Xkgalhkgalhimakgolh Mesías

«Putum xkgalhimakgolh pi xmilha Mesías, chu lu xkatsiputunkgo komo Juan wa Mesías xwanit.» (LUC. 3:15, NUEVA TRADUCCIÓN VIVIENTE)

1. ¿Tuku kamakatsinilh chatum ángel tiku xkuentajtlawakgo borregos?

AKU tsiswalh. Tiku kuentajtlawakgo borregos kamaputswayananimakgolh xborregoskan. Kaj xalan lhpipakg lakgolh xlakata kxpaxtunkan katasiyani xʼángel Jehová tiku maxkgakgenama xlilanka Dios. Kakgaxmatwi tuku lu tlan kawani chatum ángel: «Ni kapikuantit, xampi kkamakatsiniyan xasasti tlanka tapaxuwan wa ntu nalipaxuwakgoy [...] ntachixkuwitat. Chiyu lakachilh [...] mimakgaputaxtinakan wanti wanikan nCristo». Xlikana, xlakachinit chatum skgata tiku Mesías xʼama wan. Chu anta xtekgskgolh niku xkamakikan wakax chu borregos anta lakatsu chu xmamikanit anta niku kamawikan wakax chu borregos. «Kaj xalan nchu ntitatasiyukgolh [lhuwa] ángel [...] xala kʼakgapun wa nti xmaxkikgo nkakni Dios, xwankgoy: “Katamaxkilh nkakni Dios nti ntlanka xlakatsukut; Chu anta nkatiyatna, kaʼananikgolh ntapaxuwan kxnakukan nti nkgalhinikgoy ntapaxuwan[”].» (Luc. 2:8-14.)

2. ¿Tuku wamputun «Mesías», chu la tlan xtakatsilh tiku xʼamaka laksakkan?

² Xlakata Judíos, xwankgonit tiku xkuentajtlawamakgolh xborregos xkatsikgo pi tachuwin «Mesías», o «Cristo» xkilhchanima «Talaksakni» uma wamputun chatum tiku Jehová laksaka xlakata wi tuku lu xlakaskinka natlawa (Éxo. 29:5-7). Pero ¿la tlakg xkatsikgolh xlakata Mesías chu xkawanikgolh amakgapitsin pi uma aktsu skgata nema xlakachinit wa tiku xlaksakkanit xlakata Mesías nalitaxtu chuna la xwanit ángel? Xakxilhkgolh tuku xlichuwinankanit kTatsokgni xaHebreo xlakata Mesías chu la xkgantaxtulh kxlatamat akxni aktsinajku xwanit.

¿Tuku xlakata lu xkgalhkgalhimakgolh?

3, 4. ¿La kiliʼakgatekgsatkan tuku wan Daniel 9:24, 25?

³ Titaxtulh akglhuwa kata, lakachilh Juan tiku xMununan. Xlakata tuku xwan chu tuku xtlawa, lhuwa tiku xlakpuwankgo komo wa Mesías xwanit (kalikgalhtawakga Lucas 3:15). ¿Tuku xlakata lhuwa lakpuwankgo pi xlakgchanita kilhtamaku natasiya tiku Cristo? Max xlakata xʼakgatekgskgonit tuku xwanit Biblia xlakata  «setenta semanas» nema xwan: «Wi setenta semanas nema lakkaxwilikanit kminkachikin [...]. Chu milikatsit [...] pi akxni nataxtuy tachuwin xlakata nalakkaxtlawakan chu natlawaparakan Jerusalén asta Mesías Pulalina, natawilay akgtujun semana, chu tutumpuxumatiy semanas» (Daniel 9:25). Maklhuwa libros wankgo pi uma semanas kilhchanima semanas xla kata, akgatunu semana kilhchani akgtujun kata. Akgtum liʼakxilhtit, Biblia La Palabra de Dios para Todos kgalhi akgtum nota niku wan: «Setenta semanas xla kata, kilhchanima akgtati ciento tatipuxumakaw kata».

⁴ La uku, xlakskujnin Dios katsiyaw pi 69 semanas nema lichuwinan Daniel 9:25 tsukulh kata 455 akxni nina xmin Cristo, akxni mapakgsina xalak Persia Artajerjes maxkilh talakaskin Nehemías xkaxtlawapa Jerusalén (Neh. 2:1-8). Komo ama kata tsukuyaw putlekgayaw 69 semanas, o 483, kichan kata 29 akxni nina xmin Jesús, kata akxni tamunulh Jesús. Tama kilhtamaku lilaksakka espíritu santo chu Mesías litaxtulh (Mat. 3:13-17). *

5. ¿Tuku xlichuwinankanit xlakata Mesías nema naʼakxilhaw la uku?

