¿Kilakgapasa Jehová?
¿Kilakgapasa Jehová?
«Lakgapas[a] nkimPuchinakan wa nti ntapakgsinikgoy.» (2 TIM. 2:19)
1, 2. 1) ¿Tuku tlakg xlakaskinka xakxilha Jesús? 2) ¿Tukuya takgalhskinin akstu kilitlawatkan?
AKGTUM kilhtamaku, chatum fariseo kgalhskilh Jesús: «¿Tu limapakgsin ntlakg xatlanka?». Jesús kgalhtilh: «Xlipaks minaku nalipaxkiya Dios mimPuchina, chu xlipaks [milatamat] chu xlipaks mintalakapastakna» (Mat. 22:35-37). Liwana katsiyaw pi Cristo xmakgantaxti uma limapakgsin kxlatamat. Pero maski lu xpaxki xTlat, Jesús lu xlakaskin pi chuntiya tlan xtalalilh chu wa xlakata nikxni makgxtakgli. Wa xlakata, akxni atsinu xtsankga namakgnikan, wa pi xTlat liwana xkatsi pi ni xmakgxtakga chu xmakgantaxtinit putum xlimapakgsin. Chuna tamakgxtakgli kxtapaxkit Jehová (Juan 15:10).
2 La uku lhuwa latamanin wankgo pi lakgapaskgo chu paxkikgo Dios. Pero ni kajwatiya uma talakaskin. Kilikatsitkan komo Dios “kinkalakgapasan”, uma wamputun pi tlan nakinkaʼakxilhan. Wa xlakata lu xlakaskinka natlawayaw uma takgalhskinin: «¿Tlan nakwan pi Jehová kilakgapasa chu katsi pi ktapakgsini?» (2 Tim. 2:19). Wa xlakata, tlan natalalinaw tiku lakgchan namapakgsinan xlikalanka kakilhtamaku akgtum lanka talakgalhaman.
3. ¿Tuku xlakata makgapitsi latamanin nila kanajlakgo pi tlan natalalinkgo Dios, chu tuku nakamakgtaya ni chuna nalakpuwankgo?
3 Wi tiku, maski lu paxkikgo Jehová, ni lu kanajlakgo pi tlan natalalinkgo. Max xlakata lakpuwankgo pi nitu litaxtukgo chu nila tapakgsinikgo. ¡Lu tlan pi Jehová ni chuna kinkaʼakxilhan! (1 Sam. 16:7.) Kalilakapastakwi uma tuku wa Pablo: «Lapi wi nti mpaxkiy Dios, wa yuma nchixku, lakgapasa Dios» (1 Cor. 8:3). Chuna la akxilhwi, xlakata Dios tlan natalalin chatum lataman talakaskin pi na napaxki. Kalilakapastakti uma: «¿Tuku xlakata klikgalhtawakgama uma revista? ¿Tuku xlakata lu fuerza ktlawani nakskujni Jehová xliputum kinaku, kilatamat, kintalakapastakni chu kilitliwakga? ¿Ktamakamastaninita Dios chu ktamununita? Komo chuna ktlawanita, ¿tuku xlakata chuna ktlawalh?». Kalakapastakwi pi Jehová lakputsanani xnakujkan latamanin, chu tlawa pi katalakatsuwinikgolh kajwatiya tiku «lilakgatit» akxilha, o lu xlakaskinka (kalikgalhtawakga Ageo 2:7 chu Juan 6:44). La uku skujnanimaw Dios xlakata tlawalh pi katalakatsuwiniw chu xʼamigo kinkaliʼakxilhan. Komo akinin ni namakgxtakgaw na ni kintikamakgxtakgni. Xatapaxuwan nakinkakuentajtlawayan xlakata lu lhuwa xtapalh kinkaʼakxilhan (Sal. 94:14).
4. ¿Tuku xlakata lu xlakaskinka naʼakxilhaw tlan natalalinaw Dios?
