«Katayaniw niku kgosnamaw»
«Katayaniw niku kgosnamaw»
«Katayaniw niku kgosnamaw nema wilikanit kkilakatinkan.» (HEB. 12:1, NM)
1, 2. ¿Tuku liʼakxilhtit maklakaskilh Pablo akxni lichuwinalh xlatamatkan kstalaninanin Cristo?
KATA kata klakalhuwa países lakaxwilikan xlakata tiku nakgosnankgo, o natatsalanan. Kaj xatalaksakni tiku ankgo kgosnankgo chu lakpuwankgo pi xkatlajakgolh amakgapitsin, pero makgapitsi tiku kgosnankgo kaj ni lhuwa tuku lakaskinkgo: kaj watiya tlan nawankgo pi chankgolh niku xtalakaskin.
2 Biblia makglhuwa lichuwinan uma takgaman chu tamalakxtumi xlatamatkan kstalaninanin Cristo. Wa xlakata, akxni Pablo kamalakgachanilh xapulana carta natalan xalak Corinto, kawanilh: «¿[...] Katsiyatit mpi wa nti nkgosnankgoy kpukgaman, lhuwa [...] kgosnankgoy, wampi xman chatum wa nti [...] nalakgchan ntatakin? Xtachuna nkalikgosnantit lantla namakgamakglhtinanatit ntatakin» (1 Cor. 9:24).
3. ¿Tuku xlimasiyaputun Pablo akxni wa pi kaj chatum tiku kgosnan tlajanan?
3 Xlikana pi Pablo ni xwamputun pi kaj chatum tiku xʼama makglhtinan latamat nema ni kgalhi xlisputni. ¡Komo chuna xwa lu nitu xlitaxtulh pi amakgapitsin na makgkgosnankgolh! Wa xlakata, ¿tuku xmasiyaputun? Pi lu xlakaskinka chuna natlawayaw la tiku kgosnankgo. Tiku xkgosnankgo chatunu chatunu liwana xlakgtawakgakgo chu putum xlitliwakga xkgosnankgo xlakata xtlajanankgolh. Pablo na xkawanima xnatalan pi xkgosnankgolh xlakata xmakglhtinankgolh latamat. Xlikana, uma tiku kgosnamakgolh putum makglhtinankgo latamat pero talakaskin ni natamakgxtakgtayakgo.
4. ¿Tuku kililakapastakatkan xlakata takgosni xla latamat?
4 Lu kinkamakgtayayan umakgolh tachuwin tiku kgosnamawa xlakata namakglhtinanaw latamat, pero wi tuku na kinkamalakpuwaniyan. ¿Tuku xlakata? Xlakata wantuku namakglhtinanaw, max latamat kʼakgapun o kKatiyatni uma lu lhuwa xtapalh chu ni makgatsankgaputunaw. Katsiyaw pi xlatamat kstalanina Cristo lu makgat niku talakaskin nachan chu tuwa, anan lhuwa tuku kinkamalaktlawiputunan, tuku lakgatiyaw chu tuku kalipekua wili kilatamatkan (Mat. 7:13, 14). Pero tuku lu nitlan, makgapitsi nialh lakapala kgosnankgo o asta nialh kgosnankgo. ¿Tuku uma nema nakinkamalaktlawiputunan? ¿Tuku natlawayaw xlakata ni chuna nakinkaʼakgspulayan? ¿Tuku natlawayaw xlakata tlan nachanaw niku talakaskin chu namakglhtinanaw latamat?
Talakaskin natayaniyaw xlakata natlajananaw
5. ¿Tukuya liʼakxilhtit limaklakaskimpa Pablo kHebreos 12:1?
5 Kʼuma carta nema Pablo katsokgnanilh natalan xalak Jerusalén chu xlikalanka Judea, limaklakaskimpa liʼakxilhtit xlakata tiku kgosnankgo (kalikgalhtawakga Hebreos 12:1). Akxni kawanilh pi chuntiya xkgosnankgolh xlakata xmakglhtinankgolh latamat, na kawanilh la tlan xtlajakgolh latamat. Pulana kaʼakxilhwi tuku xlakata kamalakgachanilh uma carta, chu tukuya tayat xtalakaskin xkgalhikgolh, alistalh naʼakxilhaw la nakinkamakgtayayan xtastakyaw.