⁵ Kalichuwinaw atanu tuku xlichuwinankanit xlakata la xlakachilh Mesías, akxni aktsujku xwa chu la xlichuwinalh Dios. Akxni naʼakxilhaw la nakgantaxtu, nakanajlaniyaw Biblia chu liwana nakatsiyaw pi Jesús wa Mesías nema xkgalhkgalhimaka.

Akxni aktsinakju xwanit

6. ¿La kgantaxtulh tuku wan Génesis 49:10?

⁶ Xtapakgsilh tribu xla Judá. Akxni xʼamaja niy Jacob, kasikulanatlawalh xkamanan. Akgtum tasikulunalin wan: «Kiwi nema limapakgsinankan kaj watiya Judá nakgalhi, nachuna xlixtokgo xapuxku soldado, asta akxni nachin Siló; chu wa lakgchan nakgalhakgaxmatnikgo kachikinin» (Gén. 49:10). Chuna la wankgolh lhuwa lakgskgalalan judíos, umakgolh tachuwin xkilhchanima Mesías. ¿Tuku kilhchanima kiwi xla mapakgsina chu xlixtokgo xapuxku soldado? Mapakgsina chu kgalhi limapakgsin. Wa xlakata xtalichuwinanit kBiblia pi putum mapakgsinanin xʼamakgolh taxtukgo ktribu xla Judá, chu chuna lalh akxni David mapakgsina tlawaka. ¿Tuku wamputun Siló? «Tiku Xla» o «Tiku Lakgchan». Siló xkgawasa mapakgsinanin xalak kJudá xʼama wan chu xliputum kilhtamaku xʼama mapakgsinan. Tuku kinkamakgtayayan nakatsiyaw, wa tuku Jehová wanilh Sedequías xaʼawatiya mapakgsina xalak kJerusalén. Wanilh pi xʼama min tiku xmakglhtinalh pumapakgsin chu pi wa Dios xʼama maxki (Eze. 21:26, 27). Akxni xmapakgsinanita Sedequías, alistalh kaj watiya Jesús, xkgawasa David wa tiku wanika pi namapakgsinan. Xlikana, akxni nialh lhuwa papaʼ xtsankga nalakachin, ángel Gabriel wanilh María: «Na namaxkiy [...] Dios xlimapakgsin David xtlat. Na xaliʼankgalhin xmapakgsinakan nawan [xchik] Jacob; na wa xlimapakgsin, niʼukxni katikgalhilh xlisputni» (Luc. 1:32, 33). Uma liwana likatsiyaw pi Siló wa Jesús xwanit, tiku xtapakgsi tribu xla Judá chu xkgawasa David (Mat. 1:1-3, 6; Luc. 3:23, 31-34).

7. ¿Niku lakachilh Mesías, chu tuku xlakata lu xlakaskinka?

⁷ Xʼama lakachin kBelén. Miqueas tsokgli: «Wix Belén Efrata, nema tlakg xaʼaktsu xlilhuwa kachikinin nema anan kJudá, anta nalakachin tiku namapakgsinan kʼIsrael, tiku makgasa xlamaja, nema lu makgasa lakatsukulh» (Miq. 5:2). Chuna la akxilhaw, Mesías xʼama lakachin kBelén, kʼakgtum kachikin nema pulana max xwanikan Efrata. María chu José, ni xwilakgolh kBelén, wata xwilakgolh kNazaret. Pero ankgolh kBelén xlakata natatsokgtawilakgo chuna la xmapakgsinankgonit romanos, wa xlakata Jesús anta lakachilh kkata akgtiy nema lilakgapaskan akxni nina xmin Jesús (Mat. 2:1, 5, 6). ¡Kaks lilakawanaw akxni akxilhaw la kgantaxtulh tuku xlichuwinankanit!

8, 9. Chuna la xtalichuwinanit kBiblia, ¿tiku xtse xʼama wan Mesías chu tuku nitlan xʼama la alistalh?

