Jehová, «Dios nti nkinkamaxkiyan ntatanksni»
Jehová, «Dios nti nkinkamaxkiyan ntatanksni»
«Wa Dios nti nkinkamaxkiyan ntatanksni, makxtum kakatalataman.» (ROM. 15:33)
1, 2. ¿Tuku tuwa taʼakglhuwit lichuwinan capítulos 32 chu 33 xla Génesis, chu la talakkaxtlawalh?
LAKATSU kPenuel, kxpaxtun niku titaxtu Jordán, lakatsu kJaboq nalatatanokglhkgo chatiy natalan tiku akxtum lakachinkgolh chu makgasa ni lu tlan latalalinkgo. Lichuwinamaw Esaú chu Jacob. Maski titaxtunita puxum kata akxni Jacob makgtamawalh xtala tuku xlakgchan xlakata xapuxku xwanit, Jacob lakpuwan pi sitsimajku chu max makgniputun. Wa xlakata akxni katsilh pi Esaú mastokgli 400 lakchixkuwin, chu mima lakgapaxtokga, wi tuku tlawa xlakata namakgapaxuwa. Wa xlakata chalhuwa tiku kamalakgacha chu malakgachani lhuwa animales. Maskiwi 550 animales, chu akxni makgatunu lakgchankgo Esaú, wanikgo pi xtala malakgachanima.
2 Alistalh chalh kilhtamaku nalatatanokglhkgo. Jacob nialh pekuan akxni lakgan xtala xapuxku, pero makgtujun tatsokgostalh xlakata nalimasiya pi maxki kakni. Pero wi tuku pulana tlawa nema lu xlakaskinka xlakata nialh nasitsini xtala: skini Dios kamakgtayalh. Jehová kgalhtilh xʼoración, xlakata xtachuwin Dios wan pi «Esaú kgosnalh xlakata natatanokglha xtala, chu akgpixtiyalh chu tsukulh lakatsuka» o lakasputa (Gén. 32:11-20; 33:1-4).
3. ¿Tuku kinkamasiyaniyan xlakata la Jacob lakkaxtlawalh taʼakglhuwit nema xtakgalhi Esaú?
3 ¿Tuku kinkamasiniyan uma tuku tilalh? Pi akxni natakgalhiyaw taʼakglhuwit chatum tala, kilitlawatkan putum tuku natalakaskin xlakata nalakkaxtlawayaw chu ni natlawa pi nialh tlan nalatalalinaw kcongregación. Chu chuna kilitlawatkan asta akxni akinin ni tlawanitaw tuku nitlan chu ni talakaskin naskiniyaw kakinkatapatin. Jacob tlan chuna xlakpuwa, xlakata Esaú nitu xliʼakxilhnit tuku xlakgchan xlakata xapuxku xwanit chu xlistamaxkinit xtala akgtum plato xla lentejas (Gén. 25:31-34; Heb. 12:16). Pero chuna la Jacob, kilitlawanitkan oración Jehová chu kilitlawatkan tuku natalakaskin xlakata ni nakatakgalhiyaw taʼakglhuwit amakgapitsin. Chu Jehová nasikulunatlawa tuku natlawayaw. La uku naʼakxilhaw atanu liʼakxilhtit xalak Biblia chu nakinkamasiyanikgoyan la nalakkaxtlawayaw taʼakglhuwit.
Akgtum lu tlan liʼakxilhtit
4. ¿Tuku tlawanit Dios xlakata nakalakgmaxtu latamanin ktalakgalhin chu klinin?
4 Ni anan achatum xlikalanka kakilhtamaku la Jehová tiku lhuwa tuku tlawanit xlakata tlan natalalinaw. Wa xlakata Biblia limapakuwi «Dios nti nkinkamaxkiyan ntatanksni» (Rom. 15:33). Kalakpuwaw tuku tlawalh xlakata tlan xtalaliw. Katsiyaw pi xlakata xkamanan Adán chu Eva akinin, lakgalhinanin chu wa xlakata «xtaxokgo» talakgalhin wa linin (Rom. 6:23). Pero Jehová lhuwa kinkapaxkin wa xlakata makamilh xKgawasa unu kKatiyatni xlakata xlakachilh la chatum chixku tiku ni xkgalhi talakgalhin chu xkinkalakgmaxtun. Jesús tlawalh xtalakaskin xTlat chu mastalh talakaskin pi tiku ni xakxilhputunkgo xmakgnikgolh (Juan 10:17, 18). Alistalh malakastakwanika chu makamaxkilh Dios xtamakamastan, uma wamputun xtapalh xkgalhni nema stajtamakgalh, nema tlan xkalilakgmaxtuka klinin tiku xmakgxtakgkgolh tuku nitlan xtlawamakgolh (kalikgalhtawakga Hebreos 9:14, 24).
