¿Tanunitata wix kxtajaxni Dios?
¿Tanunitata wix kxtajaxni Dios?
«Xampi wa xtachuwin Dios [...] xastakna, na kgalhiy xlitliwakga.» (HEB. 4:12)
1. ¿Tuku kilitlawatkan komo tanuputunaw kxtajaxni Dios, chu tuku xlakata tuwa makgkatsiyaw?
KʼARTÍCULO nema akxilhwi wan pi, xlakata tlan natanuyaw kxtajaxni Dios, talakaskin nakgalhakgaxmataw chu chuna natlawayaw la lakapastaknit Dios. Pero min kilhtamaku tuwa makgkatsiyaw nakgalhakgaxmataw. Akgtum liʼakxilhtit, komo xkatsiw pi tuku lu lakgatiyaw tlawayaw ni lakgati Jehová, ¿nialh natlawayaw o chuntiya natlawayaw? Komo chuntiya xtlawaw ni xlitaxtuw la tiku «lipaxuw kgalhakgaxmatninankgoy» (Sant. 3:17). Kʼuma artículo naʼakxilhaw pulaklhuwa niku tlan nalimasiyayaw pi kgalhakgaxmatnanaw, chu pi xlikana latamaputunaw chuna la Dios lakaskin.
2, 3. ¿Tuku kilitlawatkan xlakata namakgapaxuwayaw Jehová?
2 ¿Tuwa makgkatsiyaw nakgalhakgaxmataw tastakyaw xalak Biblia? Biblia wan pi Dios makgstokgputun «putum tuku tlakg xatlan anan kputum kkachikinin», uma wamputun latamanin tiku lhuwa xtapalh kaʼakxilha Jehová xlakata paxkikgo tuku xalakatitum (Ageo 2:7). Xlikana, pi akxni tsukuw katsiniyaw tuku wan Biblia, lhuwa akinin xtlawayaw tuku nitlan. Pero xlakata lu paxkiw Jehová chu xKgawasa, lakgpaliw la xlikatsiyaw chu tuku xtlawayaw. Xlakata tlan xmakgapaxuwaw Dios max lhuwa liskujwi chu tlawaw oración, chu tlan lakgpaliw la xlinaw kilatamatkan. Alistalh chalh kilhtamaku akxni tamunuw (kalikgalhtawakga Colosenses 1:9, 10).
3 ¿Nialh talakaskin nalakgpaliyaw kilatamatkan? Chuntiya talakaskin. Katsiyaw pi akinin lakgalhinanin chu chuntiya talakaskin naliskujaw xlakata ni natlawayaw tuku nitlan. Pero liwana katsiyaw pi komo chuntiya naliskujaw xlakata chali chali namakgapaxuwayaw Jehová nakinkasikulunatlawayan.
Kamakgamakglhtinaw tastakyaw
4. ¿Tuku pulaktutu maklakaskin Jehová xlakata nakinkastakyawayan?
4 Akxni wi tuku lakgpaliputunaw kkilatamatkan, pulana kilikatsitkan tuku ni tlan tlawamaw. ¿La kinkamakgtayayan Jehová nakatsiyaw? Max nalimaklakaskin akgtum taʼakgchuwin o akgtum artículo nema lu nakinkamaʼakxilhniyan pi tlawamaw tuku nitlan. Pero komo ni akgatekgsaw tastakyaw o ni tlawayaniyaw kuenta, max namaklakaskin chatum tala xlakata nakinkamalakapastakayan (kalikgalhtawakga Gálatas 6:1).
5. ¿Tuku xlakata lakgkgolotsin kamakgtayakgo natalan chu tuku ni natlawayaw akxni kinkastakyawakgoyan?
