¿Namastayaw talakaskin nakinkapulalinan Jehová?
¿Namastayaw talakaskin nakinkapulalinan Jehová?
«Klakgmakganit lixkajnit latamat nima nitu limakwan.» (SAL. 119:128)
1, 2. 1) ¿Tuku xlakata lu xlakaskinka pi akxni wi niku naʼanaw, nakinkawanikanan tuku nitlan wi ktiji? 2) ¿Tuku kinkamakatsiniyan Jehová chu tuku xlakata chuna tlawa?
KALAKPUWAW pi wi niku amputunaw chu skiniyaw chatum amigo tiku liwana lakgapasa tiji kakinkawanin la nachanaw. Nikaj kinkawaniyan la wi tiji na kinkawaniyan tuku kuenta kilitlawatkan. Max kinkawaniyan pi akxni naʼakxilhaw akgtum letrero nema ni liwana tasiya ni kuenta katlawani xlakata lhuwa tiku kaʼakgskgawi chu akgtsankgakgo. ¡Lu paxtikatsiniyaw pi kiʼamigokan liwana kinkawanin xlakata nitu nakinkaʼakgspulayan! Naʼanaw la kinkawanin. Jehová nachuna kinkawaniyan. Liwana kinkamasiyaniyan la namakglhtinanaw: latamat nema ni kgalhi xlisputni. Pero na kinkawaniyan pi kuenta natlawayaw nitu natlawa pi nialh namakglhtinanaw latamat (Deu. 5:32; Isa. 30:21).
2 Kʼuma artículo chu nema aku mima naʼakxilhaw pulaklhuwa tuku nakinkamatlawiputunan tuku nitlan pero Jehová tiku lu kinkapaxkiyan kinkawaniyan tuku kilitlawatkan. Kalakapastakwi pi lu kinkapaxkiyan wa xlakata kinkawaniyan tuku kilitlawatkan xlakata nitu kakinkaʼakgspulan chu kamakglhtinaw latamat. Lu nalilipuwan komo natlawayaw umakgolh tuku nitlan (Eze. 33:11). Kaʼakxilhwi pulaktutu tuku max nakinkamatlawiputunan tuku nitlan. Xapulana wa tuku kinkamatlawikgoyan amakgapitsin, xlipulaktiy tuku tlawaputun kinakujkan chu xlipulaktutu nema Biblia wan pi ni xaxlikana pero na kilikuentajtlawatkan. Xlakaskinka nakatsiyaw niku minacha uma tuku nitlan chu la kinkamakgtayayan Jehová natayaniyaw. Salmista wanilh Jehová: «Klakgmakganit lixkajnit latamat nima nitu limakwan» o nitu xlilaka (Sal. 119:128). Chuna la tiku tsokgli uma texto, ¿nipara tsinu akxilhputunaw tuku nitlan? ¿Tuku nakinkamakgtayayan chuna natlawayaw?
«Ni nakastalaniya lhuwa latamanin»
3. 1) ¿Tuku xlakata lu nitlan nakastalaniyaw niku amakgolh amakgapitsin akxni ni katsiyaw niku amaw? 2) ¿Tuku xlakata lu xlakaskinka tastakyaw nema wi kʼÉxodo 23:2?
3 Chu kalakpuwaw pi taxtumawa. ¿Tuku natlawayaw komo ni liwana katsiyaw tukuya tiji natiyayaw? Max naʼakxilhaw lhuwa tiku linkgo xputlawkan pi tiyamakgolh akgtum tiji chu na anta nakastalaniputunaw. Pero nitlan natiyayaw akgtum tiji kaj xlakata lhuwa tiku anta amakgolh. Xlakata ni putum amakgolh niku akinin amaw, chu max na ni liwana lakgapasnankgo. Uma wi tuku kinkamasiyaniyan. Kilhchanima tastakyaw nema Jehová kamaxkilh Israel. Akxni wi tiku juez xlitaxtu o tiku xaʼan wan komo xlikana o ni xlikana tuku xlimalakgsiyamaka chatum lataman Dios kawanilh: «Ni nakastalaniya lhuwa latamanin» (kalikgalhtawakga Éxodo 23:2). ¿Tuku xlakata chuna kawanilh? Xlakata xkatsi pi akinin lakgalhinanin chu lakapala tlawayaw tuku nitlan kinkamatlawiputunkgoyan amakgapitsin. Xlikana, ni nakatatayayaw amakgapitsin ni kajwatiya kilhchanima akxni tiku malakgsiyaknit, wata nachuna natlawayaw xliputum kilatamatkan.