⁸ Chatum tsumat xtse xʼama wan. Isaías xwanit: «Tsumat [...] nakgalhi kskgata» (kalikgalhtawakga Isaías 7:14). Xlikana pi uma versículo  ni limaklakaskin tachuwin xahebreo nema kilhchani «tiku nina tatalakgxtumi chixku» (bethuláh), wata maklakaskin tachuwin «tsumat» (ʽalmáh). Pero uma tachuwin na limaklakaskinkan akxni lichuwinankan chatum tsumat tiku nina tatalakgxtumi chatum chixku, chuna la Rebeca (Gén. 24:16, 43). Nachuna xlakata Dios lipulalilh espíritu santo, malakpuwanilh Mateo nalimaklakaskin tachuwin xagriego (parthénos) «tsumat nema nina tatalakgxtumi chixku» akxni lichuwinalh pi Isaías 7:14 kgantaxtulh akxni lakachilh Jesús. Chu Evangelios xla Mateo chu Lucas liwana kinkawanikgoyan pi María kgalhilh aktsu skgata chu ni xtatalakgxtuminit chixku, wata espíritu santo chuna tlawalh (Mat. 1:18-25; Luc. 1:26-35).

⁹ Ni makgas xtitaxtulh akxni xlakachilh, xʼamaka kamakgnikan lhuwa lakgskgatan. Akglhuwa siglos akxni nina xmin Jesús, akxni hebreos xwilakgolh kʼEgipto, faraón mapakgsinalh pi putum lakgkgawasan tiku xlakachinkgo xkamakanka kkgalhtuchukgo nema wanikan Nilo (Éxo. 1:22). Akxni xtitaxtunita lhuwata kata, Jeremías 31:15, 16 lichuwinalh pi nachuna lhuwa tiku xʼamaka kamakgnikan. Wa uma tuku xwankanit, «Raquel tiku kalakgtasa xkamanan», xlakata «[k]xtiyat xtalamakgasitsinkan» kalinkanit. Chu pixlanka tasa asta takgaxmata kRamá maski lu lakgamakgat xwi, kxtiyat Benjamín, knorte xalak Jerusalén. Mateo wan pi uma kgantaxtulh akxni mapakgsina Herodes mapakgsinalh nakamakgnikan laktsu lakgkgawasan xalak Belén chu kachikinin nema na anta lakatsu xwilakgolh (kalikgalhtawakga Mateo 2:16-18). ¡Lu lilipuwankgolh umakgolh familias!

10. ¿La kgantaxtulh Oseas 11:1 kxlatamat Jesús?

¹⁰ Chuna la israelitas, Dios xʼama makxtuyacha kʼEgipto (Ose. 11:1). Akxni Herodes nina xwan pi nakamakgnikan laktsu lakgkgawasan, chatum ángel wanilh José pi xtsalalh chu xkalilh María chu Jesús kʼEgipto. Chu taspitparakgolh akxni «tinilh Herodes, lakimpi xkgantaxtulh wantu ntimawanilh nkimPuchinakan xpalakachuwina [Oseas], ntiwaj: “Anta kʼEgipto ktasanilh nkinkam namin”» (Mat. 2:13-15). Jesús ni lakkaxwililh uma tuku lalh xlakata akxni xlakachilh, akxni aktsujku xwanit chu wi tuku xtlawalh xlakata chuna xkgantaxtulh.

Akxni tsuku lichuwinan Dios

11. ¿Tuku makgtayanalh xlakata xkatsika tiku Mesías?

¹¹ Pulana wi tiku xlichuwinalh xlakata xlakgapaska. Malaquías lichuwinalh pi «palakachuwina Elías» xʼama tlawa uma taskujut, xkamakgtayalh latamanin xlakata tlan xmakgamakglhtinankgolh Mesías (kalikgalhtawakga Malaquías 4:5, 6). Jesús wa pi tiku xlitaxtu «Elías» wa Juan tiku xMununan (Mat. 11:12-14). Nachuna Marcos masiyalh pi Juan makgantaxtilh tuku xwanit Isaías (Isa. 40:3; Mar. 1:1-4). Jesús ni skinilh Juan pi pulana xlichuwinalh chu na xtlawalh chuna la tlawalh Elías. Wa Jehová maxkilh Juan uma taskujut chu xkamakgtayalh judíos xkatsikgolh tiku Mesías xwanit.

12. ¿Tukuya taskujut liwana litasiya pi Jesús wa Mesías xwanit?

