Kamaxkikan xatlan tamakatsin tiku nitu kgalhikgo

ANTA kxTachuwin Dios kinkawaniyan: «Pero ti limaxkgan, ti nila ti lekgawaj, Dios ni ama akgxtakgmakgan» (Salmo 9:18). Na lichuwinan xlakata kiMalakatsukinakan: «Akxni lakalitana mimakan, [...] kasikulanatlawaya wakg ti staknan» (Salmo 145:16). Uma tamalaknun xaxlikana. Dios tiku kgalhi putum litliwakga natlawa tuku natalakaskin xlakata putum nitu nakatsankgani. ¿Tuku talakaskin?

Chatum puskat xalak África tiku putsanan la xlilhuwa tumin anan kʼakgtum kachikin wa pi tlakg tlan xkakitaxtunilh países tiku nitu kgalhikgo komo xʼanalh «chatum mapakgsina xalakgalhamanina». Tuku lichuwinalh limasiya pi talakaskin tiku kgalhi litliwakga chu tlan xtapuwan xlakata chuna natlawa. Na xlimapakgsinat xlikalanka Katiyatni, xlakata anankgo chalhuwa mapakgsinanin uma tlawa pi naʼanan lhuwa latamanin tiku nitu kgalhikgo. Nachuna xlikgalhit litliwakga xlakata namasputu tuku tlawa pi kaʼanalh tiku nitu kgalhikgo, uma wamputun tiku xakstu kapaxkikan. ¿Niku natekgsaw uma xatlan mapakgsina?

Dios makamilh xKgawasa xlakata xkaliminilh xatlan tamakatsin tiku nitu kgalhikgo. Jesús lichuwinalh tuku xwanikanit akxni likgalhtawakgalh kxTachuwin Dios: «Wa kspiritu kimPuchinakan nkintalama, wa cha nkililaksakwililh naklimaxkikgoy limaxkganin xatlan tamakatsinin» (Lucas 4:16-18).

¿Tuku uma xatlan tamakatsinin?

Dios Mapakgsina tlawanit xKgawasa uma lu tlan tamakatsinin. Pulaklhuwa tuku xlakata Jesús lu tlan mapakgsina: 1) kgalhi litliwakga xlakata tlan nakamapakgsi putum latamanin, 2) kalakgalhaman tiku nitu kgalhikgo chu kamasiyani kstalaninanin na nakakuentajtlawakgo, chu 3) nakamasputu tiku akstu kapaxkikan. Kalichuwinaw xlakata uma.

1. Jesús tlan kamapakgsi putum kachikinin Anta kxTachuwin Dios wan pi Jesús maxkikanit «tamapakgsin [...] xlakata kachikinin, pulaklhuwa kachikinin chu tanu tanu tachuwin putum naskujnikgo» (Daniel 7:14). ¿La lakpuwana nawan latamat akxni kaj chatum mapakgsina natawila? Nialh katilalisitsinilh tuku anan kKatiyatni uma natlawa pi putum tlan nakakitaxtuni. Jesús liwana wa pi xla lu tlan mapakgsina nawan, xlakata kgalhi limapakgsin Jesús wa: «Xlipaks limapakgsin, ki[...]maxkinit nakkgalhiy nkakgapun, chu nkatiyatna» (Mateo 28:18).

2. Xkalakgalhaman tiku nitu xkgalhikgo Akxni xlichuwinama Dios kKatiyatni, Jesús kalakgalhamalh tiku nitu xkgalhikgo. Akgtum liʼakxilhtit, chatum puskat tiku makgasputli putum tuku xkgalhi kaj xlakata xkuchumputun, xamalh xlhakgat Jesús xlakata xlakpuwan pi napaksa. Akgkutiy kata uma puskat lhuwa xlakgstajtamakgama chu max xkgalhi anemia. Limapakgsin xwan pi putum tiku kxamalh lixkajni xʼama wan. Pero Jesús lakgalhamalh uma puskat chu wanilh: «Tsumat, wa mintakanajla, malakgtaxtinitan. Chapaxuwana nkapit, na nialh katikgalhi mintajatat» (Marcos 5:25-34).

Tuku masiyalh Jesús tlawa pi nalakgpalikgo xnakujkan latamanin, chu na nalakgalhamanankgo. Kalilakapastakti takgalhtin nema Jesús maxkilh chatum chixku akxni kgalhskilh la xtlawalh xlakata tlan xmakgapaxuwalh Dios. Chixku xkatsi pi Dios lakaskin napaxkiyaw kintalatamankan, pero tlawanilh uma takgalhskinin: «¿Wa yama nti lakatsu [kintalataman]?».

Jesús likgalhtilh akgtum parábola, xlakata samaritano nema tlan likatsi chu makgtayalh chatum chixku tiku taxtulh kJerusalén chu xʼama kJericó, makgkgalhananka chu atsinu «xmakgnikan». Chatum sacerdote tiku xtitaxtuma ktiji akxilhli chu alakatanu alh chu chatum levita nachuna tlawalh. «Wampi wa nchatum  samaritano nti xtiji tlawama anta, akxni ntichalh lakatsu ntani xma, lantla ukxilhli, kgayaj tikatsanilh.»