4, 5. ¿Tuku tuwa titaxtukgolh Josué chu Caleb chu tuku kamakgtayalh natayanikgo?
4 Lhuwa tiku kinkamatlawiputunkgoyan tuku nitlan kkilatamatkan. Max kaj lakapala chuna nakinkamatlawiputunkanan chu tuwa natayaniyaw. Kalilakapastakwi tuku kaʼakgspulalh Josué chu Caleb. Xchatiykan na xʼankgonit akxni kamalakgachaka kgalhkutiy tiku kiskgalakgolh Tiyat nema xKawanikanit pi Nakamaxkikan. Kgalhkaw lu nitlan tamakatsin liminkgolh. Asta wankgolh pi xakxilhkgonit laklanka lakchixkuwin xkamanan nefilim, nema lakachinkgolh akxni ángeles tiku nitlan likatsikgolh tatawilakgolh lakpuskatin (Gén. 6:4). ¡Nipara tsinu xlikana tuku wankgolh! Umakgolh lakchixkuwin lu makgasa xnikgonita kMunkaklat chu ni kgalhikgolh xkamanankan. Uma limasiya pi akxni wi tiku ni tliwakga wi xtakanajlakan tunkun kanajlakgo tuku kawanikan maski ni xlikana. Chuna kaʼakgspulalh israelitas: taʼakgsanin nema wankgolh kgalhkaw tiku kiskgalanankgolh tlawalh pi xtsukukgolh pekuankgo. Wa xlakata asta lhuwa israelitas lakpuwankgolh pi nitlan xkgalhakgaxmatkgolh Jehová chu na nitlan xtanukgolh kTiyat nema xKawanikanit pi Nakamaxkikan. ¿Tuku xtlawakgolh Josué chu Caleb akxni lu tuwa xwi taʼakglhuwit? (Núm. 13:25-33.)
5 Josué chu Caleb ni wa tlawakgolh tuku xlakaskinkgo amakgapitsin. Maski ni xkakgaxmatniputukan asta kawanika pi xʼamaka kaʼaktalamikan, wankgolh tuku xaxlikana. ¿Tuku kamakgtayalh ni xpekuankgolh? Xtakanajlakan. Xlakata akxni kanajlayaw pi Jehová makgantaxti tuku wanit pi natlawa katsiyaw pi ni xlikana tuku wankgo lakchixkuwin. Alistalh Josué chu Caleb wankgolh pi lu lipaxuwakgolh xlakata akxilhkgolh pi Jehová makgantaxtilh tuku xwanit natlawa (kalikgalhtawakga Josué 14:6, 8 chu 23:2, 14). Xchatiykan xkakninanikgo Dios chu nipara tsinu xtlawakgolh tuku xmakgasitsilh Jehová kaj xlakata xtatayakgolh tiku nixkanajlanikgo. Wa xlakata ni chuna tlawakgolh. ¡Lu tlan liʼakxilhtit kinkawilinikgon! (Núm. 14:1-10.)
6. ¿Tuku max natlawa nachuna nalakapastakaw la tiku xalak kakilhtamaku?
6 ¿Milh kilhtamaku akxni xtlawaputunaw tuku xlakaskinkgo amakgapitsin? La uku tlakg lhuwa latamanin ni linkgo xlatamatkan la lakaskin Jehová. Chuna la litasiya xlakata tuku lilakgastanankgo. Lhuwa tiku wankgo pi talakgxtumit xalimaxana, tiku latlawani tuku nitlan chu taskuwan nema masiyakan ktelevisión, kcine chu kvideojuegos tlan kaʼakxilhkan (2 Tim. 3:1-5). Pero katlawaw uma takgalhskinin: «Akxni klaksaka tuku naklilakgastanan akit chu kifamilia, ¿chuna ktlawa la tlawakgo amakgapitsin, nachuna klakapastaka chu klaksaka tuku xalak kakilhtamaku? Komo chuna xtlawaw, ni makgantaxtimaw uma tastakyaw, «ni nakastalaniya lhuwa latamanin».
7, 8. 1) ¿La namasiyaniyaw “kintalakapastaknikan” xlakata nakinkamakgtayayan nixawa nakgalhiyaw akgtum lista xlakata putum tuku tlawaputunaw? 2) ¿Tukuya liʼakxilhtit mastakgo lakgkgawasan chu laktsuman?