5, 6. ¿La kinkamakgtayanitan xtamakamastan Jesús xlakata la talalinaw Dios?
5 Isaías 53:5 wan la kinkamakgtayan tlan natalalinaw Dios xlakata nilh Cristo: «Tuku kilixokgotkan xwanit xlakata tlan natalalinaw, wa lakgchalh, chu xlakata tuku limasipanika akinin lipaksnitaw». Maski lakgalhinaninku akinin, komo kanajlaniyaw uma tamakamastan, Jehová nialh xtalamakgasitsin kinkaʼakxilhan, wata kinkamaxkiyan talakaskin tlan natalalinaw. Xlikana, «likgalhiyaw ntalakgtaxtun xpalakata xkgalhni [Jesús], chu xmatsankgananika kintalakgalhinkan» (Efe. 1:7).
6 Biblia na kinkawaniyan xlakata Cristo: «Dios tlan akxilhli pi wa [Cristo] putum xkgalhilh». Chuna la akxilhaw, Jesús wa tiku tlakg xlakaskinka xlakata nalikgantaxtu tuku Dios lakapastaknit natlawa. ¿Chu tuku lakapastaknit natlawa? «Xlakata putum amakgapitsi tlan xtalalinkgolh, chu chuna tatlawalh xlakata xkgalhni [Jesucristo] nema tastajtamakgalh.» Kaʼakxilhwi pi akxni lichuwinan «putum amakgapitsi» tiku Dios tlawa pi tlan natalalinkgo, pulaktiy tuku talichuwinan: «tuku wi kʼakgapun» chu «tuku wi kkatiyatni». ¿Tiku kilhchanima uma tachuwin? (Kalikgalhtawakga Colosenses 1:19, 20.)
7. ¿Tiku kilhchanima «tuku wi kʼakgapun» chu «tuku wi kkatiyatni» nema Dios tlan katalalin?
7 ¿Tiku kalimapakuwikan «tuku wi kʼakgapun»? Wa tiku xatalaksakni chu xlakata talakgmaxtut «tlan kaʼakxilhkan» xtachuna xkamanan Dios chu tlan talalinkgo (kalikgalhtawakga Romanos 5:1). Chuna kawanikan xlakata naʼankgo kʼakgapun “namapakgsinankgoy kkatuxawat” (Apo. 5:10). ¿Chu tiku kilhchanima «tuku wi kkatiyatni»? Latamanin tiku makgxtakgkgo tuku nitlan xtlawakgo chu nalatamakgo xliputum kilhtamaku unu kkatiyatni (Sal. 37:29).
8. ¿La limakgkatsiyaw akxni lakpuwanaw putum tuku Jehová tlawanit xlakata tlan natalalinaw?
8 Carta nema Pablo kamalakgachanilh xatalaksakni kstalaninanin Cristo xalak Éfeso kawanilh: «Xpalakata mpi lu wa tlanka Dios kxtalakgalhaman, [...] mpi maski xtachuna xanin xwanitaw nkin xpalakata nkintalakgalhinkan, wampi makxtum kinkatamaxkikan latamat nCristo». Chu alistalh wa: «Kaj litlan lipaxkatsinit liʼakgaputaxtunitantit» (Efe. 2:4, 5). ¡Uma tachuwin limasiya pi lipaxtikatsini pi kinkalakgmaxtukan! Putum akinin tiku nalatamayaw kʼakgapun o kKatiyatni, lhuwa lakliniyaw Jehová. Akxni akgatekgsaw tuku tlawalh xlakata tlan natalalinaw, lu lipaxuwayaw chu paxtikatsiniyaw xlakata tlan kinkalikatsiniyan chu kinkalakgalhaman. Xlikana Jehová liwana masiya pi tlan kinkatalalimputunan. Tlan natlawayaw chuna la Jehová, max akxni wi tuku tlawaputun pi nialh liwana nalatalalinaw kcongregación.