Makuchilh, lilh anta niku tlan xjaxli chu xokgonilh tiku makgwililh xlakata xkuentajtlawalh. Jesús kgalhskilh chixku: «¿Ti mpuwana nchatum yama xlikgalhatutukan, wa nti lakatsu [xtalamanan] nkitataxtulh yama nchixku ntichipakgolh nkgalhananin?». Xla kgalhtilh: «Wa yama wa nti nkgalhinilh ntalakgalhaman». Jesús wanilh: «Kapit, na chuna wix nkatlawa» (Lucas 10:25-37).

Tiku xtatayananin Jehová wankgo likgalhtawakgakgo tuku masiyalh Jesús, lakgpalikgo xtalakapastakni chu kamakgtayakgo tiku maklakaskinkgo tamakgtay. Akgtum liʼakxilhtit, kxlibro Women in Soviet Prisons (Las mujeres en las prisiones soviéticas), chatum puskat xalak Letonia tiku tsokga libros lichuwinalh, pi tatatlalh akxni kskujma kpulachin xla Potma, max xtitaxtuma kata 1960, uma tuku wa: «Akxni xaktatatla, [lakpuskatin tiku xtatayananin Jehová] wa kinkuentajtlawakgolh. Wa tiku tlakg tlan kinkuentajtlawakgolh». Chu na wampa: «Xtatayananin Jehová lu xlakaskinka akxilhkgo nakamakgtayakgo putum latamanin, chu ni akxilhkgo tukuya takanajla kgalhikgo o niku xala».

Anta Ancon (Ecuador) akxni ni xaʼanan tumin kkachikin, makgapitsi xtatayananin Jehová ni kgalhikgolh tumin, atanu xTatayananin Jehová putsakgolh la tlan xkamakgtayakgolh: kaxtlawakgolh liwat xlakata tlan xkastamaxkikgolh tiku tantaskaka xchipakgo skiti, o tamakgni, (kaʼakxilhti foto). Putum congregación makgtayanankgolh asta laktsu kamanan. Xtsukukgo kamakgtum hora tsitsa, akxni xtakgatsi makgtati hora chu xchinkgo barcos xwija liwat. Chu tumin nema tamastokgli kamakgpitsinika natalan chuna la xmaklakaskinkgo.

Uma tuku tlawakgolh masiya pi xliʼakxilhtit chu xtamasiyat Jesús tlawa pi nalakgpalikgo xtalakapastaknikan latamanin chu nakamakgtayakgo tiku nitu kgalhikgo.

3. Xlitliwakga Jesús lakgpali la lakapastakkgo latamanin Putum akinin kaj lakaskinaw tlan kakinkakitaxtunin chu ni amakgapitsin. Biblia limapakuwi talakgalhin. Asta apóstol Pablo tsokgli: «Wi uma limapakgsin kkilatamat: pi akxni ktlawaputun tuku xalakatitum, tuku nitlan wa tuku ktlawaputun». Na wampa: «¿Tiku nalakgmaxtu kimakni nema nima? ¡Paxtikatsini Dios xpalakata Jesucristo[!]» (Romanos 7:21-25, NM). Pablo xlichuwinama pi Dios xʼama maklakaskin Jesucristo, xlakata xkalakgmaxtulh xaxlikana kstalaninanin ktalakgalhin. Pulaktum tuku nitlan wa pi latamanin xakstu kapaxkikan. ¿La chuna la?

Akxni tamunulh Jesús, Juan Bautista kawanilh tiku anta xwilakgolh: «Kaʼukxilhtit aktsu xkalhnilu Dios, nti namapanuniy xtalakgalhin ntachixkuwitat» (Juan 1:29). Nialh makgas, putum kKatiyatni nialh katianalh tiku nakgalhi talakgalhin, chu na nialh katianalh tiku akstu napaxkikan (Isaías 11:9). Jesús namasputu tuku tlawa pi kaʼanalh tiku nitu kgalhikgo.

¡Lu lipaxuwayaw xlakata katsiyaw pi namin kilhtamaku akxni nakgalhikgo putum tuku maklakaskinkgo latamanin! Xtachuwin Dios wan: «Chatunu chatunu natawila xtampin xakiwi xʼuvas chu xtampin xhiguera, chu ni katianalh tiku nakamakgapekuan» (Miqueas 4:4). Uma tachuwin limasiya pi natawila kilhtamaku akxni putum nakgalhiyaw taskujut nema nakinkamakgapaxuwayan, nialh katipekuaw chu nalipaxuwayaw kakilhtamaku niku nakgalhiyaw tuku namaklakaskinaw chu putum uma nalimalankiyaw Jehová.