¿Wi tuku xlakata lamaw?

LHUWA latamanin kakgalhskinkan tuku xlakata lamaw. Lakputsakgo la napaxuwakgo, pero lhuwa ni chuna kakitaxtuni la xlakpuwankgonit. Chuna makgkatsikgo la wan neurólogo xalak Austria Viktor E. Frankl pi “makgkatsikan pi nitu litaxtu latamakan chu ni lipaxuwakgo tuku tlawakgo”.

¿Tuku xlakata? Xlakata lhuwa millones latamanin xlikalanka Katiyatni lu nitlan tuku titaxtumakgolh. Patinamakgolh xlakata nitu kgalhikgo, xlakata tajatat, lhuwa katlawakanikan tuku lu nitlan o katlawanikan tuku ni xaʼakgstitum. Chuna la wa chatum xaskgalala chixku xala makgasa xwanikan Job, kgalhikgo latamat nema «kalimini tapatin» (Job 14:1, La Palabra de Dios para Todos). Lakaskinkgo tlan xtitaxtuparakgolh maski kaj aʼakgtum kilhtamaku.

¿Chu latamanin tiku kgalhikgo lhuwa tumin nema tasiya pi tlan wilakgo? Tasiya pi kgalhikgo putum tuku talakaskin xlakata napaxuwakgo. Pero lhuwa ni chuna kakitaxtuni. Makglhuwa akxilhkgo pi «taʼakglhuwit» chu amakgapitsi «tuku nitlan», max la akxni makgasputkgo xtuminkan, kaʼakgspula tuku lu nitlan, akxni niy chatum xkamanan, uma tlawa pi nialhtu nakgalhikgo takgalhkgalhin (Salmo 90:10, NM).

Pero ananku tuku tlawa pi tlakg «makgkatsikan pi nitu litaxtu latamakan chu ni lipaxuwakan» xlakata lhuwa tiku lakpuwankgo: ni makgas latamayaw. Lhuwa nila katsikgo tuku xlakata latamanin ni makgas latamakgo maski lhuwa tuku tlanku xtlawakgolh. Pero tiku lakpuwankgo pi maski nialh xkgalhiw laklanka taʼakglhuwit kkilatamatkan, akxni niyaw makgatsankgayaw putum tuku kgalhiyaw (Eclesiastés 3:19, 20).

¿Tlan natekgsaw tuku nakinkamakgapaxuwayan kkilatamatkan?

Makgasa, chatum mapakgsina xalak Israel xwanikan Salomón, wa tuku tlawakgo latamanin. Xla xakxilha pi latamanin xla xkilhtamaku chuna la latamanin xala uku, lu xliskujkgo xlakata: xchananankgolh, xmakgalanankgolh, xtlawakgolh xchikkan, xkakuentajtlawakgo  xfamiliajkan... Pero maski chuna xtlawakgo, ¿la xkakitaxtuni? Xla wa: «Putum nitu litaxtu, xtachuna la putsastalanikan un» (Eclesiastés 2:17, Nueva Traducción Viviente).

¿Xlakpuwan Salomón pi maski lataman lhuwa tuku xtlawalh nila xatapaxuwan xlatamalh? Ni chuna xlakpuwan. Xla kajwatiya lichuwinalh la wilakgolh latamanin tiku kgalhikgo talakgalhin. Pero xTachuwin Dios kinkawaniyan pi ni putum kilhtamaku chuna katiwa latamat.

Akgtiy artículos nema naʼakxilhaw lichuwinan tuku xlakata nakanajlayaw tuku kinkawaniyan Dios pi nakinkamaxkiyan. Na natalichuwinan tuku xlakata tasiya pi latamat nitu litaxtu, tuku kilhtamaku nalakkaxla uma chu tuku tlan natlawayaw xlakata xlikana napaxuwayaw.