¿Tuku ama xtajaxni Dios?
¿Tuku ama xtajaxni Dios?
«Ananku akgtum mpujaxni, wa ntu [...] lakgchankgoy [xkachikin] Dios.» (HEB. 4:9)
1, 2. ¿Tuku kinkamasiyaniyan akxni liwana likgalhtawakgayaw Génesis 2:3, chu tukuya takgalhskinin max natlawayaw?
LIBRO xla Génesis kxapulana capítulo wan pi Jehová akgchaxan «kilhtamaku» skujli, uma akgatunu kilhtamaku kilhchanima akglhuwa kata, xlakata xkakaxtlawalh Katiyatni chu tlan xlatamakgolh latamanin. Akxni lichuwinan akgatunu kilhtamaku wi uma tachuwin: «Analh kakgotanun chu tsisa» (Gén. 1:5, 8, 13, 19, 23, 31). Pero nichuna wan xlakata kxliʼakgtujun kilhtamaku. Akxni xliʼakgtujun kilhtamaku wan pi «Dios sikulunatlawalh xliʼakgtujun kilhtamaku chu xasanto tlawalh, xlakata uma kilhtamaku chuntiya jaxma xlakata putum tuku tlawalh» (Gén. 2:3).
2 Uma tachuwin tsokgli Moisés kata 1513 akxni nina xmin Jesús. Wa xlakata, tachuwin «chuntiya jaxma» kinkamakgtayayan naʼakgatekgsaw, o makgachakgxiya pi ama kilhtamaku nina ksputnit xliʼakgtujun kilhtamaku, Jehová chuntiya jaxma. ¿Chu la uku? ¿Watiyaku xliʼakgutjun kilhtamaku wilaw? ¿La tlan natanuyaw kxtajaxni Dios? Umakgolh takgalhskinin lu xlakaskinka kimpalakatakan.
¿Chuntiyaku «jaxma» Jehová?
3. ¿La kinkamakgtayayan Juan 5:16, 17 naʼakgatekgsaw pi xliʼakgtujun xkilhtamaku Dios nina ksputa kxapulana siglo?
3 Wi pulaktiy tuku xlakata tlan nawanaw pi kxapulana siglo, watiyaku kxliʼakgtujun kilhtamaku xwilakgolh. Xapulana, wa takgalhtin nema mastalh Jesús akxni xlimawakamaka pi xlakatsalama limapakgsin sábado. Xwankgo pi tlawakan milagros ksábado xkitaxtu la komo skujka sábado, kilhtamaku nema Limapakgsin xla Moisés xwan pi ni naskujkan. Kaʼakxilhwi la kakgalhtilh Jesús: «Wa nkinTlat, asta [uku] skujma pus na kskujma nkit» (Juan 5:16, 17). Akxni wa: «NkinTlat, asta [uku] skujma», chuna limasiyalh pi ni xlikana tuku xlimawakamaka. Wa uma tuku xwamputun: «Kintlat chu akit watiya taskujut ktlawamaw. Xla skujma ksábado, nema akglhuwata miles kata makgapalanit, wa xlakata nitu wamputun akit na nakskuja ksábado». Uma tuku wa Jesús limasiya pi watiyaku xliʼakgtujun kilhtamaku xwilakgolh, uma wamputun kilhtamaku akxni chuntiya jaxma Dios xlakata tlawakgolh putum tuku anan Katiyatni. Pero Dios chuntiyaku skujma xlakata namakgantaxti tuku lakapastaknit xlakata latamanin chu Katiyatni. *
4. ¿Tuku na limasiyalh Pablo pi xliʼakgtujun kilhtamaku watiyaku xwanit asta kxapulana siglo?
4 Xlipulaktiy, wa tuku lichuwinan Pablo nema Dios malakpuwanilh. Akxni xlichuwinama xtajaxni Dios chu nina xlichuwinan Génesis 2:2, Pablo tsokgli: “Tanuyaw kpujaxni, akinin tiku kanajlanitaw” (Heb. 4:3, 4, 6, 9). Uma tachuwin limasiya pi nina ksputa xliʼakgtujun kilhtamaku. Wa xlakata ¿asta tukuya kilhtamaku xʼama sputa xtajaxni Dios?
5. ¿Tuku xlakata lakkaxwililh Dios xliʼakgtujun kilhtamaku chu tukuya kilhtamaku nakgantaxtu tuku lakapastaknit?
