Wantuku masiya xTachuwin Dios

¿Tuku xTamapakgsin Dios?

Uma artículo namakgtayayan natekgsa kmiBiblia xtakgalhtin makgapitsi takgalhskinin nema wix max katsiputuna. Komo lakaskina xtatayananin Jehová tlan natalikgalhtawakgakgoyan umakgolh takgalhskinin.

1. ¿Tuku xTamapakgsin Dios?

Akgtum tamapakgsin xalak akgapun nema natawila xlakgxokgo putum tamapakgsin xalak Katiyatni chu natlawa pi nakgantaxtu xtalakaskin Dios kKatiyatni chuna la kʼakgapun. Uma xTamapakgsin Dios wa tamapakgsin nema putum maklakaskinaw. (Kalikgalhtawakga Daniel 2:44; Mateo 6:9, 10.)

Xlakata putum tamapakgsin maklakaskin tiku napulalin, Jehová Dios laksaknit xKgawasa, Jesucristo, xlakata Mapakgsina nawan kxTamapakgsin. (Kalikgalhtawakga Lucas 1:30-33.)

2. ¿Tuku xlakata Jesús wa tlakg tlan mapakgsina?

Xkgawasa Dios wa xatlan mapakgsina xlakata xapaxkina, putum kilhtamaku tlawa tuku xaʼakgstitum chu kgalhi litliwakga xlakata nakamakgtaya latamanin (Mateo 11:28-30). Akxni malakastakwanika, Jesús alh kʼakgapun pero ni tunkun tsukulh mapakgsinan (Hebreos 10:12, 13). Kgalhkgalhilh kxpaxtun Dios asta akxni xmaxkilh limapakgsin xlakata xmapakgsinalh. (Kalikgalhtawakga Daniel 7:13, 14.)

3. ¿Natamapakgsinankgo Jesús amakgapitsi latamanin?

Biblia wan pi nakatamapakgsinan Jesús makgapitsi xlakskujnin Dios. Anta kDaniel 7:27 kalimapakuwikan xasantos. Xapulana tiku kalaksakli Dios xlakata xasantos xwankgolh wa xʼapóstoles Jesús. Asta kkinkilhtamakujkan Jehová chuntiya kalaksakma lakchixkuwin chu lakpuskatin tiku kanajlanikgo, xlakata xasantos nawankgo. Chuna la Jesús, umakgolh latamanin ankgo kʼakgapun akxni nikgo chu kamaxkikan xmaknikan xaʼespíritu. (Kalikgalhtawakga Juan 14:1-3; 1 Corintios 15:42-45.)

¿La xlilhuwa naʼankgo kʼakgapun? Jesús kalimapakuwilh «ni xalhuwa borregos» (Lucas 12:32, NM). Kaj 144,000 tiku natamapakgsinankgo Jesús kKatiyatni. (Kalikgalhtawakga Apocalipsis [Revelación] 5:9, 10; 14:1.)

 4. ¿Tukuya kilhtamaku tsukulh mapakgsinan xTamapakgsin Dios?

Jesús wilika xlimapakgsina kata 1914. * Alistalh kamaxtucha Satanás chu xdemonios anta kʼakgapun chu kamakamilh kKatiyatni (Apocalipsis 12:7-10, 12). Ama kilhtamaku, tlakg tsukulh talhuwi taʼakglhuwit kkakilhtamaku. Guerras nema anankgo uku, tachiki tiyat, tatsinksni chu tuku nitlan, makgantaxtima tuku wan Biblia nema limasiya pi nialh makgas wi uma kakilhtamaku (2 Timoteo 3:1-5). Putum tiku lipaxuwaputunkgo tasikulunalin nema nalimin xTamapakgsin Dios xlistalanitkan xMapakgsinakan, Jesús. (Kalikgalhtawakga Lucas 21:7, 10, 11, 31, 34, 35.)

5. ¿Tuku natlawa xTamapakgsin Dios?

Xlakata talichuwinama xtachuwin Dios xlikalanka kKatiyatni kamakgtayakanit lhuwa latamanin nakatsikgo tuku kinkaskiniyan Dios (Mateo 24:14). Pero tlakg lhuwa tuku natlawa. Namasputu uma lixkajni kakilhtamaku chu nakalakgmaxtu «lhuwa ntachixkuwitat» tiku ni makgxtakgkgo Jesús. (Kalikgalhtawakga Apocalipsis 7:9, 10, 13-17.)

Chuna la natitaxtutilha akgtum mil kata Katiyatni akgtum paraíso nawan. Chu Jesús namaxkipara xTamapakgsin xTlat (1 Corintios 15:24-26). ¿Wi tiku xmasiyaniputu xlakata uma Tamapakgsin? (Kalikgalhtawakga Salmo 37:10, 11, 29.)

Komo tlakg katsiputuna xlakata uma, kaʼakxilhti capítulo 8 chu 9 xla libro ¿Tuku xlikana masiya Biblia?, nema tlawakgonit xtatayananin Jehova.

[Notas nema wilakgo kpágina]