4 Akxni Jehová tlawa pi natalakatsuwiniyaw, ¿tuku tlakg xlakaskinka kiliʼakxilhatkan? Putum kilhtamaku natamakgxtakgaw kxtapaxkit (kalikgalhtawakga Judas 20, 21). Biblia wan pi max wi tuku natlawa natamakgatliniyaw o namakgxtakgaw Dios (Heb. 2:1; 3:12, 13). Chuna kaʼakgspulalh Himeneo chu Fileto, tiku kalichuwinan Pablo akxni nina xtsokgwili tuku wan 2 Timoteo 2:19, nema litsuku uma artículo. Chuna la akxilhaw umakgolh lakchixkuwin pulana xtapakgsinikgo Jehová, pero alistalh tamakgatlinikgolh xaxlikana takanajla (2 Tim. 2:16-18). Nachuna kaʼakgspulalh makgapitsi natalan xalak Galacia. Maski Dios xkalakgapasa, ni tamakgxtakgkgolh kxaxlikana takanajla (Gál. 4:9). ¡Nikxni chuna katlawaw! Tlan natalalinaw Dios xalak akgapun wa tuku tlakg xlakaskinka anan kkakilhtamaku.
5. 1) ¿Tuku pulaktiy tayat lu xlakaskinka akxilha Dios? 2) ¿Tukuya liʼakxilhtit naʼakxilhaw uku?
5 Xlakata Dios natalalin chatum lataman, talakaskin nakgalhi makgapitsi tayat nema xla lu xlakaskinka akxilha (Sal. 15:1-5; 1 Ped. 3:4). Makgapitsi wa umakgolh, takanajla chu ni tlanka nalikatsiyaw. Kaʼakxilhwi chatiy tiku chuna xlikatsikgo makgasa chu wa xlakata Dios xkapaxki. Chu alistalh naʼakxilhaw tuku tlawalh chatum chixku, tiku xlakata tlanka xmakgkatsikan Jehová lakgmakgalh maski xla xlakpuwan pi xʼamigo xwanit. Umakgolh wi tuku kinkamasiyaniyan.
«Xtlatkan nawan xlipaks nkanajlanin»
6. 1) ¿La limasiyalh Abrahán pi xkanajla tuku xwanit Dios natlawa? 2) ¿Tuku kilhchanima pi Jehová xlakgapasa Abrahán?
6 Biblia wan pi Abrahán lu «kanajlanilh Jehová» chu limapakuwi «xtlatkan [...] xlipaks nkanajlanin» (Gén. 15:6; Rom. 4:11). Abrahán makgxtakgli xchik chu lhuwa tuku xkgalhi, xʼamigos chu alh tawila makgat kachikin (Gén. 12:1-4; Heb. 11:8-10). Xlikana pi lu xlipawan Dios. Chu maski titaxtulh kata chuntiya lipawa Dios. Makglhuwa limasiyalh pi xkanajlani, liwaka akxni xʼama makamasta Isaac xlakata xmakgantaxtilh tuku Dios xlimapakgsinit (Heb. 11:17-19). Dios xkatsi pi Abrahán xkanajla tuku xwaninit natlawa, wa xlakata lu xlakaskinka xakxilha chu Dios lichuwinalh pi «[x]lakgapasa» (kalikgalhtawakga Génesis 18:19). Xlikana umakgolh tachuwin ni wamputun pi Dios kaj xkatsi pi xlama Abrahán, wata xʼamigo xliʼakxilha (Sant. 2:22, 23).
7. ¿Tuku liwana xkatsi Abrahán xlakata tuku xwanit Jehová chu la limasiyalh kxlatamat?
7 Dios xwaninit Abrahán pi xkamanan xʼamakgolh makglhtinankgo Tiyat nema xʼama Kamaxki chu lu lhuwa xʼamakgolh wankgo «xtachuna la kuku [o muntsaya] nema wilakgolh xkilhtun pupunu» (Gén. 22:17, 18). Pero, maski ni akxilhli la kgantaxtulh uma tuku xwanit Dios, chuntiya lu lipawa Jehová. Xkatsi pi akxni Jehová wi tuku xwan natlawa xlikana xkgantaxtu. Chu chuna la xlin xlatamat xlimasiya pi lu xlipawan Jehová (kalikgalhtawakga Hebreos 11:13). ¿Nachuna kanajlaniyaw Jehová? ¿Kinkalilakgapasan Jehová pi kgalhiyaw kintakanajlakan xtachuna la Abrahán?
Tiku kanajlakgo kgalhkgalhikgo Jehová
8. ¿Tuku kgalhiputunkgo lhuwa latamanin?