5 Xlakata nakatsiyaw akxni sputa xliʼakgtujun kilhtamaku, liwana kilikatsitkan tuku xlakata Dios lakkaxwililh. Génesis 2:3 wan pi Malakatsukina «sikulunatlawalh xliʼakgtujun kilhtamaku chu xasanto tlawalh». Jehová xasanto tlawalh ama kilhtamaku xlakata lu xlakaskinka tuku xmakgantaxtilh: xtlawalh tuku xlakapastaknit xlakata Katiyatni. ¿Tuku xlakapastaknit? Xlimalakgatsamalh Katiyatni lhuwa latamanin tiku xkgalhakgaxmatkgolh Dios chu xkuentajtlawakgolh Katiyatni chu putum tuku staknan (Gén. 1:28). Wa xlakata «asta [uku] skujma» Jehová chu Jesucristo, tiku Biblia limapakuwi «wa xmalana» sábado (Mat. 12:8). Uma liʼakgatekgsaw pi kilhtamaku akxni jaxa nakgalhsputa asta akxni nakgantaxtu putum tuku Dios lakapastaknit natlawa kKatiyatni. ¿Tukuya kilhtamaku nakgantaxtu? Akxni nakgalhsputa kxTamapakgsin xaʼAkgtum Milh Kata xla Cristo.
Ni chuna katlawaw «la tiku ni kgalhakgaxmatnankgolh»
6. ¿Tuku liʼakxilhtit ni natlawayaw chu tuku kinkamasiyaniyan?
6 Jehová liwana kawanilh Adán chu Eva tuku xlakapastaknit natlawa, pero xlakan ni makgtayanankgolh. Chuna la titaxtunit kilhtamaku, lhuwa millones latamanin nachuna tlawakgonit. Chuna la xamakgan kachikin Israel, nema Dios xkalaksaknit. Titaxtulh kilhtamaku Pablo kastakyawalh kstalaninanin Cristo kxapulana siglo xlakata ni chuna xtlawakgolh. Wa xlakata kawanilh: «Kaliskujwi xlakata namakgtanuyaw kxtajaxni Dios, xlakata max wi tiku nachuna natlawa la tiku ni kgalhakgaxmatnankgolh» (Heb. 4:11, NM). Akxilhaw pi Pablo lichuwinan pi tiku ni kgalhakgaxmatnan nila katitanulh kxtajaxni Dios. Uma tuku wa na lu kuenta kilitlawatkan. ¿Tuku xkinkaʼakgspulan komo ni wa xtatayaw tuku Dios tlawatilhama? Ni katimakgtanuw kxtajaxni Jehová. Lu xlakaskinka nalakputsananiyaw umakgolh takgalhskinin. Naʼakxilhaw alistalh. Pero pulana kaʼakxilhwi tuku nitlan tlawakgolh israelitas chu tuku xlakata ni tanukgolh xtajaxni Dios.
«Ni katitanukgolh k[kim]pujaxni»
7. ¿Tuku xlakata kalakgmaxtulh Jehová israelitas chu tuku kawanilh pi xlitlawatkan?
7 Kata 1513 akxni nina xmin Jesús, Jehová wanilh Moisés tuku xlakapastaknit natlawa xpalakata israelitas tiku xkamaskujumaka kʼEgipto: «Kkalakgmiman nakkalakgmaxtuyan kxmakan egipcios chu xlakata nakkamaxtuyan chu nakalinan niku xatlan chu katilanka katiyatni niku lhuwa anan leche chu ksakgsi cera» (Éxo. 3:8). ¿Tuku xlakata kalakgmaxtulh? Xlakata xkachikin xlitaxtukgolh chuna la xwaninit Abrahán (Gén. 22:17). Na kamaxkilh limapakgsin xlakata tlan xtalalinkgolh (Isa. 48:17, 18). Pero kawanilh: «Komo wixin liwana nakgalhakgaxpatatit kintachuwin chu namakgantaxtiyatit tuku kkatalakkaxlan, akit nakintapakgsiniyatit nixawa la makgapitsi kachikinin, xlakata akit kintapakgsini putum katiyatni» (Éxo. 19:5, 6). Chuna la akxilhaw, israelitas tlan xkachikin Dios xlitaxtukgolh pero xtalakaskin xkgalhakgaxmatnankgolh.
8. ¿Tuku lu tlan xʼama kamaxki Dios israelitas komo xkgalhakgaxmatkgolh?