6. Judíos tiku xpulalinkgo takanajla, ¿la xkalikatsinikgo kstalaninanin Cristo?
6 Kinatalankan xalak Jerusalén chu kxlikalanka Judea lhuwa taʼakglhuwit chu talakgaputsit xtitaxtumakgolh kxapulana siglo. Judíos tiku xpulalinkgo takanajla lu xkamaʼakglhuwikgo, xlakata xʼakgchipakgonit putum kachikin. Akglhuwata kata xtitaxtunit akxni timakgnikgolh Jesús chu tlawakgolh pi xmakgnika la chatum lakgalhina. Chu nachuna nitlan xkalikatsinikan kstalaninanin. Anta klibro xla Hechos tatsokgtawilanit lhuwa tuku nitlan katlawanika, chuna tsukuka katlawanikan akxni xtitaxtunita tuku lalh kPentecostés kata 33. ¡Ama kilhtamaku lu tuwa kstalanina Cristo xwankan! (Hech. 4:1-3; 5:17, 18; 6:8-12; 7:59; 8:1, 3.)
7. ¿Tuku tuwa xtitaxtumakgolh kstalaninanin Cristo tiku Pablo katsokgnanilh?
7 Amakgolh kstalaninanin Cristo xlamakgolh akxni xʼamakaja masputukan xtamapakgsin judíos. Jesús xkawaninita pi xʼamaka malakgsputukan ama kachikin tiku xmakgxtakgkgonit Dios. Na xkawaninit tuku xʼama litasiya pi xtalakatsuwinita namasputukan Jerusalén chu tuku xtlawakgolh xlakata tlan xlakgtaxtukgolh (kalikgalhtawakga Lucas 21:20-22). Lu kuenta xtlawakgolh uma tastakyaw nema xkawaninit: «Wixin kuentaj kakatlawakantit, mpi wa minakujkan ni nalichuway ntaji tawayani, chu ntakgotni, chu ntakglhuwilaj xla yuma kkakilhtamaku, chu ni xalan lakapala nakalakgchinan yama nkilhtamaku» (Luc. 21:34).
8. ¿Tuku xlakata makgapitsi nialh liwana kgosnakgolh xlakata xmakglhtinankgolh latamat?
8 Akxni Pablo kamalakgachanilh carta kstalaninanin Cristo hebreos, xtitaxtunita max puxamakaw kata akxni Jesús xmastanit ama tastakyaw. ¿Tuku tlawakgolh xlakata xtitaxtunita lhuwa kilhtamaku? Makgapitsi ni matliwakglhkgolh xtakanajlakan xlakata natayanikgo, wata mastakgolh talakaskin pi taʼakglhuwit nema xʼanan nakaʼakgchipa (Heb. 5:11-14). Amakgapitsi xlakpuwankgo, pi tlakg tlan nachuna xtlawakgolh la amakgapitsin judíos. Max xlakpuwankgo pi xlakata judíos xwankgonit xkanajlanikgoyku Dios chu chuntiya xmakgantaxtikgo xLimapakgsin Moisés. Pero, na xwilakgolh kstalaninanin Cristo tiku xmastakgonit talakaskin nakaʼakgskgawi o nakamakgapekuankgo tiku lu xmakgantaxtiputunkgoyku Limapakgsin Moisés chu makgapitsi talismanin xla takanajla. ¿Tuku tlan xkalimakgtayalh Pablo xnatalan xlakata xkuentajtlawakgolh xtakanajlakan chu chuntiya xkgosnankgolh xlakata xmakglhtinankgolh latamat?
9, 10. 1) ¿Tuku lu tlan tachuwin kawanilh Pablo kcapítulo 10 xla Hebreos? 2) ¿Tuku xlakata Pablo lichuwinalh lhuwa tuku titaxtukgolh kxlakskujnin Dios xlakata xkanajlanikgo?
9 Kaʼakxilhwi tachuwin nema Dios malakpuwanilh natsokgwili Pablo xlakata xkamatliwakglhli kstalaninanin Cristo. Kcapítulo 10 xla Hebreos, kawani pi Limapakgsin kaj, «[...]limasiyulh wa ntu namin xatlan» chu liwana kamaʼakgatekgsni xtapalh xtamakamastan Cristo. Chu kxkgalhsputat uma capítulo 10 kawani: «Mintapaxuwanaliyankan [o militayanitkan], lu wa xlakaskinka, lakimpi wa lantla natlawayatit xtalakaskin Dios nalikgalhiyatit ntamalaknun [o tuku wanit Dios natlawa]. “Sampi kaj atsinuj kilhtamaku, wa nti xliminat namin, na ni katimakgapalalh [”]» (Heb. 10:1, 36, 37).