8 Wa uma tuku putsakgo latamanin, ni natatatlakgo, natamakgaxtokgkgo chu nakgalhikgo xkamanankan. Xlikana pi uma tuku kgalhiputunkgo nila nawanaw pi nitlan, pero ni putum kgantaxtu tuku lakaskinkgo. ¿Tuku kilitlawatkan akxni chuna titaxtuyaw? Chuna la limaw kilatamatkan nalimasiyayaw la xlitliwakga wi kintakanajlakan.
9, 10. 1) ¿Tuku tlawakgo makgapitsi xlakata nakgalhikgo tuku lakaskinkgo? 2) ¿La kiliʼakxilhatkan tuku Jehová wanit pi natlawa?
9 Komo lakaskinaw pi Jehová tlan nakinkatalalinan, nitlan nakinkakitaxtuniyan komo natlawayaw tuku akinin lakgatiyaw chu nalakatsalayaw xlimapakgsin Dios. Makgapitsi laksakkgo tuku nalikuchunkgo nema katsikgo pi lakatsala xtastakyaw Biblia. Chu amakgapitsi akxni makglhtinankgo taskujut chu nialh kgalhikgo kilhtamaku akxtum nakatatawilakgo xfamilia o naʼankgo ktamakxtumit. Chu amakgapitsi tsukukgo lakgatikgo tiku ni xtatayana Jehová. Tiku chuna tlawakgo ni limasiyakgo pi paxtikatsinikgo Jehová xlakata tlan talalinkgo. Kalilakapastakwi Abrahán. Komo nialh xkgalhkgalhiputulh nakgantaxtu tuku Dios xwaninit chu wata xputsalh lakatum xtawilalh, chu lhuwa tiku xmalankikgolh xtukuwani, ¿tuku xtilakpuwa Jehová? (Katamalakxtupi Génesis 11:4.) ¿Chuntiya xtisikulunalilh Jehová?
10 ¿Tuku xlakgati wix pi xmaxkin Jehová? ¿Tliwakga wi mintakanajla xlakata chuntiya nakgalhkgalhiya Jehová, tiku namaxkiyan putum tuku wix lakaskina? (Sal. 145:16.) Kalakapastakwi pi xtachuna tuku wanika Abrahán, makgapitsi tuku wan Dios pi natlawa ni lakapala kgantaxtu chuna la akinin lakaskinaw. Pero komo chuntiya nakanajlayaw la Abrahán, Dios chuntiya nakinkalakapastakan chu namakglhtinanaw lhuwa tasikulunalin (Heb. 11:6).
Chatiy lakchixkuwin tiku ni lakxtum xlikatsikgo
11. ¿Tuku talakgalhaman xkgalhi Coré chu xapulana la skujnanilh Jehová?
11 Moisés chu Coré ni lakxtum xkaʼakxilha Jehová. ¿Tuku xlakata? Xlakata ni lakxtum xʼakxilhkgo tuku xlakkaxwilinit Dios chu tuku xlimapakgsinanit. Kalilakapastakwi tuku xtlawanita Coré, levita xwanit xalak xfamilia Qohat. Lhuwa talakgalhaman kgalhilh, max na akxilhli akxni Jehová kalakgmaxtulh israelitas kXaspinini pupunu, makgtayanalh akxni Jehová kamalakgaxokgelh tiku ni kgalhakgaxmatnikgolh ksipi Sinaí chu xmakgtayanan akxni xlinkan caja xla talakkaxlan (Éxo. 32:26-29; Núm. 3:30, 31). Akglhuwa kata liwana skujnanilh Jehová wa xlakata lhuwa israelitas xmaxkikgo kakni.
12. Chuna la tasiya kdibujo xla página 31, ¿tuku xlakata Dios nialh talalilh Coré?
12 Pero akxni xʼamakgolh kTiyat nema xKawanikanit Nakamaxkikan, milh kilhtamaku Coré lakpuwa pi chuna la xpulalimaka xkachikin Dios ni lu tlan xwanit. Coré chu 250 lakchixkuwin tiku wi tuku xkalakgayawakanit, lakgpaliputunkgolh tuku xtatlawama. Max xlakpuwankgo pi tlan xtalalinkgo Jehová, wa xlakata lakatakikgolh xlimapakgsin Moisés. Wanikgolh Moisés chu Aarón: «Nialh wix kalakgchanan nakilapulalipinatit, xlakata putum israelitas na santos, chu Jehová wi xlakgstipankan» (Núm. 16:1-3). ¡Lu laktlanka xkamakgkatsikan! Pero Moisés kaj watiya kawanilh: «Jehová na wan tiku tapakgsini» (kalikgalhtawakga Números 16:5). Pero lichali, Coré chu putum tiku kstalanikgo xnikgonit (Núm. 16:31-35).