5 Min kilhtamaku tuwa makgkatsiyaw nakgalhakgaxmataw xtastakyaw chatum tala xlakata na lakgalhina, maski max liwana lakapastakli la kinkawanin chu limasiya pi kinkapaxkiyan. Pero kalakapastakwi pi wa Jehová kalimapakgsi tiku pulalinkgo congregación pi «tasmalhwan kalilakgmaxtu[kgolh]» natalan, uma wamputun pi akxni nakastakyawakan ni nakakilhnikgo (Gál. 6:1). Komo kgalhakgaxmataw tuku kinkawanikgoyan «tlakg xatlan» nakinkaʼakxilhan Dios. Xlikana pi akxni tlawaniyaw oración Jehová na waniyaw pi tlawayaw tuku nitlan. Pero max tuwa makgkatsiyaw akxni chatum kgolotsin kinkawaniyan tuku nitlan tlawamaw. Max nasitsiniyaw chu nawanaw pi kaj kinkakilhnin chu lakpuwanaw pi ni lu lanka talakgalhin tuku tlawaw (2 Rey. 5:11). Chu komo nakinkalistakyawakanan tuku lakpuwanaw pi ni xlimakgtanutkan amakgapitsi max tuku nitlan tlawama tiku xalak kifamiliajkan, la lhakgananaw, max xlakata ni paxaw o lilakgastananaw tuku ni lakgati Jehová, max asta nakasitsiniyaw chu ni nitlan namamakgkatsiniyaw. Pero akxni nialhtu sitsinitaw, akgatekgsaw pi ni tlan la kgalhtinaw chu tlan pi kinkastakyawakan.
6. ¿La masiya xtachuwin Dios tuku wi «ntalakapastakna, chu lantla xtatlawaputu nchatum»?
6 Texto nema litsuku uma artículo kinkamalakapastakayan pi «xtachuwin Dios [...] kgalhiy xlitliwakga». Wa xlakata kinkamakgtayayan nalakgpaliyaw kilatamatkan, tsukuyaw lakgpaliyaw kilatamatkan akxni nina tamunuyaw chu chuntiya tlawayaw akxni tamununitawa. Watiya uma texto Pablo na wan pi «xtachuwin Dios [...] laktanuy ntani wi [latamat] chu spiritu, chu asta lakgchan ntakilhastukut, [...] na tlan lilakgapasa xatu ntalakapastakna, chu lantla xtatlawaputu nchatum» (Heb. 4:12). Akxni lichuwinan «latamat» wamputun tuku tasiya, chu «spiritu», wamputun kintalakapastaknikan. ¿Tuku xwamputun apóstol Pablo? Akxni lakputsananiyaw Biblia chu akgatekgsaw tuku lakaskin Dios natlawayaw, wantuku tlawayaw limasiya la lakapastaknanaw. ¿La likatsiyaw chatunu chatunu? ¿Pi watiya tuku akxilhkgo amakgapitsin wa tuku wi kkinakujkan? (Kalikgalhtawakga Mateo 23:27, 28.) Kalakpuwaw tuku xtlawaw komo xtitaxtuw la nalichuwinanaw la uku.
Chuna katlawaw chuna la masiya xkachikin Jehová
7, 8. 1) ¿Tuku xlakata chuntiyaku xmakgantaxtiputunkgo Limapakgsin xla Moisés makgapitsi kstalaninanin Cristo? 2) ¿Tuku xlakata wanaw pi ni xtlawamakgolh tuku Dios lakaskin?
7 Lhuwa akinin lakgapasaw uma texto Proverbios 4:18 niku wan: «Xtijikan tiku xaʼakgstitum tsinu tsinu tsuku tlakg kaxkgakga asta akxni kakuwani wan». Umakgolh tachuwin limasiya pi chuna la titaxtutilha kilhtamaku kintayatkan talakgpalitilha chu tlakg akgatekgstilhayaw xtalakaskin Dios.
8 Artículo nema titaxtulha, akxilhwi pi akxni xninita Jesús, lhuwa kstalaninanin Cristo tiku judíos xwankgonit chuntiyaku lu xmakgantaxtiputunkgo Limapakgsin xla Moisés (Hech. 21:20). Wantuku Dios malakpuwanilh natsokgwili Pablo, liwana kamasiyanilh pi nialh xtalakaskin nakgalhakgaxmatkgo Limapakgsin, pero makgapitsi ni chuna tlawakgolh (Col. 2:13-15). ¿Tuku xlakata? Max xlakpuwankgo pi komo xmakgantaxtikgolh makgapitsi limapakgsin, xkamakgtayalh ni xkaputsastalanikgolh amakgapitsin judíos. Carta nema kamalakgachanilh Hebreos, Pablo kawanilh pi xlakata tlan xtanukgolh kxtajaxni Dios, xtalakaskin xtlawatilhakgolh chuna Dios xkaskinitilhama (Heb. 4:1, 2, 6; kalikgalhtawakga Hebreos 4:11). * Komo xlakaskinkgo pi Dios xkamakgamakglhtinalh, xtalakaskin pi xʼakgatekgskgolh pi tanu la Dios xkapulalima xkachikin.
9. ¿Tuku kilitlawatkan akxni lakgpalikan tuku aku liwana taʼakgatekgsma xalak Biblia?