10 Pablo na kalitachuwinan capítulo 11 xla Hebreos, anta liwana kawani tuku wamputun xlikana kanajlanikan Dios. Chu lichuwinan lakchixkuwin chu lakpuskatin xala makgasa tiku kanajlanikgolh Dios. Akxni chuna kalitachuwinalh, ¿pi nialh wa xlichuwinama xlakata la xtayanikgolh? Ni chuna. Pablo xlakaskin pi xnatalan xlakapastakkgolh pi takanajla litasiya akxni ni namakgxtakgaw Dios chu ni napekuanaw maski tuwa tuku natitaxtuyaw. Katsi pi xliʼakxilhtit xlakskujnin Jehová xala makgasa, xkamatliwakglhli natayanikgo akxni nitlan tuku xtitaxtukgolh. Alistalh, akxni xkawaninita tuku titaxtukgolh umakgolh tiku ni makgxtakgkgolh Dios xlakata xkanajlanikgo, amakgtum kawanilh pi xtayanikgolh: «Xlakata lhuwa kxlakskujnin Dios nema litastilinitaw, kamakgxtakgwi putum tuku xatsinka takuka, chu talakgalhin nema lakapala kinkalaktlawayan, chu katayaniw niku kgosnamaw nema wilikanit kkilakatinkan» (Heb. 12:1, NM).
«Lhuwa kxlakskujnin Dios»
11. ¿La kinkamakgtayayan akxni lilakpuwanaw «lhuwa kxlakskujnin Dios» xala makgasa?
11 «Lhuwa kxlakskujnin Dios» ni kajwatiya lakgastanamakgolh. Ni kaj anta wilakgolh kʼestadio chu akxilhmakgolh la kgosnamaka chu ni kaj akxilhmakgolh komo natlajanan tiku tatayakgo, wata minkgonit matliwakglhkgo tiku kgosnamakgolh. Chu tlan chuna tlawakgo, xlakata makgasa na tikgosnankgolh chu chankgolh niku xtalakaskin. Maski nikgonitta, Pablo kalichuwinan la lamakgolhku xlakata nakamatliwakglhkgo amakgapitsin. ¿La kamakgtaya tiku aku tsukumakgolh kgosnankgo xlakata katsikgo pi tiku kaʼakxilhma na tayanikgolh akxni kgosnankgolh? Kamakgtaya tlakg liwana nakgosnankgo o asta tlakg tlan natlawakgo. Xlakata wilakgolh «kxlakskujnin Dios» xala makgasa, nema limasiyakgolh pi tlan tayanikan maski lu tuwa tuku titaxtukan. Komo xlilakpuwankgolh uma, ni xpekuankgolh xlakata “ni xtamakgxtakgkgolh chuntiya xkgosnankgolh”. Uma tastakyaw lu kamakgtayalh hebreos kxapulana siglo, chu na nakinkamakgtayayan.
12. ¿La nakinkamakgtayayan liʼakxilhtit nema lichuwinan Pablo?
12 Na xtachuna titaxtumaw la titaxtukgolh tiku ni makgxtakgkgolh Dios nema lichuwinan Pablo. Kaʼakxilhwi pulaklhuwa liʼakxilhtit. Noé latamalh akxni nina xmin Munkaklat. Nachuna akinin lamaw kxlisputni uma kakilhtamaku. Abrahán chu Sara kalimapakgsika namakgxtakgkgo xkachikinkan chu alakatanu país xankgolh tawilakgo, niku xkakninanikgolh Dios chu xkgalhkgalhikgolh xkgantaxtulh tuku xkawaninit. Nachuna kinkawanimakan pi nialh kaputsaw tuku akinin lakgatiyaw wata kaliskujwi natlawayaw xtalakaskin Jehová chu chuntiya kakgalhkgalhiw tasikulunalin nema nakinkamaxkiyan Dios. Moisés akglhuwa kata tuwa tuku titaxtulh akxni xlama kdesierto chu xʼamakgolh kTiyat nema xKawanikanit Nakamaxkikan. Akinin na natayaniyaw tuku tuwa natitaxtuyaw kʼuma kakilhtamaku nema sputmaja xlakata nachanaw kxasasti kakilhtamaku. Lu nakinkamatayayan nalilakapastakaw la latamakgolh lakchixkuwin chu lakpuskatin xala makgasa, tuku tlan kakitaxtunilh, la xlikatsikgo chu tuku nitlan tlawakgolh (Rom. 15:4; 1 Cor. 10:11).