Xliʼakxilhtit Abrahán chu Isaac
9, 10. ¿La limasiyalh Abrahán pi ni xkgalhiputun taʼakglhuwit akxni tsukukgolh lamakgasitsikgo xlakskujninkan?
9 Atanu liʼakxilhtit nema na tlan chuna natlawayaw wa xla Abrahán, Biblia wan: «“Abraham, kanajlanilh Dios, na wa xtakanajla, xtachuna litaʼukxilhli xlitamalulokgni”; na xʼamigo Dios litapakuwilh» (Sant. 2:23). ¿La limasiyalh pi xkanajlani Dios? Akxni ni katakgalhilh taʼakglhuwit amakgapitsin. Makgtum, tiku xkuentajtlawakgo xborregos takgalhikgolh taʼakglhuwit xlakskujni xpuxnimat Lot, xlakata nialh xʼanan lhuwa sekget chu chuchut xlakata xwakgolh xʼanimales (Gén. 12:5; 13:7). Xlakata tlan xlakkaxtlawakgolh xtaʼakglhuwitkan xtalakaskin tanu tanu xʼankgolh tawilakgo. ¿Tuku tlawalh Abrahán? Maski tlakg xkgalhi kata chu xpalakachuwina Dios xwanit, maxkilh talakaskin Lot nalaksaka niku xʼamputun. Uma limasiya pi tuku tlakg xlakaskin, tlan xkatalalimputun amakgapitsin.
10 Kaʼakxilhwi tuku wanilh Lot: «Katlawa litlan nialh kalamakgasitsiw, chu nialh kalamakgsitsikgolh kilakskujnin chu milakskunin, xlakata akinin linatalan. Tlan napina xlikalanka kachikin niku napimputuna. Katlawa litlan, lakatanu wix kapit. Komo wix napina kpakgxwiki akit nakan kpakgstakat chu komo wix napina kpakgstakat akit nakan kpakgxwiki». Lot laksakli tiyat niku tlakg tlan xmakgalanan (Gén. 13:8-11). ¿Sitsinilh Abrahán xlakata chuna laksakli? Nitu sitsinima, xlakata akxni Lot chilinkgolh makgapitsi soldados, lakapala alh lakgmaxtu (Gén. 14:14-16).
11. ¿Tuku tlawalh Abrahán xlakata ni nakatakgalhi taʼakglhuwit filisteos?
11 Kaʼakxilhwi atanu kilhtamaku akxni Abrahán na ni katakgalhiputulh taʼakglhuwit xalak Canaán. Makgapitsi filisteos tiku anta lakatsu xwilakgolh «xmakglhtikgonit» akgtum pozo xalak Beer-seba nema xpuwaxkgonit xlakskujni Abrahán. Xlikana pi xla tlan ni xmastalh talakaskin namakglhtikan, chu xlimasiyanit pi xkgalhi litliwakga akxni katlajalh kgalhtati mapakgsinanin tiku xchilinkgonit Lot. ¿Tuku tlawalh akxni makgkgalhanka xpozo? Ni tunkun katalachipalh wata mastalh talakaskin natitaxtu kilhtamaku. Pero wi tuku tlawalh alistalh akxni lakgapaxialhnalh xmapakgsina filisteos. Akxni uma mapakgsina skinilh pi nitu xtlawanikgolh nipara xfamilia, Abrahán talakkaxlalh pi nitu xʼama katlawani, pero na wanilh pi xmakgkgalhankanit xpozo. Mapakgsina wa pi ni xkatsi pi xmakglhtikanit chu wanilh pi xʼama maspitni. Abrahán ni kgalhilh taʼakglhuwit kkachikin niku xmakgwi (Gén. 21:22-31, 34).
12, 13. 1) ¿La nachuna tlawalh Isaac chuna la xtlat? 2) ¿La sikulunatlawalh Jehová xlakata tlan likatsilh?