7 Jehová wi tuku lu tlan kinkamaskiwinitan xlakata lu tlan nalaksakaw tuku natlawayaw: «talakapastakna». Biblia wan pi uma tachuwin wamputun liwana nalakapastakaw chu tlan nalaksakaw tuku tlan chu tuku nitlan. Xlakata tlan nakinkamakgtayayan talakaskin «nalimasmaniya[w]» chuna natlawayaw (Heb. 5:14). Ni chuna katikitaxtulh kaj naʼakxilhaw la tlawakgo amakgapitsin, nipara kaj nakgalhakgaxmataw limapakgsin akxni talakaskin pi kiʼastukan nalaksakaw tuku kinkawaniyan kintalakapastaknikan natlawayaw. Wa xlakata xtatayananin Jehová ni maʼakgpitsiyaw akgtum lista xlakata tukuya películas, libros o tuku ni naʼakxikhaw kʼInternet. Kkakilhtamaku lakgpalitilhamakgolh tuku tlawakgo chu komo xtlawaka akgtum lista lakapala nialh xkinkamakgtayan (1 Cor. 7:31). Chu tuku tlakg nitlan, komo xkgalhiw uma lista nipara xputsaw xtastakyaw Biblia o ni kskiniw xtamakgtay Dios akxni nalaksakaw tuku natlawayaw nema makgapaxuwa (Efe. 5:10).
8 Xlikana pi lhuwa ni katilipaxuwakgolh tuku nalaksakaw natlawayaw chuna la wan Biblia chu asta nakinkamatlawiputunkgoyan tuku xlakan lakaskinkgo. Akgtum liʼakxilhtit, max tiku ankgo kʼescuela xcompañeros nalakaskinkgo pi nachuna kalikatsikgolh chu kalilakgastanankgolh chuna la xlakan (1 Ped. 4:4). Pero ¡lu lipaxuwayaw akxni akxilhaw lhuwa natalan maski tanu tanu kata kgalhikgo na limasiyakgo xtakanajlakan chuna la Josué chu Caleb! Akxni chuna tlawakgo kgalhakgaxmatkgo uma limapakgsin: «Ni nakastalaniya lhuwa latamanin».
«Ni natlawayatit tuku lakaskin minakujkan chu milakgastapukan»
9. 1) ¿Tuku xlakata nitlan nakitaxtuni tiku wi niku ama komo kaj anta naʼan niku nalakgati? 2) ¿La xkamakgtaya israelitas akxni xkgalhakgaxmatkgo tuku wan Números 15:37-39?
9 Xlipulaktiy, wa tuku kinkamatlawiputunan kinakujkan. Kalichuwinamparaw xlakata niku amaw paxialhnanaw. ¿Tuku xlalh komo nialh xʼakxilhwi tuku wan mapa chu wata anta xʼaw niku tlakg tlan akxilhaw? Max ni xchaw niku amaw. Uma kinkamakgtayayan naʼakgatekgsaw, o makgachakgxiya atanu limapakgsin, nema Jehová kamaxkilh israelitas akxni kawanilh: xwilinikgolh xfalda flecos chu akgtum cordón xaspupuku xʼakgspun fleco (kalikgalhtawakga Números 15:37-39). La uku uma limapakgsin max lu nitlan naʼakxilhkgo latamanin, pero makgasa lu xlakaskinka xwanit. Xkamalakapastaka israelitas pi ni xtachuna xtasiyakgolh la amakgapitsi kachikinin nema ni xkanajlanikgo Jehová, chu uma lu xtalakaskin xlakata tlan xkaʼakxilhli Dios (Lev. 18:24, 25). Chu uma limapakgsin kinkamasiniyan pi wi tuku tlawaputunaw nema nialh nalimakglhtinanaw latamat. ¿Tuku ama?
10. ¿La limasiyalh Jehová pi liwana kinkalakgapasan?
10 Kaʼakxilhwi uma limapakgsin: «Ni natlawayatit tuku lakaskin minakujkan chu milakgastapukan nema tlawaputun talakgxtumit xalimaxana». Jehová mastalh uma limapakgsin xlakata liwana kinkalakgapasan. Katsi pi kinakujkan wa tlawaputun tuku akxilha kilakgastapukan. Wa xlakata kinkamakatsiniyan pi: «Kinakujkan tlakg akgskgawinan nixawa atanu, chu tatlakgaja. ¿Tiku nalakgapasa?» (Jer. 17:9). ¿Akgatekgsaw tuku xlakata Jehová kawanilh pi ni xtlawakgolh tuku xnakujkan xtlawaputun chu tuku xlakgastapukan xakxilhputun? Xkatsi pi xlakgatikgolh tuku xtlawakgo amakgapitsi kachikinin. Chu komo xlakgatikgolh la klhkganankgo nachuna klhakganamputunkgolh chu alistalh nachuna xlakapastakkgolh (Pro. 13:20).