Wantuku kamakgtayalh natayanikgo
13. ¿Tuku tuwa titaxtulh Noé chu tuku makgtayalh?
13 Wi tuku kamakgtayalh chuntiya nakgosnankgo chu xchankgolh niku xtalakaskin, xlakskujnin Jehová tiku kalichuwinan Pablo. Kaʼakxilhwi la limasiyalh Noé uma tuku makgtayalh (kalikgalhtawakga Hebreos 11:7). Jehová wanilh Noé «nakmakamin akgtum munkaklat kxakgspun katiyatni xlakata nakmalakgsputu [...] putum tuku staknan» (Gén. 6:17). ¿Tuku xlakata wan Pablo pi «ni makgtum xataʼukxilha», o xtasiya? Xlakata nipara makgtum lhuwa ksenanit. Maski ni makgstum xʼakxilhnit pi chuna ksenalh, Noé ni lakpuwa pi ni xʼama kgantaxtu. Xlakata lu xkanajlani Dios. Xkatsi pi Jehová xʼama makgantaxti tuku xwanit chu wa xlakata ni lakpuwa pi tuku xlimapakgsinit lu tuwa xwanit. Wata «tlawalh [putum] chuna la xwanikanit» (Gén. 6:22). Pero lhuwa tuku xʼama tlawa, xtlawalh arca, xtamaknukgolh lhuwa liwat chu tuku xwakgolh animales, xkamakatsinilh latamanin tuku xʼama tlawa Dios chu xkuenta tlawalh xtakanajlakan xfamilia. Noé lhuwa tasikulunalin makglhtinalh xlakata kanajlalh chu tayanilh, xlakata lakgtaxtukgolh xfamilia.
14. ¿Tuku tuwa titaxtukgolh Abrahán chu Sara chu tuku kinkamasiyaniyan?
14 Akxni Pablo lichuwinan «lhuwa kxlakskujnin Dios nema litastilinitaw» na lichuwinan Abrahán chu Sara. Lu lhuwa tuku xkgalhikgo kʼUr chu akxni alakatanu xʼankgolh ni xkatsikgo la xʼama kakitaxtuni. Pero lu tlan liʼakxilhtit wilikgolh xlakata la xlitawilat kintakanajlakan chu la nakgalhakgaxmataw Dios maski tuwa tuku natitaxtuyaw. Akxni katsiyaw pi lhuwa tuku limakgxtakgli Abrahán xlakata xaxlikana Dios, lakgchan nalimapakuwikan «xtlatkan nawan xlipaks nkanajlanin» (Rom. 4:11). Pablo kaj ni lhuwa lichuwinalh Abrahán, xlakata tiku xkgaxmatmakgolh liwana xkatsikgo xlakata Abrahán. Pero wi tuku lu xlakaskinka kalitachuwinalh: «Paks yuma nchixkuwin [xlakskujnin Dios, na kilhchanima Abrahán chu xfamilia], xkanajlakgo asta tinikgolh, maski ni xamakgamakglhtinankgoy ntamalaknun, wampi kaj xlimakgat ntiliukxilhkgolh, na lipaxuwakgolh mpi nakgalhikgoy, na mpi kaj xalatapulinin [wankgolh], na kaj xaminin kxokgspun tiyat» (Heb. 11:13). Liwana tasiya pi xlakata lu xkanajlanikgo Jehová chu lu tlan xtalalinkgo, kamakgtayalh nakgosnankgo chu natayanikgo.
15. ¿Tuku makgtayalh Moisés xlakata ni lhuwa tuku xkgalhiputulh?
