xTamapakgsin Dios?
18 ¡Lu tlan tamakatsinin! Uma kinkamalakpastakayan xalakwan xalaksasti tamakatsin nema lichuwinalh Pablo kRomanos. Chuna la akxilhwa apóstol tsokgli: «Ni klimaxanan xatlan tamakatsinin; mpi wa xlitliwakga Dios, lantla nalilakgtaxtukgoy xlipaks wa nti yama nkanajlay» (Rom. 1:15, 16).
19 Pero, uma xatlan tamakatsinin lichuwinan tuku lakgayawakanit Jesús chu la nakgantaxtu xtalakaskin Dios. Akgtum liʼakxilhtit, Pablo wan pi «xatlan tamakatsinin» nema xlichuwinama xʼama chin «nkilhtamaku, wa Jesucristo naliwili Dios naputsananiy nchixkuwin» (Rom. 2:16). Akxni chuna lichuwinalh ni xlimasiyama pi ni lu xlakaskinka «kxtapakgsin nCristo, chu Dios» chu tuku Jehová natlawa akxni namapakgsinan Cristo (Efe. 5:5). Pablo xlichuwinama pi tiku latamaputun kxTamapakgsin Dios chu makglhtinamputun xtasikulunalin, pulaktiy tuku xlitlawat: pulana, xlikatsitkan pi lakgalhinanin kxlakatin Dios chu xlipulaktiy, xlikanajlanitkan Jesucristo xlakata tlan nakatapatikan xtalakgalhinkan. Akxni akgatekgsaw chu tlan tlawayaw uma tuku Dios lakaskin chu akxilhaw tuku namakglhtinanaw kilhtamaku nema aku mima, wa xlakata tlan wanaw: «¡Lu tlan tamakatsin!».
20, 21. ¿Tuku xlakata liwana kilikatsitkan tuku wan Romanos akxni lichuwinanaw xatlan tamakatsinin chu tuku nakitaxtu?
20 Liwana kilikatsitkan uma xlakata xalakwan xalaksasti akxni lichuwinaw Dios. Pablo lichuwinalh tuku xwanit Isaías akxni wa: “Xlipaks wa nti yuma xkanajlanilh, [Cristo] ni katitamamaxanilh” (Rom. 10:11; Isa. 28:16). Klhuwa kachikinin niku katsikgo xlakata talakgalhin na lakgapaskgo Jesús. Pero kʼamakgapitsi kkachikinin ni katsikgo xlakata talakgalhin chu nipara lakgapaskgo Jesús. Wa xlakata akxni latamanin xalak uma kachikinin kanajlanikgo Dios chu xTachuwin, talakaskin nakawaniyaw tuku lakgayawakanit Jesús. Kʼartículo nema aku mima natalichuwinan uma xlakata xalakwan xalaksasti kcapítulo 5 xla Romanos. Uma max nakinkamakgtayayan akxni nalichuwinaw Dios.
21 Chuna la akxilhnitawa, carta nema kamalakgachanika romanos makglhuwa lichuwinan xalakwan xalaksasti chu wan pi «wa xlitliwakga Dios, lantla nalilakgtaxtukgoy xlipaks wa nti yama nkanajlay» (Rom. 1:16). ¡Lu lipaxuwayaw akxni makglhtinanaw uma tamakatsin chu kamakgtayayaw tiku xlikana katsiputunkgo nachuna natlawakgo! Lu lipaxuwayaw pi tiku paxkikgo xaxlikana takanajla nachuna wankgo chuna la Pablo wa kRomanos 10:15: «Kana lilakgatit [xtantunkan] nti liminkgoy, naliʼakgchuwinankgoy xatlan xtamakatsinin Dios» (Isa. 52:7).
[Notas nema wilakgo kpágina]
^ párr. 5 Amakgapitsi libros xalak Biblia na maklakaskinkgo uma tachuwin (Mar. 1:1; Hech. 5:42; 1 Cor. 9:12; Fili. 1:27).
¿Lakapastakaku uma?
• ¿Tuku talichuwinan kRomanos, xlakata xatlan tamakatsinin?
• ¿Tuku talakaskin naʼakgatekgskgo latamanin?
• ¿Tuku tasikulunalin tlan namakglhtinanaw xlakata «xatlan xtamakatsinin Cristo»?
[Takgalhskinin]
[Epígrafe xla página 13]
Xatlan tamakatsinin nema talichuwinan kRomanos, kilhchanima tuku Dios lakapastaknit natlawa nema lakgayawanit Jesús
[Epígrafe xla página 14]
Akxni lakachinaw liminaw tuku tlawa pi naniyaw: talakgalhin