11. ¿Tuku max nalitaʼakgskgawi kinakujkan xlakata tuku naʼakxilha?
11 La uku kinakujkan tlakg lakapala tlawa tuku akxilha kilakgastapukan. Kakilhtamaku niku lamaw limaklakaskin tuku lakgatiyaw xlakata nakinkamatlawiyan tuku nitlan. Wa xlakata, ¿la namakgantaxtiyaw xtastakyaw Números 15:39? Max naʼakxilhaw pi kʼescuela, kputaskujut o kintalakatsujkan tlakg aktsu lhakganankgo xlakata nakalakgatikan. ¿Tuku kinkamatlawiyan? Akxni akxilhaw la lhakganankgo, ¿na lakgatiyaw? ¿Nachuna lhakganamputunaw, chu nialh natlawayaw tuku Dios lakaskin? (Rom. 12:1, 2.)
12, 13. 1) ¿Tuku kilitlawatkan komo akxilhaw tuku ni xlilat? 2) ¿Tuku xlakata ni natlawayaw pi amakgapitsin nalakpuwankgo tuku nitlan xlakata la lhakgananitaw?
12 Lu xlakaskinka nakakuentajtlawayaw. Komo akxilhputunaw tuku ni xlilat, nachuna kilitlawatkan la Job, tiku katalakaxlalh xlakgastapu xlakata ni xlakpuwa natatalakgxtumi atanu komo ni xpuskat (Job 31:1). Nachuna tlawalh mapakgsina David: «Ni [...] [k]lakani tu lixkajnit» (Sal. 101:3). Putum tuku laktlawa kintalakapastaknikan chu tuku kinkamamakgxtakgniputunan Jehová nitu xlilaka. Wa xlakata ni naʼakxilhaw tuku nakinkamatlawiputunan talakgalhin.
13 ¿Tlan max nalitaxtuyaw la tiku «nitu xlilaka» maxki nichuna xlakpuwanitaw? Akxni natlawayaw pi achatum naʼakxilha tuku namatlawiputun tuku nitlan. Akgtum liʼakxilhtit, akxni ni lhakgananaw chuna la wan Biblia «wa ntu lakatitum» «chu ni taji katakaxtayakgolh» (1 Tim. 2:9). Xlakata nakatsiyaw komo xlilat chuna la lhakgananaw, ni kaj nakinkamakgtayayan tuku akinin lakpuwanaw. Talakaskin liwana nalakputsananiyaw komo ni naliʼakgchakgxa tiku nakinkaʼakxilhakgoyan. Wa tlakg xlakaskinka naʼakxilhaw tuku lakpuwankgo amakgapitsin nixawa tuku lakgatiyaw (Rom. 15:1, 2). Kcongregaciones anan lhuwa lakgkgawasan chu laktsuman nema lu tlan liʼakxilhtit wilikgo xlakata la lhakganankgo. ¡Lu tlan pi chuna tlawakgo! Limasiyakgo pi ni wa «tlawakgo tuku kamatlawiputun xnakujkan chu xlakgastaptukan».
«Ni wa nastalaniyatit tuku nixaxlikana»
14. ¿Tukuya tastakyaw kamaxkilh Jehová akxni limaklakaskilh Samuel?
14 Kalichuwinamparaw xlakata niku xʼamaw. Tuku xlalh komo akxni titaxtumaw kdesierto, pero taxtutayayaw ktiji kaj xlakata wintuku akxilhwi nema litaʼakgskgawiw? Komo kstalaniw tuku akxilhwi max asta xmakgatsankgaw kilatamatkan. Jehová liwana katsi pi lu nitlan kitaxtu akxni lipawanaw tuku ni xaxlikana. Wa xlakata kastakyawalh israelitas tiku chuna la amakgapitsi kachikinin na xkgalhiputunkgo chatum mapakgsina xastakna. Uma tuku xlakaskinkgo akgtum talakgalhin xlakata xlimasiyamakgolh pi xlakgmakgamakgolh Jehová tiku lakgchan namapakgsinan. Maski Jehová kamaxkilh talakaskin nakgalhikgo mapakgsina, limaklakaskilh palakachuwina Samuel xlakata xkawanilh tuku nitlan xʼama kakitaxtuni kaj xlakata kstalanikgolh «tuku nixaxlikana» (kalikgalhtawakga 1 Samuel 12:21).
15. ¿Tuku tlawakgolh israelitas nema limasiyakgolh pi xputsamakgolh «tuku ni xaxlikana»?