¹² Xlilakgapaska xlakata taskujut nema xmaxkinit Dios. Akgtum kilhtamaku, Jesús alh ksinagoga xalak Nazaret, kkachikin niku stakli. Tiyalh rollo xla Isaías chu likgalhtawakgalh uma: «Wa kSpiritu kimPuchinakan nkintalama, wa cha nkililaksakwililh naklimaxkikgoy limaxkganin xatlan tamakatsinin; wa nkilimalakgachalh nakmakgtsiyajkgoy wanti nkgalhikgoy ntalipuwan kxnakukan; chu nakliʼakgchuwinanikgoy ntalakgtaxtun mpatinanin; chu lakgatsinin nalakawanankgoy. Chu nakmalakgtaxtikgoy wanti xakatsajwananin; chu wa nakliʼakgchuwinan nkata akxni namatlaniy nkimPuchinakan» Jehová. Liwana xlitasiya pi Jesús wa Mesías xwanit, wa xlakata kawanilh: «Chiyu nkgantaxtunit yuma ntatsokgnun wantu nkgaxpatnitantit» (Luc. 4:16-21).

13. ¿Tuku xlichuwinanita Isaías xlakata la Cristo xʼama lichuwinan Dios kGalilea?

¹³ Xlichuwinalh Dios kʼGalilea. Akxni xlichuwinama «Galilea xalak kachikin» xkatiyatni Zabulón chu [...] Neftalí» Isaías wa: «Kachikin nema kapukswa xlama la uku akxilhnit xkgakganat. Chu tiku anta lamakgolh niku lu kapukswa, xkgakganat makgaxkgakganama xlakgstipankan» (Isa. 9:1, 2). Wa xlakata ¿niku tsukulh  Jesús lichuwinan Dios? Anta xalanka kachikin kʼGalilea. Anta xwi kCapernaum nema xtapakgsi kʼGalilea. Tiku xtapakgsikgo tribu xla Zabulón chu Neftalí kgaxmatkgolh tuku xkamakgtayalh tlakg nalakgapaskgo Dios (Mat. 4:12-16). Nachuna anta kʼGalilea Cristo mastalh Takgalhchuwin xalak Sipi, anta kalaksakli xʼapóstoles chu tlawalh xapulana milagro. Chu asta max na anta katasiyanilh akgkitsis ciento xtamakgalhtawakgen akxni xmalakastakwanikanita (Mat. 5:1–7:27; 28:16-20; Mar. 3:13, 14; Juan 2:8-11; 1 Cor. 15:6). Chuna la akxilhwi makgantaxtilh tuku xwanit Isaías akxni lichuwinalh Dios «xkatiyatni Zabulón chu [...] Neftalí». Pero Jesús na lichuwinalh xTamapakgsin Dios putum kachikin xalak Israel.

Wankan tuku na xʼama tlawa

14. ¿La makgantaxtilh Jesús tuku xlichuwinanit Salmo 78:2?

¹⁴ Xʼama limaklakaskin liʼakxilhtit chu parábolas. Salmista Asaf kilhtlilh: «Kinkilhni naklichuwinan liʼakxilhtit [o «parábolas»]» (Sal. 78:2; Reina-Valera Actualizada). ¿Tuku xlakata wanaw pi uma tachuwin kilhchanima Jesús? Mateo kinkawaniyan pi wa kilhchanima. Akxni Mateo xlichuwinanita niku Jesús tamalakxtumi xTamapakgsin Dios akgtum xtalhtsi mostaza chu tuku limaxkutikan harina nema litlawakan kaxtalanchu, na wampara: «Ni tu xlixakgatlikgoy mpala ni wa ntakgalhchuwin [o liʼakxilhtit]. Lakimpi xkgantaxtulh wa ntu ntimawanika xpalakachuwina Dios ntiwaj: “Wa [liʼakxilhtit] naklichuwinan; lhuwa nakwan ntu nkaj xatsekga xwanit asta kxkilhtsukut katuxawat”» (Mat. 13:31-35). Xlikana pi liwana maklakaskilh liʼakxilhtit chu parábolas xlakata nakamasiyani latamanin.

15. ¿La kgantaxtulh tuku xlichuwinanit Isaías 53:4?