8 ¡Lu tlan tuku xʼama kamaxki Jehová! Komo xkgalhakgaxmatkgolh ksikulunatlawalh tuku xchankgolh, xʼuvas, xborregoskan chu xwakaxkan. Nachuna tlan xtawilakgolh chu ni xmastalh talakaskin pi xtalamakgasitsinkan xkatlajakgolh (kalikgalhtawakga 1 Reyes 10:23-27). Ni xtapakgsinikgolh atanu kachikin, nipara lanka kachikin tlan xkaʼakgchipalh. Chu max akxni xmilh Mesías, chuntiyaku xakstu xtapakgsikgolh, ni xtapakgsinikgolh Roma. Nachuna xtawilaputunkgolh amakgapitsi kachikinin, liwana xlitasiyalh pi Dios kasikulunatlawa tuku tlawakgo chu xtakanajlakan tiku kgalhakgaxmatkgo.
9, 10. 1) ¿Tuku xlakata lu nitlan pi israelitas xtaspitputumparakgo kʼEgipto? 2) ¿Chuntiyaku tlan xkakninanikgolh Dios?
9 Komo xtatayakgolh tuku lakapastaknit Dios natlawa, lhuwa tasikulunalin xmakglhtinankgolh chuna la xtitaxtutilhalh kilhtamaku chu nachuna xmakglhtinankgolh putum kachikinin (Gén. 22:18). Pero lu nitlan tuku tlawakgolh, lhuwa israelitas lakgmakgankgolh uma lanka talakgalhaman pi kaj wa xkachikin Dios xwankgolh chu xkawilinikgolh liʼakxilhtit amakgapitsi kachikinin. ¡Asta xtaspitputumparakgo kʼEgipto! (Kalikgalhtawakga Números 14:2-4.) Pero ¿tlan xkakitaxtunilh? ¿Tlakg tlan xmakgantaxtikgolh tuku lakapastaknit natlawa Jehová? Ni xʼama kamakgtaya. Wata kxlakskujni tiku ni kakninanikgo Jehová xlitaxtuparakgolh chu nila xkgalhakgaxmatkgolh Limapakgsin xla Moisés chu ni xkatapatika xtalakgalhinkan. Xlakata lu xtaspitputumparakgo kʼEgipto xlimasiya pi ni liwana xlakapastakkgo chu xakstu xkapaxkikan. Wa xlakata Jehová kamalakapastakalh alistalh: «Ktilisitsinikgolh yuma xamakgan ntachixkuwitat, na ktiwaj: Xaliʼankalhin kintamakgatlinikgoy xtalakapastaknakan, na ni ukxni alakgapaskgo wa ntu nkintalakaskin. [...] Akxni xaksitsinit [kwa]: Ni katitanukgolh k[kim]pujaxni» (Heb. 3:10, 11; Sal. 95:10, 11).
10 Chuna la likatsikgolh limasiyakgolh pi nitu liʼakxilhkgo tuku xla Dios. Kajwatiya wa xwaputunkgo puerros, cebollas chu axux xalak Egipto (Núm. 11:5). Lu ni paxitkatsininankgolh chuna la Esaú, tiku kaj lakapala lilakgpalilh pakgtum plato xla lentejas tuku Dios xmaxkinit (Gén. 25:30-32; Heb. 12:16).
11. ¿Lakgpalilh Dios tuku xlakapastaknit natlawa kaj xlakata israelitas nialh kanajlanikgolh?
11 Jehová tiku «asta [uku] skujma» chuntiya makgantaxtilh tuku xlakapastaknit natlawa maski tiku taxtukgocha kʼEgipto nialh kanajlanikgolh. Wa xlakata, Jehová kamakgtayalh israelitas tiku alistalh lakachinkgolh chu tlakg kgalhakgaxmatnankgolh nixawa tiku taxtukgocha kʼEgipto. Akxni Jehová kawanilh pi xtanukgolh chu xʼakgchipakgolh Tiyat nema xKawanikanit pi Nakamaxkikan chuna tlawakgolh la kalimapakgsika. Anta kJosué 24:31 tatsokgnit la xatapaxuwan tlawakgolh: «Israelitas chuntiya skujnikgolh Jehová akxni xlama Josué chu akxni xlamakgolh lakgkgolotsin tiku xpulalinankgo nema xaʼakxilhkgonit tuku xtlawanit Jehová xpalakata Israel».
12. ¿Tuku likatsiyaw pi tlanku tanuyaw kxtajaxni Dios?