13, 14. ¿La limasiyalh Moisés pi ni tlanka xmakgkatsikan?
13 Xwi chatum tiku ni xtachuna xwanit la Coré, «Moisés wa tlakg ni tlankajwa xwanit xliputum lakchixkuwin tiku xlamakgolh kkatiyatni» (Núm. 12:3). ¿La limasiyalh Moisés pi ni tlankajwa xwanit? Akxni liwana kgalhakgaxmatli tuku xlimapakgsinit Jehová (Éxo. 7:6; 40:16). Biblia ni wan pi Moisés xkgalhskin Jehová tuku xlakata chuna xtlawama o ni xtlawaputun tuku xlimapakgsi. Kalakapastakwi akxni Jehová wanilh pi xtlawanika tabernáculo, akgtum chiki niku xkakninanika. Moisés liwana wanika la xtlawaka lhakgat, tuku color xtlawaka hilos, la xlilhuwa xʼama tachiy xlakata xmatastukka lhakgat chu lhuwa tuku wanika la xʼama tlawa taskujut (Éxo. 26:1-6). Chuna la titaxtunit kilhtamaku, Jehová limaklakaskinit lakchixkuwin tiku napulalinkgo xkachikin. Max namin kilhtamaku ni tlan nalimakgkatsiyaw akxni kinkawanikanan pulaktu pulaktu tuku kilitlawatkan. Pero kinTlatkan xalak akgapun lu tlan kinkapulalinan, chu kalipawan xlakskujni chu kalakgayawa taskujut. Wa xlakata, akxni Dios pulaktu pulaktu kinkawaniyan tuku kilitlawatkan katsi tuku xlakata chuna wan. Akxni Moisés lhuwa tuku wanika la xtlawalh tabernáculo, ni sitsinilh Jehová chu ni lakpuwa pi xmaʼaktujuma o pi nipara xkatsi la xtlawalh. Liwana kgalhakgaxmatli, chu kuentaj tlawalh pi tiku skujkgolh chuna xtlawakgolh la xkawanikanit (Éxo. 39:32). ¡Ni tlankajwa xlikatsi Moisés! Xlikana, xkatsi pi wa xtaskujut Jehová xwanit chu xla kaj xlimaklakaskimaka.
14 Titaxtulh kilhtamaku, limasiyapa pi ni tlanka xmakgkatsikan akxni wi tuku wanika. Akxni israelitas tsukulh sitsinikgo. Moisés na sitsilh chu tlawalh tuku nitlan, ni malankilh Jehová. Akxni limalakgaxokgeka, wanika pi ni wa xʼama kalin israelitas kTiyat nema xKawanikanit Nakamaxkikan (Núm. 20:2-12). Kalakapastakwi pi Moisés chu Aarón, akglhuwata kata xtayanikgonit maski israelitas xtaʼakglhuwikgo. Pero kaj xlakata ni xmalankinit Jehová, wanika pi ni xʼama akxilha la xʼama kgantaxtu tuku akglhuwata kata xkgalhkgalhima. ¿Tuku tlawalh Moisés akxni katsilh? Maski max lilipuwa, makgamakglhtinalh tuku wanilh Jehová. Xkatsi pi Dios xalakatitum «tiku ni tlawa tuku ni xaʼakgstitum» (Deu. 3:25-27; 32:4). Liwana litasiya pi Jehová xlakgapasa Moisés, chatum xlakskujni nema ni xmakgxtakga (kalikgalhtawakga Éxodo 33:12, 13).
Ni tlankajwa nawanaw xlakata tlan nakgalhakgaxmataw Jehová
15. ¿Tuku kinkamasiyaniyan tuku tlawalh Coré?