12 Isaac, xkgawasa Abrahán, na xlakgati tlan xkatalalin amakgapitsin. Kaʼakxilhwi tuku tlawalh akxni analh tatsinksni niku xlama anta (kBeer-lahai-roí, kʼNégueb) chu alh knorte kachikin nema xwanikan Guerar, tiyat nema xkatapakgsini filisteos. Kʼuma tiyat lu tlan xmakgalanan chu Jehová sikulunatlawalh xlakata lhuwa tuku xmakgalhalh chu lhuwa xkgalhilh wakax. Pero filisteos lu xlakgsitsinikgo. Ni xlakaskinkgo lhuwa tuku xkgalhilh chuna la Abrahán, wa xlakata putapunikgolh xpozo nema xmatlawinanit. Alistalh mapakgsina wanilh Isaac: «Alakatanu kapit tawilaya». ¿Tuku tlawalh? Xlakata ni xkgalhilh taʼakglhuwit, wa xlakata alakatanu alh (Gén. 24:62; 26:1, 12-17).
13 Isaac lilh alakatanu putum tuku xkgalhi chu anta xlakskujni tlawakgolh atanu pozo. Pero xkuentajtlawananin wakax xalak Filistea waniparakgolh pi uma chuchut xlakan xwanit. Amakgtum Isaac nachuna tlawalh la xtlat. Ni katalachipalh wata kamapakgsilh xlakskujni alakatanu xtlawaparakgolh akgtum pozo. Pero amakgtum filisteos wamparakgolh pi xlakan xwanit. Xlakata ni xkgalhilh taʼakglhuwit alakatanu niku ankgolh tawilakgo chu anta matlawinalh xasasti pozo chu limapakuwilh Rehobot. ¿Sikulunatlawalh Jehová xlakata chuna tlawalh? Sikulunatlawalh, xlakata alistalh, akxni alh tawila kBeer-seba, niku tlakg tlan tiyat xwanit, Dios wanilh: «Ni kapekuanti, akit nakmakgtayayan, chu xlikana naksikulunatlawayan, chu nakmalhuwi minkamanan kaj xlakata kiskujni Abrahán» (Gén. 26:17-25).
14. ¿La limasiyalh Isaac pi ni xtakgalhiputun taʼakglhuwit akxni mapakgsina xalak Filistea wi tuku talakkaxlalh?
14 ¿Tlan xkatalachipalh Isaac xlakata ni xmakglhtikgolh xpozos? Tlan. Xlakata Dios xmakgtaya. Chuna wankgolh alistalh mapakgsina filisteo chu chatiy xlakskujnin akxni kilakgapaxialhnankgolh kBeer-seba xlakata xtalakkaxlakgolh chu nitu nalatlawani. Wanikgolh: «Kakxilhnitaw, pi xlikana Jehová makgtayaman». Pero ¿tuku xlakata Isaac alakatanu alh tawila? Xlakata ni xkgalhiputun taʼakglhuwit. Chu akxni mapakgsina filisteo chu xlakskujnin lakgapaxialhnankgolh, limasiyapa pi lu tlan xkatalalimputun: «Matlawinalh lhuwa liwat chu wayankgolh chu kgotkgolh. Lichali tsisa sokg takikgolh chu latalakaxlalh. Alistalh Isaac kamalakgachalh [...] ni kgalhikgolh taʼakglhuwit» (Gén. 26:26-31).
Xliʼakxilhtit José
15. ¿Tuku xlakata xnatalan José nitlan tuku tlawanikgolh?
15 Jacob, chatum xkgawasa Isaac lu xalakatitum xlikatsi (Gén. 25:27). Chuna la akxilhwi kxapulana párrafo Jacob tlawalh putum tuku talakaskilh xlakata nialh ksitsinilh Esaú. Xlikana wa xtlat xmasiyaninit tlan nakatalalin amakgapitsin. Pero ¿tuku tlan nawanaw xlakata xkgalhkuti xlakgkgawasan? José xkgawasa nema tlakg xpaxki, lu tlan xlikatsi, putum kilhtamaku maxkilh kakni, kgalhakgaxmatli chu kuentajtlawalh tuku xla xtlat xwanit (Gén. 37:2, 14). Pero, lu tanu la xlikatsikgo xanapuxkun xnatalan. Lu nitlan xlikatsikgo asta stakgolh xlakata kaj skujni xlitaxtulh chu alistalh wanikgolh xtlatkan pi tantum lapanit xmakgninit (Gén. 37:4, 28, 31-33).
16, 17. ¿La limasiyalh José pi tlan xkatalalimputun amakgapitsin?
