Katalakatsuwini Dios

Lakwan tachuwin xlakata tiku lipuwankgo

«JEHOVÁ max nikxni kintipaxkilh.» Chuna wa chatum tala puskat tiku lhuwata kata kgalhi talipuwan. Xlakpuwan pi Dios ni xmakgatayama. Pero ¿pi xlikana Jehová ni kamakgtaya xlakskujnin tiku wi tuku lilipuwankgo? Tekgsaw lu tlan takgalhtin akxni likgalhtawakgayaw tuku Dios malakpuwanilh natsokgwili David kSalmo 34:18.

David liwana xkatsi pi akxni lu lipuwan xlakskujni Dios lu nitlan makgkatsi. Akxni kgawasaku xwanit xtsalapula xlakata mapakgsina Saúl xlakgkatsanani chu lu xmakgniputun. Makgtum kitatsekgli niku xlakpuwan pi nikxni xʼama putsa Saúl: xkachikinkan filisteos, anta kʼGat, tiku xtalamakgasitsin xwankgonit. Pero filisteos lakgapaskgolh chu ni makgnikgolh kaj xlakata David tlawalh pi xʼakgwitinit. David malankilh Dios xlakata lakgmaxtulh chu uma tuku nitlan titaxtulh tsokgwililh kSalmo 34.

¿Xlakpuwan David pi Dios ni kamakgtaya tiku lipuwamakgolh xlakata kgalhikgo taʼakglhuwit o lakpuwankgo pi ni kaminini nakapaxki? David wan: «Jehová lakatsu katawi tiku lu lipuwamakgolh; chu kalakgmaxtu tiku makgkatsikgo pi katlajama xtaʼakglhuwit» (versículo 18). Kaʼakxilhwi la umakgolh tachuwin tlan limakgkatsiyaw chu kinkamaxkiyan takgalhkgalhin.

«Jehová lakatsu katawi.» Maktum libro wan pi uma tachuwin wamputun «pi Dios skgalalh wi xlakata nakamakgtaya chu nakalakgmaxtu xkachikin». Lu tlan limakgkatsiyaw akxni katsiyaw pi Jehová kakuentajtlawa xlakskujni, chu skgalalh wi xlakata tuku nitlan titaxtumakgolh “xaʼawatiya kilhtamaku [niku] luwa skalajwa” o katuwa chu lakgapasa tuku wi kinakujkan (2 Timoteo 3:1; Hechos 17:27).

«Tiku lu lipuwamakgolh.» Uma tachuwin xla salmista, wamputun «tiku wi tuku katsanima chu lu lilipuwan», wan chatum skgalala chixku. Min kilhtamaku xlakskujnin Dios na titaxtukgo lu tuwa taʼakglhuwit nema natlawa pi lu nalilipuwankgo.

«Tiku makgkatsikgo pi katlajama xtaʼakglhuwit.» Tiku lipuwamakgolh lakpuwankgo pi nitu xlilaka chu asta lakpuwankgo pi nikxni tlan natawilaparakgo. Maktum libro nema masiya la matitaxtikan Biblia kʼatanu tachuwin wan pi uma tachuwin wamputun, «tiku lakpuwankgo pi nialh katikalakgchilh tuku tlan kxlatamatkan».

¿La kakgalhti Jehová xʼoraciónkan tiku «lu lipuwamakgolh» chu «tiku makgkatsikgo pi katlajama xtaʼakglhuwit»? ¿Xlikana pi ni katalakatsuwini xlakata lakpuwan pi ni kaminini nakapaxki chu nakakuentajtlawa? Nichuna. Chuna la chatum tlat limasiyani pi paxki xkgawasa tiku lu lipuwama, Jehová na lakatsu katawilani xlakskujni tiku skinikgo xtamakgtay xlakata nakamakgtaya, lu kamakgtayaputun tiku lu lipuwamakgolh chu tiku makgkatsimakgolh pi katlajama xtaʼakglhuwit. Dios tlan kamaxki liskgalala chu litliwakga xlakata tlan natayanikgo katuwa taʼakglhuwit (2 Corintios 4:7; Santiago 1:5).

¿Tuku tlan xtlawa xlakata tlakg tlan xtalakatsuwini Jehová? Xla kinkapaxkiyan chu kinkwaniyan: «Akxtum ktatawila tiku lipuwama chu tiku ni laktlanka, xlakata nakamatliwakglha tiku nitu kgalhikgo chu nakmatliwakglha xnakukan tiku katlajamaka» (Isaías 57:15).