15 La uku, natalan tiku pulalinkgo taskujut xlikalanka Katiyatni lhuwa tuku lakkaxwilikgo natlawakgo chu min kilhtamaku talakaskin wi tuku nalakgpalikgo. ¿Tuku tlawayaw akxni chuna la? Kalakapastakwi pi kajwatiya tlan natalalinaw Jehová komo kgalhakgaxmataw tuku lakkaxwilinit. Ni natlawayaw tuku nitlan tlawalh Coré. Coré chu tiku xtatayakgo nialh kasikulunatlawalh Dios, xlakata akstu xkalipawankan chu tlawakgolh tuku xlakan xlakpuwankgo pi tlan, chuna limasiyakgolh pi tlanka xkamakgkatsikan chu ni tlan xwi xtakanajlakan. Coré ni kuenta tlawalh pi maski Moisés tiku xwan tuku xtatlawalh chali chali, wa Jehová tiku xpulalima uma kachikin. Akxni ni kuenta tlawalh, nialh kakgalhakgaxmatli tiku Jehová xkamaklakaskima. ¡Tlakg tlan xtiwa komo xtilipawa Dios! Jehová xtimakgtayalh nalakapastaka chuna la xlilat. Pero ni chuna tlawalh Coré, chu nitlan kitaxtulh kaj xlakata tlankajwa xwanit maski akglhuwata kata kskujnima Dios.
16. ¿La kinkamakgtayayan xliʼakxilhtit Moisés?
16 Uma tuku lalh, putum wi tuku xlakaskinka kinkamasiyaniyan, nachuna lakgkgolotsin xalak congregación. Talakaskin ni tlankajwa nawanaw, wa uma nakinkamakgtayayan nakgalhkgalhiyaw Jehová chu nakakgalhakgaxmataw tuku kinkawanikgoyan natalan tiku kalakgayawanit taskujut. ¿Lu liskujaw xlakata ni tlankajwa nawanaw chuna la Moisés? ¿Kakgalhakgaxmataw natalan tiku pulalimakgolh congregación chu tlawayaw tuku kinkawanikgoyan? ¿Tliwakga wi kintakanajlakan xlakata natayaniyaw tuku nitlan titaxtuyaw? Komo ni tlankajwa nawanaw chu nakgalhakgaxmatnanaw, Jehová nakinkalakgapasan chu tlakg nakinkapaxkiyan.
«Lakgapas[a] nkimPuchinakan wa nti ntapakgsinikgoy»
17, 18. ¿Tuku nakinkamakgtayayan chuntiyaku tlan natalalinaw Jehová?
17 ¡Lu kinkamakgtayayan nalilakapastakaw liʼakxilhtit xlakata latamanin tiku Jehová tlawalh pi katalakatsuwinikgolh chu lu tlan katalalilh! Chuna la akxilhwi, maski Abrahán chu Moisés, na lakgalhinanin xwankgonit la akinin, lu tlan talalinkgolh Jehová. Coré lu nitlan kitaxtunilh, Jehová nialh tlan talalilh. Wa xlakata akstu kakinkakgalhskinkan: «¿Kilakgapasa Jehová pi akit kskujni tiku ni makgxtakga? ¿Tuku kimasiyani umakgolh liʼakxilhtit xalak Biblia?».
18 ¿Ni xlikana pi lu tlan limakgkatsiyaw pi Jehová tlawalh natalakatsuwiniyaw chu natapakgsiniyaw? Komo ni namakgxtakgaw chu nakanajlaniyaw, ni tlanka nalikatsiyaw, chuna la natitaxtu kilhtamaku tlakg lhuwa xtapalh nakinkaʼakxilhan. Xlikana pi lu lanka talakgalhaman tlan natalalinaw. Xlakata chuna kinkaʼakxilhan, la uku lu xatapaxuwan lamaw chu namakglhtinanaw lhuwa tasikulunalin kilhtamaku nema aku mima (Sal. 37:18).
Tuku kililakapastakatkan
• ¿Tuku wamputun nakinkalakgapasan Jehová?
• ¿La tlan nachuna nakgalhiyaw kintakanajlakan la Abrahán?
• ¿Tuku kinkamasiyanikgoyan Coré chu Moisés?
[Takgalhskinin]
[Epígrafe xla página 29]
Xtachuna la Abrahán, ¿kanajlayaw pi Jehová namakgantaxti putum tuku wanit natlawa?
[Epígrafe xla página 31]
Coré tlanka xmakgkatsikan ni kgalhakgaxmatli tuku Jehová xlakkaxwilinit
[Epígrafe xla página 32]
¿Katsi Jehová pi kgalhakgaxmataw chu ni tlanka likatsiyaw?