16 Jehová sikulunatlawalh José, xlakata alistalh wa tiku tlakg xmakgtaya faraón akxni chatum puxku litaxtulh kʼEgipto. Akxni analh tatsinkstat kCanaán, xnatalan ankgolh kʼEgipto xlakata xkitamawakgolh tuku nawakgo. Chankgolh kxlakatin José pero ni lakgapaskgolh, max xlakata tanu la xlhakgananit xlakata xapuxku xwanit (Gén. 42:5-7). ¡Tlan xlimaklakaskilh xlimapakgsin xlakata xkamalakgaxokgelh xnatalan! Pero maski lu nitlan tuku xtlawanikgonit José chu xtlat, lakpuwa pi tlakg tlan xwa tlan nakatalalin. Akxni akxilhli pi xmakgxtakgkgonit nixatlan xtayatkan, kawanilh pi wa José: «Ni kalilipuwantit chu ni kalisitsit pi kilastaw; Dios kimalakgachalh xlakata nak lakgmaxtu latamanin kmilakatinkan». Chu alistalh «katsukli putum xnatalan chu tasalh» (Gén. 45:1, 5, 15).
17 Titaxtulh kata chu Jacob nilh, chu xnatalan José pekuankgolh xlakata xlakpuwankgo pi wi tuku nitlan xʼama katlawani. Akxni José katsilh pi xnatalan xpekuamakgolh, amakgtum limasiyalh pi ni xlakgati taʼakglhuwit. Lu nitlan limakgkatsilh, tsukulh tasa chu kawanilh: «Ni kapekuantit. Akit chuntiya nakamaxkiyan tuku nawayatit wixin chu minkamanankan». Nachuna, «kawanilh lakwan tachuwin nema lu tlan limakgkatsikgolh» (Gén. 50:15-21).
«Litsokgka mpi chuna nalikatsiniyaw wantu ntlan»
18, 19. 1) ¿Tuku kinkamasiyanin liʼakxilhtit nema likgalhtawakgaw kʼuma artículo? 2) ¿Tuku naʼakxilhaw kʼartículo nema aku mima?
18 Pablo tsokgli: «Xampi wa nkatuwa ntu xapulana ntatsokgli, wa litsokgka mpi chuna nalikatsiniyaw wantu ntlan; lakimpi wa lantla nalikgalhiyaw ntapaxuwanaliyan, chu naliʼakgpuwantiyaw ntatsokgnun, nalikgalhiyaw ntakgalhkgalhitin» (Rom. 15:4). Xlikana lhuwa tuku katsiniyaw xlakata la likatsi Jehová chu tuku talichuwinan kBiblia xlakata Abrahán, Isaac, Jacob chu José.
19 ¿La makgkatsiyaw akxni akxilhaw putum tuku Jehová tlawanit xlakata tlan nakatalalin latamanin? Xlikana xlakata paxtikatsiniyaw, uma tlawa pi akinin naliskujaw xlakata ni nakatakgalhiyaw taʼakglhuwit amakgapitsin. Nachuna, liʼakxilhtit xla Abrahán, Isaac, Jacob chu José, limasiyakgo pi natlatni tlan kamasiyanikgo la nalikatsikgo xkamanan. Na kinkamasiyaniyan pi Jehová kasikulunatlawa tiku tlan katalalimputunkgo amakgapitsin. Chu chuna xlilat xlakata Pablo wan pi «Dios nti nkinkamaxkiyan ntatanksni» o tlan kinkamamakgkatsiniyan (kalikgalhtawakga Romanos 15:33 chu 16:20). Kʼartículo nema aku mima naʼakxilhaw tuku xlakata Pablo makglhuwa wa pi lu xlakaskinka tlan nalatalalinaw chu la chuna natlawayaw.
¿Tuku katsini?
• ¿Tuku tlawalh Jacob xlakata xtala Esaú nialh ksitsinilh?
• ¿Tuku kilitlawatkan komo paxtikatsiniyaw putum tuku Jehová tlawalh xlakata tlan natalalinaw?
• ¿Tuku kinkamasiyaniyan tuku tlawakgolh Abrahán, Isaac, Jacob chu José?
[Takgalhskinin]
[Epígrafe xla página 19]
¿Tuku tlakg xlakaskinka tlawalh Jacob xlakata xtala Esaú nialh ksitsinilh?