15 ¿Xlakpuwankgo israelitas pi mapakgsina nema tasiya tlakg xʼama kamakgtaya nixawa Jehová? Komo chuna xlakpuwankgo, kstalanimakgolh «tuku nixaxlikana». Akxni chuna tlawakgolh tlakg lakapala kstalanikgolh tuku ni xaxlikana nema liʼakgskgawinan Satanás. Akgtum liʼakxilhtit, xmapakgsinakan tlan xtlawakgolh pi xkakninanikgolh ídolos. Tiku tlawakgo uma tuku nitlan lakpuwankgo pi dioses nema litatlawanit kiwi o chiwix tlakg tlan kakanajlanikan nixawa xaxlikana Dios. Wa kiMalakatsukinakan, tiku tlawalh putum tuku anan pero ídolos chuna la wa Pablo, «nitu kgalhiy xlakgasi» (1 Cor. 8:4). Xlikana, ídolos nitu xlakgasi. Ni kinkamakgtayakgoyan maski kaʼakxilhaw, kachipayaw, ni lakawanankgo, ni kgaxmatkgo, ni chuwinankgo chu nila makgtayanankgo. Komo xkakninaniw xkitaxtulh la kstalaniw tuku ni xaxlikana nema kaj nitlan niku nakinkalinan (Sal. 115:4-8).
16. 1) ¿La tlawa Satanás xlakata lhuwa latamanin naputsakgo «tuku ni xaxlikana»? 2) ¿Tuku xlakata wanaw pi Jehová xlikana nakinkamakgtayayan nixawa tumin nema «ni xaxlikana»?
16 Satanás chuntiya tlawama pi latamanin naputsakgo «tuku ni xaxlikana». Akgtum liʼakxilhtit, tlawa pi lhuwa nalakpuwankgo pi tlan natawilakgo akxni lhuwa tuku nakgalhikgo. Xlikana pi akxni kgalhikan lhuwa tumin, chu kgalhikan tlan taskujut makgtayanan xlakata nakgalhiyaw tuku lakaskinaw. Pero, akxni snun tatatlakgo, akxni ni anan taskujut o wi tuku masputunan, ni kamakgtaya. Chu ¿kamakgtaya tumin latamanin xlakata ni namakgkatsikgo pi nitu kgalhikgo chu nakatsikgo tuku xlakata lamakgolh la uku? ¿Kamakgtayakgo xlakata ni lu napekuankgo akxni katsikgo pi nanikgo? Komo xlakpuwaw pi akxni nakgalhiyaw lhuwa tumin nialh namaklakaskinaw Dios namakgkatsiyaw pi wi tuku kinkatsankganiyan. Umakgolh kaj ni «xaxlikana». Chu chuna la titaxtutilha kilhtamaku ni kinkamakgtayayan xlakata nila putum kilhtamaku latamayaw, nachuna tajatat chu linin putum kinkalakgchanan (Pro. 23:4, 5). Jehová ni chuna, xlikana lama chu xlikana kinkamakgtayayan. Pero kajwatiya nakinkamakgtayayan komo tlan natalalinaw. ¡Akgtum lanka talakgalhaman! Ni kamakgatsankgaw kaj xlakata naputsayaw «tuku ni xaxlikana».
17. ¿Tuku kilitlawatkan xlakata tuku katsiw?
17 ¡Lu tlan pi Jehová kiʼamigojkan chu kinkapulalinan kkilatamatkan! Komo nakgalhakgaxmataw xtastakyaw, ni katilitaʼakgskgawiw uma pulaktutu tuku nitlan nema lichuwinawa: ni nakastalaniyaw lhuwa latamanin, ni natlawayaw tuku lakaskin kinakujkan chu “ni wa nastalaniyaw tuku nixaxlikana”. Chuna tlan nachanaw niku amputunaw: klatamat nema ni kgalhi xlisputni. Kʼartículo nema aku mima naʼakxilhaw apulaktutu tuku Satanás kaliʼakgskgawinit lhuwa latamanin. Komo nakgalhakgaxmataw xtastakyaw Jehová xlakata uma tuku limaklakaskin Satanás, na ni nakaʼakxilhputunaw chu naliskujaw xlakata ni chuna natlawayaw (Sal. 119:128).
¿La akxilhti?
¿La tlan xlimaklakaskinti umakgolh textos?
• Éxodo 23:2
• Números 15:37-39
• 1 Samuel 12:21
• Salmo 119:128
[Takgalhskinin]
[Epígrafe xla página 11]
¿Min kilhtamaku tlawaputunaw chuna la kakilhtamaku?
[Epígrafe xla página 13]
¿Tuku xlakata lu nitlan kaj akglakgwa tuku natlawayaw?
[Epígrafe xla página 14]
¿Lakgatiyaw tuku «ni xaxlikana»?