12 Akxni nikgolh tiku xkgalhakgaxmatnankgo, lakachinkgolh «atanu [...] tiku ni xlakgapaskgo Jehová nipara xkatsikgo tuku xtlawanit xpalakata Israel». ¿Tuku tlawakgolh? «Tsukukgolh tlawakgo tuku nitlan xlakatin Jehová, chu kakninanikgolh Baales.» (Jue. 2:10, 11.) Xlakata ni kgalhakgaxmatnankgolh nila tlan talalinkgolh Dios chu ni «[x]pujaxni» tlawakgolh kTiyat nema xKawanikanit pi Nakamaxkikan. Pablo xkalichuwinama akxni wa: «Xampi wa lapi x[ka]maxkikgolh Josué xpujaxnikan, ni xlichuwinalh akgtum kilhtamaku alistalh. Wa cha liʼananku akgtum mpujaxni, wantu xlakan lakgchankgoy [xkachikin] Dios» (Heb. 4:8, 9). ¿Tiku kalimapakuwi Pablo «[xkachikin] Dios»? Putum kstalaninanin, tiku judíos o ni judíos xwankgonit. ¿Wamputun pi akinin kstalaninanin Cristo xala uku na tlan natanuyaw xtajaxni Dios? Tlan natanuyaw.
Makgapitsi kstalaninanin Cristo ni tanukgolh kxtajaxni Dios
13, 14. ¿Tuku xtalakaskin xlakata tlan xtanuka kxtajaxni Dios 1) kxkilhtamaku Moisés? 2) kxapulana siglo?
13 Carta nema Pablo kamalakgachanilh Hebreos, limasiya pi nitlan xlimakgkatsi xlakata makgapitsi kstalaninanin Cristo ni xmakgtayanamakgolh nakgantaxtu tuku lakapastaknit Dios natlawa, wata xlakatayamakgolh (kalikgalhtawakga Hebreos 4:1). ¿Tuku nitlan xtlawamakgolh? Makgapitsi xwankgo pi xtalakaskinku namakgantaxtikgo Limapakgsin xla Moisés. Xlikana pi akgtum mil akgkitsis ciento kata nema xtitaxtunita, putum tiku xtlawaputun xtalakaskin Dios, xtalakaskin nakgalhakgaxmata Limapakgsin. Pero akxni nilh Jesús, nialh talakaskilh chuna natlawakan. Makgapitsi kstalaninanin Cristo ni akgatekgskgolh chu chuntiyaku lu xmakgantaxtiputunkgo Limapakgsin. *
14 ¿Tuku liwana kamaʼakgatekgsnilh Pablo amakgolh kstalaninanin Cristo tiku lu xmakgantaxtimakgolh Limapakgsin xla Moisés? Pi xkgalhikgo akgtum xasasti templo, xasasti talakkaxlan chu chatum xapuxku sacerdote, Jesús, tiku tlakg xlakaskinka xwanit nixawa templo, talakkaxlan chu xapuxku sacerdotes nema xwilakgolh kʼIsrael (Heb. 7:26-28; 8:7-10; 9:11, 12). Akxni xlichuwinama limapakgsin xla sábado, kawanilh pi kstalanina Cristo tlan xtanukgolh kxtajaxni Jehová: «Ananku akgtum mpujaxni, wantu xlakan lakgchankgoy [xkachikin] Dios. Xampi wanti ntanunitta kxpujaxni, lijaxnitta xla xtatlaw, xtachuna lantla Dios lijaxli wantu xla» (Heb. 4:8-10). Umakgolh tachuwin liwana xlimasiya tuku xlikatsitkan xwanit: pi nialh xtalakaskin namakgantaxtikgo tuku kskin Limapakgsin xlakata tlan xtanukgolh kxtajaxni Dios. Pentecostés kata 33 asta la uku, xlakata Dios tlan nakinkaʼakxilhan talakaskin nakanajlaniyaw Jesucristo.
15. ¿Tuku limasiya pi tiku ni kgalhakgaxmatnankgo ni tanukgo kxtakxni Dios?
15 ¿Tuku xlakata ni tanukgolh makgapitsi israelitas kTiyat nema xKawanikanit pi Nakamaxkikan akxni xlama Moisés? Xlakata ni kgalhakgaxmatnankgolh. ¿Chu tuku xlakata ni tanukgolh kxtajxni Dios makgapitsi kstalaninanin Cristo akxni xlama Pablo? Xlakata na ni kgalhakgaxmatnankgolh. Ni kanajlaputunkgolh pi Limapakgsin xmakgantaxtinita tuku xlimastakanit chu la uku Jehová tanu la xkapulalima xkachikin.