9 La uku na akxilhmaw la tlakg taʼakgatekgstilhama tuku masiya Biblia. Ni litaʼakglhuwiyaw, wata tlakg lipawanaw skujni xalipaw chu skgalala. Katsiyaw pi Lakgkgolotsin tiku Pulalinkgo xTatayananin Jehová, akxtum taskujmakgolh, chu komo talakaskin tunkun lakgpalikgo tuku pulana ni liwana xʼakgatekgskgo. Chu ni pekuankgo maski nitlan nakalichuwinankan. Umakgolh natalan wantuku tlakg xlakaskinka akxilhkgo chuna la taʼakgatekgstilhama xtalakaskin Dios. ¿Chu akinin tuku tlawayaw akxni lakgpalikan tuku aku liwana taʼakgatekgsma xalak Biblia? (Kalikgalhtawakga Lucas 5:39.)
10, 11. ¿Tuku kinkamasiyaniyan akxni talakgpalilh la xʼamaka lichuwinankan Dios?
10 Kaʼakxilhwi atanu tuku tilalh. Akxni ksputmaja siglo XIX chu xtsukuma siglo XX, makgapitsi tiku xLikgalhtawakgakgo Biblia, chuna la xkalilakgapaskan xtatayananin Jehová, xwilakgo tiku lu tlan xchuwinankgo chu lu tlan xʼakgchuwinankgo. Xlakpuwankgo pi xlakata tlan xkamasiyanikgolh xlakata Dios latamanin, xʼakgchuwinankgolh. Lu xlakgatikgo xchuwinankgo kxlakatin amakgapitsin chu na lu xlakgatikgo nakamalankikan. Pero milh kilhtamaku akxni xkachikin Dios akgatekgskgolh pi na xtalakaskin atanu la xkalitachuwinakgolh Dios, nakalakganaw kxchikkan. Akxni chuna lalh makgapitsi tiku lu tlan la xʼakgchuwinankgo nipara tsinu litsakgsaputunkgolh. Xtasiya pi lu tliwakga xwi xtakanajlakan chu lu kskujnikgo Dios, pero akxni kawanika tuku xlakaskin Jehová natlawakgo tasiyalh tuku xwi kxnakujkan chu tuku xtlawaputunkgo. Chuna la tlawakgolh ni makgapaxuwakgolh Dios chu asta makgxtakgkgolh xkachikin (Mat. 10:1-6; Hech. 5:42; 20:20).
11 ¿La kakitaxtunilh tiku kgalhakgaxmatnankgolh? ¿Ni tuwa makgkatsikgolh naʼankgo kʼakgatunu chiki? Pulana lu tuwa makgkatsikgolh. Pero kgalhakgaxmatnankgolh. Chuna la titaxtulh kilhtamaku nialh pekuankgolh chu Jehová kasikulanatlawalh. Chu wix, ¿tuku tlawaya akxni wanikana pi kalitsakgsa tanu la nalichuwinana Dios? ¿Litsakgasaya?
Akxni chatum xalak kifamiliajkan makgxtakga Jehová
12, 13. 1) ¿Tuku xlakata Jehová wan katamakxtuka tiku ni makgxtakgkgo talakgalhin? 2) ¿Tuku lu tuwa makgkatsikgo namakgantaxtikgo makgapitsi natlatni?
12 Chuna la katsiyaw, Jehová kajwatiya makgamakglhtinan tiku nitu limaxkajwanikgo xmaknikan, xlatamatkan chu xtakanajlakan (kalikgalhtawakga Tito 2:14). Uma tastakyaw max nakinkaliʼakxilhkanan komo kgalhakgaxmataw Dios. Kawiliw akgtum liʼakxilhtit, chatum tala chu xpuskat tiku liwana skujnanimakgolh Dios akxilhkgo pi xkgawasa makgxtakga xaxlikana takanajla. Uma kgawasa nialh xlakaskinka akxilha la talalin xnatlatni chu Jehová wata «[...]limakgapaxuwakan ntalakgalhin ntu [...] nkaj makgtum natitaxtuj», wa xlakata tamaxtukan kcongregación (Heb. 11:25).