¹⁵ Xʼama kamakuchi tiku tatatlakgo. Chuna xlichuwinanita Isaías: «Wa lilh kintajatatkan; chu wa kukalilh tuku xkinkakatsaniyan» (Isa. 53:4). Mateo wan pi akxni xmakuchinita xtse xpuskat Pedro, Cristo na kamakuchilh amakgapitsin latamanin «lakimpi xkgantaxtulh wantu ntiwa xpalakachuwina Dios Isaías. Chuna nama ntiwaj: “Watiya ntiyalh nkintajatatkan, chu mapanulh nkintakatsanajwatkan”» (Mat. 8:14-17). Chu uma kaj makgapitsi nema lichuwinaw akxni Jesús kamakuchilh tiku xtatatlakgo.

16. ¿La limasiyalh apóstol Juan pi Isaías 53:1 xkilhchanima Jesús?

¹⁶ Maski lhuwa tlawalh milagros, lhuwa ni Mesías liʼakxilhkgolh (kalikgalhtawakga  Isaías 53:1). Apóstol Juan limasiyalh la kgantaxtulh tuku xlichuwinankanit xlakata Jesús: «Maski xtlawanit nkaxatu kawa xaliʼukxilhtit kxlakatinkan, chunata ni xkanajlanikgoy. Wa yuma ntilalh lakimpi xlikgantaxtulh xtachuwin xpalakachuwina Dios Isaías, wa tu ntiwaj: “Tlati, [Jehová] ¿ti nkanajlanit nkintamakatsininkan? Chu xlitliwakga nkimPuchinakan, ¿ti ntamasiyuninit?”» (Juan 12:37, 38). Chu umakgolh tachuwin chuntiyaku kgantaxtulh alistalh, akxni Pablo xlichuwinan Dios, latamanin chuntiyaku ni xkanajlaniputunkgo Cristo (Rom. 10:16, 17).

17. ¿La masiyalh Juan pi Salmo 69:4 makgantaxtilh Jesús?

¹⁷ Xʼamaka sitsinikan maski nitu xtlawanit (Sal. 69:4). Juan lichuwinan uma tuku Jesús wa: «Lapi ni xaktlawalh ntatlaw [...] nti ni chatum nti atlaway, ni xkgalhikgolh ntalakgalhin. Wampi wa nchu ni manwa ukxilhkgonit, wampi na [kisitsinikgonit], xa wa nkinTlat. Wampi wa yuma nchuna lilay, lakimpi nalikgantaxtuy ntachuwin ntu ntatsokgtawilanit kxlimapakgsin, ntani wan: “Ni kgalhiy xkilhtsukut nkilixkajnikgolh”» (Juan 15:24, 25). ¿Tuku xlakata wa pi uma xlichuwinankanita “kLimapakgsin”, pero tatsokgnit kSalmos? Xlakata putum Tatsokgni xaHebreo xwanikan «Limapakgsin» (Juan 10:34; 12:34). Evangelios wankgo pi Jesús lhuwa tiku ksitsinikgo, chu judíos tiku xpulalinkgo takanajla tlakg ksitsinikgo. Jesús kawanilh latamanin: «Xawa wixin niti kasitsiniyan, wampi kit lhuwa ni kiʼukxilhputunkgoy, xampi kit ni klikilhpuwanikgoy, chu lakatanks kmalakgsiyunikgoy, kwanikgoy wantu ni tlan tlawakgoy» (Juan 7:7, Hua Xasasti Talaccaxlan, 1999).

18. ¿Tuku tlakg nalikanajlayaw pi Jesús wa Mesías?

¹⁸ Kxapulana siglo, xtamakgalhtawakgen liwana xkatsikgo pi Jesús xalak Nazaret wa Mesías  xwanit, xlakata putum makgantaxtilh tuku xlichuwinanit Tatsokgni Hebreo nema makgtayanalh tlan xkatsika tiku Mesías (Mat. 16:16). Chuna la akxilhwi makgapitsi tuku xlichuwinankanit kgantaxtulh akxni aktsujku xwanit chu amakgapitsi akxni xlichuwinan Dios. Artículo nema aku mima naʼakxilhaw amakgapitsi tuku xwankanita. Lu tlan komo nalilakapastakaw, xlakata tlakg nakanajlayaw pi Jesús wa xTalaksakni Jehová.

[Notas nema wilakgo kpágina]

¿La xkgalhtinaw?

• ¿Tuku xlichuwinanita Biblia kgantaxtulh akxni lakachilh Jesús?

• ¿Tiku tlawalh pi tlan xmakgamakglhtinanka Mesías?

• ¿La kgantaxtulh capítulo 53 xla Isaías tuku xwankanit xlakata Cristo?

[Takgalhskinin]