La tlan natanuyaw uku kxtajaxni Dios
16, 17. 1) ¿La tlan natanuyaw kxtajaxni Dios? 2) ¿Tuku naʼakxilhaw kʼartículo nema aku mima?
16 La uku, akinin nipara tsinu lakpuwanaw pi xlakata tlan nalakgtaxtuyaw talakaskin namakgantaxtiyaw Limapakgsin xla Moisés. Wantuku Pablo katsokgnilh xalak Éfeso anta lakatanks wan: «Kaj xpalakata xtalakgalhaman Dios wixin kgalhiyatit akgaputaxtut pi kanajlayatit wantu malakanuy, ni wa likgalhiyatit lakgtaxtut xpalakata [...] tu tlan xtlawatit, wampi wa Dios kaj litlan kamaxkinitan. Ni pala chatum ti napuwanacha pala wa lilakgalhamalh Dios kaj xpalakata [...] lhuwa tlan katsiy» (Efe. 2:8, 9, Hua Xasasti Talaccaxlan, 1999). Wa xlakata ¿tuku kilitlawatkan komo tanuputunaw kxtajaxni Dios? Kalakapastakwi pi Jehová laksakli xliʼakgtujun kilhtamaku, akxni jaxli xlakata wi tuku lu xlakaskinka xtlawalh: namakgantaxti tuku lakapastaknit natlawa kKatiyatni. Wa xlakata komo tanuputunaw kxtajaxni Jehová, kilikgalhakgaxmatatkan chu namakgtayananaw nakgantaxtu tuku lakapastaknit Dios natlawa chuna la nakinkawanitilhayan xkachikin.
17 Chuntiya lu xlakaskinka kaʼakxilhwi tastakyaw xalak Biblia nema masta skujni xalipaw chu xaskgalala, chu ni wa natlawayaw tuku akinin lakpuwanaw. Komo ni xlakaskinka xakxilhwi, uma xkitaxtulh pi lakatayamaw xtalakaskin Dios chu asta nialh tlan xtalaliw Jehová. Pero ¿tuku tlawa pi ni nakgalhakgaxmataw Dios la uku? Artículo nema aku mima naʼakxilhaw uma chu na naʼakxilhaw pi tuku tlawayaw limasiya komo tanunitaw kxtajxni Dios.
[Notas nema wilakgo kpágina]
^ párr. 3 Jesús wa pi akxni sacerdotes chu levitas kskujkgo ktemplo sábado ni talakgalhin xwanit. Xlakata Jesús wa xaPuxku Sacerdote kxalanka templo xaʼespiritual, na ni xlakatsalama limapakgsin xlakata xmakgantaxtima taskujut nema xlakgayawanit xTlat (Mat. 12:5, 6).
^ párr. 13 Ni katsiyaw komo akxni xtitaxtunita Pentecostés xla kata 33, kstalaninanin Cristo tiku judíos xwankgonit asta tlawakgolh tamakamastan kKilhtamaku akxni kXapakan Talakgalhin. Komo chuna tlawakgolh uma xkitaxtu pi ni xlakaskinka xʼakxilhkgo xtamakamastan Jesús. Pero max lhuwa chuntiyaku xtlawamakgolh tuku xwan Limapakgsin xla Moisés (Gál. 4:9-11).
Xlakata nalilakapastakaw
• ¿Tuku xlakata lakkaxwililh Jehová kilhtamaku akxni najaxa?
• ¿Tuku likatsiyaw pi xliʼakgtujun kilhtamaku nina sputa?
• ¿Tuku xlakata ni tanukgolh makgapitsi israelitas kkxtajxni Dios akxni xlama Moisés chu makgapitsi kstalaninanin Cristo kxapulana siglo?
• ¿Tuku kilitlawatkan komo tanuputunaw kxtajxni Dios?
[Takgalhskinin]
[Epígrafe xla página 27]
Komo tanuputunaw kxtajaxni Jehová, kilikgalhakgaxmatatkan chu namakgtayananaw nakgantaxtu tuku Dios lakapastaknit natlawa chuna la nakinkawanitilhayan xkachikin
[Epígrafe xla página 26]
¿Tuku chuntiya talakaskin natlawayaw xlakata tlan natanuyaw kxtajaxni Dios?