13 Xnatlatni lu lilipuwankgo. Liwana katsikgo tuku wan Biblia pi xlitlawatkan: «Nialh titatalakgxtupiyatit lapi wi nchatum wanti ntala litapakuwiy, na [tlaway talakgxtumit nema ni xlitatlawat], chu xmakglakgatina tumin, chu xlakatakilhputana [ídolos], chu maxkajwalina, chu kgotni, chu kgalhana; wa yama asta ni titawayanatit» (1 Cor. 5:11, 13). Akgatekgskgo pi tachuwin «wi nchatum wanti» na kilhchanima xfamiliajkan tiku ni anta katawilakgolh kxchikkan. Pero ni katsikgo tuku natlawakgo xlakata lu paxkikgo xkgawasakan. Max nalakpuwankgo: «Komo ni natachuwinanaw, ¿la namakgtayayaw nataspitpara xkachikin Jehová? Tlakg tlan xwa kaj tsinu xtalaliw». *
14, 15. ¿Tuku natlawakgo xnatlatni tiku tamakxtukanit kcongregación?
14 Akgatekgsaw la makgkatsikgo xnatlatni. Chu xlakan ni chuna xtitaxtuputunkgo. Wa xkgawasakan kamakgapatinama, xlakata tlan xtitlawalh tuku tlan, wata laksakli natlawa tuku nitlan, maski xkatsi pi nialh tlan xkatalalilh xnatlatni chu congregación. Wa xlakata xnatlatni lu lilipuwankgo chu nialh la tuku tlawakgo.
15 Xnatlatni na wi tuku lu xlakaskinka nalaksakkgo: ¿nakgalhakgaxmatkgo tuku wan Jehová? Xlikana pi kaj akxni natalakaskin tlan natachuwinankgo xkgawasa tiku tamakxtuka xlakata max wi tuku lu xlakaskinka nalakkaxwilikgo kfamilia. Pero ¿natachuwinankgo maski ni lu talakaskima? Akxni wi tuku natlawakgo, ni nalakatsalakgo tuku wan Jehová. Dios lakkaxwililh natamakxtukan kcongregación tiku lakgalhinan: xlakata nitu nalixkajawanan xkachikin chu namakgxtakga nitlan xtayat tiku lakgalhinalh. ¿La nalimasiyakgo xnatlatni pi nachuna lakpuwankgo la Jehová?
16, 17. ¿Tuku kinkamasiyaniyan tuku akgspulalh Aarón?
16 Aarón xtala Moisés, chuna titaxtulh akxni chatiy xlakgkgawasan Nadab chu Abihú lakgalhinankgolh. Jehová kamakgnilh akxni xmakamastanimakgolh incienso. ¡Max lu lilipuwa Aarón xlakata nialh xʼama kaʼakxilhpara chu nialh xʼama katachuwinampara! Pero ni kajwatiya uma. Aarón chu amakgapitsin xkamanan Dios kawanilh pi ni xlimasiyakgolh pi xlilipuwankgo chuna la xtlawakgo israelitas akxni wi tiku xni: «Tlan xlitasiyat miʼakgxakgakan, chu ni nalakxtitatit milhakgatkan, xlakata ni naniyatit, chu xlakata [Dios] ni nakasitsini kachikin» (Lev. 10:1-6). Uma tuku lalh wi tuku lu xlakaskinka kinkamasiyaniyan: tlakg napaxkiyaw Jehová nixawa kifamiliajkan, tlakg chuna kilitlawatkan komo ni makgxtakga xtalakgalhin.
17 La uku, Jehová ni tunkun kamakgni tiku lakatsalakgo xlimapakgsin. Xlakata lu paxkinan kamaxki talakaskin pi kamakgxtakgkgolh tuku nitlan tlawamakgolh. Akxni wi tiku ni makgxtakga tuku ni tlan tlawama tamakxtukan kcongregación. Wa xlakata, ¿tuku xkitaxtulh komo chuntiya xtalalinkgolh? ¿Xlakgatilh Jehová komo chuna xtlawakgolh?
18, 19. ¿Tuku max lu tlan nakitaxtu komo kstalaninanin Cristo liwana namakgantaxtikgo tuku wan Jehová akxni tiku tamakxtukan kcongregación?
18 Lhuwa natalan wankgo pi xlakata xʼamigos chu xfamilias liwana tatayakgolh Jehová wa uma tuku tlawalh nataspitparakgo kxkachikin Dios. Chatum tala tsumat kawanilh lakgkgolotsin pi tuku makgtayalh xlakata nalakgpali la xlin xlatamat wa pi «xtala kgawasa liwana makgantaxtilh tuku wan Jehová xlakata tiku tamakxtukan kcongregación». Wan pi akxni akxilhli pi xtala «liwana kgalhakgaxmatli tastakyaw xalak Biblia, uma makgtayalh nataspitpara».
