Makatsinina knixatuwa inglés

LIPAXUW kkamakatsiniman pi uma julio nalitsuku revista nixatuwa inglés Makatsinina nema na tlan natalikgalhtawakga kcongregación, chu akgtum kata naliʼakxilhkan komo namakgtayanan, maski chuntiya nataxtu nema lakgapasawa chu na watiya kilhtamaku. Nalimin artículos nema natalikgalhtawakga ktamakxtumit chu komo naʼakgataxtu páginas nawilikan atanu temas. ¿Tuku xlakata natatlawa uma revista? Xlakata namakgtayakgo lhuwa xtatayananin Jehová nakatsikgo tuku wan xtachuwin Dios.

Kkachikin la Fiyi, Ghana, Kenia, Liberia, Nigeria, Papúa Nueva Guinea chu las islas Salomón niku tlakg chuwinankan inglés. Wa uma tachuwin nema maklakaskinkgo kinatalankan ktamakxtumit chu akxni ankgo lichuwinankgo xtachuwin Dios, maski kxchikkan tanu tachuwin maklakaskinkgo. Pero inglés nema min klikgalhtawakga tlakg tuwa nixawa nema xlakan chuwinankgo. Nachuna, lhuwa xtatayananin Jehová ni anta wilakgolh kxkachikinkan uma tlawa pi nachuwinankgo inglés maski ni liwana katsinikgo. Nachuna makgapitsi nila ankgo ktamakxtumit niku chuwinankan xtachuwinkan.

Chuna la katsiyaw, artículos nema likgalhtawakgayaw krevista Makatsinina kʼakgatunu semana wa tuku limatliwakglhaw kintakanajlakan chu akxni maklakaskinaw. Wa xlakata, putum kinatalankan tiku chuwinankgo inglés liwana namaklakaskinkgo tuku naʼakxilhkan ktamakxtumit, tatlawanit maktum revista nema maklakaskin tachuwin nema ni laktuwa. Xmakni revista ni xtachuna katiwa la amakgapitsin, pero na nakgalhi subtítulos párrafos, takgalhskinin, recuadros chu dibujos xtachuna la revista nema kgalhiyaw. Akxni natawila Takgalhtawakga xla Makatsinina chatunu chatunu tlan namaklakaskin nema tlakg nalakgati. Komo wix chuwinana inglés ¿xkatsiputu tuku litalakgpali makatunu revista? Ktutsu kʼuma página naʼakxilha akgtum liʼakxilhtit nema takilhtinit xliʼakgtiy párrafo xapulana artículo xla uma revista.

Lhuwa natalan skinikgonit Jehová: «Kakimaxki liskgalala xlakata nakkatsini milimapakgsin» (Sal. 119:73). Liwana kkatsiyaw pi uma revista nakamakgtaya tiku chuna skinimakgolh Jehová. Klakpuwanaw pi lakgkgawasan chu tiku nila liwana chuwinankgo inglés tlakg tlan nakatsikgo tuku lichuwinan Takgalhtawakga xla akgatunu semana xla Makatsinina. ¡Kpaxtikatsiniyan Jehová xlakata limasiyaninita pi “kapaxkikgoya xlipaks natalanin” chu xlakata kilamaxkiyaw tuku matliwakglha kintakanajlakan «skujni xalipaw chu xaskgalala»! (1 Ped. 2:17; Mat. 24:45, NM.)

Lakgkgolotsin tiku Pulalinkgo xTatayananin Jehová