15 Moisés atanu tiku na lu tlan liʼakxilhtit akxni lichuwinankan «lhuwa kxlakskujnin Dios». Moisés ni lhuwa tumin kgalhiputulh, nipara limapakgsin wata “ntilaksakli xalikgaman natatlawakan xlakgskgatan Dios”. ¿Tuku makgtayalh chuna nalakpuwan? Chuna la wan Pablo, Moisés putum kilhtamaku «xlakaniy ntalakgalhaman ntu nakgalhiy alistalh» na «xtachuna mpala lu wa man xukxilhma Dios ntu ni tasiyuj» (kalikgalhtawakga Hebreos 11:24-27). Ni lakpuwa «nalimakgapaxuwakan ntalakgalhin». Moisés lu xkanajlani Dios chu tuku xwanit natlawa. Wa xlakata ni xpekuan chu tayanilh. Lu liskujli xlakata tlan xkamaxtulh israelitas kʼEgipto chu xkalilh kTiyat nema xKawanikanit Nakamaxkikan.
16. ¿Tuku xlakata Moisés ni lilipuwa akxni wanilh Jehová pi ni xʼama tanu kTiyat nema xKawanikanit Nakamaxkikan?
16 Chuna la Abrahán, Moisés na ni akxilhli nakgantaxtu tuku Dios xwaninit. Akxni israelitas xʼamakgolha tanukgo kTiyat nema xKawanikanit Nakamaxkikan, Jehová wanilh Moisés: «Kaj lakgamakgat naʼakxilha tiyat, pero ni natanuya ktiyat nema nakkamaxki xkamanan Israel». ¿Tuku xlakata chuna xkamalakgaxokgemaka Moisés chu Aarón? Xlakata israelitas lu laktsakat xwankgonit, makgtum Moisés chu Aarón sitsikgolh chu ni maxkikgolh kakni Jehová. Wa xlakata, Jehová kawanilh: «Wixin ni kinkgalhakgaxpatit kxlakatin israelitas, klakatsu kchuchut xalak Meribá» (Deu. 32:51, 52). Xlakata uma tuku wanilh Dios, ¿lu lilipuwa Moisés chu lisitsilh? Ni. Akxni kasikulanatlawalh israelitas, kawanilh: «¡Lu xatapaxuwan wila wix Israel! ¿Tiku xtachuna la wix, kachikin tiku kalakgmaxtu Jehová, escudo nema makgtayayan, wa xʼespada Tiku makgtayayan?» (Deu. 33:29).
Wantuku kinkamasiyanikgoyan
17, 18. 1) ¿Tuku kinkamasiyaniyan «lhuwa kxlakskujnin Dios»? 2) ¿Tuku naʼakxilhaw kʼartículo nema aku mima?
17 Akxni lilakapastakaw xlatamatkan «lhuwa kxlakskujnin Dios nema litastilinitaw», wi tuku lu xlakaskinka kinkamasiyaniyan: xlakata tlan namakglhtinanaw latamat, talakaskin lu nalipawanaw Dios chu tuku wanit pi natlawa (Heb. 11:6). Talakaskin pi kintakanajlakan wa tuku tlakg xlakaskinka kiliʼakxilhatkan kkilatamatkan. Akinin ni xtachuna la latamanin, ni kaj wa akxilhaw tuku anan kkakilhtamaku wata akxilhaw Jehová «ntu ni tasiyuj», nema kinkamakgtayayan nakgosnanaw chu natayaniyaw (2 Cor. 5:7).
18 Xlatamat kstalanina Cristo lu tuwa. Pero putum tlan namakglhtinanaw latamat. Kʼartículo nema aku mima naʼakxilhaw atanu tuku nakinkamakgtayayan xlakata namakglhtinanaw latamat.
¿Tlan xkgalhtinaw?
• ¿Tuku xlakata Pablo lu kalichuwinalh «lhuwa kxlakskujnin Dios»?
• ¿La kinkamakgtayayan akxni lilalakapastakaw «lhuwa kxlakskujnin Dios nema litastilinitaw»?
• ¿La kinkamakgtayakgoyan xliʼakxilhtit Noé, Abrahán, Sara chu Moisés tiku ni makgxtakgolh Dios?
[Takgalhskinin]
[Epígrafe xla página 22]
Abrahán chu Sara xatapaxuwan makgxtakgkgolh lhuwa tuku xkgalhikgo kʼUr