19 Chuna la akxilhwi kʼuma artículo, nila namastayaw talakaskin pi kinakujkan nakinkamatlawiyan tuku nitlan. Maski lu tuwa namakgkatsiyaw namakgantaxtiyaw akgtum tastakyaw xalak Biblia, kilimakgantaxtitkan xlakata liwana katsiyaw pi Jehová tlakg katsi la nalakkaxtlawayaw kintaʼakglhuwitkan.
«Xtachuwin Dios [...] xastakna»
20. ¿Tuku pulaktiy kilhchanima Hebreos 4:12? (Kaʼakxilhti nota.)
20 Akxni Pablo tsokgli kʼHebreos 4:12 pi «xtachuwin Dios [...] xastakna», ni kaj xlichuwinama xtachuwin Dios nema wi kBiblia. Tuku lichuwinalh alistalh, masiya pi xlichuwinama putum tuku Dios natlawa. * Wantuku xlimasiyaputum pi putum xtachuwin Dios xlikana kgantaxtu chu ni kaj chuna tamakgxtakga. Na wa xlichuwinama Jehová akxni wa: «Chuna nakitaxtu kintachuwin [...]. Ni katitaspitli chu ni namakgantaxti tuku klimalakgachanit, wata [...] xlikana namakgantaxti tuku limalakgachanit» (Isa. 55:11). Wa xlakata, ni kalakpuwaw pi ni nakgantaxtu tuku Jehová lakkaxwilinit kaj xlakata ni lakapala kgantaxtuma chuna la akinin lakaskinaw. Jehová «asta [uku] skujma» chu chuntiya natlawa asta nakgantaxtu tuku lakapastaknit natlawa (Juan 5:17).
21. ¿La kamatliwakglha tiku linkgoya kata Hebreos 4:12 nema tapakgsikgo «[k]lhuwa ntachixkuwitat»?
21 Wilakgolh tiku tapakgsikgo «[k]lhuwa ntachixkuwitat» o latamanin, nema akglhuwata kata skujnanimakgolh Jehová (Apo. 7:9). Lhuwa xlakpuwankgo pi ni xʼamakgolh kgolonkgo, pero uma ni tlawa pi naxlajwanan xtakanajlakan (Sal. 92:14). ¿Tuku xlakata? Xlakata katsikgo pi «xtachuwin Dios [...] xastakna» chu Jehová skujma xlakata nakgantaxtu putum tuku kinkawaninitan natlawa. Jehová lu xlakaskinka akxilha tuku lakapastaknit natlawa chu lipaxuwa akxni akxilha pi na xlakaskinka akxilhaw. Xliʼakgtujun kilhtamaku nema lamaw, Jehová chuntiya jaxma, chu liwana katsi pi nakgantaxtu tuku lakapastaknit natlawa chu na katsi pi xkachikin namakgantaxti chuna la xtalakaskin. Chuna la katsiniw putum tlan natanuyaw kxtajani Dios. ¿Tanunitata wix?
[Notas nema wilakgo kpágina]
^ párr. 8 Maski lhuwa tiku xpulalinkgo judíos liwana xmakgantaxtikgo xLimapakgsin Moisés, akxni milh Jesús ni makgamakglhtinakgolh la Mesías. Wa tuku nitlan tlawakgolh ni akxilhputunkgolh la xkgantaxtuma xtalakaskin Dios.
^ párr. 13 Tlakg natekgsa xlakata uma, klibro «Katamakgxtakgtit kxtapaxkit Dios» kpáginas 207 asta 209.
^ párr. 20 La uku Dios limaklakaskin Biblia xlakata nakinkatachuwinanan, chu tlawa pi lu nalakgpaliyaw kilatamatkan. Wa xlakata tuku wan Pablo kHebreos 4:12 na kilhchanima Biblia.
Kalilakapastakwi
• ¿Tuku kilitlawatkan xlakata natanuyaw kxtajxni Dios?
• ¿La kiliʼakxilhatkan xtastakyaw Biblia komo akxilhwa tuku lakaskin Dios natlawayaw?
• ¿Tuku natitaxtuyaw nema nataliʼakxilha komo ni makgxtakgaw Dios chu tuku xlakata lu xlakaskinka nakgalhakgaxmatnanaw?
• ¿Tuku pulaktiy kilhchanima Hebreos 4:12?
[Takgalhskinin]
[Epígrafe xla página 31]
Xnatlatni lu lilipuwankgo
